“Port En Pli Gran Latansyon”

“Nou bezwen port en pli gran latansyon pour laverite ki nou’n tande, pour ki nou pa les nou ganny antrennen dan perdisyon.”—EBRE 2:1.

1. Donn en legzanp konman mank konsantrasyon i kapab anmenn dezas.

AKSIDAN loto i pran lavi anviron 37,000 dimoun tou le zan zis dan Letazini. Bann eksper i dir ki bokou sa bann lanmor ti a’n kapab ganny evite si bann drayver ti’n port en pli gran latansyon letan zot lo volan. Serten drayver i pran plezir pour get bann zenn fiy lo semen anmezir ki zot pe dray. Lezot i abitye servi zot telefonn mobil. Deplis, i annan serten ki annan labitid pour manze oubyen bwar anmezir ki zot pe dray. Tousala i kree en mank konsantrasyon ki kapab anmenn dezas.

2, 3. Ki konsey Pol ti donn bann Kretyen Ebre, e akoz son konsey ti apropriye?

² Preski 2,000 an avan ki loto ti ganny envante, zapot Pol ti idantifye en keksoz ki ti detourn latansyon serten Kretyen Ebre e ki ti pe anmenn maler pour zot. Pol ti met lanfaz lo lefe ki Zezi Kri ti’n ganny en pozisyon pli siperyer ki tou bann lanz, parski i ti’n asiz lo kote drwat Bondye. Apre sa zapot ti deklare: “Pour sa rezon nou bezwen port en pli gran latansyon pour laverite ki nou’n tande, pour ki nou pa les nou ganny antrennen dan perdisyon.”—Ebre 2:1.

³ Akoz bann Kretyen Ebre ti bezwen ‘port en pli gran latansyon pour laverite ki zot ti’n tande’ konsernan Zezi? Akoz preski 30 an ti’n pase depi ki Zezi ti’n kit later. Dan labsans zot Met, serten Kretyen Ebre ti’n konmans elwannyen avek vre lafwa. Zot ladorasyon ki zot ti pratike oparavan, larelizyon Zwif, ti pe anpes zot konsantre lo vre lafwa.

Zot ti bezwen port en pli gran Latansyon

4. Akoz serten Kretyen Ebre ti’n kapab ganny sa lanvi pour retourn dan larelizyon Zwif?

⁴ Akoz en Kretyen ti ava anvi retourn dan larelizyon Zwif? Sistenm ladorasyon anba Lalwa ti enplik bann keksoz vizib. Dimoun ti kapab vwar bann pret e santi loder bann sakrifis ki ti pe brile. Parkont, dan serten laspe, larelizyon Kretyen ti ase diferan. Bann Kretyen ti annan en Gran Pret, Zezi Kri, me zot pa ti’n vwar li lo later pour sa trantenn lannen ki ti’n pase. (Ebre 4:14) Zot ti annan en tanp, me son parti pli  sen ti lesyel li menm. (Ebre 9:24) Kontrerman avek sa sirkonsizyon fizik ki Lalwa ti demande, sirkonsizyon en Kretyen ti “dan son leker.” (Romen 2:29) Alors, pour serten Kretyen Ebre, petet larelizyon Kretyen ti nepli en ladorasyon ki reel.

5. Konman Pol ti montre ki sa sistenm ladorasyon ki Zezi ti entrodwir ti pli siperyer ki sa enn dapre Lalwa?

⁵ Bann Kretyen Ebre ti bezwen realiz en keksoz byen enportan konsernan sistenm ladorasyon ki Kris ti entrodwir. I ti baze plis lo lafwa ki lo sa ki ou ti kapab vwar. Pourtan i ti pli siperyer ki Lalwa ki ti ganny donnen atraver profet Moiz. Pol ti ekrir: “Si annefe, i ti posib ki disan bouk ek toro, ek lasann en zenis ki zot ti fann lo bann dimoun ti zistifye zot, konbyen plis ankor disan Kris, ki par Lespri eternel ti ofer limenm konman en viktim san tas devan Bondye, i pirifye zot konsyans avek son travay initil pour nou servi Bondye vivan.” (Ebre 9:13, 14) Wi, sa pardon, ki zot ti kapab gannyen atraver lafwa dan sakrifis ek ranson Zezi Kri ti bokou pli siperyer, dan plizyer laspe, ki sa pardon ki zot ti gannyen atraver bann sakrifis ki zot ti ganny demande pour fer dapre Lalwa.—Ebre 7:26-28.

6, 7. (a) Ki sitiasyon ki ti fer li irzan pour bann Kretyen Ebre ‘port en pli gran latansyon pour laverite ki zot ti’n tande’? (b) Konbyen letan ti reste pour Zerizalenm ganny detrir kan Pol ti ekrir son let pour bann Ebre? (Vwar not anba lo paz 10.)

⁶ Ti annan ankor en lot rezon akoz bann Kretyen Ebre ti bezwen port byen latansyon lo bann keksoz ki zot ti’n tande konsernan Zezi. I ti’n predir ki Zerizalenm ti pou ganny detrir. Zezi ti dir: “Bann zour pou arive pour ou, kan ou bann lennmi pou barikad ou e antour ou lo tou kote. Zot pou kraz ou ek tou ou bann zanfan e napa en sel ou ros ki pou reste an plas, akoz ou pa ti rekonnet letan ou ti ganny vizite.”—Lik 19:43, 44.

⁷ Kan ki sa ti pou arive? Zezi pa ti dir ki zour e ki ler. Plito, i ti donn sa lenstriksyon: “Kan zot a war Zerizalenm antoure par bann larme, zot a konnen ki son destriksyon i pros. Alor, ki bann ki dan Zide i sov dan montanny, e ki bann ki dan lavil i sorti, e pa les bann ki dan lakanpanny antre dan lavil.” (Lik 21:20, 21) Pandan sa 30 an apre ki Zezi ti’n dir sa parol, serten Kretyen an Zerizalenm ti nepli konsyan ki letan ti kourt e zot ti les zot latansyon ganny detournen. I ti konmsi zot ti’n tourn zot latansyon ver en lot keksoz anmezir ki zot pe dray. Si zot pa ti sanz zot fason panse, sirman dezas ti pe esper zot. Krwar ou pa krwar, Zerizalenm ti pros pour  ganny detrir! * Fotespere ki konsey Pol ti vin konman en alarm pour bann Kretyen ki ti pe ganny sonmey spirityelman an Zerizalenm.

Port “en pli gran Latansyon” ozordi

8. Akoz nou bezwen “port en pli gran latansyon” lo sa bann laverite ki dan Parol Bondye?

⁸ Parey bann Kretyen premye syek, nou bezwen “port en pli gran latansyon” lo bann laverite dan Parol Bondye. Akoz? Akoz nou osi nou trouv nou fas a fas avek en destriksyon ki pe vini tre byento, pa destriksyon zis en nasyon me sa sistenm antye. (Revelasyon 11:18; 16:14, 16) Byensir, nou pa konn sa zour ek ler egzakt ki Zeova pou pran aksyon. (Matye 24:36) Toudmenm, nou pe temwanny avek nou prop lizye lakonplisman bann profesi Labib ki klerman endike ki nou pe viv dan “bann dernyen zour.” (2 Timote 3:1-5) Alors, nou bezwen veye ki okenn keksoz pa detourn nou latansyon. Nou bezwen port latansyon lo Parol Bondye e kontinyen gard antet ki letan i kourt. Se selman par fer sa ki nou pou “kapab sap tou sa bann keksoz ki devret arive.”—Lik 21:36, NW.

9, 10. (a) Ki mannyer nou kapab montre nou atantif anver bann keksoz spirityel? (b) Konman ki Parol Bondye i ‘en lalanp pour nou lipye’ ek ‘en lalimyer pour nou semen’?

⁹ Dan sa letan enportan, ki mannyer nou kapab montre ki nou pe port “en pli gran latansyon” lo bann keksoz spirityel? En fason se pour regilye dan nou bann renyon Kretyen ek lasanble. Nou devret osi etidye Labib seryezman pour nou kapab apros pli pre avek son Loter, Zeova. (Zak 4:8) Si nou pran konnesans lo Zeova atraver letid personnel ek renyon, nou pou parey sa psalmis ki ti dir avek Bondye: “Ou parol i en lalanp pour mon lipye, e en lalimyer pour mon semen.”—Psonm 119:105.

¹⁰ Labib i vin konman ‘en lalimyer pour nou semen’ ler i dir nou bann plan Bondye pour lavenir. I osi ‘en lalanp pour nou lipye.’ Andotmo, i gid nou kan nou rankontre bann problenm ki teste nou. Se pour sa ki i tre esansyel ki nou “port en pli gran latansyon” letan nou rasanble ansanm avek nou bann konpanyon Kretyen pour ganny enstri e kan nou personnelman lir Parol Bondye. Sa lenformasyon ki nou gannyen pou ed nou fer bann bon desizyon pour nou prop benefis, ki fer plezir Zeova e rezwir son leker. (Proverb 27:11; Izai 48:17) Ki mannyer nou kapab amelyor nou konsantrasyon dan bann renyon, e dan bann moman kot nou fer nou letid personnel, afen ki nou kapab pli benefisye avek bann provizyon spirityel Bondye?

Amelyor nou Konsantrasyon dan Renyon

11. Akoz parfwa i pa fasil pour atantif dan bann renyon Kretyen?

¹¹ Parfwa, i pa fasil pour nou reste atantif dan bann renyon. Nou latansyon i kapab fasilman ganny detournen, petet akoz en zanfan pe plere oubyen en dimoun ki’n vin tar pe rod en plas asize. Apre en gran lazournen travay, nou senpleman kapab fatige. Petet sa enn ki pe koze lo platform i pa sa orater ki pli kapab kapte latansyon son lodyans, e avan ki nou realize, nou pe reve—petet nou’n menm dormi! Vi ki sa lenformasyon ki pe ganny prezante i vreman enportan, i ti a byen si nou amelyor nou abilite pour konsantre dan bann renyon kongregasyon. Me konman nou kapab fer sa?

12. Kwa ki kapab fer pli fasil pour port latansyon dan bann renyon?

¹² Ordinerman, i pli fasil pour port latansyon dan renyon si nou’n byen prepare. Alor, akoz ou pa met dekote en letan pour reflesir en pe lo bann keksoz ki pou ganny diskite? I pran zis detrwa minit sak zour pour lir e medit lo en porsyon sa bann sapit ki’n ganny progranmen konman lektir Labib pour lasemenn.  Si nou progranm nou letan, nou kapab osi trouv letan pour prepar Letid Liv Kongregasyon ek Letid Latour Veyer. Nenport progranm ki nou fer, en keksoz i sir: Preparasyon pou ed nou pour port latansyon lo sa ki pe ganny diskite dan bann renyon.

13. Kwa ki kapab ed nou pour konsantre lo sa ki pe ganny diskite dan renyon?

¹³ Apard ki prepar byen, serten i vwar ki zot pli atantif dan renyon letan zot asiz pli devan dan Lasal. Lezot fason ki kapab ed nou pour konsantre se par get sa orater pandan ki i pe koze, swiv dan nou Labib ler en teks pe ganny lir, e pran not. Me prepar nou leker i pli enportan ki okenn lezot metod pour konsantre. Nou bezwen konpran akoz nou pe rasanble ansanm. Nou zwenn ansanm avek lezot Kretyen premyerman pour ador Zeova. (Psonm 26:12; Lik 2:36, 37) Renyon i en mwayen enportan pour nou ganny nouri spirityelman. (Matye 24:45-47) Deplis, zot donn nou loportinite pour “pous kanmarad pour annan lanmour e fer sa ki byen.”—Ebre 10:24, 25.

14. Kwa ki vreman fer en renyon en sikse?

¹⁴ Serten i kapab annan tandans pour evalye kalite en renyon dapre abilite bann ki pran par dan progranm pour ansennyen. Si bann orater i byen konpetan, sa renyon i kapab ganny apele en bon renyon. Me si petet lansennyman pa tro tro efikas, nou annan tandans pour dir lotreman. I vre ki bann ki lo progranm i devret fer zot mye pour byen ansennyen e sirtou pour tous leker zot lodyans. (1 Timote 4:16) Parkont, nou ki pe ekoute, nou pa devret kritik zot pour nanryen ditou. Kantmenm abilite sa bann partisipan pour ansennyen i enportan, i pa sel fakter ki kontribye pour fer en renyon vin en sikse. Eski ou dakor ki nou konsern prensipal se pa fason ki sa orater i delivre son diskour, me se fason ki nou  ekoute? Kan nou asiste renyon e port latansyon lo sa ki pe ganny prezante, nou pe ador Bondye an akor avek son lavolonte. Se sa ki fer renyon vin en sikse. Si nou vreman anvi pran konnesans lo Bondye, nou pou benefisye avek bann renyon, nenport ki abilite sa orater i kapab annan. (Proverb 2:1-5) Alor, annou determinen pour fer nou mye pour “port en pli gran latansyon” dan nou bann renyon.

Benefisye plennman avek Letid personnel

15. Konman letid ek meditasyon i kapab benefisye nou?

¹⁵ Nou benefisye en kantite kan nou “port en pli gran latansyon” dan bann letan ki nou fer letid personnel ek meditasyon. Lir e reflesir lo Labib ek bann piblikasyon Kretyen pou donn nou bann loportinite presye pour fer bann laverite Parol Bondye penetre dan nou leker. An retour, sa pou annan en lefe profon lo fason ki nou panse e azir. Anfet, i pou ed nou pour pran plezir dan fer lavolonte Zeova. (Psonm 1:2; 40:8) Alors, nou bezwen devlop nou abilite pour konsantre afen ki nou kapab pli benefisye letan nou etidye. I sitan fasil pour nou perdi nou konsantrasyon! Bann pti lenteripsyon, parey en kou-d-telefonn oubyen en tapaz, i kapab kas nou konsantrasyon. Oubyen petet nou menm nou pa kapab konsantre pour lontan. Nou kapab asize avek bon lentansyon pour nouri nou spirityelman, me en pti moman nou tonm dan gran mazinasyon. Ki mannyer nou kapab “port en pli gran latansyon” letan nou pe personnelman etidye Parol Bondye?

16. (a) Akoz i enportan pour nou progranm letan pour letid personnel? (b) Konman ki ou’n fer letan pour personnelman etidye Parol Bondye?

¹⁶ I pou benefisye nou si nou fer en progranm e swazir en landrwa ki pou pli favorab pour nou etidye. Laplipar nou, nou napa bokou letan pour nou menm. Nou kapab santi konmsi sa vites ki lavi pe al avek pe balye nou parey en pti brans ki pe ale dan kouran larivyer. Nou vreman bezwen lit kont sa kouran senbolik, e rod bann moman kalm pour etidye. Nou pa kapab zis esper en loportinite vini pour nou etidye. Plito, nou bezwen pran kontrol lo nou sitiasyon par fer letan pour nou etidye. (Efezyen 5:15, 16) Serten i fer en pti letan dan bomaten kot petet i annan mwens distraksyon. Lezot i vwar ki aswar zot ganny en pli bon loportinite. Sa ki enportan se ki nou pa inyor sa gran bezwen pour pran konnesans egzakt lo Bondye ek son garson. (Zan 17:3) Alor, annou progranm letan pour fer letid personnel e apre swiv sa progranm fidelman.

17. Kisisa meditasyon, e konman ki i benefisye nou?

¹⁷ Meditasyon—setadir reflesir lo sa ki nou’n aprann letan nou pe etidye—i vreman itil. Meditasyon i ed nou pour pran panse Bondye lo sa paz e met li dan nou leker. I ed nou vwar konman pour aplik konsey Labib pour ki nou “pa zis ekout laparol me osi met li an pratik.” (Zak 1:22-25) Deplis, meditasyon i ed nou pour vin pli pre avek Zeova, parski i fer nou reflesir lo son bann kalite e konman ki zot evidan dan sa lenformasyon ki nou pe etidye dan nou letid personnel.

18. Ki kondisyon ki neseser pour medit dan en fason efikas?

¹⁸ Pour benefisye plennman avek letid ek meditasyon, fodre ki nou pa pe mazin lezot keksoz. Pour fer plas pour nouvo lenformasyon antre kan nou medite, nou bezwen oubliy lezot keksoz ki preokip nou lavi toulezour. Meditasyon i demann letan ek en  moman tousel, pourtan konman i rekonfort nou, letan nou pran nouritir spirityel ek delo laverite ki trouve dan Parol Bondye!

19. (a) An rapor avek letid personnel, kwa ki’n ed serten pour amelyor zot konsantrasyon? (b) Ki latitid nou devret annan anver letid, e ki benefis nou kapab tire dan sa aktivite enportan?

¹⁹ Me si nou pa kapab konsantre pour lontan e apre ki nou’n etidye pour en pti gin letan nou lespri i konmans ale? Serten in vwar ki zot kapab amelyor zot konsantrasyon dan letid par konmans avek bann letid ase kourt e apre ptit-a-pti ogmant kantite letan ki letid i dire. Nou lobzektif se pour pran nou letan kan nou pe etidye olye tay avek. Nou bezwen kiltiv en gran lentere dan sa size ki nou pe etidye. E nou kapab fer lezot resers an servan sa gran kantite lenformasyon ki lesklav fidel e pridan in fourni. Egzamin atantivman menm bann keksoz spirityel ki pli profon i annan en gran valer. (1 Korentyen 2:10) Letan nou fer sa, i ed nou pour ogmant nou konnesans lo Bondye e pour devlop nou bon zizman. (Ebre 5:14) Si nou etidye seryezman Parol Bondye, nou pou osi kalifye pour “ansenny lezot.”—2 Timote 2:2.

20. Konman nou kapab devlop e mentenir en relasyon entim avek Zeova?

²⁰ Asiste bann renyon Kretyen e fer letid personnel pou vreman ed nou pour devlop e mentenir en relasyon entim avek Zeova. Aparaman, sa ti leka avek sa psalmis ki ti dir avek Bondye: “Konbyen mon kontan ou lalwa! I okip mon panse toudilon lazournen.” (Psonm 119:97) Annou fer nou mye alor pour asiste regilyerman bann renyon ek lasanble. E fotespere nou fer letan pour etidye Labib e medite. Nou pou ganny rekonpanse bokou pour rezon ki nou “port en pli gran latansyon” lo Parol Bondye.

[Not anba lo paz]

Eski ou rapel?

• Akoz serten Kretyen Ebre ti pe elwannyen avek vre lafwa?

• Ki mannyer nou kapab gard nou konsantrasyon dan renyon Kretyen?

• Kwa ki pou ed nou pour benefisye avek letid Labib ek meditasyon?

[Kestyon]

[Portre lo paz 9]

Bann Kretyen Ebre ti bezwen reste vizilan vi ki Zerizalenm ti pros pour ganny detrir

[Portre lo paz 11]

Paran i kapab ed zot zanfan pour benefisye avek bann renyon Kretyen