‘I pa ti dir zot nanryen san servi Legzanp’

‘Zezi ti servi bann legzanp pour koz avek lafoul; i pa ti dir zot nanryen san servi legzanp.’​—MATYE 13:34.

1, 2. (a) Akoz bann legzanp ki efikas pa ganny oubliye fasilman? (b) Ki kalite legzanp Zezi ti servi, e ki kestyon nou kapab demande konsernan legzanp? (Vwar osi not anba lo paz.)

ESKI ou rapel en legzanp ki ou’n deza tande petet dan en diskour piblik, bokou lannen avan? Bann legzanp efikas pa ganny oubliye vitman. En ekriven ti fer remarke ki bann legzanp i “transform zorey an lizye e fer bann ki pe ekoute form bann portre dan zot lespri.” Vi ki nou kapab pli byen konpran en keksoz kan nou form bann portre dan nou lespri, alor bann legzanp i kapab fer nou sezi bann lide pli fasilman. Legzanp i kapab fer bann mo vin vivan, e i ansenny bann leson ki reste grave dan nou lespri.

² Napa okenn ansennyan lo later ki’n pli byen servi legzanp ki Zezi Kri. Plizyer parabol ki Zezi ti servi i kapab ganny rapele fasilman preski de mil an apre. * Akoz Zezi ti depan en kantite lo sa kalite metod lansennyman? E kwa ki ti fer son bann legzanp sitan efikas?

Akoz Zezi ti servi Legzanp pour ansennyen

3. (a) Dapre Matye 13:34, 35, nonm en rezon akoz Zezi ti servi legzanp. (b) Kwa ki endike ki Zeova i bezwen akord en gran valer avek sa metod lansennyman?

³ Labib i donn de rezon enportan akoz Zezi ti servi legzanp. Premyerman, an fezan sa, i ti akonpli profesi. Zapot Matye ti ekrir: “Zezi ti servi bann [legzanp, NW ] pour koz avek lafoul; i pa ti dir zot nanryen san servi [legzanp, NW ], pour ki parol profet i ganny realize: ‘Mon pou koz avek zot an [servan legzanp, NW ]!’ ” (Matye 13:34, 35) Sa “profet” ki Matye ti site ti konpoziter Psonm 78:2. Sa psalmis ti koz anba lenspirasyon lespri Bondye plizyer syek avan Zezi ti ne. Eski pa i remarkab pour vwar ki plizyer santenn lannen avan, Zeova ti deside ki son Garson pou servi legzanp pour ansennyen? San dout, Zeova i bezwen atas gran lenportans avek sa metod lansennyman!

4. Konman Zezi ti eksplike akoz i ti servi parabol?

⁴ Dezyenmman, Zezi li menm ti eksplike ki i ti servi legzanp pour separ bann ki pa apresye keksoz spirityel. Apre ki i ti’n rakont en “gran lafoul” parabol senmer lagrenn, son bann disip ti demann li: “Akoz ou koz an parabol avek bann dimoun?” Zezi ti reponn: “Pour zot, sekre Rwayonm Bondye in ganny revele, me pa pour lezot. Parski sa ki annan pou ganny plis ankor, e i pou dan labondans, me sa enn ki napa nanryen pou ganny arase menm sa pti gin ki i annan. Rezon ki mon servi parabol avek zot se akoz zot gete me zot pa war, zot ekoute me zot pa tande ni konpran. Alor, sa ki profet Ezai in ekri i ganny realize: ‘Zot a ekoute, me zot pa pou zanmen konpran: Zot a gete, me zot pa pou war. Akoz lespri sa pep in fermen.’ ”​—Matye 13:2, 10, 11, 13-15; Izai 6:9, 10.

5. Konman legzanp ki Zezi ti servi ti separ bann dimoun ki annan limilite avek bann ki ti orgeye?

⁵ Ki mannyer bann legzanp ki Zezi ti servi i separ bann dimoun? Dan serten ka, son lodyans ti bezwen reserse pour kapab  byen konpran sinifikasyon son parol. Bann dimoun ki ti annan limilite ti santi zot pouse pour demann plis lenformasyon. (Matye 13:36; Mark 4:34) Alors, bann legzanp Zezi ti revel laverite pour bann ki zot leker ti swaf laverite; anmenmtan, son bann legzanp ti kasyet laverite avek bann ki ti orgeye. Pa Zezi ti en ansennyan remarkab! Annou egzamin serten fakter ki ti fer son legzanp sitan efikas.

Swazir kan pour fourni Detay

6-8. (a) Ki lavantaz bann dimoun ki ti ekout Zezi dan premye syek pa ti ankor gannyen? (b) Donn legzanp ki montre ki Zezi ti swazir kan i pou fourni detay.

⁶ Eski ou’n deza demann ou lekor ki mannyer sa bann premye disip ki ti antann Zezi ansennyen ti santi zot? Kantmenm zot ti privilezye pour antann lavwa Zezi, zot pa ti annan sa lavantaz pour konsilte en dokiman an ekri pour rapel zot bann keksoz ki i ti dir. Plito, zot ti bezwen gard parol Zezi dan zot lespri ek leker. Zezi ti fer li fasil pour zot rapel sa ki i ti ansennyen atraver son abilite pour servi bann legzanp. Konman?

⁷ Zezi ti swazir kan i pou fourni detay e kan i pa pou fer li. Kan bann detay ti enportan pour en zistwar oubyen ti neseser pour met lanfaz, i ti fer sir ki i fourni sa bann detay. Se pour sa ki i ti dir egzakteman konbyen mouton ti reste deryer kan zot met ti pe rod enn ki ti’n perdi, konbyen er-d-tan bann travayer ti travay dan plantasyon rezen, e konbyen talan ki ti ganny konfye.​—Matye 18:12-14; 20:1-16; 25:14-30.

⁸ Anmenmtan, Zezi pa ti mansyonn bann detay ki pa ti neseser ki ti kapab vin en lobstak pour nou konpran sinifikasyon son bann legzanp. Par egzanp, dan parabol serviter san pitye, Zezi pa ti donn okenn leksplikasyon lo konman sa serviter ti’n kapab arive dwa 60,000,000 denye. Zezi ti pe met lanfaz lo nesesite pour pardonnen. I pa ti enportan konman ki sa serviter ti’n arive dwa sa det, me sa ki enportan se konman ki son det ti ganny efase e konman ki li an retour i ti tret enn son konpanyon ki ti dwa li bokou mwens larzan. (Matye 18:23-35) Pareyman, dan parabol garson perdi e retrouve, Zezi pa ti donn okenn leksplikasyon lo akoz en sel kou sa zenn garson ti demann son par leritaz e akoz i ti gaspiy li. Me Zezi ti detaye konman ki sa papa ti santi li e konman i ti reazir kan son garson ti regret sa ki i ti’n fer e retourn seli. Sa bann detay konsernan reaksyon sa papa ti esansyel dan sa pwen ki Zezi ti pe fer resorti, ki Zeova i pardonn “larzman.”​—Izai 55:7; Lik 15:11-32.

9, 10. (a) Letan i ti dekrir bann personnaz dan son parabol, lo ki Zezi ti konsantre? (b) Konman ki Zezi ti fer li pli fasil pour son lodyans ek lezot rapel son bann parabol?

 ⁹ Zezi ti osi montre bon zizman dan lafason ki i ti dekrir bann personnaz dan son parabol. Olye konsantre lo fourni bann deskripsyon elabore lo laparans fizik sa bann personnaz, Zezi ti souvan konsantre lo sa ki zot ti fer oubyen lo konman ki zot ti reazir anver serten levennman ki i ti rakonte. Alor, olye dekrir konman sa bon Samariten ti ete fizikman, Zezi ti rakont en keksoz pli enportan​—konman sa Samariten ti annan pitye pour sa Zwif ki ti’n ganny blese ater lo semen e ed li. Zezi ti fourni detay ki ti neseser pour ansennyen ki lanmour pour nou prosen i devret osi ganny demontre anver lezot dimoun ki pa menm ras oubyen nasyonalite avek nou.—Lik 10:29, 33-37.

¹⁰ Vi ki Zezi ti konnen kan i ler pour servi detay, sa ti gard son bann parabol bref e san tro bokou detay. Dan sa fason, i ti fer li pli fasil pour son lodyans dan premye syek​—e pour sa kantite lezot dimoun ankor ki ti pou lir bann Levanzil enspire plitar​—pour mazin sa bann parabol ek leson enportan ki zot ansennyen.

Servi bann Keksoz dan Lavi toulezour

11. Donn legzanp konman bann parabol Zezi ti reflekte bann keksoz ki i ti’n kapab obzerve letan i ti pe grandi an Galile.

¹¹ Zezi ti en eksper dan servi bann legzanp ki ti relye avek lavi bann dimoun. Bokou son bann parabol i reflekte bann keksoz ki i ti’n kapab obzerve anmezir ki i ti pe grandi an Galile. Mazin en kou son zenes. Ki kantite fwa i ti deza vwar son manman pe prepar dipen par pran en morso lapat fermante ki i ti’n anmase dernyen fwa e servi li pour fer monte dipen? (Matye 13:33) Konbyen fwa i ti’n obzerv bann peser letan zot ti larg zot lasenn dan delo kler Lanmer Galile? (Matye 13:47) Konbyen fwa i ti’n obzerv bann zanfan pe zwe dan bazar? (Matye 11:16) Petet Zezi ti osi obzerv lezot keksoz ordiner ki i ti enkli dan son bann legzanp​—bann lagrenn kot pe ganny senmen, bann festivite maryaz, ek bann plantasyon dible ki’n bon pour rekolt.​—Matye 13:3-8; 25:1-12; Mark 4:26-29.

12, 13. Konman parabol Zezi konsernan dible ek move zerb i montre ki i ti konn byen bann sitiasyon lokal?

¹² I pa sirprenan alor ki nou vwar bann sirkonstans oubyen sitiasyon lavi toulezour dan bann legzanp ki Zezi ti servi. Alor, pour konpran pli byen son abilite pour servi sa kalite metod lansennyman, i itil pour vwar ki son parol ti vedir pour sa bann Zwif ki ti ekout li. Annou vwar de legzanp.

 ¹³ Premyerman dan parabol dible ek move zerb, Zezi ti koz lo en zonm ki ti senm bon lagrenn dible dan son plantasyon me “en lennmi” ti antre dan son plantasyon e senm lagrenn move zerb ladan. Akoz Zezi ti swazir pour koz sirtou lo sa move aksyon? Bon, gard antet ki i ti pe rakont sa parabol obor Lanmer Galile, e preokipasyon prensipal bann Galileen ti san dout lagrikiltir. Ki pli gran pert pour en fermye ki en lennmi ti’n antre dan son plantasyon an sekre e senm lagrenn move zerb ladan? Lalwa sa letan i montre ki bann tel latak ti vreman arive. Eski pa i kler ki Zezi ti servi en sitiasyon ki son lodyans ti pou kapab konpran?—Matye 13:1, 2, 24-30.

14. Dan parabol bon Samariten, akoz i enportan ki Zezi in servi sa semen ki ti sorti “Zerizalenm pour al Zeriko” pour fer resorti son pwen?

¹⁴ Dezyenmman, mazin parabol bon Samariten. Zezi ti konmans par dir: “En zonm ti pe desann, sorti Zerizalenm pour al Zeriko. Bann bandi ti atak li, depouy li, bat li e kit li demi mor.” (Lik 10:30) Remarke ki Zezi ti servi sa semen ki ti sorti “Zerizalenm pour al Zeriko” pour fer resorti son pwen. Kan i ti rakont sa parabol, i ti an Zide, pa lwen avek Zerizalenm; alor i probab ki son lodyans ti konn sa semen ki i ti pe koz lo la. Sa semen ti renonmen konman en semen danzere, sirtou pour en dimoun ki ti pe vwayaz li tousel. I ti annan plizyer kontour dan bann landrwa izole ki ti ideal pour bann voler kasyet.

15. Akoz personn pa ti pou kapab zistifye lendiferans sa pret ek sa Levit dan parabol bon Samariten?

¹⁵ I annan en lot keksoz ki remarkab konsernan referans ki Zezi ti fer avek sa semen ki ti sorti “Zerizalenm pour al Zeriko.” Dapre sa zistwar, premyerman en pret ti desann lo sa semen e apre en Levit—menm si personn pa ti arete pour ed sa viktim. (Lik 10:31, 32) Bann pret ti servi dan tanp an Zerizalenm, e bann Levit ti asiste zot. Bokou pret ek Levit ti reste an Zeriko letan zot pa ti pe travay dan tanp, vi ki Zeriko ti zis 23 kilomet avek Zerizalenm. Alors, zot ti san dout ganny lokazyon pour servi sa semen. Remarke osi ki sa pret ek sa Levit ti pe desann lo sa semen “sorti Zerizalenm,” donk zot ti sorti dan direksyon tanp. * (Nou ki’n met an italik.) Alors, personn pa ti pou kapab eskiz sa de zonm pour pa montre okenn lentere dan sa zonm blese an dizan, ‘Zot ti evit sa zonm blese akoz i ti paret mor, e si zot ti tous son lekor zot pa ti pou kapab servi dan tanp pour en serten letan.’ (Levitik 21:1; Nonm 19:11, 16) Eski pa i kler ki parabol Zezi ti reflekte bann keksoz ki son lodyans ti familye avek?

Servi Kreasyon

16. Akoz i pa sirprann nou ki Zezi ti konn kreasyon sitan byen koumsa?

¹⁶ Plizyer legzanp ek parabol Zezi i montre ki i ti familye avek bann plant, zannimo, ek bann kondisyon letan. (Matye 6:26, 28-30; 16:2, 3) Kote i ti ganny en tel konnesans? Anmezir ki i ti pe grandi an Galile, i ti san dout ganny ase loportinite pour obzerv bann kreasyon Zeova. Deplis, Zezi i “premye-ne tou kreasyon,” e Zeova ti servi li konman “zouvriye abil” pour kree tou keksoz. (Kolosyen 1:15, 16; Proverb 8:30, 31) Eski nou sirprann ki Zezi ti konn kreasyon sitan byen koumsa? Annou vwar konman i ti byen servi sa konnesans letan i ti ansennyen.

17, 18. (a) Konman ki parol Zezi rikorde dan Zan sapit 10 i montre ki i ti familye avek karakter en mouton? (b) Ki bann dimoun ki’n vizit bann pei biblik in obzerve konsernan latasman ki annan ant bann berze ek zot mouton?

¹⁷ Enn parmi bann legzanp pli tousan ki Zezi ti servi, i sa enn ki ganny rikorde dan Zan sapit 10, kot i konpar sa relasyon entim ki i ti annan avek son bann disip avek relasyon ki en berze i annan avek son mouton. Parol Zezi i montre ki i ti tre familye avek karakter bann mouton domestik. I ti endike ki bann mouton i les zot ganny dirize, e ki zot fidelman swiv zot berze. (Zan 10:2-4) Sa latasman inik  ki egziste ant bann berze ek zot mouton in ganny obzerve par plizyer dimoun ki’n vizit bann pei biblik. Dan 19 vyenm syek, natiralis H. B. Tristram ti fer sa remark: “En fwa mon ti obzerv en berze pe zwe avek son troupo. I ti fer sanblan i ti pe sov zot; bann mouton ti tay deryer li e antour li. . . . Finalman troupo antye ti form en serk e sotay sotaye otour li.”

¹⁸ Akoz bann mouton i swiv zot berze? “Akoz zot konn son lavwa,” Zezi ti dir. (Zan 10:4) Eski bann mouton i vreman konn lavwa zot berze? Dapre son obzervasyon personnel, George A. Smith ti ekrir dan son liv The Historical Geography of the Holy Land: “Parfwa nou ti pas nou brek midi obor enn sa bann pwi Zideen, kot trwa ou kat berze ti vini avek zot bann troupo. Bann troupo ti melanz ansanm, e nou ti demann nou lekor ki mannyer sak berze ti pou rekonnet sa ki pour zot apre. Me apre ki troupo ti’n fini bwar delo e zwe, sak berze ti al enn par enn lo en kote vale diferan, e sakenn ti kriy dan en fason partikilye; e bann mouton ti separe avek lezot pour al sakenn kot son berze, e bann troupo ti ale annord parey zot ti’n vini.” Napa pli bon fason ki Zezi ti a kapab ilistre son pwen. Si nou aksepte e obeir son lansennyman e si nou swiv son gidans, alor nou “bon berze” pou kapab donn nou swen ranpli avek tandres ek lanmour.​—Zan 10:11.

Servi Levennman ki son Lodyans ti konnen

19. Konman Zezi ti servi en maler ki ti’n arive lokalman pour rezet en fo konsep?

¹⁹ Nou kapab pran legzanp lo bann leksperyans oubyen fe ki nou kapab tir en leson ladan. En rafal, Zezi ti servi en levennman ki ti’n fek arive pour rezet sa fo lide ki maler i ariv avek bann ki merite. I ti dir: “Sa dizwit dimoun ki ti ganny kraze ler latour dan vilaz Siloe ti tonbe, eski zot krwar ki sa bann dimoun ti pli koupab ki tou lezot zabitan Zerizalenm?” (Lik 13:4) Dan en fason konvenkan, Zezi ti montre ki sa rezonnman konsernan desten ti fo. Sa dizwit dimoun pa ti mor akoz serten pese ki zot ti’n fer e ki ti’n eksit lakoler Bondye. Plito, zot lanmor trazik ti akoz letan ek levennman san ekspekte ti’n ariv lo zot. (Eklezyast 9:11) Alors, Zezi ti montre ki en lansennyman i fo par refer avek en levennman ki son lodyans ti konnen.

20, 21. (a) Konman ki bann Farizyen ti kondann bann disip Zezi? (b) Ki resi biblik Zezi ti servi pour montre ki Zeova pa ti zanmen demann zot pour aplik son lalwa Saba dan en fason strik? (c) Ki nou pou diskite dan prosen lartik?

²⁰ Dan son lansennyman, Zezi ti osi servi bann legzanp dan Lekritir. Mazin letan bann Farizyen ti kritik son bann disip pour kas bann zepi e manz zot lagrenn zour Saba. An realite, bann disip pa ti vyol Lalwa Bondye me zot ti vyol enterpretasyon strik bann Farizyen konsernan sa ki defann fer zour Saba. Pour montre ki Bondye pa ti’n demann zot pour aplik son lalwa Saba dan en fason strik, Zezi ti refer avek en lensidan ki’n ganny rikorde dan 1 Samyel 21:3-6. Kan David ek son bann zonm ti lafen, zot ti aret kot tabernak e manz dipen prezantasyon, ki ti’n ganny ranplase. Bann vye dipen ti normalman ganny rezerve pour bann pret manze. Pourtan, dapre sirkonstans, David ek son bann zonm pa ti ganny kondannen pour manz sa dipen. Sa ki remarkab se ki sa i sel lokazyon ki’n ganny rikorde dan Labib konsernan bann non pret ki’n manz sa vye dipen. Zezi ti konn egzakteman ki resi pour servi,  e bann Zwif ki ti pe ekout li ti san dout familye avek sa.—Matye 12:1-8.

²¹ Vreman, Zezi ti en Gran Ansennyan! Nou vreman admir son abilite eksepsyonnel pour transmet bann laverite enportan dan en fason ki tous leker bann ki ti pe ekout li. Me ki mannyer nou kapab imit li dan nou lansennyman? Sa pou ganny diskite dan nou prosen lartik.

[Not anba lo paz]

Eski ou rapel?

• Akoz Zezi ti servi legzanp pour ansennyen?

• Nonm bann ka ki montre ki Zezi ti servi bann legzanp ki son lodyans dan premye syek ti kapab konpran.

• Konman Zezi ti byen servi son konnesans lo kreasyon dan son bann legzanp?

• Dan ki fason Zezi ti servi bann levennman ki son lodyans ti familye avek?

[Kestyon]

[Portre lo paz 23]

Zezi ti koz lo en serviter ki ti refize pour les pase en pti det ek en papa ki ti pardonn son garson ki ti’n pran tou son leritaz e al avek

[Portre lo paz 24]

Ki pwen Zezi ti oule fer resorti dan son parabol bon Samariten?