Annou Touzour Gard Nou Bon Kondwit
Annou Touzour Gard Nou Bon Kondwit
“Respekte tou dimoun, kontan zot bann frer dan lafwa.”—1 PYER 2:17.
1, 2. (a) Ki komanter korespondan en zournal ti fer lo Temwen Zeova? (b) Akoz Temwen Zeova i sey fer zot mye pour gard en standar kondwit ki tre onivo?
ENNDE lannen pase, korespondan en zournal an Amarillo, Texas, Letazini, ti vizit diferan legliz dan sa rezyon e i ti fer en rapor lo son bann obzervasyon. Ti annan en group ki ti enpresyonn li bokou. I ti dir: “Mon’n asiste lasanble annyel Temwen Zeova kot Sant Kominoter Amarillo pour trwa zan. Pandan ki mon’n vir vire parmi zot, mon pa’n zanmen vwar enn parmi zot alim en sigaret, debous en sopin labyer, oubyen dir en parol sal. Mon pa’n zanmen vwar bann dimoun sitan prop, si byen konport zot, si byen sanze, ki bann Temwen Zeova. Zot en bann dimoun fasil.” Bann komanter parey lo Temwen Zeova in souvan ganny pibliye. Akoz bann Temwen i souvan ganny felisite par bann dimoun ki napa menm krwayans avek zot?
2 Pep Bondye i abitye ganny felisite akoz zot bon kondwit. Kantmenm bann standar an zeneral pe deteryore, Temwen Zeova i vwar li en devwar pour zot gard en standar kondwit ki tre onivo. Sa i form par zot ladorasyon. Zot konnen ki zot aksyon i reflekte lo Zeova ensi ki lo zot bann frer Kretyen. Zot osi konnen ki zot bon kondwit i koz an faver sa parol laverite ki zot prese. (Zan 15:8; Tit 2:7, 8) Alor, annou vwar konman nou kapab gard nou bonn kondwit, ki ava fer nou kontinyen gard bon repitasyon Zeova ek son bann Temwen. Nou pou osi vwar konman nou menm nou benefisye letan nou konport nou byen.
Fanmiy Kretyen
3. Akoz bann fanmiy Kretyen i bezwen ganny proteze?
3 Annou vwar konman nou devret konport nou dan lafanmiy. En liv lo laliberte larelizyon (Die Neuen Inquisitoren: Religionsfreiheit und Glaubensneid) ekrir par Gerhard Besier ek Erwin K. Scheuch, i dir: “Pour [Temwen Zeova] lafanmiy i en keksoz ki sirtou bezwen ganny proteze.” Sa i vre. Deplis, ozordi i annan bokou danze pour nou protez nou fanmiy avek. I annan bann zanfan ki “dezobeisan anver zot paran” e bann adilt ki “annan leker dir” oubyen napa kontrol lo zot lekor. (2 Timote 3:2, 3) Souvan papa ek manman i lager, e paran i abiz oubyen negliz zanfan. Zanfan i rebele, servi drog, e anmenn en lavi imoral, oubyen zot kit lakour. Tousala se rezilta lenfliyans ‘lespri lemonn’ ki zis detrir. (Efezyen 2:1, 2) Nou bezwen protez nou fanmiy kont sa lespri. Konman nou kapab fer sa? Letan nou ekout konsey ek gidans ki Zeova i donnen pour sak manm fanmiy.
4. Ki responsabilite bann manm fanmiy Kretyen i annan anver kanmarad?
4 En mari ek en fanm Kretyen i konnen ki zot annan en devwar emosyonnel, spirityel, e fizik anver kanmarad. (1 Korentyen 7:3-5; Efezyen 5:21-23; 1 Pyer 5:7) En paran Kretyen i annan bann gro responsabilite anver son zanfan. (Proverb 22:6; 2 Korentyen 12:14; Efezyen 6:4) Anmezir ki zanfan i grandi, zot aprann ki zot osi zot annan serten devwar. (Proverb 1:8, 9; 23:22; Efezyen 6:1; 1 Timote 5:3, 4, 8) I demann zefor, determinasyon, sakrifis, ek lanmour pour akonpli nou devwar familyal. Me letan sak manm fanmiy i fer sa ki Bondye i ekspekte zot fer, zot vin en benediksyon pour kanmarad e pour kongregasyon. Pli enportan ankor, zot onor Zeova ki’n fer sa laranzman fanmiy.—Zenez 1:27, 28; Efezyen 3:15.
Lasosyasyon Kretyen
5. Ki benediksyon nou gannyen kan nou asosye avek nou bann frer ek ser?
5 Nou tou ki Kretyen, nou annan serten responsabilite anver nou bann konpanyon dan kongregasyon e osi anver ‘tou nou bann frer dan lemonn antye.’ (1 Pyer 5:9) Pour annan en bon lasante spirityel, i tre enportan ki nou annan en bon relasyon avek kongregasyon. Letan nou asosye avek nou bann frer ek ser, nou kontan sa lasosyasyon ankourazan ki nou gannyen, ensi ki sa nouritir spirityel sorti kot ‘lesklav fidel e pridan.’ (Matye 24:45-47) Si nou annan en problenm, nou kapab al kot nou bann frer ek ser pour nou ganny en bon konsey ki baze lo prensip Labib. (Proverb 17:17; Eklezyast 4:9; Zak 5:13-18) Kan nou dan bezwen, nou bann frer ek ser pa abandonn nou. Pa i en gran benediksyon pour form parti lorganizasyon Bondye!
6. Ki mannyer Pol ti montre ki nou annan serten responsabilite anver nou bann konpanyon Kretyen?
6 Toudmenm, nou pa dan kongregasyon zis pour resevwar. Nou bezwen donnen osi. Anfet, Zezi ti dir: “I annan plis lazwa pour donnen ki pour resevwar.” (Akt 20:35) Zapot Pol ti montre ki nou devret pare pour donnen kan i ti ekrir: “Annou tenir ferm nou lesperans, parski sa enn ki’n fer sa promes i fidel. Annou rode konman pous kanmarad pour annan lanmour e fer sa ki byen. Pa abandonn zot lasanble parey labitid serten parmi zot, me ankouraz kanmarad sirtou ki la sa Zour Senyer pe aprose.”—Ebre 10:23-25.
7, 8. Ki mannyer nou montre ki nou pare pour donnen dan nou kongregasyon e osi pour bann Kretyen dan lezot pei?
7 Nou “tenir ferm nou lesperans” dan kongregasyon, letan nou fer bann komanter pandan renyon oubyen letan nou partisip lo progranm dan lezot fason. Nou kontribisyon dan sa domenn i sirman ankouraz nou bann frer ek ser. Nou osi ankouraz zot letan nou koz avek zot avan oubyen apre renyon. Sa i en letan ki nou kapab servi pour nou ankouraz bann ki feb, konsol bann ki dekouraze, e rekonfort bann ki malad. (1 Tesalonisyen 5:14) Bann Kretyen ki senser i donn bokou dan sa domenn. Se pour sa ki bokou dimoun i enpresyonnen par sa lanmour ki zot resanti parmi nou letan zot asiste nou renyon pour premye fwa.—Psonm 37:21; Zan 15:12; 1 Korentyen 14:25.
8 Toudmenm, nou lanmour pa devret zis pour nou prop kongregasyon. I pour nou lasosyasyon frer dan lemonn antye. Pour sa rezon ki i annan en bwat kontribisyon pour fon Lasal Rwayonm dan sak kongregasyon. Petet nou prop Lasal i dan en bon kondisyon, me nou konnen ki bokou nou bann frer ek ser dan lezot pei napa en landrwa konvenab kot zot zwenn ansanm. Letan nou fer en kontribisyon pour Fon Lasal Rwayonm, nou montre ki nou kontan sa bann dimoun menm si petet nou pa konn zot personnelman.
9. Akoz Temwen Zeova i kontan kanmarad?
9 Akoz bann Temwen Zeova i kontan kanmarad? Parski Zezi ti demann zot pour kontan kanmarad. (Zan 15:17) Deplis, sa lanmour ki zot annan pour kanmarad i en laprev ki lespri Bondye i lo zot endividyelman e konman en group. Lanmour i form par “fri Lespri.” (Galat 5:22, 23) Etan donnen ki Temwen Zeova i etidye Labib, asiste bann renyon Kretyen, e touzour priye, lanmour i vin natirel pour zot kantmenm zot pe viv dan en lemonn kot ‘lanmour en pli gran kantite dimoun in diminyen.’—Matye 24:12.
Nou relasyon avek sa Lemonn
10. Ki responsabilite nou annan anver sa lemonn?
10 Letan Pol i mansyonn “tenir ferm nou lesperans,” sa i fer nou mazin en lot responsabilite ki nou annan. Tenir ferm nou lesperans i enplik anons sa bon nouvel avek bann ki pa ankor vin nou konpanyon Kretyen. (Matye 24:14; 28:19, 20; Romen 10:9, 10, 13-15) Sa i en lot fason kot nou kapab donnen. I en travay ki demann letan, lenerzi, preparasyon, formasyon, ek resours personnel. Toudmenm, Pol ti ekrir: “Mon konsider li mon devwar pour vizit bann Grek konman bann etranze, bann savan, konman bann inyoran. Pour sa menm rezon ki mon annan sa gran dezir pour vin anons zot osi Levanzil, zot ki reste Ronm.” (Romen 1:14, 15) Fotespere ki nou swiv legzanp Pol e nou pa tike pour fer nou “devwar” dan sa domenn.
11. Nonm sa de prensip Labib ki determin nou relasyon avek sa lemonn. Ki nou bezwen realize toudmenm?
11 Eski nou annan lezot responsabilite anver bann ki pa nou konpanyon Kretyen? Definitivman. Byensir, nou konnen ki “lemonn antye i dan pouvwar dyab.” (1 Zan 5:19) Nou konnen ki Zezi ti dir sa konsernan son bann disip: “Zot pa fer parti lemonn parey mwan mon pa fer parti lemonn.” Toudmenm, nou pe viv dan sa lemonn, nou travay ladan, e nou benefisye avek diferan servis ki i ofer. (Zan 17:11, 15, 16) Alors, nou annan serten devwar dan sa lemonn. Ki nou devwar? Zapot Pyer ti reponn sa kestyon. Apre destriksyon Zerizalenm, i ti ekrir en let bann Kretyen an Lazi Miner. Serten porsyon sa let i ed nou pour gard en lekilib dan nou relasyon avek sa lemonn.
12. Dan ki sans bann Kretyen i “bann etranze ek vwayazer”? Dan sa ka, ki zot devret gard zot kont?
12 Pour konmanse, Pyer ti dir: “Mon bann byenneme, mon demann zot antan ki etranze ek vwayazer, gard zot kont bann dezir natir imen ki fer lager kont zot lam.” (1 Pyer 2:11) Dan en sans spirityel, bann vre Kretyen i “bann etranze ek vwayazer.” Sa se akoz zot sirtou konsantre lo zot lespwar pour lavi eternel—bann Kretyen swazir pou al dan lesyel e ‘lezot mouton’ pou viv dan paradi lo later. (Zan 10:16; Filipyen 3:20, 21; Ebre 11:13; Revelasyon 7:9, 14-17) Me ki sa bann dezir natir imen ki i mansyonnen? Zot enkli lanvi pour vin ris e pour ganny rekonnet, ek bann dezir seksyel imoral. Zot osi enkli “zalouzi” ek “move dezir pour akapar keksoz dimoun.”—Kolosyen 3:5; 1 Timote 6:4, 9; 1 Zan 2:15, 16.
13. Ki mannyer bann dezir natir imen i “fer lager kont [nou] lam”?
13 Sa bann dezir i vreman “fer lager kont [nou] lam.” Zot afekte nou relasyon avek Bondye e met nou lespwar (nou “lam,” oubyen lavi) an danze. Par egzanp, si nou devlop en lentere dan bann keksoz imoral, ki mannyer nou pou kapab ofer nou lekor “konman en sakrifis vivan, sen e agreab devan Bondye”? Si nou les bann keksoz materyel tronp nou, ki mannyer nou pou kapab “rod plito Rwayonm Bondye”? (Romen 12:1, 2; Matye 6:33; 1 Timote 6:17-19) I ti a pli bon si nou ti swiv legzanp Moiz an rezetan sa bann swadizan gro keksoz ki lemonn i ofer, e met servis Zeova premye dan nou lavi. (Matye 6:19, 20; Ebre 11:24-26) Sa i en pa enportan pour nou kapab gard en lekilib dan nou relasyon avek sa lemonn.
Gard nou “bonn Kondwit”
14. Akoz nou sey nou mye pour gard nou bonn kondwit konman Kretyen?
14 Nou trouv en lot prensip enportan dan sa ki Pyer ti dir apre: “Zot devre annan bonn kondwit parmi bann payen pour ki ler zot ganny akize pour mal fer, bann payen a rekonnet zot bonn aksyon e rann glwar Bondye zour i pou vini.” (1 Pyer 2:12) Vi ki nou Kretyen, nou sey nou mye pour montre legzanp. Nou travay dir dan lekol. Dan travay, nou fer nou mye e nou onnet menm si nou anplwayer i paret egzazere parler. Dan en lakour kot sa mari oubyen madanm pa dan laverite, sa enn ki Temwen i fer en zefor spesyal pour swiv bann prensip Labib. I vre ki sa pa touzour fasil, me nou konnen ki nou bon legzanp i fer plezir Zeova e i souvan annan en bon lefe lo bann ki pa Temwen.—1 Pyer 2:18-20; 3:1.
15. Ki mannyer nou konnen ki Temwen Zeova i ganny rekonnet pour zot bonn kondwit partou dan lemonn?
15 Bann komanter ki’n ganny pibliye dan lepase lo Temwen Zeova i montre ki laplipar zot in reisi gard en standar egzanpler. Par egzanp, zournal Il Tempo an Itali ti raporte: “Bann dimoun ki travay avek bann Temwen Zeova i dekrir zot konman bann travayer onnet. Zot annan sitan en gran konviksyon dan zot lafwa ki konmsi zot mazin zis sanmenm. Toudmenm, zot merit ganny respe pour zot fidelite.” Zournal Herald an Buenos Aires, Larzantin, ti dir: “Pour bokou lannen, Temwen Zeova in montre ki zot en bann sitwayen ki travay dir, ki serye, ki pa kontan gaspiye, e ki annan lakrent pour Bondye.” En spesyalis Ris, Sergei Ivanenko, ti dir: “Temwen Zeova i renonmen partou dan lemonn konman bann dimoun ki vreman respekte lalwa e ki sirtou fidel an sa ki konsern pey zot taks.” Manedyer en fasilite ki bann Temwen Zeova ti servi an Zimbabwe pour fer zot lasanble, ti dir: “Mon vwar serten Temwen pe anmas papye ater e netway twalet. Sa landrwa kot lasanble pe fer i pli prop ki avan. Zot bann adolesan i vreman viv dapre bann bon prensip. Mon swete ki lemonn ti a ranpli avek Temwen Zeova.”
Soumisyon Kretyen
16. Ki relasyon nou annan avek bann lotorite dan sa lemonn, e akoz?
16 Pyer i osi koz lo nou relasyon avek bann lotorite dan sa lemonn. I dir: “Akoz nou Senyer, soumet zot avek tou lotorite imen, avek lerwa ki annan lotorite siprenm. Avek gouvernman ki’n ganny anvoye pour pini bann ki mal fer e felisit sa ki byen fer. Bondye i oule ki an fezan sa ki byen, zot donn legzanp bann ki dan linyorans ek bann enbesil e fer zot reste trankil.” (1 Pyer 2:13-15) Nou apresye bann byenfe ki nou gannyen avek gouvernman, e parey Pyer i dir, nou obeir lalwa gouvernman e pey nou taks. Menm si nou konnen ki Bondye in donn gouvernman drwa pour pini bann ki kas lalwa, rezon prensipal ki nou soumet avek lotorite i “akoz nou Senyer.” Bondye i demann nou pour fer sa. Deplis, nou pa anvi anmenn repros lo non Zeova par ganny pini pour mal fer.—Romen 13:1, 4-7; Tit 3:1; 1 Pyer 3:17.
17. Kan bann ki dan “linyorans” i opoz nou, ki konfyans nou kapab annan?
17 Malerezman, akoz zot “linyorans” serten dan lotorite i persekit nou oubyen opoz nou dan lezot fason. Par egzanp, zot promot bann kanpanny baze lo mansonz pour sali nou repitasyon. Kantmenm sa, zot bann mansonz i ganny devwale dan letan apropriye Zeova, e sa i fer zot reste trankil. Repitasyon ki nou annan lo nou bon konportman i koz pour li menm. Se pour sa ki bann zofisye gouvernman ki onnet i souvan koz an byen lo nou.—Romen 13:3; Tit 2:7, 8.
Serviter Bondye
18. Ki mannyer nou kapab evite mal servi nou liberte konman Kretyen?
18 Aprezan, Pyer i averti nou: “Fer konman bann zonm lib, me pa itiliz zot liberte konman en tapi pour kouver sa ki mal, me azir konman bann serviter Bondye.” (1 Pyer 2:16; Galat 5:13) Ozordi, nou konnesans lo laverite ki sorti dan Labib i liber nou avek lansennyman bann fo larelizyon. (Zan 8:32) Deplis, nou annan sa liberte pour swazir. Kantmenm sa, nou pa mal servi nou liberte. Kan nou swazir nou zanmi, nou lenz, divertisman, e menm sa ki nou manze e bwar, nou gard antet ki en vre Kretyen i en serviter Bondye. Alors, i pa fer sa ki fer li plezir. Nou nou swazir pour servi Zeova olye vin lesklav nou prop dezir oubyen lesklav bann lanmod ek stil sa lemonn.—Galat 5:24; 2 Timote 2:22; Tit 2:11, 12.
19-21. (a) Ki mannyer nou konsider bann ki annan serten lotorite dan sa lemonn? (b) Konman serten in montre ki zot “kontan zot bann frer dan lafwa”? (c) Lekel nou responsabilite pli enportan?
19 Pyer i kontinyen par dir: “Respekte tou dimoun, kontan zot bann frer dan lafwa, annan reverans pour Bondye e respe pour Lerwa.” (1 Pyer 2:17) Vi ki Zeova i permet imen okip diferan pozisyon dan lotorite, nou montre sa bann dimoun respe ki zot merite. Nou menm priy pour zot, pour ki zot permet nou kontinyen nou minister dan lape e reste atase avek Bondye. (1 Timote 2:1-4) Anmenmtan, nou “kontan [nou] bann frer dan lafwa.” Nou touzour fer dibyen nou bann frer Kretyen, olye fer zot ditor.
20 Par egzanp, kan en pei Lafrik ti ganny desire par lager etnik, kondwit bann Temwen Zeova ti remarkab. En zournal Swis Reformierte Presse ti raporte: “An 1995, Drwa Afriken . . . ti kapab prouve ki tou legliz ti partisip [dan konfli] eksepte Temwen Zeova.” Kan sa nouvel trazik ti ariv dan lezot parti lemonn, deswit bann Temwen Zeova dan Lerop ti anvoy manze ek bann swen medikal pour zot frer ek lezot dimoun dan sa pei ki ti’n ganny afekte. (Galat 6:10) Zot ti obeir sa parol dan Proverb 3:27: “Pa refiz sa ki byen pour bann ki merit gannyen, ler i dan pouvwar ou lanmen pour fer li.”
21 Parkont, nou annan en responsabilite ki pli enportan ki sa respe ki nou dwa okenn lotorite dan sa lemonn. I menm pli enportan ki sa lanmour ki nou dwa nou bann frer. Lekel sa? Pyer ti dir: “Annan reverans pour Bondye.” Nou dwa Zeova plis ki nou dwa okenn imen. Konman sa? E ki mannyer nou kapab gard en balans ant sa ki nou dwa Bondye ek sa ki nou dwa lotorite? Sa bann kestyon pou ganny reponn dan lartik swivan.
Eski ou rapel?
• Ki responsabilite bann Kretyen i annan dan lafanmiy?
• Ki mannyer nou kapab montre ki nou pare pour donnen dan kongregasyon?
• Ki responsabilite nou annan vizavi sa lemonn?
• Nonm serten byenfe ki nou gannyen kan nou gard nou bonn kondwit.
[Kestyon]
[Portre lo paz 19]
Konman en fanmiy Kretyen i kapab anmenn bokou lazwa?
[Portre lo paz 20]
Akoz bann Temwen Zeova i kontan kanmarad?
[Portre lo paz 20]
Eski nou kapab montre lanmour pour nou bann frer menm si nou pa konn zot personnelman?