‘Kontinyen swiv mwan’

“Se pour sanmenm, annefe, ki Bondye in apel zot, parski Kris limenm in soufer pour zot, an lesan pour zot en legzanp pour zot swiv.”​—1 PYER 2:21.

1, 2. Akoz legzanp parfe Zezi konman en ansennyan i pa enposib pour nou imite?

NAPA en pli gran ansennyan ki’n deza viv lo later apard ki Zezi Kri. Deplis, i ti parfe, toudilon son lavi lo later i pa ti zanmen fer okenn pese. (1 Pyer 2:22) Me, eski sa i vedir ki legzanp Zezi konman en ansennyan i tro onivo pour nou imen enparfe imite? Pa ditou.

² Parey nou’n vwar dan nou lartik presedan, Zezi ti baz son lansennyman lo lanmour. E lanmour i en keksoz ki nou tou nou kapab kiltive. Avek bokou lanfaz, Parol Bondye i souvan ankouraz nou pour ogmant e amelyor nou lanmour pour lezot. (Filipyen 1:9; Kolosyen 3:14) Zeova pa zanmen demann bann imen pour fer keksoz ki zot pa kapab fer. Annefe, vi ki “Bondye i lanmour” e i’n fer nou dan son resanblans, nou kapab dir ki i’n kree nou pour montre lanmour. (1 Zan 4:8; Zenez 1:27) Ler nou lir parol zapot Pyer dan nou teks kle, nou kapab annan lasirans ki nou pou kapab fer li. Nou kapab swiv legzanp Kris. Annefe, nou kapab obeir konmannman Zezi: ‘Kontinyen swiv mwan.’ (Lik 9:23) Annou egzaminen konman nou kapab imit lanmour ki Kris in demontre, premyerman pour laverite ki i ti ansennyen, e pour dimoun ki i ti ansennyen.

Devlop Lanmour pour Laverite ki nou aprann

3. Akoz serten i vwar li difisil pour etidye, me ki Proverb 2:1-5 i ankouraz nou pour fer?

³ Pour kontan laverite ki nou ansenny lezot, fodre ki nou menm nou kontan pour aprann bann tel laverite. Dan sa monn ozordi, lanmour pour aprann bann tel keksoz pa toultan devlop fasilman. Mank ledikasyon skoler ek move labitid ki’n ganny devlope depi lanfans i parmi plizyer keksoz ki fer bokou dimoun napa en gou pour etidye. Me i esansyel ki nou aprann avek Zeova. Proverb 2:1-5 i dir: “Mon garson, si ou resevwar mon bann parol e apresye mon bann komannman, pour port  latansyon lo lasazes avek ou zorey, afen ki ou a ouver ou leker ver disernman; si, anplis ki sa, ou kriy lentelizans li menm e ou fer rezonnen ou lavwa ver disernman li menm, si ou kontinyen rod li konmsi larzan, e ou kontinyen resers li konmsi ou pe resers en trezor kasyet, dan sa ka, ou pou konpran lakrent Zeova, e ou pou trouv konnesans Bondye.”

4. Ki savedir “ouver” ou leker, e ki pwennvi ki pou ed nou pour fer sa?

⁴ Remarke ki dan verse 1 ziska 4, nou ganny ankouraze plizyer fwa pour fer zefor pour pa zis “resevwar” e “apresye,” me osi pour “kontinyen rod li” e “kontinyen resers li.” Me kwa ki pou motiv nou pour fer tousala? Get ki sa fraz i dir, “Ouver ou leker ver disernman.” En komanter ki’n ganny fer lo sa konsey i dir ki “i pa pe zis demande pour port latansyon; me pour devlop en serten latitid: en gran lentere pour ganny ansennyen.” E kwa ki kapab fer nou pare pour resevwar e anvi aprann sa ki Zeova i ansenny nou? Se nou pwennvi. Nou bezwen vwar “konnesans Bondye” konman “larzan” ek en “trezor kasyet.”

5, 6. (a) Ki kapab arive avek letan, e konman nou kapab anpes sa arive? (b) Akoz nou bezwen kontinyen ogmant sa konnesans ki nou’n trouve dan Labib?

⁵ I pa difisil pour ganny en tel pwennvi. Par egzanp, i probab ki “konnesans Bondye” ki ou’n deza aprann i enkli sa laverite ki plan Zeova i ki bann imen fidel i viv pour touzour dan Paradi lo later. (Psonm 37:28, 29) Ler ou ti fek aprann sa laverite, sirman ou ti vwar li konman en vre trezor, en fe ki ti ranpli ou lespri ek leker avek lespwar ek lazwa. Me eski i ankor leka ozordi? Avek letan ki’n pase, eski lapresyasyon pour ou trezor in vin feb oubyen sonm? Si wi, esey fer de keksoz. Premyerman, renouvle ou lapresyasyon, savedir, regilyerman rapel ou lekor akoz ou apresye sak laverite ki Zeova in ansenny ou, menm bann ki ou’n aprann depi byen lontan.

⁶ Dezyenmman, kontinyen ogmant ou trezor. Fer konmsi ou pe fouye e ou trouv en pyer presye, eski ou pou zis met li dan ou pos e ale byen kontan? Okontrer, pa ou pou kontinyen fouye pour gete si i annan ankor? Parol Bondye i ranpli avek laverite presye ki parey larzan ek trezor kasyet. Kantmenm ou’n arive trouv en kantite, ou kapab trouv plis ankor. (Romen 11:33) Ler ou dekouver en morso laverite, demann ou lekor: ‘Kwa ki fer li en trezor? Eski sa i ed mwan pli byen konpran personnalite oubyen  plan Zeova? Eski i ofer serten gidans pratik ki kapab ed mwan pour swiv legzanp Zezi?’ Medit lo sa bann kestyon pou ed ou devlop ou lanmour pour laverite ki Zeova in ansenny ou.

Montre Lanmour pour Laverite ki nou ansennyen

7, 8. Ki serten fason nou kapab montre lezot ki nou kontan laverite ki nou’n aprann dan Labib? Donn en legzanp.

⁷ Anmezir ki nou ansenny lezot, konman nou kapab montre ki nou kontan laverite ki nou’n aprann dan Parol Bondye? An swivan legzanp Zezi, nou depann bokou lo Labib ler nou pe prese e ansennyen. Tou dernyenman, pep Bondye partou dan lemonn in ganny ankouraze pour servi Labib plis ankor dan zot minister piblik. Ler ou aplik sa sizesyon, rod fason pour fer sa dimoun konnen ki ou menm ou apresye sa ki ou pe partaze dan Labib.​—Matye 13:52.

⁸ Par egzanp, apre latak teroris lannen pase dan lavil New York, en ser Kretyen ti pe partaz sa panse dan Psonm 46:1, 11 avek dimoun ki i ti rankontre dan predikasyon. Premyerman, i ti demann dimoun ki mannyer zot pe fer fas avek sa trazedi. I ti byen ekoute e montre son konsern, e apre i ti dir: “Permet mwan partaz en verse Labib avek ou ki’n vreman rekonfort mwan pandan sa letan difisil?” Ti napa bokou dimoun ki ti refize, e sa ser in reisi ganny bann bon diskisyon. Ler i koz avek bann zenn dimoun, sa menm ser i souvan dir: “I fer 50 an depi ler mon pe ansenny Labib, e les mwan dir ou en keksoz. Mon pa’n zanmen rankontre en problenm ki sa liv pa’n kapab ede pour rezoud.” Par servi en lapros senser ranpli avek lantouzyasm, nou montre dimoun ki nou apresye e osi kontan sa ki nou’n aprann dan Parol Bondye.​—Psonm 119:97, 105.

9, 10. Akoz i enportan pour servi Labib ler nou pe reponn kestyon konsernan nou krwayans?

⁹ Ler dimoun i demann nou kestyon konsernan nou krwayans, sa i donn nou en bon loportinite pour montre ki nou kontan Parol Bondye. An swivan legzanp Zezi, nou pa  senpleman baz nou larepons lo nou prop lide. (Proverb 3:5, 6) Okontrer, nou les Labib reponn. Eski ou per ki en dimoun i demann ou en kestyon ki ou pa pou kapab reponn? Annou vwar de keksoz pratik ki ou kapab fer pour sirmont sa problenm.

¹⁰ Prepar ou pli byen posib. Zapot Pyer ti ekrir: “Me rann glwar dan zot leker Kris konman zot Senyer. Zot devre touzour pare pour donn en repons bann ki demann zot leksplikasyon konsernan lesperans ki dan zot. Me fer li avek labonte ek respe.” (1 Pyer 3:15, 16) Eski ou pare pour defann ou krwayans? Par egzanp, si en dimoun i anvi konnen akoz ou pa partisip dan serten koutim oubyen pratik ki pa biblik, eski ou pou kontant ou pour zis dir, “Sa i kont mon larelizyon.” Si ou reponn koumsa, dimoun i kapab panse ki ou les lezot fer ou desizyon e ki ou form parti en sekt. I kapab pli bon pour dir, “Parol Bondye, Labib, i defann fer sa,” oubyen, “I pou depler Bondye.” Apre, donn en leksplikasyon rezonnab konsernan akoz ou pa fer sa.​—Romen 12:1.

11. Ki liv resers ki kapab ed nou pour pare pour reponn kestyon konsernan laverite dan Parol Bondye?

¹¹ Si ou santi ki ou pa pare, akoz ou pa pran letan e etidye liv Comment raisonner à partir des Écritures si i disponib dan ou langaz? * Swazir detrwa size ki kapab monte, e memoriz serten pwen Biblik. Organiz ou pour ou kapab fasilman ganny akse avek ou liv Comment raisonner ek ou Labib. Pa ezite pour servi tou le de. Dir sa dimoun ki ou annan en liv ki ou kontan servi pour fer resers ladan, ki ede trouv larepons Labib pour bann kestyon.

12. Ki mannyer nou kapab reazir si nou pa konn larepons pour en kestyon lo Labib?

¹² Pa trakas tro bokou. Napa okenn imen enparfe ki konn tou larepons. Alor ler ou ganny demande en kestyon lo Labib ki ou pa kapab reponn, pa ezite pour reponn koumsa: “Mersi pour lev sa kestyon enteresan. Fransman, mon pa konn larepons, me mon sir ki Labib i abord sa topik. Mon kontan fer resers lo Labib, alor mon ava get ou kestyon e retourn avek en larepons pour ou.” En tel lapros fran ek onnet i kapab ouver semen pour plis diskisyon.​—Proverb 11:2.

Lanmour pour Dimoun ki nou ansennyen

13. Akoz nou devret gard en pwennvi pozitif konsernan bann dimoun ki nou pres avek?

¹³ Zezi ti montre lanmour pour dimoun ki i ti ansennyen. Ki mannyer nou kapab imit li dan sa domenn? Nou pa devret zanmen devlop en latitid ensansib anver dimoun otour nou. I vre, ‘konba sa gran zour Bondye Toupisan’ pe apros pli pre, e bokou parmi sa plizyer bilyon dimoun pou ganny detri. (Revelasyon 16:14; Zeremi 25:33) Me nou pa konnen lekel ki pou viv e lekel ki pou mor. Sa zizman pou ariv dan lavenir e se Zezi Kri ki Zeova in apwente pour fer sa zizman. Ziska ki sa zizman  i pase, nou konsider sak endividi konman enn ki kapab vin en serviter Zeova.​—Matye 19:24-26; 25:31-33; Akt 17:31.

14. (a) Ki mannyer nou kapab egzamin nou lekor pour vwar si nou annan santiman pour dimoun? (b) Dan ki fason pratik nou kapab montre santiman ek lentere personnel pour lezot?

¹⁴ Alor, parey Zezi, nou esey rod fason pour annan konpasyon pour dimoun. Nou kapab demann nou lekor: “Eski mon annan santiman pour bann dimoun ki’n ganny tronpe par bann mansonz ek riz bann group relizye, politik, e komersyal sa monn? Si i paret ki zot pa enterese avek sa mesaz ki nou pe anmennen, eski mon esey konpran akoz zot santi koumsa? Eski mon rekonnet ki mwan menm ek lezot ki pe servi Zeova fidelman ti annan menm santiman oparavan? Eski mon’n adapte mon fason prese avek zot sirkonstans? Oubyen eski mon rezet sa bann dimoun konmsi i enposib pour zot sanze?’ (Revelasyon 12:9) Ler dimoun i santi lentere senser ki nou annan pour zot, i annan plis posibilite ki zot pou reazir byen anver nou mesaz. (1 Pyer 3:8) Konpasyon i kapab osi motiv nou pour pran plis lentere dan dimoun ki nou rankontre dan nou minister. Nou kapab ekrir zot kestyon ek lentere. Ler nou retournen, nou kapab montre zot ki nou’n reflesir lo bann remark ki zot ti fer ler nou ti vizit zot pour premye fwa. E fer zot konnen ki si zot bezwen okenn led, nou kapab ofer serten led pratik.

15. Akoz nou devret get sa ki bon dan dimoun, e konman nou kapab fer sa?

¹⁵ Parey Zezi, nou rod sa ki bon dan dimoun. Petet en paran tousel pe fer en zefor remarkab pour elve son zanfan. En zonm pe lite pour sonny son fanmiy. En dimoun aze i montre en lentere dan keksoz spirityel. Eski nou remark sa bann kalite dan dimoun ki nou rankontre e felisit zot? Ler nou fer sa, nou montre keksoz ki nou annan an komen avek sa dimoun e petet kree loportinite pour donn en temwannyaz konsernan Rwayonm.​—Akt 26:2, 3.

Limilite i esansyel pour montre Lanmour

16. Akoz i enportan pour annan labonte ek respe anver bann dimoun ki nou pres avek?

¹⁶ Lanmour pour dimoun ki nou ansennyen pou motiv nou pour obeir sa lavertisman saz dan Labib: “Konnesans i fer nou gonfle, me tandis ki lanmour i konstri.” (1 Korentyen 8:1) Zezi ti annan en gran konnesans, me i pa ti zanmen arogan. Alor ler ou partaz ou krwayans avek lezot, pa koz konmsi ou pe atak sa dimoun oubyen dan en zar arogan. Nou lobzektif se pour tous leker e atir dimoun ver laverite ki nou sitan kontan. (Kolosyen 4:6) Mazinen, ler Pyer ti konsey bann Kretyen pour pare pour fer en defans, i ti osi rapel nou ki nou devret “fer li avek labonte ek respe.” (1 Pyer 3:16) Si nou annan labonte ek respe, nou pou pli kapab atir dimoun ver sa Bondye ki nou servi.

17, 18. (a) Ki mannyer nou devret reazir anver bann kritik konsernan nou kalifikasyon konman minis? (b) Akoz konn en langaz ansyen dan letan Labib pa esansyel pour en etidyan Labib?

¹⁷ Napa okenn nesesite pour nou enpresyonn dimoun avek nou konnesans oubyen ledikasyon. Si serten dan ou teritwar i refize pour ekout okenn dimoun ki napa serten degre liniversite oubyen ledikasyon, pa les zot latitid dekouraz ou. Zezi pa ti antren lobzeksyon konmkwa ki i pa’n al dan sa gran lekol ki bann profeser Lalwa ti frekante dan son letan. I pa ti ni les li ganny enfliyanse avek bann prezidis par esey enpresyonn dimoun avek son gran konnesans.​—Zan 7:15.

¹⁸ Pour bann minis Kretyen, limilite ek lanmour i bokou pli enportan ki okenn degre ledikasyon. Se sa Gran Edikater, Zeova, ki fer nou kalifye pour nou minister. (2 Korentyen 3:5, 6) E nenport kwa ki serten dirizan Kretyente i dir, pa fodre ki nou aprann langaz ki ti ganny servi dan letan Labib pour kapab vin bann ansennyan Parol Bondye. Zeova ti fer ki Labib i ganny ekrir dan en fason kler e presi, ki  preski tou dimoun i kapab konpran son bann laverite presye. Kantmenm zot in ganny tradwir dan plizyer santenn langaz, sa bann laverite pa’n sanze. Alor, kantmenm parler konn en langaz ansyen i kapab itil, i pa esansyel. Deplis, parfwa lorgey ki en dimoun i annan letan i konn sa bann langaz, i kapab fer li perdi en kalite ki esansyel pour vre Kretyen—pare pour aprann avek lezot.​—1 Timote 6:4.

19. Dan ki sans nou minister Kretyen i en servis?

¹⁹ Napa okenn dout ki nou minister Kretyen i en travay ki demann limilite. Nou regilyerman ekspoz nou avek lopozisyon, lendiferans, e menm persekisyon. (Zan 15:20) Toudmenm, par fidelman akonpli nou minister, nou pe akonpli en servis tre enportan. Si nou kontinyen servi lezot avek limilite dan sa travay, nou pe imit lanmour ki Zezi Kri ti montre anver dimoun. Reflesir: Si nou ti bezwen pres avek mil dimoun ki pa enterese oubyen opoze zis pour trouv en sel dimoun senser, eski sa pa pou vo sa zefor ki nou’n fer? Definitivman! Alor par persiste dan sa travay, e pa zanmen arete, nou pe fidelman servi bann ki senser ki nou pa ankor zwenn. Sirman Zeova ek Zezi pou fer sir ki bokou plis dimoun presye pou ganny trouve e ede avan lafen i arive.​—Agai 2:7.

20. Nonm serten fason kot nou kapab ansenny par nou legzanp?

²⁰ Ansenny par nou legzanp i en lot fason pour montre ki nou anvi servi lezot. Par egzanp, nou anvi ansenny dimoun ki servi Zeova, sa “Bondye ere,” i fason pli bon e pli satisfezan pour viv. (1 Timote 1:11) Ler zot obzerv nou kondwit ek relasyon avek nou vwazen, kanmarad lekol, koleg travay, eski zot kapab remarke ki nou zwaye e satisfe? Pareyman, nou ansenny etidyan Labib ki kongregasyon Kretyen i en landrwa kot i annan lanmour dan en monn vyolan e san santiman. Eski nou etidyan i kapab fasilman vwar ki nou kontan tou dimoun dan kongregasyon e travay dir pour prezerv lape avek kanmarad?​—1 Pyer 4:8.

21, 22. (a) Ler nou egzamin nou lekor an rapor avek nou minister, ki loportinite nou kapab sezi? (b) Ki pou ganny diskite dan bann prosen lartik dan sa nimero Latour Veyer?

²¹ Si nou annan en latitid pozitif anver nou minister, sa i kapab motiv nou pour reegzamin nou lekor parler. Bokou ki’n egzamin zot lekor onnetman, in dekouver ki zot dan en pozisyon pour elarzi zot minister par antreprann servis aplentan oubyen deplase pour servi kot i annan en pli gran bezwen. Lezot in deside pour aprann en lot langaz pour servi bann kominote imigran ki deplizanpli pe ogmante dan zot prop teritwar. Si ou annan sa bann opsyon, egzamin zot atantivman e fer zot vin size ou lapriyer. Viv en lavi pour servi lezot i anmenn bokou lazwa, satisfaksyon, ek lape lespri.​—Eklezyast 5:12.

²² Par tou mwayen, annou kontinyen imit Zezi Kri an devlopan nou lanmour pour laverite ki nou ansennyen e pour dimoun ki nou ansennyen. Devlop e demontre lanmour dan sa de laspe pou ed nou pour met en bon fondasyon pour vin bann ansennyan parey Kris. Me konman nou kapab devlop lo sa fondasyon? Sa seri lartik ki swiv pou diskit serten metod spesifik ki Zezi ti servi pour ansennyen.

[Not anba lo paz]

Ki ou pou reponn?

• Ki lasirans nou annan ki legzanp Zezi konman en ansennyan i pa tro onivo pour nou imite?

• Ki mannyer nou kapab montre ki nou kontan laverite ki nou’n aprann dan Labib?

• Akoz i enportan ki nou gard nou limilite anmezir ki nou ganny plis konnesans?

• Nonm serten fason kot nou kapab montre lanmour pour dimoun ki nou pe esey ansennyen?

[Kestyon]

[Portre lo paz 12]

Prepar ou pli byen posib

[Portre lo paz 12, 13]

Si ou apresye “konnesans Bondye” ou kapab byen servi Labib

[Portre lo paz 14]

Nou montre lanmour pour dimoun par partaz sa bon nouvel avek zot