Motive Par “Bann Mervey Ki Bondye In Fer”

“Nou tou nou tann zot pe rakont dan nou prop langaz sa bann mervey ki Bondye in fer.”—AKT 2:11.

1, 2. Ki keksoz etonnan ki ti arive Zerizalenm zour Lapannkot lannen 33 N.L.?

EN DIMANS bomaten lannen 33 N.L., en keksoz enkrwayab ti arive avek bann disip Zezi Kri, zonm konman fanm, ki ti’n rasanble kot en lakour an Zerizalenm. “Toutakou ti annan en tapaz sorti dan lesyel ki ti resanble en gro divan ki ti ranpli sa lakaz kot zot ti pe asize. E zot ti war en keksoz ki ti resanble en bann lalang dife . . . , zot tou zot ti ranpli avek Sent-Espri e zot ti konmans koz dan lezot langaz.”—Akt 2:2-4, 15.

² En gran lafoul ti’n rasanble devan lakaz. Parmi zot ti annan bann Zwif ki ti’n ne a letranze, “bann zonm ki ti annan lakrent pour Bondye” ki ti’n vin Zerizalenm pour selebre lafet Lapannkot. Zot ti etonnen parski sakenn parmi zot ti tann bann disip pe koz dan zot langaz maternel konsernan “bann mervey ki Bondye in fer.” Konman sa ti posib kan tou sa bann ki ti pe koze ti bann Galileen?—Akt 2:5-8, 11.

3. Ki mesaz zapot Pyer ti delivre avek lafoul zour Lapannkot?

³ Zapot Pyer ti enn parmi sa bann Galileen. I ti eksplike ki detrwa semenn avan, Zezi  ti’n ganny met amor par bann move dimoun. Me Bondye ti resisit son Garson parmi bann mor. Apre sa, Zezi ti aparet avek plizyer son bann disip, enkli Pyer ek lezot ki ti prezan sa zour. Zis dis zour avan, Zezi ti’n mont osyel. Se li ki ti’n vers lespri sen lo son bann disip. Eski sa ti annan okenn sinifikasyon pour sa bann dimoun ki ti’n vin selebre Lapannkot? Byensir. Lanmor Zezi ti’n ouver semen pour zot ganny pardonnen zot pese e resevwar “kado Bondye, Sent-Espri” si zot demontre lafwa dan li. (Akt 2:22-24, 32, 33, 38) Alor, apre ki zot ti’n tann sa “bann mervey ki Bondye in fer,” konman ki sa bann obzervater ti reazir? E konman sa resi i kapab ed nou pour egzamin nou prop servis ki nou ofer Zeova?

Motive pour fer Keksoz!

4. Ki profesi Yoel ki ti ganny akonpli zour Lapannkot lannen 33 N.L.?

⁴ Vi ki zot ti’n resevwar lespri sen, sa bann disip an Zerizalenm pa ti tarde pour partaz sa bon nouvel delivrans avek lezot. Zot ti konmans avek sa lafoul ki ti’n reini sa zour bomaten. Zot predikasyon ti akonpli en profesi remarkab, ki ti ganny rikorde wit syek avan par Yoel, garson Petouel: “Mon pou vers mon lespri lo tou sort laser, e zot bann garson ek zot bann fiy pou vreman profetize. An sa ki konsern zot bann vyeyar, zot pou ganny bann rev. An sa ki konsern zot bann zennonm, zot pou vwar bann vizyon. E menm bann serviter zonm ek fanm, mon pou vers mon lespri lo zot . . . avan ki sa gran zour efreyan Zeova i arive.”—Yoel 1:1; 2:28, 29, 31; Akt 2:17, 18, 20.

5. Dan ki sans bann Kretyen premye syek ti profetize? (Vwar not anba lo paz.)

⁵ Eski sa i vedir ki Bondye ti pe al lev en zenerasyon profet, zonm konman fanm, parey David, Yoel, ek Debora, e servi zot pour predir bann levennman ki ti pou arive dan lavenir? Non. Bann ‘garson, fiy, ek bann serviter’ Kretyen ti pou profetize dan le sans ki zot ti pou ganny motive par lespri Zeova pour proklanm “bann mervey” ki Zeova ti’n fer e pou kontinyen fer. Alors zot ti pou servi konman bann portparol pour Tre O. * Me ki mannyer sa lafoul ti reazir?—Ebre 1:1, 2.

6. Apre ki zot ti’n ekout diskour Pyer, ki bokou parmi sa lafoul ti ganny motive pour fer?

⁶ Apre ki lafoul ti’n tann leksplikasyon Pyer, bokou ti santi zot motive pour fer keksoz. Zot “ti krwar dan sa mesaz” e zot ti “ganny batize, e anviron 3000 dimoun ti ganny azoute avek sa group krwaryan.” (Akt 2:41) Vi ki zot ti bann Zwif e i annan ki ti bann Zwif konverti, zot ti deza annan en konnesans debaz lo Lekritir. Sa ansanm avek lafwa ki zot ti annan dan sa ki zot ti’n aprann avek Pyer, ti fourni en baz pour zot ganny batize “o non di-Per, di-Fis e di-Sent-Espri.” (Matye 28:19) Apre zot batenm, zot ti kontinyen “pas bokou letan pour aprann avek bann zapot.” Anmenmtan, zot ti konmans partaz zot nouvo lafwa avek lezot. Anfet, “toulezour zot ti ansanm dan Tanp. . . . Zot ti rann glwar Bondye, e tou dimoun ti kontan avek zot.” An rezilta sa aktivite temwannyaz, “Senyer ti azout avek zot group tou bann ki ti pe ganny sove.” (Akt 2:42, 46, 47) Bann kongregasyon Kretyen ti formen dan plizyer pei kot sa bann nouvo krwayan ti reste. San dout, sa ogmantasyon ti vin apre ki zot ti’n fer bokou zefor pour pres “Levanzil” kan zot ti retourn se zot.—Kolosyen 1:23.

Parol Bondye i annan Pwisans

7. (a) Kwa ki atir dimoun sorti dan tou nasyon anver lorganizasyon Zeova ozordi? (b) Ki potansyel ou vwar pour annan plis ogmantasyon ankor lo kote mondyal e osi lokalman? (Vwar not anba lo paz.)

⁷ Me pour bann ki anvi vin serviter Bondye  ozordi? Zot osi zot bezwen byen etidye Parol Bondye. Kan zot fer sa, zot arive konn Zeova konman en Bondye “mizerikord e konpasyon, pa ankoler vitman, e ris an labonte leker e an verite.” (Egzod 34:6; Akt 13:48) Zot aprann konsernan provizyon ki Zeova in fer, sa ranson atraver Zezi Kri, ki son disan ki’n ganny verse i kapab lav tou zot pese. (1 Zan 1:7) Zot osi rekonesan pour konn plan Bondye “ki tou dimoun bon konman move, pour resisite.” (Akt 24:15) Lanmour pour Sours sa “bann mervey” i deborde dan zot leker e zot ganny motive pour pres sa bann laverite presye. Apre sa, zot vin bann serviter Bondye ki’n dedye zot lavi e batize e zot kontinyen “progrese dan konnesans Bondye.” *—Kolosyen 1:10; 2 Korentyen 5:14.

8-10. (a) Konman ki leksperyans en madanm Kretyen i prouve ki Parol Bondye i “annan pisans”? (b) Ki sa leksperyans in ansenny ou konsernan Zeova e lafason ki i tret son bann serviter? (Egzod 4:12)

⁸ Sa konnesans ki bann serviter Bondye i gannyen dan zot letid Labib i pa en konnesans lo sirfas. En tel konnesans i tous zot leker, sanz zot fason panse, e vin en par zot lavi. (Ebre 4:12) Par egzanp, en madanm ki apel Camille ti ganny anploye pour okip bann dimoun aze. Enn sa bann dimoun ki i ti okipe ti Martha, en Temwen Zeova. Vi ki Martha ti’n ganny bokou afekte avek en maladi mantal, i ti bezwen en dimoun avek li toultan. I ti bezwen ganny rapel pour li manze—menm pour anval son manze. Toudmenm, ti annan en keksoz ki ti reste grave dan lespri Martha, parey nou pou vwar.

⁹ En zour, Martha ti vwar Camille pe plere akoz serten problenm personnel ki ti pe fatig li. Martha ti may son lebra otour Camille e i ti envit li pour etidye Labib avek li. Me eski en dimoun dan en kondisyon parey Martha ti pou kapab kondwir en letid Labib? Wi, i ti pou kapab! Kantmenm i ti’n oubliy laplipar keksoz, Martha pa ti’n oubliy son Bondye merveye e i pa ti’n oubliy bann laverite presye ki i ti’n aprann dan Labib. Pandan letid, Martha ti demann Camille pour lir sak paragraf, rod bann teks Labib ki’n ganny site, lir kestyon anba lo paz e apre reponn. Sa ti kontinyen pour en pe letan, e malgre ki Martha ti annan serten limitasyon, Camille ti progrese dan son konnesans Labib. Martha ti realize ki Camille ti bezwen asosye avek lezot ki enterese pour servi Bondye. Avek sa antet, i ti donn son etidyan en rob ek en per soulye, afen ki Camille i ava annan en resanz apropriye pour mete kan i asiste son premye renyon dan Lasal Rwayonm.

¹⁰ Camille ti ganny motive par lentere ranpli avek lanmour ki Martha ti montre li, ensi ki son legzanp ek konviksyon. I ti konklir ki sa ki Martha ti pe esey ansenny li dan Labib ti vreman enportan, parski Martha ti’n oubliy preski tou lezot keksoz eksepte sa ki i ti’n aprann dan Labib. Plitar, letan  Camille ti ganny transfer dan en lot lenstitisyon, i ti realize ki i ti’n ler pour li fer keksoz. Dek ki i ti ganny son premye loportinite, i ti antre dan Lasal Rwayonm, dan son rob ek soulye ki Martha ti’n donn li, e i ti demande pour ganny en letid Labib. Camille ti fer bon progre e i ti batize.

Motive pour reflekte Standar Zeova

11. Apard ki montre zel dan travay predikasyon, ki mannyer nou kapab demontre ki nou’n ganny motive par sa mesaz Rwayonm?

¹¹ Ozordi, i annan plis ki sis milyon Temwen Zeova ki, parey Martha e aprezan Camille, pe pres “sa Bonn Nouvel Rwayonm” partou dan lemonn. (Matye 24:14; 28:19, 20) Parey bann Kretyen premye syek, zot in ganny touse oprofon par “bann mervey ki Bondye in fer.” Zot rekonnet ki i en privilez pour zot port non Zeova e ki i’n vers son lespri lo zot. Alors, zot fer bokou zefor pour viv “en lavi ki Bondye i aprouve e ki fer li plezir dan tou sa ki zot fer,” par aplik son standar dan tou laspe zot lavi. Parmi lezot keksoz, sa i enplik respekte standar Bondye an rapor avek nou fason sanze ek nou laparans fizik.—Kolosyen 1:10a; Tit 2:10.

12. Ki konsey spesifik konsernan nou fason sanze ek nou laparans fizik ki nou vwar dan 1 Timote 2:9, 10?

¹² Wi, Zeova in etablir son bann standar an rapor avek nou laparans fizik. Zapot Pol ti donn serten lendikasyon lo sa ki Bondye i ekspekte dan sa domenn. “Mon oule osi ki bann madanm i abiy zot byen desaman, respektab, dan en fason konvenab e senp. Pa bezwen ki zot orn zot avek lanmod seve konplike, avek bizou an-or, ou perl ek labiyman byen ser, me okontrer ki zot ganny admire pour zot bann bonn aksyon, ki apropriye pour bann madanm ki relizye.” * Ki nou aprann atraver sa parol?—1 Timote 2:9, 10.

13. (a) Ki savedir ‘abiy byen desaman’? (b) Akoz nou kapab dir ki standar Zeova i rezonnab?

¹³ Parol Pol i montre ki bann Kretyen i devret “abiy zot byen desaman.” Zot pa devret annan en laparans devergonde, dezord, oubyen neglizan. Preski tou dimoun, menm bann ki mwen fortinen, i kapab satisfer sa standar rezonnab par fer sir ki zot lenz i annord, prop, e prezantab. Par egzanp, tou le zan bann Temwen dan en pei Sid Lanmerik i mars pour plizyer kilomet dan lafore e apre vwayaz par pirog pour plizyer er-d-tan pour asiste zot lasanble distrik. I pa rar pour en dimoun tonm dan larivyer oubyen pour son lenz may dan en brousay pandan vwayaz. Alor kan sa bann dimoun i ariv sa landrwa kot lasanble pou deroule, souvan zot en pe devergonde. Alors, zot pran letan pour remet bann bouton ki’n sorti, repar bann zip, lav e dres bann lenz ki zot pe al mete pour lasanble. Zot apresye sa lenvitasyon ki zot in gannyen pour manz lo latab Zeova, e zot anvi sanz dan en fason konvenab pour sa.

14. (a) Ki savedir sanz dan en fason ‘respektab, konvenab e senp’? (b) Pour nou lenz reflekte ‘respe profon pour Bondye,’ ki nou devret mazinen?

¹⁴ Pol ti kontinyen par endike ki nou devret sanz dan en fason “respektab, dan en fason konvenab e senp.” Sa i vedir ki nou labiyman pa devret atir latansyon lo nou, i pa devret drol, ni provokan, ni montre serten parti nou lekor ki pa sipoze deor, oubyen montre ki nou pe toultan swiv bann dernyen lanmod. Anplis ki sa, nou fason sanze i devret reflekte ‘en respe profon pour Bondye.’ Pa sa i fer nou reflesir bokou? Toutfwa, i pa senpleman en kestyon sanz dan en fason apropriye zis ler nou pe asiste renyon kongregasyon e apre pa fatig nou avek sa dan bann lezot lokazyon. Nou laparans fizik i devret touzour reflekte en latitid respektab e onorab vi ki nou bann Kretyen ek minis 24 lo 24. I vre ki nou lenz travay oubyen lekol i bezwen adapte avek sa kalite travay ki nou pe fer. Kantmenm sa, nou devret sanz dan en fason respektab e avek dinite.  Si nou lenz i touzour reflekte nou krwayans dan Bondye, nou pa pou zanmen santi nou anbarase pour donn en temwannyaz enformel akoz nou resanz.—1 Pyer 3:15.

“Pa bezwen kontan Lemonn”

15, 16. (a) Akoz i enportan pour nou evite imit lemonn an rapor avek nou lenz ek nou laparans fizik? (1 Zan 5:19) (b) Pour ki rezon pratik nou devret evite swiv lanmod dan nou fason sanze?

¹⁵ Sa konsey ki’n ganny rikorde dan 1 Zan 2:15, 16 i osi servi konman en gidans dan swa ki nou fer an rapor avek nou fason sanze ek nou laparans fizik. Nou lir: “Pa bezwen kontan lemonn ni sa bann keksoz ki dan lemonn. Si en dimoun i kontan lemonn, i napa lanmour pour nou Papa dan li. Tou sa ki dan lemonn: dezir natir imen, dezir atraver nou lizye ek lorgey dan lavi toulezour, tousala pa sorti kot nou Papa me i sorti dan lemonn.”

¹⁶ Pa sa konsey in vin zis atan! Dan sa lepok kot presyon lezot i pli entans ki zanmen oparavan, nou pa devret les lemonn dikte nou lo sa ki nou pou mete. Bann lanmod lenz in deteryore pandan sa ennde lannen ki’n pase. Menm fason sanze bann dimoun ki travay dan biznes ek bann ki annan en travay profesyonnel pa touzour fourni en standar apropriye pour bann Kretyen swiv. Sa i en lot rezon akoz nou devret touzour konsyan sa bezwen pour “pa swiv bann koutim sa monn konmela” si nou anvi viv dapre standar Bondye e ‘fer loner lansennyman lo Bondye, nou Sover, dan tou sa ki nou fer.’—Romen 12:2; Tit 2:10.

17. (a) Ki kestyon nou kapab demann nou lekor letan nou pe aste en lenz oubyen swazir en lanmod? (b) Akoz bann sef fanmiy i devret santi zot konsernen avek laparans fizik sak manm zot fanmiy?

¹⁷ Avan ki nou deside si nou pou aste en lenz, i saz pour nou demann nou lekor:  ‘Akoz mon vwar sa lanmod atiran? Eski i ganny idantifye avek serten artis popiler—en dimoun ki mon admire? Eski i’n ganny adopte par en geng oubyen en group ki promot en leta lespri endepandan e rebel?’ Nou devret osi get byen sa lenz. Si i en rob oubyen en zip, ki longer i ete? Son laform? Eski sa lenz i desan, apropriye, e diny, ouswa i tro kole, provokan, oubyen debraye? Demann ou lekor, ‘Si mon met sa lenz, eski i kapab fer lezot tonbe?’ (2 Korentyen 6:3, 4) Akoz sa i devret enteres nou? Akoz Labib i dir: “Kris li pa ti esey rod sa ki ti fer li plezir.” (Romen 15:3) Bann sef fanmiy i merit santi zot konsernen avek laparans fizik zot fanmiy. Respe ki bann sef fanmiy i annan pour sa Bondye merveye ki zot adore, pa devret fer zot ezite pour donn okenn konsey ferm me avek lanmour kan i neseser.—Zak 3:13.

18. Kwa ki motiv ou pour pli konsyansye dan ou fason sanze ek ou laparans fizik?

¹⁸ Sa mesaz ki nou pe anmennen i sorti kot Zeova, li ki pli gran legzanp dinite ek sentete. (Izai 6:3) Labib i enplor nou pour imit li parey “bann zanfan ki Bondye i kontan.” (Efezyen 5:1) Nou fason sanze ek nou laparans fizik i kapab swa reflekte an byen ouswa an mal lo nou Papa ki dan lesyel. Sirman nou anvi rezwir son leker!—Proverb 27:11.

19. Ki benefis nou gannyen kan nou fer lezot konn “bann mervey ki Bondye in fer”?

¹⁹ Konman ou santi konsernan sa “bann mervey ki Bondye in fer” ki ou’n aprann? Pa nou devret vreman santi nou privilezye ki nou konn laverite! Akoz nou demontre lafwa dan disan Zezi ki’n ganny verse, nou pese in ganny pardonnen. (Akt 2:38) An rezilta, nou kapab koz avek lasirans devan Bondye. Nou pa per lanmor parey bann dimoun ki napa lespwar. Okontrer Zezi in donn nou lasirans ki en zour “tou bann mor ki dan tonbo pou tann son lavwa, e zot pou sorti dan zot tonbo.” (Zan 5:28, 29) Zeova in montre li bon pour revel tou sa bann keksoz avek nou. Deplis, i’n vers son lespri lo nou. Alors, rekonesans pour tou sa bann bon kado i devret pous nou pour respekte son bann standar onivo e pour loue li avek zel, anons sa “bann mervey” avek lezot.

[Not anba lo paz]

Ki ou pou reponn?

• Ki “bann mervey” dimoun ti tande zour Lapannkot lannen 33 N.L., e konman zot ti reazir?

• Ki mannyer en dimoun i vin disip Zezi Kri, e ki sa i enplike?

• Akoz i enportan pour nou vey nou fason sanze ek nou laparans fizik?

• Ki bann fakter ki nou devret pran an konsiderasyon letan nou pe deside si en lenz oubyen en lanmod i apropriye ou non?

[Study Questions]

[Portre lo paz 29]

Pyer ti anonse ki Zezi ti’n ganny resisite parmi bann mor

[Portre lo paz 31]

Eski ou laparans fizik i reflekte an byen lo sa Bondye ki ou adore?

[Portre lo paz 32]

Bann paran Kretyen i devret santi zot konsernen avek laparans fizik zot fanmiy