Soumet Fidelman Avek Lotorite Divin
Soumet Fidelman Avek Lotorite Divin
“Zeova i nou Ziz, Zeova i fer lalwa, Zeova i nou Lerwa.” —IZAI 33:22.
1. Ki bann fakter ki ti fer ansyen Izrael inik parmi tou nasyon?
NASYON Izrael ti vin an egzistans an 1513 A.N.L. Sa lepok, i ti napa okenn lavil, okenn pei natal, e okenn lerwa vizib. Son bann sitwayen ti bann ansyen lesklav. Me sa nouvo nasyon ti inik dan ankor en lot fason. Zeova ti son Ziz envizib, son Lerwa, e sa enn ki ti fer son lalwa. (Egzod 19:5, 6; Izai 33:22) Ti napa okenn lezot nasyon ki ti kapab dir sa!
2. Ki kestyon ki leve konsernan lafason ki Izrael ti ganny organize, e akoz larepons i enportan pour nou?
2 Vi ki Zeova i en Bondye annord, ensi ki en Bondye lape, nou ekspekte nenport nasyon ki i dirize pour byen organize. (1 Korentyen 14:33) Sa ti sertennman leka avek nasyon Izrael. Me ki mannyer en lorganizasyon teres e vizib ti pou kapab ganny dirize par en Bondye envizib? I ti a byen pour nou egzamin lafason ki Zeova ti diriz sa nasyon dan ansyen lepok, e remarke sirtou konman lafason ki i ti organiz Izrael i aksantye lenportans pour soumet fidelman avek lotorite divin.
Konman ki ansyen Izrael ti ganny dirize
3. Ki bann laranzman pratik ki Zeova ti fer pour gid son pep?
3 Kantmenm Zeova ti Lerwa envizib Izrael, i ti apwent bann zonm fidel konman son bann reprezantan vizib. Zot ti bann sef, bann sef lakaz paternel, ek bann ansyen, pour servi konman konseye ek ziz pour lepep. (Egzod 18:25, 26; Deterononm 1:15) Toudmenm, fodre pa ki nou konklir ki sa bann zonm responsab ti kapab ziz keksoz avek en disernman ek konprenezon parfe san gidans Bondye. Zot pa ti parfe, e zot pa ti kapab lir leker zot bann konpanyon adorater. Kantmenm sa, bann ziz ki ti annan lakrent pour Bondye ti kapab donn zot bann konpanyon konsey itil akoz i ti baze lo Lalwa Zeova.—Deterononm 19:15; Psonm 119:97-100.
4. Ki bann tandans ki bann ziz fidel an Izrael ti anvi evite, e akoz?
4 Toudmenm, pour vin en ziz zot ti bezwen plis ki senpleman konn Lalwa. Vi ki zot ti enparfe, bann ansyen ti bezwen alert pour kontrol okenn move tandans—parey legoism, lapliferans, ek vorasite—ki ti a kapab deform zot zizman. Moiz ti dir zot: “Zot pa devret fer lapliferans dan zizman. Zot devret ekout sa ki pti parey ki zot ekout sa ki gran. Zot pa devret annan lafreyer akoz en zonm, parski zizman i pour Bondye.” Wi, bann ziz an Izrael ti pe ziz pour Bondye. Pa sa ti en privilez vreman onorab!—Deterononm 1:16, 17.
5. Apard ki etablir bann ziz, ki lezot provizyon Zeova ti fer pour pran swen avek son pep?
5 Zeova ti fer lezot provizyon pour okip bezwen spirityel son pep. Menm avan ki zot ti ariv dan Later Promiz, i ti demann zot pour konstri tabernak, sant vre ladorasyon. I ti osi fer en laranzman pour en group pret ansenny Lalwa, pour ofer sakrifis zannimo, e pour bril lansan dan bomaten ek aswar. Bondye ti etablir gran frer Moiz, Aaron, konman premye gran pret Izrael e apwent bann garson Aaron pour asiste zot papa dan son bann responsabilite.—Egzod 28:1; Nonm 3:10; 2 Kronik 13:10, 11.
6, 7. (a) Ki relasyon ti annan ant bann pret ek bann Levit ki pa ti servi konman pret? (b) Ki leson nou kapab tire lefe ki bann Levit ti perform diferan latas? (Kolosyen 3:23)
6 Okip bezwen spirityel plizyer milyon dimoun ti en gro latas, e ti annan en pti gin pret pour fer sa. Alor, en laranzman ti ganny fer pour zot ganny asiste par lezot manm dan tribi Levi. Zeova ti dir Moiz: “Ou devret donn bann Levit avek Aaron ek son bann garson. Zot sa bann ki’n ganny donnen, zot in ganny donnen avek li parmi bann garson Izrael.”—Nonm 3:9, 39.
7 Bann Levit ti byen organize. Zot ti ganny divize dapre sa trwa fanmiy—bann Gersonit, bann Keatit, ek bann Merarit—sakenn ti annan en devwar pour fer. (Nonm 3:14-17, 23-37) Petet serten devwar ti paret pli enportan ki lezot, me zot tou zot ti esansyel. Travay bann Levit Keatit ti anmenn zot pros avek lars lalyans sakre ek bann lekipman tabernak. Toudmenm, tou Levit, ki swa zot ti en Keatit ou non, ti rezwir bann privilez merveye. (Nonm 1:51, 53) Me malerezman, serten pa ti apresye zot privilez. Olye soumet fidelman avek lotorite divin, zot ti montre en mekontantman e konmans annan lorgey, lanbisyon ek zalouzi. Enn parmi zot, ti en Levit ki ti apel Kora.
“Eski zot bezwen sey pran Pretriz osi?”
8. (a) Ki Kora ti ete? (b) Kwa ki ti’n kapab fer Kora konmans vwar bann pret dapre en pwennvi pirman imen?
8 Kora pa ti sef lakaz paternel Levi, e i pa ti ni sef lafanmiy Keatit. (Nonm 3:30, 32) Toudmenm, i ti en sef respektab an Izrael. Bann responsabilite ki Kora ti annan ti’n kapab fer li frekant Aaron ek son bann garson ase souvan. (Nonm 4:18, 19) Vi ki i ti’n kapab vwar lenperfeksyon sa bann zonm, petet Kora ti’n rezonn koumsa: ‘Oule dir mwan mon bezwen soumet avek sa bann pret, kantmenm zot vreman enparfe! Pa tro lontan Aaron ti fer en pti bef annor e nou pep ti tonm dan idolatri akoz zot ti ador sa pti bef. Aprezan, Aaron, frer Moiz, pe servi konman gran pret! Tousala pa lapliferans! E bann garson Aaron, Nadab ek Abiou? Pa zot ti montre en mank respe pour zot privilez ki Zeova ti bezwen met zot amor!’ * (Egzod 32:1-5; Levitik 10:1, 2) Nenport rezonnman ki Kora ti’n kapab fer, i kler ki i ti’n konmans vwar bann pret dapre en pwennvi imen. Sa ti fer li rebel kont Moiz ek Aaron, e finalman, kont Zeova.—1 Samyel 15:23; Zak 1:14, 15.
9, 10. Ki lakizasyon Kora ek son bann konpanyon rebel ti fer kont Moiz, e akoz zot ti’n kapab evit sa?
9 Vi ki i ti en zonm ki ti annan gran lenfliyans lo lezot, i pa ti difisil pour Kora anmenn lezot ki ti annan menm latitid lo son kote. Li, ansanm avek Datann ek Abiram, ti ganny 250 konpanyon ki ti partaz menm lopinyon avek zot—zot tou zot ti bann sef lasanble. Zot tou ansanm, zot ti apros Moiz ek Aaron e dir: “Lasanble antye i sen e Zeova i parmi zot. Alor, akoz ki zot bezwen lev zot parlao kongregasyon Zeova?”—Nonm 16:1-3.
10 Sa bann rebel ti’n kapab evite konteste lotorite Moiz. Pa bokou letan avan sa, Aaron ek Miryam ti’n fer menm zafer. Zot ti rezonn parey Kora! Dapre Nonm 12:1, 2, zot ti demande: “Eski Zeova in koz zis atraver Moiz tousel? Pa i’n koz atraver nou osi?” Zeova ti pe ekoute. I ti demann Moiz, Aaron, ek Miryam pour vin kot larantre latant renyon afen ki i kapab endike lekel ki i’n swazir konman lider. Apre sa, Zeova ti dir klerman: “Si ti annan en profet pour Zeova parmi zot, se dan en vizyon ki mon ti pou fer li konn mwan. Mon ti pou koz avek li dan en rev. I pa leka avek mon serviter Moiz! I pe ganny konfye avek mon lakaz antye.” Apre sa, Zeova ti frap Miryam avek lalep pour en serten letan.—Nonm 12:4-7, 10.
11. Ki mannyer Moiz ti tret sa sitiasyon ki ti enplik Kora?
11 Kora ek bann ki ti lo son kote ti’n bezwen okouran sa lensidan. Zot ti napa okenn leskiz pour rebele. Toudmenm, avek pasyans Moiz ti esey rezonn avek zot. I ti enplor zot pour annan plis lapresyasyon pour zot privilez, an dizan: “Eski sa i sitan en pti keksoz pour zot ki Bondye Izrael in separ zot avek lasanble Izrael pour prezant zot avek li?” Non, i pa ti “en pti keksoz”! Bann Levit ti deza annan bokou. Ki zot ti anvi anplis ki sa? Moiz ti ekspoz rezonnman ki ti annan dan zot leker, an azoutan: “Eski zot bezwen sey pran pretriz osi?” * (Nonm 12:3; 16:9, 10) Me, ki mannyer Zeova ti reakte anver sa rebelyon kont lotorite divin?
Ziz Izrael i entervenir
12. Lo ki sa bon relasyon ki nasyon Izrael ti annan avek Bondye ti depan?
12 Kan Zeova ti donn nasyon Izrael Lalwa, i ti dir lepep ki si zot obeir, zot ti pou vin “en nasyon sen” e sa nasyon ti pou reste sen osi lontan ki zot aksepte laranzman Zeova. (Egzod 19:5, 6) Vi ki aprezan ti annan en rebelyon ki ti pe arive dan kler, la ti lemoman pour Ziz Izrael e sa Enn ki fer son lalwa entervenir! Moiz ti dir avek Kora: “Ou ek tou ou lasanble, fodre ki zot prezan demen devan Zeova, ou, zot ek Aaron. E pran sakenn son resipyan dife, e zot bezwen met lansan lo la e prezant sakenn son resipyan dife devan Zeova, de san senkant resipyan dife, e ou ek Aaron sakenn son resipyan dife.”—Nonm 16:16, 17.
13. (a) Akoz nou kapab dir ki sa bann rebel ti annan lodas pour al ofer lansan devan Zeova? (b) Ki mannyer Zeova ti azir avek sa bann rebel?
13 Dapre Lalwa Bondye, zis bann pret ki ti kapab ofer lansan. Zis sa lide en Levit ki pa en pret pe ofer lansan devan Zeova ti’n devret fer sa bann rebel rezonnen. (Egzod 30:7; Nonm 4:16) Me i pa ti leka avek Kora ek son bann siporter! Son lannmen i ti “reini tou lasanble ansanm kont [Moiz ek Aaron] dan larantre latant renyon.” Resi i dir nou: “Alor Zeova ti koz avek Moiz ek Aaron, an dizan: ‘Separ zot avek sa lasanble, pour mwan ekstermin zot dan en pti moman.’ ” Me Moiz ek Aaron ti sipliye ki lavi lepep i ganny eparnyen. Zeova ti aksepte zot demann. Me konsernan Kora ek son latroup, “en dife ti sorti kot Zeova e konmans devor sa de san senkant zonm ki ti pe ofer lansan.”—Nonm 16:19-22, 35. *
14. Akoz Zeova ti pran aksyon sever kont lasanble Izrael?
14 Sa ki pli etonnan ankor, se ki bann Izraelit ki ti vwar konman Zeova ti azir avek sa bann rebel pa ti aprann zot leson. “Son lannmen menm, lasanble bann garson Izrael antye ti konmans plennyen kont Moiz ek Aaron, an dizan: ‘Zot menm ki’n fer pep Zeova mor.’ ” Bann Izraelit ti pe pran kote avek bann ki ti konplot kont Moiz! Finalman, pasyans Zeova ti fini. Personn—ni menm Moiz oubyen Aaron—pa ti pou kapab entervenir pour lepep aprezan. Zeova ti fer en fleo afliz bann ki ti dezobei, “e bann ki ti mor avek sa fleo ti ariv katorz mil set san, apard sa bann ki ti mor akoz Kora.”—Nonm 16:41-49.
15. (a) Akoz bann Izraelit ti’n devret aksepte Moiz ek Aaron konman zot lider san ezitasyon? (b) Ki sa resi in ansenny ou lo Zeova?
15 Tou sa bann dimoun ti’n kapab evite perdi zot lavi si selman zot ti’n rezonn lo sa size. Zot ti’n kapab demann zot lekor bann kestyon parey: ‘Lekel ki ti riske zot lavi par al devan Faraon? Lekel ki ti demande pour bann Izraelit ganny libere? Lekel ki ti ganny envite pour mont lo Montanny Oreb apre delivrans Izrael pour koz fas-a-fas avek lanz Bondye?’ Sirman, rikord remarkab lo Moiz ek Aaron i montre ki zot ti fidel avek Zeova e ki zot ti kontan lepep. (Egzod 10:28; 19:24; 24:12-15) Zeova pa ti pran plezir pour detrir sa bann rebel. Toutfwa, letan i ti vwar laprev ki sa pep ti pou persiste dan zot rebelyon, i ti pran aksyon definitif. (Ezekyel 33:11) Tousala i annan en gran lenplikasyon pour nou ozordi. Akoz?
Idantifye sa Mwayen dan nou Letan
16. (a) Ki laprev ki ti devret konvenk bann Zwif dan premye syek ki Zezi ti pe reprezant Zeova? (b) Akoz Zeova ti ranplas bann pret Levitik, e avek ki i ti ranplas zot?
16 Ozordi, i annan en nouvo “nasyon” ki annan Zeova konman son Ziz envizib, son Lerwa, e sa Enn ki fer son lalwa. (Matye 21:43) Sa “nasyon” ti formen dan premye syek N.L. Sa letan, tabernak ki ti ganny servi dan lepok Moiz ti’n ganny ranplase par en zoli tanp an Zerizalenm, kot bann Levit ti ankor an fonksyon. (Lik 1:5, 8, 9) Me, dan lannen 29 N.L., en lot tanp, enn spirityel, ti vin an egzistans, avek Zezi Kri konman Gran Pret. (Ebre 9:9, 11) Sa kestyon lo lotorite divin ti ankor enn fwa ganny leve. Lekel ki Zeova ti pou servi pour diriz sa nouvo “nasyon”? Zezi ti montre li antyerman fidel avek Bondye. I ti kontan lepep. I ti osi fer plizyer mirak merveye. Toudmenm, parey zot bann zanset antete, lamazorite Levit pa ti oule aksepte Zezi. (Matye 26:63-68; Akt 4:5, 6, 18; 5:17) Finalman, Zeova ti ranplas bann pret Levitik avek en group ki tre diferan—en group pret rwayal. Sa group pret rwayal in kontinyen egziste ziska dan nou letan.
17. (a) Lekel ki form sa group pret rwayal ozordi? (b) Konman Zeova i servi sa group pret rwayal?
17 Lekel ki form sa group pret rwayal ozordi? Zapot Pyer i reponn sa kestyon dan son premye let enspire. An adresan bann manm swazir lekor Kris, Pyer ti ekrir: “Zot en ras ki’n ganny swazir, en group pret rwayal, en nasyon sen, en pep ki pour Bondye, ki i’n swazir pour proklanm bann keksoz merveye konsernan sa enn ki’n apel zot pour sorti dan fernwanr pour vin dan son lalimyer merveye.” (1 Pyer 2:9) Par sa parol, i kler ki, konman en group, bann disip swazir Zezi i form sa “group pret rwayal” ki Pyer ti osi apel “en nasyon sen.” Zot form sa mwayen ki Zeova i servi pour fourni son pep avek lenstriksyon ek gidans spirityel.—Matye 24:45-47.
18. Ki relasyon i egziste ant bann ansyen ek sa group pret rwayal?
18 Bann ansyen ki annan responsabilite dan bann kongregasyon pep Zeova partou lo later i azir konman bann reprezantan sa group pret rwayal. Sa bann zonm i merit nou respe ek tou nou sipor, ki swa zot bann Kretyen swazir ou non. Akoz? Parski se Zeova li menm ki’n apwent sa bann ansyen dan zot pozisyon atraver lespri sen. (Ebre 13:7, 17) Konman sa i posib?
19. Dan ki fason bann ansyen i ganny apwente par lespri sen?
19 Sa bann ansyen i ranpli bann kondisyon ki trouve dan Parol Bondye, ki’n ganny prodwir par lespri Bondye. (1 Timote 3:1-7; Tit 1:5-9) Alors, nou kapab dir ki zot in ganny apwente par lespri sen. (Akt 20:28) Bann ansyen i bezwen byen familye avek Parol Bondye. Parey sa Ziz Siprenm ki’n apwent zot, bann ansyen i devret osi deteste okenn keksoz ki paret en lapliferans dan zizman.—Deterononm 10:17, 18.
20. Kwa ki ou apresye dan bann ansyen ki travay dir?
20 Olye kestyonn zot lotorite, nou bezwen vreman apresye nou bann ansyen ki travay dir! Zot servis fidel, souvan pour plizyer dizenn lannen, i donn nou konfyans. Zot fidelman prepar e kondwir bann renyon kongregasyon, travay kotakot avek nou dan predikasyon “Bonn Nouvel Rwayonm,” e donn nou bann konsey baze lo Labib kan nou bezwen. (Matye 24:14; Ebre 10:23, 25; 1 Pyer 5:2) Zot vizit nou letan nou malad e rekonfort nou kan nou dan lapenn. Zot soutenir bann lentere Rwayonm fidelman e avek gran ker. Lespri Zeova i lo zot; zot annan son laprouvasyon.—Galat 5:22, 23.
21. Ki bann ansyen i bezwen konsyan, e akoz?
21 Byensir, bann ansyen pa parfe. Vi ki zot konsyan ki zot osi zot annan limit, zot pa sey domin troupo, “leritaz Bondye.” Plito, zot konsider zot lekor konman bann konpanyon travay ki ‘pe kontribye dan lazwa zot bann frer.’ (1 Pyer 5:3, NW; 2 Korentyen 1:24) Bann ansyen ki annan limilite e ki travay dir i kontan Zeova, e zot konnen ki pli zot imit li, pli zot pou kapab fer dibyen kongregasyon. Avek sa antet, zot kontinyen fer zefor pour kiltiv bann kalite ki fer plezir Bondye, parey lanmour, konpasyon, ek pasyans.
22. Konman ki revwar sa resi lo Kora in fortifye ou lafwa dan lorganizasyon vizib Zeova?
22 Ki lazwa pour nou annan Zeova konman nou Dirizan envizib, Zezi Kri konman nou Gran Pret, bann manm sa group pret rwayal konman nou ansennyan, e bann ansyen fidel konman nou konseye! Kantmenm napa okenn lorganizasyon ki ganny dirize par imen ki pou kapab parfe, nou kontan ki nou kapab servi Bondye an konpanni nou bann konpanyon Kretyen fidel, ki volonterman soumet avek lotorite divin!
[Not anba lo paz]
^ par. 8 Sa de lezot garson Aaron, Eleazar ek Itamar, ti egzanpler dan zot servis pour Zeova.—Levitik 10:6.
^ par. 11 Datann ek Abiram, ki ti de konplis Kora, ti bann Ribenit. Alors, i pa paret ki zot ti anvi vin pret. Dan zot ka, zot ti proteste kont lotorite Moiz e lefe ki ziska prezan, zot pa ti ankor antre dan Later Promiz parey zot ti ekspekte.—Nonm 16:12-14.
^ par. 13 Dan lepok bann patrias, sak sef fanmiy ti reprezant son madanm ek son bann zanfan devan Bondye, e zot ti menm ofer sakrifis pour zot. (Zenez 8:20; 46:1; Zob 1:5) Me kan Lalwa ti ganny entrodwir, Zeova ti apwent bann zonm dan fanmiy Aaron konman pret atraver ki bann sakrifis ti devret ganny ofer. Aparaman, sa 250 rebel pa ti pare pour korpere avek sa sanzman dan fason fer.
Ki ou’n aprann?
• Ki bann provizyon ki Zeova ti fer avek lanmour pour bann Izraelit?
• Akoz Kora ti napa okenn leskiz pour rebel kont Moiz ek Aaron?
• Ki leson nou kapab tire dan lafason ki Zeova ti tret bann ki ti rebele?
• Ki mannyer nou kapab montre ki nou apresye laranzman Zeova denozour?
[Study Questions]
[Portre lo paz 23]
Eski ou konsider nenport responsabilite dan servis Zeova konman en privilez?
[Portre lo paz 24]
“Alor, akoz ki zot bezwen lev zot parlao kongregasyon Zeova?”
[Portre lo paz 26]
Bann ansyen ki’n ganny apwente i bann reprezantan sa group pret rwayal