Rekonfor dan Letan difisil

NOUVEL ki nou tande denozour i pa rekonfort nou ditou. En dimoun ti ekrir: “Bann levennman ki egziste ozordi i sitan fer lapenn ki nou souvan pa asire si nou pou kapab get nouvel 8 er.” Lager, akt terorism, soufrans, krim, ek maladi pe ranpli later―bann fleo ki tre byento i kapab afekte nou direkteman si zot pa’n fini deza afekte nou.

Labib ti predir sa sitiasyon ki egziste ozordi dan en fason egzakt. Kan i ti pe koz lo nou letan, Zezi ti dir ki pou annan bann gro lager, lepidemi, lafamin, ek tranbleman-d-ter. (Lik 21:10, 11) Pareyman, zapot Pol ti ekrir konsernan en “letan difisil,” kot bann dimoun pou kriyel, kontan larzan, lennmi sa ki fer dibyen. I ti apel sa peryod letan “bann dernyen zour.”―2 Timote 3:1-5.

Alors, kan medya pe dekrir bann kondisyon lemonn nou vwar ki i annan serten similarite avek sa ki Labib ti predir. Me sa i sel similarite ki zot annan. Labib i donn en pwennvi ki medya pa donnen. Atraver Parol enspire Bondye, nou pa zis konpran akoz i annan sitan kantite keksoz mal me osi ki mannyer lavenir pou ete.

Konman ki Bondye i konsider Mesanste

Labib i eksplike konman ki Bondye i konsider bann sitiasyon enkyetan ki nou vwar dan nou  lepok. Menm si Bondye ti vwar bann difikilte ki egziste ozordi davans, i pa aksepte sa bann keksoz e i pa ni annan lentansyon pour toler zot pour toultan. Zapot Zan ti ekrir, “Bondye i lanmour.” (1 Zan 4:8) Zeova i annan en gran lentere dan bann dimoun e i ay tou mesanste. I tre apropriye pour nou tourn ver Bondye pour ganny rekonfor. Vi ki Bondye i bon e i annan konpasyon, i osi annan sa pouvwar ek dezir pour elimin tou move keksoz lo later. En ekriven Psonm ti ekrir: ‘[Lerwa seles ki Bondye in apwente] pou delivre sa enn ki pov ki pe kriy osekour, osi sa enn ki aflize e nenport ki ki napa personn pour vin ed li. I pou senpatiz avek sa enn ki senp e pov, e i pou sov lavi bann ki pov. I pou liber zot lavi anba dominasyon e dan vyolans, e zot disan pou presye dan son lizye.’―Psonm 72:12-14.

Eski ou pran pitye pour bann ki pe soufer? Petet ou santi koumsa. Konpran santiman lezot i en kalite ki Zeova in met dan nou, akoz nou’n ganny kree dan son resanblans. (Zenez 1:26, 27) Alor, nou kapab annan konfyans ki Zeova i konpran e santi soufrans ki imen pe pas ladan. Zezi ki ti konn Zeova pli byen ki okenn lezot dimoun, ti ansennyen ki Zeova i enterese avek nou en kantite e i ranpli avek konpasyon.―Matye 10:29, 31.

Kreasyon li menm i konfirmen ki Bondye i enterese avek limanite. Zezi ti dir ki Bondye “i fer leve son soley lo bann ki move parey lo bann ki bon, e i fer tonbe lapli lo bann ki fer dibyen parey lo bann ki fer dimal.” (Matye 5:45) Pol ti dir avek bann dimoun ki ti reste dan lavil Lis: “[Bondye] i’n touzour revel son lekor par bann dibyen ki i’n fer. I’n donn zot son lapli sorti dan lesyel, ek bann rekolt, sakenn son sezon. I’n donn zot osi manze e i’n ranpli zot leker avek lazwa.”―Akt 14:17.

Lekel ki responsab pour Mesanste?

I bon note ki Pol ti osi dir avek sa bann dimoun an Lis: “Dan letan pase, [Bondye] in les tou bann nasyon fer sa ki fer zot plezir.” Alors, bann nasyon oubyen dimoun zot menm zot responsab en kantite pour laplipar sitiasyon difisil ki zot trouv zot ladan. Bondye pa devret ganny blanmen.―Akt 14:16.

Akoz Zeova i permet bann move keksoz arive? Eski i pou fer keksoz konsernan sa? Zis Labib ki kapab donn larepons pour sa bann kestyon. Sa i akoz i annan en lot personnaz ek en kestyon ki i ti souleve ki enplike etrwatman avek sa larepons.

[Portre lo paz 3]

Kote gos anler, Croatia: UN PHOTO 159208/S. Whitehouse; en zanfan ki pe mor lafen: UN PHOTO 146150 BY O. MONSEN

[Portre lo paz 4]

Imen i annan santiman pour lezot. Eski Bondye li i mwen sansib ek soufrans imen?