Zeova I Beni E Protez Bann Ki Obeisan

“Kant a sa enn ki pe ekout mwan, i pou viv an sekirite e i pou viv trankilman san ki i bezwen per maler.”—PROVERB 1:33.

1, 2. Akoz obeir Bondye i enportan? Donn en legzanp pour demontre sa.

BANN zoli pti poul pe rod manze dan zerb. Zot pa okouran ditou ki i annan en katiti pe anvole anler. I pe met li pare pour atak zot. Toutakou, sa mer poul i kakaye e ouver son lezel. Son bann pti piti i tay kot li, e deswit zot rod proteksyon anba son bout lezel. Finalman sa katiti i ale. * Ki leson nou retire? Lobeisans i sov lavi!

² Sa leson i tre enportan pour Kretyen ozordi, akoz Satan pe fer tou sa ki i kapab pour atak pep Bondye. (Revelasyon 12:9, 12, 17) I anvi detri nou spirityalite afen ki nou perdi faver Zeova ek lespwar pour lavi eternel. (1 Pyer 5:8) Me si nou reste pros avek Bondye e nou pa tarde pour swiv gidans ki nou resevwar atraver son Parol ek lorganizasyon, nou kapab garanti pour ganny son proteksyon. En psalmis ti ekri: “Avek son bout lezel i pou bar tou akse avek ou, e anba son lezel ou pou pran refiz.”—Psonm 91:4.

En Nasyon dezobeisan i ganny atake

3. Ki ti arive avek Izrael vi ki zot ti kontinyelman dezobei?

³ Ler nasyon Izrael ti obei Zeova, zot ti regilyerman benefisye avek son latansyon. Me zot ti kit zot Kreater tro souvan e zot ti tourn ver bann bondye an dibwa ek ros—“bann keksoz ki pa reel, ki napa okenn valer, e ki pa delivre.” (1 Samyel 12:21) Apre plizyer syek ki zot ti rebele, sa nasyon an antye ti’n telman ganny enfliyanse par bann fo lansennyman, ki i pa ti kapab rekipere. Pour sa rezon, Zezi ti dir avek latristes: “Zerizalenm, Zerizalenm, ou ki touy bann profet e saboul a kou-d-ros bann ki Bondye in anvoy kot ou! Konbyen fwa mon’n oule rasanble ou zanfan ansanm parey en mer poul i rasanble son bann piti anba son lezel, me ou pa’n oule. Lala! ou lakaz aprezan in ganny abandonnen.”—Matye 23:37, 38.

4. Ki mannyer i ti vin evidan ki Zeova ti abandonn Zerizalenm an 70 N.L.?

⁴ Sa soufrans ki sa pep rebel ti eksperyanse an 70 N.L., ti levidans ki Zeova ti’n rezet zot. Dan sa lannen, larme Romen, avek zot lanblenm leg ki zot ti tenir byen anler, ti anvair Zerizalenm pour fer en masak terib. Sa zour, lavil ti ranpli avek dimoun ki ti’n vin selebre Lapak. Tou zot sakrifis pa ti kapab fer zot ganny faver Bondye. Malerezman, sa ti egzakteman parey sa ki Samyel ti dir avek Lerwa dezobeisan Sail: “Eski Zeova i annan otan plezir dan lofrann brile ek sakrifis ki  dan obei lavwa Zeova? Ekoute! Obei i pli bon ki en sakrifis, port latansyon i pli bon ki lagres mouton.”—1 Samyel 15:22.

5. Ki kalite lobeisans ki Zeova i ekspekte, e ki mannyer nou konnen ki en tel lobeisans i posib?

⁵ Kantmenm Zeova i met bokou lanfaz lo lobeisans, i konn byen limitasyon imen enparfe. (Psonm 130:3, 4) Sa ki Zeova i demande se ki nou annan en leker senser, e ki nou obeir li akoz nou annan lafwa, lanmour, e nou per pour ofans li. (Deterononm 10:12, 13; Proverb 16:6; Izai 43:10; Mika 6:8; Romen 6:17) Sa ‘gro nyaz temwen avan lepok Kretyen’ ti demontre ki en tel lobeisans i posib. Zot ti reste fidel kantmenm zot ti fer fas avek bann leprev efreyan, e menm avek lanmor. (Ebre 11:36, 37; 12:1) Sirman zot in fer leker Zeova rezwir! (Proverb 27:11) I annan lezot ki ti fidel okonmansman, me zot pa’n kontinyen reste obeisan. Enn parmi ti Lerwa Yeoas dan ansyen Zida.

Move Frekantasyon ti gat en Lerwa

6, 7. Ki kalite lerwa Yeoas ti ete pandan ki Yeoyada ti ankor vivan?

⁶ Ler i ti ankor zanfan, Lerwa Yeoas ti pros pour ganny asasinen. Alaz set an, Gran Pret Yeoyada pa ti per pour tir li dan kasyet e fer li vin lerwa. Vi ki Yeoyada ti annan lakrent pour Bondye, e i ti azir konman en papa ek en konseye pour Yeoas, alor sa zenn dirizan “ti kontinyen fer sa ki byen dan lizye Zeova pandan letan pret Yeoyada.”—2 Kronik 22:10–23:1, 11; 24:1, 2.

⁷ Bann bon aksyon Yeoas ti enkli reparasyon lo tanp Zeova—en keksoz ki ti “dan leker Yeoas.” Parey Moiz ti’n ordonnen, Yeoas ti fer Gran Pret Yeoyada pa oubliy lenportans ranmas taks tanp, dan Zida ek Zerizalenm, pour ganny larzan pour travay reparasyon. Aparaman, Yeoyada ti’n reisi ankouraz sa zenn lerwa pour etidye e obeir Lalwa Bondye. Alor, travay lo tanp e lo bann lekipman tanp ti vitman ganny konplete.—2 Kronik 24:4, 6, 13, 14; Deterononm 17:18.

8. (a) Ki ti lakoz prensipal ki ti fer Yeoas perdi son spirityalite? (b) Finalman ki son dezobeisans ti anmenn li pour fer?

⁸ Malerezman, lobeisans Yeoas anver Zeova pa ti dire. Akoz? Parol Bondye i dir nou: “Apre lanmor Yeoyada bann prens Zida ti vini e ti salye lerwa. Depi sa, lerwa ti ekout zot. E ptit-a-pti zot ti kit lakaz Zeova, Bondye zot zanset, e konmans servi poto sakre ek bann zidol, e sa ti anmenn lakoler kont Zida ek Zerizalenm akoz zot ti koupab.” Move lenfliyans bann prens Zida ti osi fer lerwa pa ekout bann profet Bondye. Enn parmi ti Zekarya, garson Yeoyada, ki pa ti per pour reprimann Yeoas ek lepep pour zot dezobeisans. Olye repantir, Yeoas ti fer Zekarya ganny lapide ziska lanmor. Wi, Yeoas ti’n vin en zonm dezobeisan, san konpasyon, e tousala akoz i ti’n les li ganny enfliyanse par bann move frekantasyon!—2 Kronik 24:17-22; 1 Korentyen 15:33.

9. Akoz sa ki ti arive avek Yeoas ek bann prens, i montre ki i bet pour dezobei Zeova?

⁹ Vi ki zot ti’n abandonn Zeova, ki ti arive avek Yeoas ek sa bann move prens ki ti son zanmi? En lafors militer sorti Lasiri ki ti  enkli zis “en pti group zonm” ti anvair Zida e “anmenn larin lo tou bann prens parmi lepep.” Bann devaster ti osi fors lerwa pour donn son bann posesyon osi byen ki lor ek larzan tanp. Kantmenm Yeoas ti sirviv, i ti vin en zonm malad e dezespere. Pa bokou letan apre, serten son bann serviter ti fer konplo kont li e asasin li. (2 Kronik 24:23-25; 2 Lerwa 12:17, 18) Wi, parol ki Zeova ti dir nasyon Izrael ti vin en realite: “Si ou pa ekout lavwa Zeova ou Bondye par fer atansyon pour obeir tou son bann komannman ek son bann lord . . . , tou sa bann malediksyon pou ariv lo ou”!—Deterononm 28:15.

Lobeisans ti sov en Sekreter

10, 11. (a) Akoz i bon pour reflesir lo konsey ki Zeova ti donn Barouk? (b) Ki konsey ki Zeova ti donn Barouk?

¹⁰ Eski parler ou santi ou fatige akoz laplipar dimoun ki ou rankontre dan predikasyon pa montre okenn lentere dan sa bon nouvel? Eski parler ou santi ou en pti pe zalou bann dimoun ris ek zot fason viv? Si i leka, reflesir lo Barouk, sekreter Zeremi, e sa bon konsey ki Zeova ti donn li.

¹¹ Barouk ti pe ekrir en mesaz profetik ler li menm ti resevwar latansyon Zeova. Akoz? Parski Barouk ti konmans regrete sa ki i ti annan dan lavi e i ti anvi en keksoz pli meyer olye son privilez spesyal pour servi Bondye. Ler Zeova ti vwar sa sanzman dan latitid Barouk, i ti donn li en konsey byen kler me zantiy. I ti demann Barouk pour pa kontinyen rod sa bann gro keksoz ki i ti pe rode pour li menm, akoz i pe anmenn en maler lo tou dimoun, e i pou sov son lavi partou kot i kapab ale.—Zeremi 36:4; 45:5.

12. Akoz nou devret evite rod “bann gro keksoz” dan sa sistenm?

¹² Dan parol ki Zeova ti dir avek Barouk, eski ou kapab santi sa gran lentere ki Zeova ti annan pour sa zonm fidel, ki ti’n servi li avek kouraz akote Zeremi? Pareyman ozordi, Zeova i annan gran lentere pour sa bann ki pe ganny tante pour rod sa ki zot krwar, i bann loportinite pli profitab dan sa sistenm. Erezman, parey Barouk, bokou in byen reazir anver bann bon konsey ki bann frer matir in donnen pour redres zot. (Lik 15:4-7) Wi, fotespere ki nou tou nou byen konpran ki napa lavenir pour sa bann ki rod “bann gro keksoz” dan sa sistenm. Zot pa zis pa arive trouv boner, me sa ki pli terib ankor, se ki byento zot pou ganny detri avek sa lemonn ek son bann dezir egois.—Matye 6:19, 20; 1 Zan 2:15-17.

13. Ki leson lo limilite sa resi konsernan Barouk i ansenny nou?

¹³ Sa resi konsernan Barouk i osi ansenny nou en bon leson konsernan limilite. Remarke ki Zeova pa ti konsey Barouk direkteman me i ti koz atraver Zeremi, en dimoun ki Barouk ti probableman konn ase byen son bann defo ek latitid en pe drol. (Zeremi 45:1, 2) Pourtan, Barouk pa ti les li ganny dominen par lorgey; okontrer i ti abes li e i ti rekonnet vre sours sa konsey—Zeova. (2 Kronik 26:3, 4, 16; Proverb 18:12; 19:20) Alor, si nou ‘pran en fo pa avan ki nou konnen’ e resevwar konsey neseser dan Parol Bondye, annou imit matirite, disernman spirityel, ek limilite Barouk.—Galat 6:1.

14. Akoz i bon pour nou obeir sa bann ki pe diriz nou?

¹⁴ Si nou annan limilite, sa pou osi ed sa bann ki pe donn nou konsey. Ebre 13:17 i  dir: “Obei zot bann dirizan e swiv zot lord; parski zot pe kontinyelman vey lo zot lam, konman bann dimoun ki bezwen rann kont lo zot size. Les zot fer zot travay dan lazwa, e non pa dan lapenn ki pa pou anmenn okenn lavantaz pour zot.” Konbyen fwa bann ansyen i devid zot leker avek Zeova, priy pour kouraz, lasazes, ek bon zizman pour kapab byen pran swen avek sak manm kongregasyon! Sa pa en travay fasil. Annou ‘montre nou lapresyasyon pour bann tel zonm.’—1 Korentyen 16:18.

15. (a) Konman ki Zeremi ti demontre son konfyans dan Barouk? (b) Ki mannyer Barouk ti ganny rekonpanse pour son lobeisans?

¹⁵ I evidan ki Barouk ti sanz son fason panse, akoz apre Zeremi ti donn li en latas byen difisil. I ti bezwen al kot tanp e lir aotvwa sa menm mesaz zizman ki Zeremi ti’n fer li ekri. Eski Barouk ti obeir? Wi, i ti fer “tou sa ki profet Zeremi ti komann li.” Annefe, i ti al ziska pour lir sa menm mesaz avek bann prens Zerizalenm, en keksoz ki san dout ti demann en bon pe kouraz. (Zeremi 36:1-6, 8, 14, 15) Apepre 18 an plitar ler bann Babilonnyen ti detri lavil, zis esey mazinen ki mannyer Barouk ti rekonesan ki i ti’n ganny eparnyen akoz i ti ekout lavertisman Zeova e aret rod “bann gro keksoz” pour li menm!—Zeremi 39:1, 2, 11, 12; 43:6.

Lobeisans pandan en Latak ti sov Lavi

16. Konman ki Zeova ti montre konpasyon pour bann Zwif an Zerizalenm pandan latak par bann Babilonnyen an 607 A.N.L.?

¹⁶ An 607 A.N.L., ler Zerizalenm ti trouv son lafen, Bondye ti demontre ankor enn fwa son konpasyon pour bann ki obeisan. Ler latak ti’n ariv lo son pik, Zeova ti dir avek bann Zwif: “La mon pe met devan zot semen lavi ek semen lanmor. Sa ki reste dan lavil pou mor par lepe e par lafamin e par maladi; me sa ki sorti e ki [rann lekor] avek bann Kaldeen ki pe atak zot pou kontinyen viv.” (Zeremi 21:8, 9) Kantmenm bann zabitan Zerizalenm ti merit destriksyon, Zeova ti montre konpasyon pour sa bann ki ti obeir li, menm dan sa dernyen moman kritik. *

17. (a) Nonm sa de fason ki lobeisans Zeremi ti ganny teste. (b) Konman nou kapab benefisye atraver legzanp lobeisans Zeremi?

¹⁷ Dir bann Zwif pa lager, ti sirman teste osi lobeisans Zeremi. Akoz premyerman i ti anvi defann non Bondye. I pa ti anvi ki bann lennmi i sali sa non vi ki zot ti pou dir ki se sa bann zidol ki ti donn zot laviktwar. (Zeremi 50:2, 11; Lamantasyon 2:16) Deplis, Zeremi ti konnen ki ler i pou demann lepep pour pa lager, i ti pe met son prop lavi  an danze, akoz bokou dimoun ti pou krwar ki i pe pran kote avek bann Babilonnyen. Toudmenm, i pa ti per, me i ti obeir Zeova e anons son parol. (Zeremi 38:4, 17, 18) Parey Zeremi, nou osi nou anons en mesaz ki dimoun pa oule tande. I ti sa menm mesaz ki ti fer bokou pa kontan Zezi. (Izai 53:3; Matye 24:9) Alor annou pa ‘tranble devan zonm,’ me parey Zeremi, annou avek kouraz obeir Zeova e met tou nou konfyans dan li.—Proverb 29:25.

Lobeisans pandan Latak Gog

18. Ki leprev ki pe vini byento ki pou teste lobeisans serviter Zeova?

¹⁸ Byento, sistenm mesan Satan an antye pou ganny detri dan en “gran ladetres.” (Matye 24:21, NW ) Sirman avan e pandan sa letan, pep Bondye pou eksperyans bann gro leprev anver zot lafwa ek lobeisans. Par egzanp, Labib i dir nou ki Satan, dan son rol konman “Gog sorti dan pei Magog,” pou fer en latak kont serviter Zeova. Bann lafors Gog ki pe prepare pour aksyon, i ganny dekrir konman “en gran kantite lafors militer . . . , parey nyaz ki kouver pei.” (Ezekyel 38:2, 14-16) Pep Bondye pa arme e napa bokou zot. Selman Zeova in ouver son lezel pour protez bann ki obeisan, ki pou rod refiz anba son “bout lezel.”

19, 20. (a) Akoz lobeisans Izrael ti vreman enportan ler zot ti kot Lanmer Rouz? (b) Akoz ki priye e reflesir lo sa resi i kapab benefisye nou ozordi?

¹⁹ Sa sitiasyon i fer nou mazin ler Izrael ti pe sorti Lezip. Apre ki Zeova ti’n frap Lezip avek dis fleo, olye gid zot lo sa semen ki ti pli kourt ver Later Promiz, i ti anmenn zot kot Lanmer Rouz, kot zot ti kapab ganny kwense fasilman si zot ti ganny atake. Ler ou get li dapre en pwennvi militer, sa ti paret en move deplasman. Fer konmsi ou ti prezan sa zour, eski ou ti pou’n obeir parol Zeova atraver Moiz e desann kot Lanmer avek konfyans total, ler ou ti konnen ki Later Promiz i sitye dan en lot direksyon?—Egzod 14:1-4.

²⁰ Ler nou lir lezot verse dan Egzod sapit 14, nou vwar ki mannyer Zeova ti delivre son pep par demontre en pwisans enkrwayab. Ler nou pran letan pour etidye e reflesir lo sa bann resi, sa i kapab fer nou lafwa vin bokou pli for! (2 Pyer 2:9) An retour, en lafwa ki for i fortifye nou pour obeir Zeova, menm ler sa ki i demande i paret pa fer sans pour nou imen. (Proverb 3:5, 6) Alor demann ou lekor, ‘Eski mon pe esey batir mon lafwa atraver letid Labib, lapriyer ek meditasyon serye, osi byen ki asosye avek pep Bondye regilyerman?’—Ebre 10:24, 25; 12:1-3.

Lobeisans i anmenn Lespwar

21. Pour bann ki obeir Zeova, ki benediksyon zot pe gannyen konmela menm e dan lavenir?

²¹ Bann ki abitye obeir Zeova, i eksperyans konmela menm lakonplisman Proverb 1:33, ki dir: “Kant a sa enn ki pe ekout [oubyen obeir] mwan, i pou viv an sekirite  e i pou viv trankilman san ki i bezwen per maler.” Dan en fason merveye sa bann parol rekonfortan pou aplike pandan zour vanzans Zeova ki pe aprose! Annefe, Zezi ti dir son bann disip: “Alor, kan sa bann keksoz i a konmans arive, dres zot e lev zot latet anler, akoz zot delivrans i ava pe aprose.” (Lik 21:28) Definitivman, selman bann ki obeir Bondye ki pou annan konfyans pour port latansyon lo sa bann parol.—Matye 7:21.

22. (a) Akoz ki pep Zeova i annan konfyans? (b) Ki size ki pou ganny diskite dan lartik swivan?

²² En lot rezon pour annan konfyans, se ki “Souvren Senyer Zeova pa pou fer en keksoz amwen ki i’n revel son keksoz konfidansyel avek son serviter bann profet.” (Amos 3:7) Ozordi, Zeova pa enspir bann profet parey dan lepase; selman i’n demann en group dimoun—lesklav fidel—pour fourni nouritir spirityel avek son pep. (Matye 24:45-47) Alor, i vreman enportan ki nou annan en latitid obeisan anver sa ‘lesklav’! Parey prosen lartik pou montre, en tel lobeisans i osi reflekte nou latitid anver Zezi, met sa ‘lesklav.’ Li i sa Enn ki “tou bann pep pou obeir.”—Zenez 49:10.

[Not anba lo paz]

Eski ou rapel?

• Vi ki Izrael ti kontinyen dezobei, ki ti ariv zot?

• Ki mannyer Lerwa Yeoas ti ganny afekte par son bann zanmi boner dan son lavi e plitar?

• Ki leson nou kapab aprann atraver Barouk?

• Akoz pep obeisan Zeova napa okenn rezon pour per anmezir ki sa sistenm i ariv son lafen?

[Kestyon]

[Portre lo paz 23]

Anba gidans Yeoyada, zenn Yeoas ti obeir Zeova

[Portre lo paz 25]

Move frekantasyon ti enfliyans Yeoas pour fer profet Bondye ganny touye

[Portre lo paz 26]

Eski ou ti pou’n obeir Zeova e vwar son pouvwar enkrwayab pour anmenn delivrans?