Imit sa Gran Ansennyan

“Ale e fer tou pep vin mon bann disip. . . . Ansenny zot pour obei tou sa ki mon’n konmande.”​—MATYE 28:19, 20.

1, 2. (a) Konman ki nou tou, dan en fason ou en lot, nou en ansennyan? (b) An sa ki konsern ansennyen, ki responsabilite spesyal bann vre Kretyen i annan?

ESKI ou en ansennyan? Dan en fason ou en lot, nou tou nou en ansennyan. Sak fwa ou donn lenstriksyon en dimoun ki’n tronp semen, sak fwa ou montre en koleg travay konman pour fer en serten louvraz, oubyen sak fwa ou eksplik en zanfan konman pour anmar son lase soulye, ou pe ansennyen. Letan nou ed lezot dan sa bann fason nou ganny serten satisfaksyon, pa i vre?

² An sa ki konsern ansennyen, bann vre Kretyen i annan en responsabilite spesyal. Nou’n ganny en misyon pour ‘fer tou pep vin disip . . . e ansenny zot.’ (Matye 28:19, 20) Dan kongregasyon osi, nou ganny loportinite pour ansennyen. Bann zonm kalifye i ganny apwente pour servi konman “paster, ou serten konman ansennyan,” avek bi pour batir kongregasyon. (Efezyen 4:11-13) Toulezour dan zot aktivite Kretyen, bann madanm ki matir i bezwen “donn bon konsey” bann madanm ki pli zenn. (Tit 2:3-5) Nou tou nou ganny konseye pour ankouraz nou bann konpanyon Kretyen, e nou kapab swiv sa konsey an servan Labib pour batir lezot. (1 Tesalonisyen 5:11) Pa i en privilez pour vin en ansennyan Parol Bondye e pour partaz bann valer spirityel ki kapab annan bann byenfe permanan!

3. Ki mannyer nou kapab vin pli efikas dan nou lansennyman?

³ Me konman nou kapab vin pli efikas dan nou lansennyman? Premyerman, par imit sa Gran Ansennyan, Zezi. Serten i kapab demann zot lekor, ‘Me ki mannyer nou kapab imit Zezi? I ti parfe li.’ I vre, nou pa kapab vin bann ansennyan parfe. Kantmenm sa, nenport ki abilite ki nou annan, nou kapab fer nou mye pour imit fason ki Zezi ti ansennyen. Annou diskite konman ki nou kapab met an pratik kat metod ki i ti servi—senplisite, bann kestyon efikas, rezonnman lozik, ek bann ilistrasyon apropriye.

Gard li senp

4, 5. (a) Akoz senplisite i en laspe enportan laverite ki sorti dan Labib? (b) Akoz i enportan pour vey bann mo ki nou servi si nou anvi ansenny dan en fason ki senp?

⁴ Bann laverite debaz dan Parol Bondye i pa konplike. Kan i ti pe priye, Zezi ti dir: “Mon remersi ou Papa, . . . akoz ou’n kasyet avek bann dimoun malen e entelizan tou sa bann keksoz, me ou’n revel li avek bann zanfan.” (Matye 11: 25) Zeova in revel son bann plan avek bann dimoun ki annan leker senser e ranpli avek limilite. (1 Korentyen 1:26-28) Alor, senplisite i en laspe enportan laverite ki sorti dan Labib.

⁵ Konman ou kapab ansenny dan en fason senp letan ou pe kondwir en letid Labib oubyen letan ou pe revizit bann dimoun enterese? Bon, ki nou’n aprann avek sa Gran Ansennyan? Pour fer sir ki son lodyans, ki laplipar ti bann dimoun “senp san gran ledikasyon” ti pou byen konpran li, Zezi ti koz dan en fason kler. (Akt 4:13) Alor pour ansenny dan en fason senp, nou bezwen premyerman vey bann mo ki nou servi. Nou pa bezwen servi bann mo oubyen fraz enpresyonan pour fer laverite ki sorti dan Parol Bondye vin pli konvenkan pour lezot. En tel “parol konplike” i kapab anbaras lezot, sirtou bann ki napa gran ledikasyon oubyen abilite. (1 Korentyen 2:1, 2) Legzanp Zezi i montre ki bann mo senp ki’n ganny byen swazir avek prekosyon i kapab transmet laverite avek bokou pwisans.

6. Ki mannyer nou kapab evite sarz en etidyan Labib avek tro bokou lenformasyon?

⁶ Pour ansenny avek senplisite, nou bezwen osi fer sir ki nou pa sarz en etidyan Labib avek tro bokou lenformasyon. Zezi ti pran an konsiderasyon limit son bann disip. (Zan 16:12) Nou osi, nou bezwen pran konsiderasyon pour sa etidyan. Par egzanp, letan nou pe kondwir en letid dan liv Konnesans Ki Anmenn ver Lavi Eternel, nou pa bezwen eksplik tou detay. * I pa ni neseser osi pour nou tay avek sa letid, konmsi keksoz pli enportan se pour kouver en serten kantite lenformasyon. Plito, i pli saz pour desid vites letid dapre bezwen ek abilite sa etidyan. Nou lobzektif se pour ed sa etidyan vin en disip Kris e en adorater Zeova. Nou bezwen pran nenport ki kantite letan ki neseser pour ed sa etidyan enterese pour byen konpran sa ki i pe aprann. Dan sa fason, laverite i kapab tous son leker e pous li pour pran aksyon neseser.—Romen 12:2.

7. Ki bann sizesyon ki kapab ed nou pour ansenny dan en fason senp kan nou donn en diskour dan kongregasyon?

⁷ Kan nou donn en diskour dan kongregasyon, sirtou kan i annan bann nouvo dan lodyans, konman nou kapab fer nou “mesaz kler”? (1 Korentyen 14:9) Annou vwar trwa sizesyon ki kapab ede. Premyerman, eksplik okenn lekspresyon etranz ki ou bezwen servi. Nou konprenezon lo Parol Bondye in donn nou en vokabiler ki inik. Si nou servi bann lekspresyon parey ‘lesklav fidel e pridan,’ ‘lezot mouton,’ ek “Gran Babilonn,” nou bezwen eksplike kwa sa, an servan bann fraz senp pour fer son definisyon kler. Dezyenmman, evite servi tro bokou mo. Tro bokou mo, ki bezwen tro bokou leksplikasyon, i kapab fer lodyans perdi lentere. Koup lo bann mo ek fraz ki pa neseser i kapab fer keksoz pli kler. Trwazyenmman, evite kouver tro bokou lenformasyon. Nou resers i kapab donn nou bokou detay enteresan. Me i pli bon pour organiz nou lenformasyon dan ennde pwen prensipal, servi zis bann lenformasyon ki siport sa bann pwen e ki kapab ganny klerman devlope dan lespas letan ki’n ganny donnen.

Servi Kestyon dan en Fason efikas

8, 9. Konman nou kapab swazir en kestyon ki kapab enteres sa dimoun ki nou zwenn kot lakour? Donn bann legzanp.

⁸ Rapel byen ki Zezi ti en eksper dan servi kestyon pour fer son bann disip eksprim sa ki zot ti pe panse, e pour ankouraz e form zot pour reflesir. An servan kestyon, Zezi ti ptit-a-pti tous zot leker. (Matye 16:13, 15; Zan 11:26) Konman ki nou kapab servi kestyon dan en fason efikas parey Zezi?

 ⁹ Kan nou pe pres port an port, nou kapab servi kestyon pour revey lentere sa dimoun, sa i donn nou loportinite pour koz lo Rwayonm Bondye. Konman nou kapab swazir en kestyon ki kapab enteres sa dimoun ki nou zwenn kot lakour? Fodre ki nou obzerv byen. Letan ou pe apros sa lakour, obzerv otour ou. Eski i annan okenn zouzou dan lari, ki endike ki i annan zanfan dan sa lakour? Si wi, nou kapab demande: ‘Eski ou’n deza demann ou lekor konman ki lemonn pou ete kan ou zanfan i grandi?’ (Psonm 37:10, 11) Eski i annan detrwa lok lo laport devan, oubyen eski i annan en sistenm sekirite? Nou kapab demande: ‘Eski ou krwar ki en zour bann dimoun parey ou ek mwan pou kapab santi zot an sekirite se zot e lo semen?’ (Mika 4:3, 4) Eski i annan en pti lapant pour wiltyer antre e sorti anndan? Nou kapab demande, ‘Eski pou annan en letan kot tou dimoun pou kapab annan en bon lasante?’ (Izai 33:24) Nou kapab trouv plizyer sizesyon dan liv Comment raisonner à partir des Écritures. *

10. Konman nou kapab servi kestyon pour arive konn panse ek santiman dan leker en etidyan Labib, me ki nou devret gard antet?

¹⁰ Ki mannyer nou kapab byen servi kestyon kan nou pe kondwir letid Labib? Kontrerman avek Zezi, nou pa kapab lir dan leker dimoun. Toudmenm, si nou demann kestyon avek disernman e vey fason ki nou dir li, sa pou kapab ed nou pour arive konn bann panse ek santiman dan leker sa etidyan. (Proverb 20:5) Par egzanp, meton nou pe etidye sa sapit “Akoz En Lavi ki Konform avek Lavolonte Bondye i Aport Boner,” dan liv Konnesans. Sa sapit i diskit pwennvi Bondye lo malonnekte, fornikasyon, ek lezot size. Sa etidyan i kapab byen reponn kestyon ki dan liv, me eski i dakor avek sa ki i pe aprann? Nou kapab demande: ‘Eski pwennvi Zeova lo sa bann size i paret rezonnab pour ou?’ ‘Ki mannyer ou kapab aplik sa bann prensip Labib dan ou lavi?’ Parkont, gard antet ki nou bezwen montre respe, pa abes dinite sa etidyan. Nou pa ti ava anvi demann bann kestyon ki ti pou anbaras oubyen abes sa etidyan Labib.—Proverb 12:18.

11. Konman bann frer ki donn diskour piblik i kapab servi kestyon dan en fason efikas?

¹¹ Bann frer ki fer diskour piblik i kapab osi servi kestyon dan en fason efikas. Zot kapab servi bann kestyon ki nou pa ekspekte lodyans reponn for, me ki ed zot pour reflesir e rezonnen. Parfwa Zezi ti servi sa bann kalite kestyon. (Matye 11:7-9) Deplis, apre ki en orater in fer son lentrodiksyon, i kapab servi kestyon pour donn en apersi lo bann pwen prensipal ki pou ganny diskite. I kapab dir: “Dan nou diskour ozordi, nou pou egzamin larepons pour sa bann kestyon swivan . . .” Apre, dan konklizyon, i kapab refer avek sa bann kestyon pour revwar bann pwen prensipal.

12. Donn en legzanp pour montre ki bann ansyen i kapab servi kestyon pour ed en konpanyon Kretyen pour retir rekonfor dan Parol Bondye.

¹² Dan zot vizit pastoral, bann ansyen i kapab servi kestyon pour ed “bann ki dekouraze” pour retir rekonfor dan Parol Zeova. (1 Tesalonisyen 5:14, NW ) Par egzanp, pour ed en dimoun ki santi li dekouraze, en ansyen i kapab atir son latansyon lo Psonm 34:18. Sa verse i dir ki Zeova i pre avek bann ki annan leker brize e ki vreman dekouraze. Pour fer sir ki sa dimoun i vwar konman sa i aplik pour li personnelman, sa ansyen i kapab demande: ‘Zeova i pre avek lekel? Eski parfwa ou santi ou leker brize e ou santi ou vreman dekouraze? Si parey Labib i dir, Zeova i pre avek sa bann kalite dimoun, eski sa pa i vedir ki i  pre avek ou?’ En tel lasirans ranpli avek tandres i kapab relev moral sa dimoun dekouraze.—Izai 57:15.

Rezonnman lozik

13, 14. (a) Ki mannyer nou kapab rezonn avek en dimoun ki dir i pa krwar dan en Bondye ki i pa kapab vwar? (b) Akoz nou pa ekspekte tou dimoun pour konvenki?

¹³ Dan nou minister, nou anvi tous leker dimoun avek bann bon rezonnman ki konvenkan. (Akt 19:8; 28:23, 24) Eski sa i vedir ki nou bezwen servi bann rezonnman konplike pour arive konvenk lezot konsernan laverite dan Parol Bondye? Pa ditou. Bann bon rezonnman pa bezwen konplike. Souvan, bann largiman lozik ki ganny prezante dan en fason senp i pli efikas. Annou vwar en legzanp.

¹⁴ Konman nou kapab reazir kan en dimoun i dir i pa krwar dan en Bondye ki i pa vwar? Nou kapab rezonn lo lalwa natirel, ki en rezilta i bezwen annan son lakoz. Kan nou vwar rezilta en keksoz, nou aksepte ki i bezwen annan en lakoz. Nou kapab demande: ‘Si ou dan en landrwa rezete e la ou trouv en lakaz byen konstri e i ekipe avek manze ladan (rezilta), ou pou definitivman aksepte ki en dimoun (lakoz) in konstri sa lakaz e ranpli son bann kabinet. Pareyman, letan nou vwar fason ki lanatir in ganny fer e sa labondans manze dan “kabinet” later (rezilta), eski pa i fer sans pour aksepte ki Kelken (lakoz) i responsab pour sa?’ En largiman senp dan Labib i byen fer sa resorti: “Wi, tou lakaz i bezwen annan en dimoun ki’n konstri li, me konstrikter tou keksoz se Bondye.” (Ebre 3:4) Toudmenm, pa tou dimoun ki pou konvenki menm si nou kapab vin avek pli bon rezonnman posib. Labib i rapel nou ki zis bann ki “dan dispozisyon neseser” ki pou vin krwayan.—Akt 13:48, NW; 2 Tesalonisyen 3:2.

15. Ki kalite rezonnman nou kapab servi pour met lanfaz lo bann kalite Zeova ek son fason fer keksoz? Nonm de legzanp ki montre konman nou kapab servi en tel rezonnman.

¹⁵ Letan nou ansennyen, ki swa dan predikasyon oubyen dan kongregasyon, nou kapab servi rezonnman lozik pour met lanfaz lo bann kalite Zeova ek son fason fer keksoz. En kalite rezonnman ki sirtou efikas i sa enn ki Zezi ti servi an dizan: “I annan plis rezon pour . . .” (Lik 11:13; 12:24) Baze lo diferans, sa kalite rezonnman i kapab fer en gran lefe lo en dimoun. Pour montre konman ki sa doktrin lanfer dife pa rezonnab, nou kapab demande: ‘Okenn papa ki kontan son piti pa ti pou bril lanmen son piti dan dife. Pa i annan plis rezon pour nou Papa lanmour dan lesyel annan en repinyans pour sa lide lanfer dife!’ (Zeremi 7:31) Pour ansennyen ki Zeova i enterese avek sak son bann serviter endividyelman, nou kapab dir: ‘Si Zeova i konn non sak sa plizyer bilyon zetwal ki egziste, pa i annan plis rezon pour li enterese avek bann imen ki kontan li e ki’n ganny aste avek disan presye son Garson!’ (Izai 40:26; Akt 20:28) En tel rezonnman pwisan i kapab ed nou pour tous leker lezot.

Bann Legzanp apropriye

16. Akoz i enportan pour servi legzanp kan nou ansennyen?

¹⁶ Bann legzanp efikas i parey en zepis ki kapab fer nou lansennyman pli apetisan pour lezot. Akoz i enportan pour servi legzanp letan nou pe ansennyen? En profeser ti fer sa remark swivan: “Enn bann keksoz pli difisil pour imen fer se pour reflesir san okenn legzanp.” Bann legzanp i fer bann bon portre grave dan nou lespri, i ed nou pli byen konpran bann nouvo lide. Zezi ti remarkab dan fason ki i ti servi legzanp. (Mark 4:33, 34) Annou vwar konman nou kapab servi sa metod lansennyman.

17. Nonm sa kat fakter ki fer en legzanp efikas.

¹⁷ Kwa ki fer en legzanp efikas? Premyerman, i devret adapte avek nou lodyans. Servi bann sitiasyon ki nou lodyans i kapab fasilman konnen ki nou pe koz lo la. Nou kapab rapel ki Zezi ti baz bokou son bann legzanp lo lavi toulezour son lodyans. Dezyenmman, en legzanp i devret al byen avek sa pwen ki nou oule fer resorti. Si konparezon ki nou fer pa vreman apropriye, sa legzanp i kapab zis kas konsantrasyon nou lodyans. Trwazyenmman, en legzanp pa devret enkli bann detay ki pa neseser. Mazinen ki Zezi ti presize ler ti neseser me i pa ti mansyonn  bann keksoz ki pa ti esansyel. Katriyenmman, kan nou donn en legzanp, nou devret fer sir ki son laplikasyon i kler. Si non, serten i kapab pa ganny sa pwen ki nou oule fer resorti.

18. Ki mannyer nou kapab mazin bann bon legzanp?

¹⁸ Ki mannyer nou kapab mazin bann bon legzanp? Nou pa bezwen al mazin bann gran zistwar konplike. Bann pti legzanp i kapab byen efikas. Zis sey mazin en legzanp sa pwen ki pe ganny diskite. Meton nou pe diskit lo mizerikord Bondye, e nou anvi ilistre sa pwen ki ganny fer resorti dan Akt 3:19 dan Traduction du monde nouveau, kot i dir ki Zeova i ‘efas’ nou bann fot. Sa dan li menm i kree en portre vivan dan nou lespri. Me ki legzanp reel nou kapab servi pour ilistre sa pwen—en lagonm? en leponz? Nou kapab dir: ‘Kan Zeova i pardonn nou pese, i konmsi i pran en lagonm e efas zot.’ An servan en senp legzanp koumsa, i pou fasil pour en dimoun ganny sa pwen ki nou pe fer resorti.

19, 20. (a) Kote nou kapab trouv bann bon legzanp pour servi? (b) Donn serten legzanp efikas ki’n ganny pibliye dan nou piblikasyon? (Vwar bwat osi.)

¹⁹ Kote nou kapab trouv bann legzanp apropriye ki baze lo lavi toulezour? Gete si ou pa trouv zot dan ou prop lavi, oubyen dan diferan lorizin ek leksperyans bann konpanyon Kretyen. Nou kapab swazir bann legzanp dan diferan lezot sours, ki enkli bann keksoz vivan, bann lobze, bann keksoz lakaz, oubyen en levennman ki fek pase ki tou dimoun dan kominote in tande. En bon fason pour trouv bann bon legzanp se pour port byen atansyon, “get” byen bann sitiasyon dan lavi toulezour otour nou. (Akt 17:22, 23) En travay referans lo lar oratwar i eksplike: “En orater ki obzerv lavi imen ek son diferan aktivite, ki koz avek tou sort kalite dimoun, ki egzamin keksoz byen e demann kestyon ziska ki i arive konpran zot, pou ranmas en kantite lide konman legzanp ki pou vreman itil pour li kan i bezwen.”

²⁰ I annan ankor en lot sours kot nou kapab trouv bokou legzanp efikas—Latour Veyer, Réveillez-vous!, ek lezot piblikasyon prodwir par Temwen Zeova. Ou kapab aprann bokou si ou reflesir lo fason sa bann piblikasyon i servi sa bann legzanp. * Pran sa legzanp ki’n ganny servi dan liv Konnesans, sapit 17, paragraf 11. I pe konpar bann diferan personnalite dan kongregasyon avek diferan transpor ki pe vwayaz akote ou lo menm semen. Kwa ki fer li efikas? Remarke ki i baze lo bann sitiasyon toulezour, i al byen avek sa pwen ki pe ganny fer resorti, e son laplikasyon i kler. Dan nou lansennyman nou kapab servi bann legzanp ki’n deza aparet dan en piblikasyon, e petet adapte zot avek bezwen en etidyan Labib oubyen pour servi dan en diskour.

21. Ki rekonpans nou gannyen kan nou vin en ansennyan efikas Parol Bondye?

²¹ En ansennyan efikas i ganny bann gran rekonpans. Letan nou ansennyen, nou partaz avek lezot; nou servi serten nou resours pour ed zot. Donn dan sa fason i anmenn lazwa, parski Labib i dir: “I annan plis lazwa pour donnen ki pour resevwar.” (Akt 20:35) Pour bann ansennyan Parol Bondye, sa lazwa i sa lakontantman ki nou resanti letan nou konnen ki nou pe donn en keksoz ki annan en vre valer dirab—laverite konsernan Zeova. Nou kapab osi resanti en satisfaksyon letan nou konnen ki nou pe imit sa Gran Ansennyan, Zezi Kri.

[Not anba lo paz]

Eski ou mazinen?

• Konman nou kapab ansenny dan en fason senp letan nou pe kondwir en letid Labib? letan nou pe donn en diskour dan kongregasyon?

• Ki mannyer nou kapab servi kestyon dan en fason efikas kan nou pres port an port?

• Konman nou kapab servi rezonnman lozik pour met lanfaz lo bann kalite Zeova ek son fason fer keksoz?

• Kote nou kapab trouv bann legzanp apropriye?

[Kestyon]

 [Bwat lo paz 31]

Eski ou mazin sa bann Legzanp?

Nou kapab vwar anba zis ennde legzanp efikas. Akoz ou pa rod zot referans e remarke konman ki sa legzanp ti ede fer resorti sa pwen ki ti pe ganny diskite?

• Gouvernman imen i kapab ganny konpare avek bann pwen zegwiy ki neseser apre en blesir. Zis parey sa difil pa form parti ou lekor, gouvernman imen pa ti form parti plan orizinal Bondye. Me ziska ki Rwayonm Bondye i vini, gouvernman imen pe ede prezerv serten lord dan lasosyete, parey sa difil ki ede protez sa blesir.​—Konnesans Ki Anmenn ver Lavi Eternel, paz 133.

• Eksprim ou santiman i kapab ganny konpare avek en boul ki ou pe anvoye. Ou kapab lans li dousman oubyen anvoy li for ki i kapab bles sa dimoun.​—Konnesans Ki Anmenn ver Lavi Eternel, paz 144.

• Aprann montre lanmour i parey aprann en nouvo langaz.—La Tour de Garde le 15 Fevriye, 1999, paz 18, 22-3.

• Parey en keksoz ki’n ganny grave lo en ros, pese ti’n grave dan sistenm erediter nou premye paran.​—Konnesans Ki Anmenn ver Lavi Eternel, paz 58.

• Spiritizm i annan menm fonksyon avek en labwet servi par bann peser. I atir en viktim.​—Konnesans Ki Anmenn ver Lavi Eternel, paz 111.

• Fason ki Zezi in vin sov bann desandans Adan, i kapab ganny konpare avek en dimoun ris ki pey det en lakonpanni (koze par en manedyer malonnet) ki fer ki sa lakonpanni i reouver, e sa i benefisye tou son bann travayer.​—La Tour de Garde le 15 Fevriye, 1991, paz 13.

• Zis parey bann ki apresye lar pou fer tou sa ki zot kapab pour repar en travay zenyal ki’n ganny abimen, Zeova i kapab vwar sa ki byen dan nou olye ki zis nou bann defo, e finalman i pou refer nou vin parfe parey Adan ti ete okonmansman.​—Konnesans Ki Anmenn ver Lavi Eternel, paz 181.

[Portre lo paz 28]

Bann vre Kretyen i ansenny Parol Bondye

[Portre lo paz 29]

Bann ansyen i kapab servi kestyon pour ed bann Kretyen pour retir rekonfor dan Parol Bondye