Konnesans egzakt lo Bondye i rekonfort nou

POUR serten dimoun, sa ki Labib i dir lo lanmour ek mizerikord Bondye i fer zot demann bann kestyon ki trakas zot. Zot demande: Si Bondye i anvi elimin mesanste, i konnen konman pour fer li, e i annan sa pouvwar pour fer li, akoz keksoz mal i kontinyen ogmante? Problenm ki zot rankontre se pour rekonsilye trwa keksoz ansanm ki paret pa an akor avek kanmarad: (1) Bondye i tou pwisan; (2) Bondye i lanmour e i bon; e (3) bann levennman katastrofik i kontinyen arive. Zot mazinen vi ki sa enn trwazyenm i definitivman vre, alors i bezwen ki enn parmi sa de lezot i fo. Pour zot, swa Bondye pa kapab aret mesanste ouswa i pa enterese avek sa ki pe arive lo later.

Detrwa zour apre destriksyon World Trade Center an New York, en gran sef relizye an Letazini ti dir: “Mon’n ganny demande . . . en santenn fwa dan mon lavi akoz ki Bondye i permet trazedi ek soufrans. Mon bezwen admet ki mon pa konn larepons san poursan. E mwan menm mon pa satisfe avek larepons ki mon’n gannyen.”

Dan son komanter lo sa ki sa sef relizye ti dir, en ansennyan larelizyon ti ekrir ki i ti enpresyonnen par “sa bon krwayans” ki sa sef relizye ti prese. I ti osi siport pwennvi en spesyalis Labib ki ti ekrir: “Difikilte pour konpran akoz soufrans i egziste i form parti sa difikilte pour konpran Bondye.” Me eski i vreman enposib pour konpran akoz Bondye i permet soufrans?

Lorizin Mesanste

Kontrerman avek sa ki bann sef relizye i kapab dir, Labib i fer nou konpran akoz Bondye i permet mesanste. I enportan pour nou konnen ki Zeova pa ti kree en lemonn ranpli avek mesanste, e sa pou ed nou konpran pli byen sa size konsernan mesanste. I ti kree sa premye koup imen parfe, san pese. Zeova ti obzerv son travay kreasyon e vwar ki i ti “tre bon.” (Zenez 1:26, 31) I ti son plan pour Adan ek Ev agrandi Paradi Edenn partou lo later e pour ranpli later avek dimoun ere anba proteksyon son dominasyon ranpli avek lanmour.―Izai 45:18.

Mesanste ti konmanse kan en lanz ki, menm si okonmansman i ti fidel avek Bondye, ti devlop en dezir pour li ganny adore. (Zak 1:14, 15) Son rebelyon ti vin evidan lo later kan i ti enfliyans sa premye koup imen pour zwenn ansanm avek li pour opoz Bondye. Olye soumet avek lenstriksyon kler ki Bondye ti’n donnen pour pa manz oubyen tous fri sa pye dibwa konnesans bon e move, Adan ek Ev ti pran sa fri e manze. (Zenez 3:1-6) An fezan sa, zot pa ti zis dezobei Bondye me zot ti osi montre ki zot ti anvi vin endepandan avek li.

 En Kestyon ti ganny leve

Sa rebelyon an Edenn ti soulev en kestyon, ki annan lenportans iniversel. Rebelyon sa de imen ti met an kestyon si Zeova ti pe byen egzers son lotorite. Eski Kreater i annan drwa demann bann imen pour obeir li dan tou keksoz? Eski dimoun ti pou pli byen si zot ti fer keksoz dan zot prop fason?

Fason ki Zeova ti tret sa kestyon lo son drwa pour dirize, i demontre ki i ti servi son bann kalite parey lanmour, lazistis, lasazes, ek pouvwar dan en fason byen balanse. I ti’n kapab servi son pwisans pour aret sa rebelyon toudswit. Sa ti pou paret zis, vi ki i annan sa drwa pour fer li. Me sa kestyon ki ti’n ganny leve pa ti pou ganny reponn si i ti’n fer sa. De lot kote, Bondye ti’n zis kapab inyor sa pese. Petet pour serten dimoun ozordi, sa ti paret en bon keksoz pour fer. Me sa osi pa ti pou kapab reponn deklarasyon Satan, ki imen ti pou pli byen si zot ti fer keksoz dan zot prop fason. Deplis, si Zeova ti’n azir dan sa fason, eski sa pa ti pou ankouraz dimoun pour vir kont semen Zeova? Son konsekans ti pou vreman grav.

Vi ki Zeova i annan lasazes, i’n permet bann imen viv ki mannyer zot anvi pour en pe letan, menm si sa i vedir permet mesanste dir pour en serten kantite letan. Alors bann imen in ganny sa loportinite pour montre si zot kapab byen diriz zot lekor san depan lo Bondye, e viv dapre zot prop standar pour sa ki byen ek sa ki mal. Ki rezilta zot in gannyen? Listwar imen i kontinyen ganny marke par lager, lenzistis, persekisyon, ek soufrans. Vi ki finalman sa rebelyon kont Zeova pa pou anmenn okenn sikse, sa pou reponn bann kestyon ki ti ganny leve an Edenn enn fwa pour tou.

Antretan, Bondye in montre son lanmour par fourni son Garson, Zezi Kri, ki’n donn son lavi konman en sakrifis. Sa in donn bann imen sa posibilite pour ganny libere avek kondannasyon pese ek lanmor ki dezobeisans Adan in anmennen. Sa sakrifis in donn  tou bann ki demontre lafwa dan Zezi loportinite pour ganny lavi eternel.―Zan 3:16.

Zeova i donn nou lasirans rekonfortan ki soufrans imen i tanporer. En psalmis ti ekrir: “En pti pe letan ankor, sa enn mesan pou nepli la. Ou pou sertennman egzamin son landrwa, e i pa pou egziste. Me bann ki annan limilite pou posed later, e zot pou vreman rezwir dan labondans lape.”―Psonm 37:10, 11.

Sekirite ek Boner dan Lavenir

Lakonplisman bann profesi Labib i montre ki sa letan kot Bondye pou anmenn en lafen avek maladi, sagren, ek lanmor i pros pour arive. Not byen sa apersi merveye lo bann keksoz ki pou vini. Sa ti ganny donnen avek zapot Zan dan en vizyon. I ti ekrir: “Alor, mon ti war en nouvo lesyel ek en nouvo later akoz sa premye lesyel ek sa premye later ti’n disparet, e lanmer osi ti nepli egziste. . . . [Bondye] pou reste avek [bann imen]. . . . I pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.” Zan ti ganny dir ki sa bann parol i vre: “Ekri, sa bann parol i serten e i vre.”―Revelasyon 21:1-5.

Me ki pou arive avek sa plizyer bilyon dimoun inosan ki’n mor depi sa rebelyon an Edenn? Zeova i promet ki i pou redonn lavi bann ki’n mor. Zapot Pol ti dir: “Mon annan sa menm lesperans dan Bondye parey zot ki tou dimoun bon konman move, pour resisite.” (Akt 24:15) Sa bann dimoun i annan sa lespwar pour viv dan en lemonn kot “pou annan lazistis.”—2 Pyer 3:13.

En papa ranpli avek lanmour pou permet ki son garson i fer en loperasyon si i konnen sa pou benefisye li. Pareyman, Zeova in permet bann imen pour eksperyans mesanste pour en pe letan. Toutfwa, bann benediksyon eternel pe esper tou bann ki esey fer lavolonte Zeova. Pol ti eksplike: “Parski lemonn antye in ganny kondannen pour vin en nanryen ditou non pa par son prop swa, me akoz sa enn ki’n fer li soumet, me avek en lespwar ki sa kreasyon pou ganny libere en zour avek pouvwar destrikter ki pe gard li dan lesklavaz, pour partisip dan laliberte ek laglwar bann zanfan Bondye.”—Romen 8:20, 21.

Sa i vreman en bon nouvel―pa parey sa bann ki nou vwar lo televizyon oubyen lir dan zournal. I pli bon nouvel ki sorti kot “Bondye ki touzour donn konsolasyon.”—2 Korentyen 1:3.

[Portre lo paz 6]

Letan in prouve ki bann imen pa kapab diriz zot lekor san depan lo Bondye

[Portre lo paz 6]

Fanmiy an Somali: UN PHOTO 159849/M. GRANT; bonm atomik: USAF photo; kan konsantrasyon: U.S. National Archives photo