Kontinyen Pratik Sa Ki Zot In Aprann

“Kontinyen pratik sa ki zot in aprann e resevwar avek mwan, swa sa ki zot in tann mwan dir ouswa sa ki zot in war mwan fer. E Bondye, ki donn nou son lape i ava avek zot.”—FILIPYEN 4:9.

1, 2. An zeneral, eski Labib pe enfliyans lavi bann dimoun ki konsider zot konman Kretyen? Eksplike.

“LARELIZYON pe ogmant son Lenfliyans, me Moralite pe perdi son Lenfliyans.” Sa tit dan zournal Emerging Trends i fer en rezimen lo rezilta en serve ki ti ganny fer partou dan Letazini. I paret ki i’n annan en ogmantasyon dan lakantite dimoun ki al lanmes dan sa pei e ki dir ki larelizyon i okip en plas enportan dan zot lavi. Pourtan, rapor i dir: “Malgre sa bann sif enpresyonan, bokou Ameriken i doute si vreman larelizyon i enfliyans lavi bann dimoun ek lasosyete an zeneral.”

² Sa sitiasyon pa ganny trouve dan zis en pei. Partou dan lemonn, bokou dimoun ki dir zot krwar dan Labib e ki zot Kretyen, pa les Labib vreman enfliyans zot lavi. (2 Timote 3:5) Sef en group resers ti dir: “Nou ankor annan en gran respe pour Labib me pour vreman pran letan pour lir li, etidye li, e aplik li—sa i bann keksoz ki konmela nou nepli fer.”

3. (a) Ki mannyer Labib i enfliyans bann ki vin vre Kretyen? (b) Konman bann ki swiv Zezi i aplik konsey Pol ki’n ganny rikorde dan Filipyen 4:9?

 ³ Parkont, pour bann vre Kretyen sitiasyon i diferan. Lefe ki zot aplik bann konsey Labib, sa in anmenn bann sanzman dan zot fason panse ek kondwit. Lezot dimoun i fasilman remark sa nouvo personnalite ki zot annan. (Kolosyen 3:5-10) Pour bann ki swiv Zezi, Labib pa en liv ki zot les anmas lapousyer lo letazer. Okontrer, zapot Pol ti dir bann Kretyen an Filip: “Kontinyen pratik sa ki zot in aprann e resevwar avek mwan, swa sa ki zot in tann mwan dir ouswa sa ki zot in war mwan fer. E Bondye, ki donn nou son lape i ava avek zot.” (Filipyen 4:9, nou ki’n met an italik.) Bann Kretyen pa zis aksepte ki Parol Bondye i laverite. Zot kontinyelman met an pratik bann konsey Labib, dan zot lavi fanmiy, dan travay, dan kongregasyon, e dan tou laspe zot lavi.

4. Akoz i pa fasil pour nou met lalwa Bondye an pratik?

⁴ Met an pratik lalwa ek prensip Bondye i pa en keksoz fasil. Nou pe viv dan en lemonn ki anba pouvwar Satan Dyab, ki Labib i apel ‘bondye sa syek.’ (2 Korentyen 4:4; 1 Zan 5:19) Alor, i tre enportan ki nou veye ki okenn keksoz pa anpes nou reste fidel avek Zeova. Konman nou kapab fer sa?

Reste atase avek “Parol Laverite”

5. Ki Zezi ti oule fer nou konpran kan i ti dir swiv li kontinyelman?

⁵ En fason ki nou kapab pratik sa ki nou’n aprann i par fidelman soutenir vre ladorasyon malgre lopozisyon ki nou gannyen avek bann dimoun ki pa partaz nou krwayans. Pour nou andire nou bezwen fer zefor. Zezi ti dir ki si en dimoun i oule swiv li, fodre ki i aret mazin zis limenm, i pran son poto siplis, e swiv li kontinyelman. (Matye 16:24) I pa ti dir ki nou devret swiv li pour zis en semenn, en mwan, oubyen en lannen. Plito i ti dir swiv li kontinyelman. Son parol i endike ki vin en disip i pa vedir ki nou kapab aret dan semen apre. Soutenir vre ladorasyon i vedir ki nou andire fidelman dan sa semen ki nou’n swazir, nenport kwa ki kapab arive. Ki mannyer nou kapab fer sa?

6. Ki model laverite bann Kretyen premye syek ti aprann avek Pol?

⁶ Pol ti konsey son konpanyon travay Timote: “Tenir byen for konman en model, parol laverite ki mon’n ansenny ou, e reste ferm dan lafwa ek lanmour ki nou posede dan Kris Zezi.” (2 Timote 1:13) Ki Pol ti oule dir par sa? Sa mo Grek ki’n ganny tradwir “model” dan Labib Nouvo Testaman i literalman refer avek desen en artis. Me sa desen pa enkli tou pti detay. Parkont, i annan bann laliny ek laform ki permet en dimoun ki pe get byen kapab konpran ki sa artis pe desinen. Pareyman, model laverite ki Pol ti ansenny Timote pa ti ganny fer avek lentansyon pour donn en larepons presi pour tou kestyon ki kapab ganny demande. Toudmenm, sa bann lansennyman i fourni ase gidans—zis parey sa desen ki nou’n mansyonnen—afen ki bann dimoun ki kontan sa ki drwat, i kapab konpran ki Zeova i ekspekte zot fer. Pour fer plezir Bondye, byensir, zot ti pou bezwen kontinyen tenir byen for sa model laverite par pratik sa ki zot ti’n aprann.

7. Konman ki bann Kretyen i kapab reste atase avek model parol laverite?

⁷ Dan premye syek, bann dimoun parey Imene, Aleksann, ek Filet ti pe promot bann lide ki pa ti an akor avek sa “model, parol laverite.” (1 Timote 1:18-20; 2 Timote 2:16, 17) Konman bann premye Kretyen ti pou kapab evite ganny anbete par bann aposta? Par etidye bann lekritir enspire atantivman e met zot an pratik. Bann ki ti swiv legzanp Pol ek lezot serviter fidel ti kapab rekonnet e rezet okenn keksoz ki pa ti an akor avek sa model laverite ki zot ti’n ganny ansennyen. (Filipyen 3:17; Ebre 5:14) Olye “ganny maladi  diskisyon ek dispit lo mo,” zot ti kontinyen servi Bondye dan sa bon fason. (1 Timote 6:3-6) Nou fer parey bann premye Kretyen letan nou met an pratik bann laverite ki nou’n aprann. Ozordi, plizyer milyon dimoun ki pe servi Zeova partou lo later pe kontinyen reste fidel avek sa model laverite ki zot in aprann dan Labib. Kan nou vwar sa, i vreman fortifye nou lafwa.—1 Tesalonisyen 1:2-5.

Pa ekout sa bann Zistwar

8. (a) Ki mannyer Satan i esey detri nou lafwa ozordi? (b) Ki lavertisman Pol ti donnen dan 2 Timote 4:3, 4?

⁸ Satan i esey detri nou lafwa par senm bann dout konsernan sa ki nou’n aprann. Denozour, zis parey dan premye syek, bann aposta ek lezot pe sey detri lafwa bann inosan. (Galat 2:4; 5:7, 8) Parler, zot servi medya pour deform bann lenformasyon oubyen menm pour koz lalang lo bann metod ek lentansyon pep Zeova. Pol ti averti ki serten ti pou vir kont laverite. I ti ekrir: “En letan pe vini, kot dimoun pou nepli siport lansennyman laverite. Me zot pou swiv zot prop dezir; zot pou rasanble en kantite ansennyan otour zot pour dir zot sa ki zot zorey i oule tande. Zot pou nepli oule ekout laverite, me zot pou prefer bann fab.”—2 Timote 4:3, 4.

9. Ki Pol ti kapab pe mazinen letan i ti refer avek bann fab?

⁹ Olye reste atase avek sa model parol laverite, serten ti ganny atire par “bann fab.” Ki sa bann fab oubyen zistwar ki ti atir zot? Petet Pol ti pe mazin bann zistwar parey sa bann ki nou kapab vwar dan liv Tobi, ki’n ganny envante. * Sa bann zistwar ti osi kapab enkli bann rimer ki gou pour tande. Apre, ti annan serten ki ti annan en pwennvi tro toleran lo standar Bondye oubyen ki ti kritik bann ki ti pran swen avek kongregasyon. Alor, lezot ti’n kapab les zot ganny anbete par sa, an ‘swivan zot prop dezir.’ (3 Zan 9, 10; Zid 4) Nenport lobstak ki sa ti enplike, i paret ki serten ti prefer mansonz olye laverite dan Parol Bondye. Zot pa ti tarde pour aret pratik sa ki zot ti’n aprann e sa ti en danze pour zot menm spirityelman.—2 Pyer 3:15, 16.

10. Nonm serten zistwar ki egziste denozour? Konman Zan ti met lanfaz lo nesesite pour fer atansyon?

¹⁰ Denozour, nou kapab evite ganny atire par bann zistwar si nou egzamin e swazir byen sa ki nou ekoute e lir. Par egzanp, medya i souvan promot en lavi imoral. Bokou dimoun i dekouraz lezot pour krwar ki Bondye i egziste oubyen pour konn Bondye pli byen. Serten swadizan eksper i ridikiliz  deklarasyon Labib konmkwa i’n ganny enspire par Bondye. E konmela i annan bann aposta ki pe kontinyen esey senm dout dan lespri bann Kretyen pour afeblir zot lafwa. Sa i parey dan premye syek kot bann fo profet ti prezant en danze pour kongregasyon. Se pour sa ki zapot Zan ti averti: “Byenneme, pa bezwen krwar tou sa ki pretann ki i posed lespri, me teste zot pour verifye si lespri ki zot posede i sorti kot Bondye, parski i annan bokou fo ansennyan dan lemonn.” (1 Zan 4:1) Alors, nou bezwen fer atansyon.

11. Nonm en fason ki nou kapab egzamin nou pour vwar si nou pe gard nou lafwa.

¹¹ An rapor avek sa, Pol ti ekrir: “Egzamin zot lekor pou war si zot pe gard zot lafwa.” (2 Korentyen 13:5) Sa zapot ti enplor nou pour kontinyen egzamin nou lekor pour vwar si nou pe reste fidel avek tou bann krwayans Kretyen. Si nou annan tandans pour ekout bann ki pa zanmen satisfe, nou bezwen egzamin nou lekor e priy lo sa size. (Psonm 139:23, 24) Eski nou annan tandans pour vwar defo avek pep Zeova? Si wi, akoz? Eski en dimoun in dir oubyen fer en keksoz ki’n bles nou? Si i leka, eski nou tant pour fer sa sitiasyon vin pli grav ki i ete? Nenport kalite problenm ki nou pe pas atraver dan sa sistenm i tanporer. (2 Korentyen 4:17) Menm si nou eksperyans serten difikilte dan kongregasyon, eski nou bezwen aret servi Bondye? Si ou dezapwente akoz en keksoz ki’n arive, pa i pou pli byen si ou fer ou mye pour rezourd sa problenm e apre les keksoz dan lanmen Zeova?—Psonm 4:4; Proverb 3:5, 6; Efezyen 4:26.

12. Konman bann dimoun lavil Bere in donn nou en bon legzanp?

¹² Olye ki nou pe toultan kritike, annou gard en bon pwennvi lo lenformasyon ki nou gannyen atraver letid personnel ek renyon kongregasyon. (1 Korentyen 2:14, 15) E olye annan dout lo Parol Bondye, pa i ti a pli byen pour nou annan menm latitid avek bann dimoun lavil Bere dan premye syek, ki ti egzamin Lekritir atantivman! (Akt 17:10, 11) Alor, annou pratik sa ki nou aprann, rezet bann zistwar, e reste atase avek laverite.

13. Ki mannyer nou kapab ede propaz bann zistwar san ki nou menm realize?

¹³ I annan en lot kalite zistwar ki nou bezwen veye. Souvan i annan en kantite zistwar ki ganny sirkile par E-mail, bann mesaz ki ganny anvoye lo konpiter. Konsernan sa bann zistwar, nou bezwen fer atansyon sirtou si nou pa konnen kote sa lenformasyon i sorti. Menm si en leksperyans oubyen en zistwar i sorti kot en Kretyen ki annan en bon repitasyon, i kapab ki li osi i’n tann sa avek en lot dimoun. Alors, i enportan ki nou fer byen atansyon pour pa repet, oubyen pas  avek lezot okenn lenformasyon ki nou pa asire si i vre. Byensir, nou pa ti a anvi repet “bann fab bet ki kontrer avek lafwa.” (1 Timote 4:7) Deplis, i nou devwar pour koz laverite avek kanmarad. Alors, i pou saz lo nou par si nou evit okenn keksoz ki ti a kapab fer nou pas bann fo lenformasyon san ki nou menm realize.—Efezyen 4:25.

Byenfe ki nou gannyen kan nou pratik Laverite

14. Ki byenfe nou gannyen kan nou pratik sa ki nou’n aprann dan Parol Bondye?

¹⁴ Pratik sa ki nou aprann dan letid personnel e dan bann renyon Kretyen i anmenn bokou byenfe. Par egzanp, nou relasyon avek nou bann frer ek ser Kretyen i kapab amelyore. (Galat 6:10) Kan nou aplik bann prensip Labib, nou pou annan en pli bon konportman ek fason panse. (Psonm 19:8) Deplis, nou “fer loner lansennyman lo Bondye” letan nou aplik sa ki nou aprann, e petet sa i kapab atir lezot ver laverite.—Tit 2:6-10.

15. (a) Konman ki en zenn ti ganny kouraz pour donn temwannyaz kot lekol? (b) Ki ou’n aprann atraver sa leksperyans?

¹⁵ Parmi Temwen Zeova, i annan en kantite zenn ki pratik sa ki zot in aprann dan zot letid Labib e dan bann piblikasyon Kretyen, ensi ki dan bann renyon ki zot asiste regilyerman dan kongregasyon. Zot bon kondwit i donn en bon temwannyaz bann ansennyan ek lezot kanmarad lekol. (1 Pyer 2:12) Annou vwar legzanp Leslie, en pti fiy 13 an ki reste Letazini. I admet ki i pa ti vwar li fasil pour koz avek son bann kanmarad lekol lo son lafwa. Me en zour sa ti sanze. “Mon laklas ti pe koz lo ki mannyer dimoun i sey vann keksoz. En fiy ti lev son lanmen e i ti mansyonn Temwen Zeova konman en legzanp.” Vi ki Leslie i en Temwen, konman i ti reazir? I dir: “Mon ti defann mon lafwa. Mon asire sa ti sirprann tou dimoun parski mon abitye trankil kot lekol.” Leslie ti’n annan kouraz pour defann son lafwa. Me ki ti arive apre sa? Leslie i dir: “Mon ti kapab donn en etidyan de pti liv vi ki i ti demann lezot kestyon.” Kan bann zenn ki pratik sa ki zot aprann i ganny sa kouraz pour donn en temwannyaz kot lekol, sa i bezwen vreman fer Zeova rezwir.—Proverb 27:11; Ebre 6:10.

16. Ki mannyer Lekol Minister Teokratik in benefisye en zenn Temwen?

¹⁶ Elizabeth i en lot legzanp. Apartir laz set an e toudilon son bann lannen lekol primer, sa zenn fiy ti envit son bann ansennyan lasal sak fwa ki i ti annan en ekspoze pour fer dan Lekol Minister Teokratik. Si en ansennyan pa ti kapab vini, Elizabeth ti reste apre lekol pour prezant son ekspoze avek sa ansennyan. Pandan son dernyen lannen lekol segonder, Elizabeth ti fer en rapor detaye lo konman Lekol Minister Teokratik i benefisye li e i ti prezant sa devan kat ansennyan. I ti osi ganny demande pour montre konman en ekspoze dan Lekol Minister Teokratik i deroule, e i ti swazir pour koz lo “Akoz Bondye i permet Soufrans?” Elizabeth in benefisye avek sa progranm edikasyonnel ki Temwen Zeova i fer dan Lekol Minister Teokratik. I zis enn parmi sa kantite zenn Kretyen ki loue Zeova par pratik sa ki zot in aprann dan son Parol.

17, 18. (a) Ki konsey Labib i donnen konsernan lonnekte? (b) Konman en zonm ti vreman touse pour vwar lonnekte ki en Temwen Zeova i annan?

 ¹⁷ Labib i demann bann Kretyen pour onnet dan tou keksoz. (Ebre 13:18) Malonnekte i kapab gat nou relasyon avek lezot, e pli enportan ankor, avek Zeova. (Proverb 12:22) Kan nou onnet, sa i montre ki nou pe pratik sa ki nou’n aprann e sa in fer bokou dimoun annan en pli gran respe pour Temwen Zeova.

¹⁸ Reflesir lo leksperyans Phillip, ki en solda. I ti perdi en tyek ki i ti’n fini sinyen e sa tyek pa ti spesifye ki kantite larzan ki ou kapab touse lo la. Phillip pa ti’n realize si i ti’n perdi sa tyek ziska ki i ti reganny li par lapos. En Temwen Zeova ti’n trouv sa tyek, e i ti met en not avek pour dir ki son krwayans relizye ti’n motiv li pour retourn sa tyek. Phillip ti reste labous ouver. I ti dir: “Zot ti’n kapab balye tou mon pti [50,000 roupi]!” En zour en dimoun ti vol son sapo dan legliz e sa ti vreman dezapwent li. Aparaman sa dimoun ki ti pran son sapo ti en dimoun ki i ti konnen. Tandis ki la en dimoun ki i pa ti konn ditou ti’n retourn avek son tyek ki ti kapab kout li bokou! Wi, bann Kretyen onnet i anmenn loner pour Zeova!

Kontinyen pratik sa ki ou’n aprann

19, 20. Konman nou benefisye letan nou swiv bann keksoz ki nou’n aprann dan Labib?

¹⁹ Bann ki pratik sa ki zot in aprann dan Parol Bondye i ganny bokou byenfe. Disip Zak ti ekrir: “Sa ki egzamin byen lalwa parfe, lalwa laliberte e ki persevere, e ki pa zis ekoute pour oubliye apre, me ki met an pratik, Bondye pou beni li dan tou son aktivite.” (Zak 1:25) Wi, si nou swiv bann keksoz ki nou’n aprann dan Labib, nou pou vreman ere e nou pou pli kapab fer fas avek bann presyon lavi. Pli enportan ankor, se ki nou pou ganny benediksyon Zeova ek lespwar pour lavi eternel!—Proverb 10:22; 1 Timote 6:6.

²⁰ Alor, kontinyen fer zefor pour etidye Parol Bondye. Rasanble ansanm avek lezot adorater Zeova e port latansyon lo sa ki pe ganny diskite dan renyon. Kontinyen aplik sa ki ou aprann. Fotespere ki ‘Bondye, ki donn nou son lape i ava avek ou.’—Filipyen 4:9.

[Not anba lo paz]

Eski ou rapel?

• Kisisa “model, parol laverite,” e ki mannyer nou kapab kontinyen reste atase avek li?

• Ki sa “bann fab” oubyen fo zistwar ki nou bezwen rezete?

• Ki byenfe bann ki pratik sa ki zot in aprann dan Labib i gannyen?

[Kestyon]

[Portre lo paz 15]

Konman ki bann premye Kretyen ti pou kapab evite ganny anbete par bann aposta?

[Portre lo paz 16]

Bann dout i kapab ganny senmen atraver medya, Internet, ek bann aposta ki annan konmela

[Portre lo paz 17]

Si ou pa asire si en nouvel i vre, vomye pa pas li

[Portre lo paz 18]

Temwen Zeova i met an pratik sa ki zot lir dan Labib dan travay, kot lekol, ek lezot landrwa