Akoz i telman difisil pour demann Leskiz?

AN ZILYET 2000, Lasanble Nasyonal Kaliforni an Letazini ti pas en lalwa. Sa lalwa ti dir ki si en dimoun i senpatiz avek en lot dimoun ki’n ganny blese dan en aksidan kot li osi ti enplike, i pa pou ganny konsidere konman responsab. Akoz zot ti pas sa lalwa? Parski zot ti’n remarke ki ler en aksidan i koz blesir ek domaz, bann dimoun i souvannfwa ezite pour demann leskiz. Akoz zot per pangar si sa ka i ganny anmennen devan lakour zot a ganny trouve koupab. De lot kote, bann ki santi ki lezot i devret demann zot leskiz toudswit i kapab ankoler, e en pti aksidan i kapab vin en gran bagar.

Byensir, i pa neseser pour ou demann leskiz pour en aksidan si pa ti ou lafot. Parfwa, i kapab pli byen si ou fer atansyon sa ki ou dir. En vye proverb i dir: “Dan en kantite parol sa ki mal pa manke, me sa enn ki vey son labous i saz.” (Proverb 10:19; 27:12) Kantmenm sa, ou kapab poli e zantiy.

Pa i vre, ki bokou dimoun in aret demann leskiz, menm si napa okenn  zafer ki pou ganny prezante devan lakour? Kot lakaz, en madanm i kapab plennyen, ‘Mon msye pa zanmen demann leskiz.’ Kot travay, en formenn i konplent, ‘Mon bann travayer pa zanmen admet zot fot, e i rar ki zot demann leskiz.’ Kot lekol, en mis i kapab raporte, ‘Bann zanfan pa’n ganny edike pour dir eskiz mwan.’

En rezon akoz en dimoun i ezite pour demann leskiz i kapab akoz i per pangar i a ganny rezete. I kapab pa eksprim vreman sa ki i santi akoz i per ki sa lot dimoun pou inyor li. Deplis, sa dimoun ki’n ganny blese i kapab evit sa enn ki’n bles li totalman, e sa i fer rekonsilyasyon vin tre difisil.

Serten dimoun pa enterese avek santiman lezot e sa i kapab en lot rezon akoz zot ezite pour demann leskiz. Zot kapab dir, ‘Demann leskiz pa pou sanz sa fot ki mon’n fer.’ I menm annan lezot ki ezite pour fer li akoz konsekans ki sa i kapab anmennen. Zot demande, ‘Eski mon pou responsab e ganny demande pour pey domaz?’ Me rezon ki pli souvan fer li difisil pour demann leskiz se lafyerte. En dimoun ki tro fyer pour dir “Eskiz mwan,” pe an realite dir, ‘Mon konnen mon annan tor, me mon pa pou abes mwan devan li.’

Pour diferan rezon, bokou dimoun i trouv li difisil pour demann leskiz. Me eski i vreman neseser pour demann leskiz? Ki benefis i annan kan nou demann leskiz?

[Portre lo paz 3]

“Bann zanfan pa’n ganny elve pour dir eskiz mwan”

[Portre lo paz 3]

“Mon bann travayer pa zanmen admet zot fot”

[Portre lo paz 3]

“Mon msye pa zanmen demann leskiz”