Bann bon Vwazen i en Lavantaz

“Vomye en vwazen ki pre ki en frer ki lwen.”​—Proverb 27:10.

EN PROFESER dan premye syek nou lepok ti demann Zezi: “Lekel mon prosen?” Dan larepons Zezi, i pa ti dir sa zonm lekel ki son prosen, me plito kwa ki fer en dimoun vin en bon prosen. I tre probab ki ou familye avek sa parabol Zezi. Bokou dimoun i konn li konman parabol bon Samariten e i ganny trouve dan Levanzil Lik. La ki mannyer Zezi ti rakont sa zistwar:

“En zonm ti pe desann, sorti Zerizalenm pour al Zeriko. Bann bandi ti atak li, depouy li, bat li e kit li demi mor. Par azar, en pret ti pe desann par sa menm semen. Ler i ti war sa zonm blese i ti pas lot kote e i ti ale. En levit osi ti ariv dan sa landrwa. Ler i ti war sa zonm li osi, i ti pas lot kote e i ti ale. Me en Samariten, ki ti pe vwayaze, ti ariv kot i ti ete, e ler i ti war sa zonm blese, i ti ganny pitye. I ti apros kot li, bann son blesir apre ki in vid delwil ek diven lo la. Apre i ti met li lo son prop bourik e anmenn li dan en lotel, e ti donn li bann swen neseser. Son lannmen, i ti pran de denye e i ti donn propriyeter lotel e i ti dir li, ‘Pran swen avek li; sa ki ou a depanse anplis, mon a pey ou ler mon a retournen.’ ” “Dapre ou, lekel parmi sa trwa, ki’n azir konman prosen sa zonm ki ti ganny atake par bann bandi?”—Lik 10:29-36.

I evidan ki sa profeser ti konpran leson enportan dan sa parabol. San ezite, i ti kapab idantifye lekel ki ti en prosen pour sa zonm blese: “Se sa enn ki’n egzers konpasyon pour li.” Apre Zezi ti dir li: “Ale, e ou osi fer parey.” (Lik 10:37) Vreman sa i en tre bon legzanp konsernan kisisa en vre prosen! Parabol Zezi i kapab menm fer nou demann nou lekor: ‘Ki kalite prosen mon ete? Eski sa ras oubyen nasyon ki mon sorti ladan i enfliyans mwan letan mon pe deside lekel mon pou aksepte konman mon prosen? Eski sa bann keksoz i limit mon lobligasyon pour ed okenn mon kanmarad ki mon vwar dan problenm? Eski mon fer tou sa ki mon kapab pour vin en bon vwazen?

Kote pour konmanse?

Si nou santi ki nou bezwen amelyore dan sa domenn, nou devret konmans avek nou mantalite. Nou devret konsantre plis lo vin en bon vwazen. Sa i kapab osi kontribye pour nou ganny bann bon vwazen. Preski de mil an pase, Zezi ti aksantye sa prensip enportan konsernan relasyon imen dan son Sermon lo Montanny. I ti dir: “Fer pour lezot sa ki ou oule lezot i fer pour ou.” (Matye 7:12) Tret lezot avek respe, dinite, ek labonte i ankouraz zot pour tret ou dan menm fason.

Dan lartik “Loving Thy Neighborhood,” (Kontan ou Vwazinaz) trouve dan magazin The Nation Since 1865, zournalis ek loter Lise Funderburg ti mansyonn serten keksoz senp ki kapab ganny fer pour ankouraz sa leta lespri vwazen. I ti ekrir: ‘Mon anvi . . . kontakt ant imen i ganny eksprimen par en kantite pti faver ki bann vwazen i kapab fer pour kanmarad—tel parey pret en keksoz, vey zanfan, aste en keksoz laboutik. Mon anvi sa kalite relasyon dan en monn ki pe vin deplizanpli divize, kot bann kominote in vin frazil akoz lafreyer ek krim.’ Apre i ti azoute: “Ou bezwen konmans en landrwa. Kekfwa ou kapab konmans avek ou vwazen pli pre avek ou.”

Magazin Canadian Geographic osi ti fer en bon remark ki kapab ed bann vwazen devlop en bon latitid anver kanmarad. Marni Jackson ki en ekriven ti obzerve: “Zis parey en dimoun pa kapab swazir son fanmiy, en dimoun pa kapab toultan swazir lekel ki pou vin son vwazen. Pour sa relasyon posib i neseser annan en bon zizman, lakourtwazi ek tolerans.”

 Bon Vwazen i Dimoun ki pare pour donnen

I vre ki bokou nou pa santi nou alez pour apros bann vwazen. I kapab paret bokou pli fasil pour evit kontak e izol nou lekor. Sepandan, Labib i dir ki i “i annan plis lazwa pour donnen ki pour resevwar.” (Akt 20:35) Alors, en bon vwazen i esey fer en zefor pour konn bann dimoun otour li. Kantmenm i pa neseserman anvi devlop en relasyon pros avek zot, tanzantan i esey fer zefor pour fer konversasyon amikal avek zot, petet konmans par zis en zes oubyen en sourir amikal.

Parey i’n ganny mansyonnen pli boner, i sa “kantite pti faver” ki vwazen i fer pour kanmarad ki vreman enportan pour etablir e mentenir bon relasyon antre zot. Alor i bon pour rod bann keksoz pour fer oubyen bann bon parol ki ou kapab dir en vwazen, akoz sa pou souvan promot en leta lespri korperasyon ek respe pour kanmarad. Deplis, si nou fer sa, nou pou swiv sa konsey Labib: “Pa refiz sa ki byen pour bann ki merit gannyen, ler i dan pouvwar ou lanmen pour fer li.”—Proverb 3:27; Zak 2:14-17.

Bon Vwazen i rekonesan

I ti pou byen si nou ti kapab dir ki tou dimoun i rekonesan ler zot ganny en led oubyen kado. Malerezman, sa i pa toultan leka. Bokou led ek kado avek bon lentansyon in ganny resevwar avek sitan mank lapresyasyon ki sa dimoun ki pe donnen i kapab mazinen, ‘Sa i dernyen fwa ki mon fer sa!’ Parler, ou vwazen i kapab pa montre preski okenn lapresyasyon pour tou zefor ki ou fer pour tenir bann pti konversasyon e pour bann zes amikal ki ou pe fer.

Me dan bokou ka, sa dimoun pa vreman pa apresye sa ki ou pe fer, kantmenm lo sirfas i kapab paret leka. Petet son kiltir oubyen son ledikasyon i fer li ezite oubyen anbarase pour eksprim son lapresyasyon ek son lentere, e sa i pa fer li paret amikal. De lot kote, dan sa monn ki mank rekonesans, serten dimoun i kapab vwar li drol pour ou montre ou zantiy avek li, oubyen zot kapab menm kestyonn ou lentansyon. Petet ou bezwen rasir zot. Alor, pour etablir bann relasyon amikal i kapab pran letan ek pasyans. Toutfwa, bann vwazen ki aprann pour vin bann dimoun ki pare pour donnen e resevwar avek rekonesans i kontribye pour kree en vwazinaz ki anpe e zwaye.

Ler Maler i arive

Sirtou ler dezas i arive en bon vwazen i vreman itil. Pandan letan difisil, ou trouv dimoun pe demontre ki zot bann bon vwazen. I annan bokou resi ki koz konsernan bann bon keksoz ki bann vwazen i fer dan bann tel moman. Trazedi ki frap tou dimoun i paret pous bann vwazen pour korpere e fer zefor pour ed kanmarad. Menm sa bann ki annan diferan pwennvi pou souvan travay ansanm.

Par egzanp, The New York Times i raporte ki ler en tranbleman-d-ter terib ti frap Lartirki an 1999, bann ki ti lennmi depi lontan ti montre solidarite konman vwazen. “Nou’n ganny ansennyen pour ay bann Tirk pour bokou lannen,” en ekriven Grek apele Anna Stergiou ti ekrir dan en zournal an Atenn. “Me zot douler enkrwayab pa ti anmenn nou okenn lazwa. Nou ti ganny touse, nou ti plere konmsi sa laenn ki’n egziste pour tou sa letan ti disparet ler nou ti vwar bann pti baba ki’n mor.” Ler bann loperasyon sekour ti ofisyelman arete, bann group sekour Grek ti refize pour abandonn resers pour rod bann sirvivan.

Partisip dan travay sov lavi apre ki en dezas in arive, i sertennman en aksyon nob e remarkab delapar en vwazen. Me pour sov lavi en vwazen par averti li avan ki en maler i arive, i sirman kapab ganny konsidere konman en aksyon ki annan ankor plis valer ki en vwazen i kapab fer. Malerezman, listwar i revele ki sa bann ki averti zot prosen konsernan dezas ki pe al arive, pa souvan ganny byen resevwar, vi ki ler sa lavertisman pe ganny donnen, sa dezas ki pe al arive pa evidan pour zot. Alor zot pa krwar sa bann ki pe lans lavertisman. Pour nenport dimoun, i demann bokou persistans ek en leta lespri sakrifis pour eseye ed sa bann ki pa okouran ki zot dan en sitiasyon danzere.

Pli bon Keksoz en Dimoun i kapab fer pour son Prosen

Ozordi, en keksoz ki bokou pli serye ki en dezas natirel pe vin lo limanite. Sa se aksyon Bondye  Tou pwisan ki’n predir pour retir krim, mesanste, ek lezot problenm lo later. (Revelasyon 16:16; 21:3, 4) Sa levennman enportan i pa en keksoz ki nou pa tro asire me enn ki garanti! Temwen Zeova i enterese pour partaz sa konnesans, ki neseser pour sirviv sa levennman mondyal ki pe al arive, avek otan dimoun posib. Pour sa rezon ki zot partisip avek sitan persistans dan zot aktivite predikasyon byen koni partou dan lemonn. (Matye 24:14) Zot fer sa volonterman, akoz lanmour pour Bondye ek pour zot prosen.

Alor, pa les prezidis oubyen reaksyon lezot dimoun anpes ou ekout bann Temwen Zeova ler zot pas devan ou laport oubyen rankontre ou en lot landrwa. Zot pe esey vin bann bon vwazen. Alor aksepte pour etidye Labib avek zot. Aprann konman Parol Bondye i asir nou ki en lavenir kot bann vwazen i viv ansanm dan lazwa i pros. Dan sa letan, pou nepli annan diskriminasyon rasyal, relizye, oubyen klas sosyal ki pou gat sa bon relasyon ki laplipar nou i vreman oule.

[Portre lo paz 5]

I byen pour fer bann bon aksyon dan ou vwazinaz

[Portre]

Globe: Mountain High Maps® Copyright © 1997 Digital Wisdom, Inc.