Bann Vre Kretyen Pa Fer Parti Lemonn
Bann Vre Kretyen Pa Fer Parti Lemonn
“Zot pa fer parti lemonn parey mwan mon pa fer parti lemonn.”—ZAN 17:16.
1, 2. Ki Zezi ti dir lo relasyon son bann disip avek lemonn, e ki kestyon sa i souleve?
DERNYEN swar son lavi konman en imen parfe, Zezi ti fer en gran lapriyer pandan ki son bann disip ti ekoute. Dan son lapriyer, i ti dir en keksoz ki dekrir lavi tou vre Kretyen. I ti dir sa lo son bann disip: “Mon’n donn zot ou mesaz, e lemonn in ay zot, parski zot pa fer parti lemonn parey mwan mon pa fer parti lemonn. Mon pa demann ou pour tir zot dan lemonn, me mon demann ou, pour prezerv zot kont sa enn ki apel Malen. Zot pa fer parti lemonn parey mwan mon pa fer parti lemonn.”—Zan 17:14-16.
2 De fwa, Zezi ti dir ki son bann disip pa pou fer parti lemonn. Deplis, lefe ki zot ti pou separe avek lemonn, sa ti pou kree konfli. Lemonn ti pou ay zot. Kantmenm sa, bann Kretyen pa devret enkyet, akoz Zeova ti pou protez zot. (Proverb 18:10; Matye 24:9, 13) An rapor avek parol Zezi, nou kapab demande: ‘Akoz bann vre Kretyen pa fer parti lemonn? Ki savedir pa fer parti lemonn? Si lemonn i ay bann Kretyen, alor ki mannyer bann Kretyen i devret vwar lemonn? Konman zot konsider bann gouvernman lemonn?’ I enportan pour konn pwennvi Labib lo sa bann kestyon akoz zot afekte nou tou.
“Nou apartenir a Bondye”
3. (a) Kwa ki fer nou separe avek sa lemonn? (b) Kwa ki montre ki lemonn i “dan pouvwar dyab”?
3 Nou bon relasyon avek Zeova i en rezon akoz nou pa fer parti lemonn. Zapot Zan ti ekrir: “Nou konnen ki nou apartenir a Bondye, e lemonn antye i dan pouvwar dyab.” (1 Zan 5:19) Definitivman, sa ki Zan i dir konsernan lemonn i vre. Sa kantite lager, krim, kriyote, dominasyon kriyel, malonnekte, ek imoralite ki egziste ozordi, i montre ki lenfliyans Satan ki pe dominen, pa sa ki pour Bondye. (Zan 12:31; 2 Korentyen 4:4; Efezyen 6:12) Kan en dimoun i vin Temwen Zeova, i pa pou fer oubyen aksepte sa bann move pratik. Alors, sa i fer li pa fer parti lemonn.—Romen 12:2; 13:12-14; 1 Korentyen 6:9-11; 1 Zan 3:10-12.
4. Konman nou montre ki nou pour Zeova?
4 Kontrerman avek lemonn, Zan ti dir ki bann Kretyen i “apartenir a Bondye.” Tou sa ki dedye zot lavi avek Zeova, i pour li. Zapot Pol ti dir: “Si nou viv, nou viv pour Senyer; e si nou mor, nou mor pour Senyer. Alor, swa ki nou viv swa ki nou mor, nou apartenir a Senyer.” (Romen 14:8; Psonm 116:15) Akoz nou pour Zeova, nou donn li en latasman zis pour li tousel. (Egzod 20:4-6) Alor, en vre Kretyen pa dedye son lavi pour akonpli serten lobzektif dan sa lemonn. E menm si i annan respe pour bann lanblenm nasyonal, i pa ador zot ni par aksyon ni menm ofon son leker. I pa ador bann vedet sport oubyen lezot zidol modern. Byensir, i respe drwa lezot pour fer sa ki zot anvi, me li i ador zis sa Enn ki’n kree li. (Matye 4:10; Revelasyon 19:10) Sa osi i fer li separe avek lemonn.
“Mon Rwayonm pa sorti lo sa Later”
5, 6. Ki mannyer soumisyon avek Rwayonm Bondye i fer nou separe avek lemonn?
5 Bann Kretyen pa fer parti lemonn akoz zot bann disip Kris e bann sitwayen Rwayonm Bondye. Kan Zezi ti pe ganny kestyonnen devan Pons Pilat, i ti dir: “Mon Rwayonm pa sorti lo sa later. Si mon Rwayonm ti sorti lo sa later, mon bann serviter ti a lager pour defann mwan kont lotorite Zwif. Non mon Rwayonm pa sorti lo sa later.” (Zan 18:36) Par mwayen sa Rwayonm, non Zeova pou ganny sangtifye, son drwa pour dirize pou ganny zistifye, e son lavolonte pou ganny fer lo later parey dan lesyel. (Matye 6:9, 10) Pandan son minister, Zezi ti pres sa bon nouvel Rwayonm, e i ti dir ki son bann disip ti pou kontinyen anons sa bon nouvel ziska lafen sa sistenm. (Matye 4:23; 24:14) An 1914, sa parol profetik dan Revelasyon 11:15 ti ganny realize: “Rwayonm lemonn in vin rwayonm nou Senyer, e son Kris. E i pou rennyen pour touzour.” Tre byento, sa Rwayonm lesyel pou vin sa sel pouvwar ki pou gouvern limanite. (Danyel 2:44) Sa zour, menm bann dirizan sa lemonn pou forse rekonnet son lotorite.—Psonm 2:6-12.
6 Alor, bann vre Kretyen ozordi i bann sitwayen Rwayonm Bondye, e zot obeir konsey Zezi pour “rod plito Rwayonm Bondye ek son lazistis.” (Matye 6:33) Sa pa donn zot rezon pour pa akonpli zot devwar anver zot pei, me i fer zot separe avek sa lemonn dan en sans spirityel. Parey dan premye syek, latas prensipal bann Kretyen ozordi se pour ‘anons Rwayonm Bondye.’ (Akt 28:23) Napa okenn gouvernman imen ki annan drwa anpes nou fer sa travay ki Bondye in demann nou pour fer.
7. Akoz bann vre Kretyen pa siport okenn konfli oubyen politik sa lemonn, e konman zot in montre sa?
7 Vi ki zot pour Zeova, zot bann disip Zezi, e bann sitwayen Rwayonm Bondye, bann Temwen Zeova pa’n siport okenn konfli nasyonal oubyen enternasyonal pandan sa 20 ek 21 tyenm syek. Zot pa’n pran kote avek personn, zot pa’n lev okenn zarm kont personn, e zot pa’n fer okenn propagann pour ganny okenn keksoz avek sa lemonn. Zot in ganny en kantite lopozisyon ki ti paret ensiportab. Me avek en lafwa ferm, zot in swiv menm prensip ki ti ganny eksprimen avek bann dirizan Nazi an Lalmanny an 1934: “Nou pa enterese avek politik, me nou antyerman devoue avek rwayonm Bondye anba direksyon son Lerwa Zezi. Nou pa pou fer okenn ditor oubyen dimal personn. Nou ti a kontan viv anpe e fer dibyen tou dimoun kan nou ganny loportinite.”
Bann Lanbasader ek bann Reprezantan Kris
8, 9. Dan ki sans Temwen Zeova ozordi i parey bann lanbasader ek bann reprezantan, e konman sa i afekte zot relasyon avek bann nasyon?
8 Pol ti dekrir li, ensi ki son bann konpanyon Kretyen swazir konman ‘bann lanbasader Kris, ki par zot, Bondye limenm in apel nou.’ (2 Korentyen 5:20; Efezyen 6:20) Depi 1914, bann Kretyen ki’n ganny swazir i kapab ganny apele bann lanbasader Rwayonm Bondye. Zot osi bann “garson” sa Rwayonm. (Matye 13:38; Filipyen 3:20; Revelasyon 5:9, 10) Deplis, Zeova in reini “en gran lafoul” ‘lezot mouton’ sorti dan tou nasyon pour soutenir sa bann garson dan zot travay lanbasader. Sa i bann Kretyen ki annan lespwar pour viv lo later. (Revelasyon 7:9; Zan 10:16) Bann ‘lezot mouton’ i kapab ganny apele “bann reprezantan” Rwayonm Bondye.
9 En lanbasader ek son staf pa mel dan zafer sa pei kot zot pe servi. Pareyman, bann Kretyen pa mel dan bann zafer politik sa lemonn. Zot pa pran kote pour oubyen kont okenn group nasyonal, rasyal, sosyal, oubyen ekonomik. (Akt 10:34, 35) Okontrer, zot “fer dibyen tou dimoun.” (Galat 6:10) Lefe ki Temwen Zeova pa siport okenn ras, nasyon, oubyen tribi, napa personn ki kapab senserman rezet zot mesaz akoz sa rezon.
Idantifye par Lanmour
10. Ki kantite enportan lanmour i ete pour en Kretyen?
10 Anplis ki sa, bann Kretyen pa mel dan bann zafer sa lemonn akoz zot relasyon avek lezot Kretyen. Zezi ti dir avek son bann disip: “Dimoun pou war ki zot mon bann disip si zot kontan kanmarad.” (Zan 13:35) I tre enportan pour en Kretyen annan lanmour pour son frer. (1 Zan 3:14) Relasyon ki en Kretyen i annan avek Zeova ek Zezi, i fer li annan en relasyon tre pros avek son bann frer ek ser Kretyen. I pa kontan zis bann ki dan son kongregasyon. Son lanmour i pour “tou [son] bann frer dan lemonn antye.”—1 Pyer 5:9.
11. Konman kondwit bann Temwen Zeova in ganny enfliyanse par lanmour ki zot annan pour kanmarad?
11 Ozordi, Temwen Zeova i demontre lanmour pour zot frer par akonpli sa parol dan Izai 2:4: “Zot pou bezwen forz zot lepe an pyos e zot lans an sizay. Nasyon pa pou lev lepe kont nasyon e zot pou nepli aprann lager.” Vi ki zot in ganny ansennyen par Zeova, bann vre Kretyen i anpe avek Bondye e avek kanmarad. (Izai 54:13) Parski zot kontan Bondye ek zot frer, alors zot pa pou kapab pran zarm pour al touy zot frer—oubyen nenport dimoun—dan lezot pei. Lape ek linite i en par esansyel dan zot ladorasyon. I en levidans ki zot vreman annan lespri Bondye. (Psonm 133:1; Mika 2:12; Matye 22:37-39; Kolosyen 3:14) Zot “esey rod lape e kontinyen gard li,” parski zot konnen ki “lizye Zeova i lo bann dimoun drwat.”—Psonm 34:14, 15.
Konman bann Kretyen i vwar Lemonn
12. Ki latitid Zeova i annan anver bann dimoun dan lemonn ki Temwen Zeova i imite, e konman?
12 Zeova in dir ki i pou anmenn son zizman lo sa lemonn, me i pa ankor ziz tou dimoun dan sa lemonn. I pou fer sa atraver Zezi dan Son letan apropriye. (Psonm 67:3, 4; Matye 25:31-46; 2 Pyer 3:10) Antretan, i pe demontre son gran lanmour pour limanite. I ti menm donn son sel Garson pour ki tou dimoun i kapab ganny loportinite pour resevwar lavi eternel. (Zan 3:16) Vi ki nou Kretyen, nou imit lanmour Bondye par fer lezot konn laranzman ki i’n fer pour nou ganny sove, menm si dimoun pa souvan apresye nou zefor.
13. Ki mannyer nou devret vwar bann dirizan dan sa lemonn?
13 Ki mannyer nou devret vwar bann dirizan dan sa lemonn? Pol ti reponn sa kestyon letan i ti ekrir: “Tou dimoun i devre soumet li avek bann lotorite ki gouvernen, parski napa okenn lotorite amwen ki Bondye in etabli li, e bann lotorite ki egziste i ganny etabli par Bondye.” (Romen 13:1, 2) Imen i annan serten lotorite (plis oubyen mwens ki kanmarad, me touzour enferyer avek Zeova) akoz Tou Pwisan i permet zot. En Kretyen i soumet li avek lotorite akoz sa i form par son lobeisans anver Zeova. Me si i ariv en konfli ant sa ki Bondye ek gouvernman i demann nou fer?
Lalwa Bondye ek Lalwa Sezar
14, 15. (a) Konman Danyel ti kapab evit en konfli an rapor avek lobeisans? (b) Ki pozisyon sa trwa Ebre ti pran dan sa konfli an rapor avek lobeisans?
14 Danyel ek son trwa konpanyon ti donn en bon legzanp konman pour gard en balans ant soumisyon anver gouvernman ek soumisyon anver lotorite Bondye. Kan sa kat zenn Ebre ti ganny egzile an Babilonn, zot ti obeir lalwa sa pei. Pa bokou letan apre, zot ti ganny swazir pour en formasyon spesyal. Danyel ti realize ki sa formasyon ti pou kapab kree konfli avek Lalwa Zeova, alors i ti diskit sa zafer avek zofisye ansarz. An rezilta, bann laranzman spesyal ti ganny fer pour respe konsyans sa kat Ebre. (Danyel 1:8-17) Bann Temwen Zeova i swiv legzanp Danyel letan zot eksplik zot pozisyon avek lotorite konsernen. Si zot fer sa e anmenmtan vey fason ki zot dir li, zot kapab evit serten problenm.
15 Me plitar ti ariv en konfli ki pa ti kapab ganny evite an rapor avek soumisyon. Lerwa Babilonn ti’n enstal en gran zidol lo laplenn Doura e i ti demann bann o zofisye, enkli bann administrater distrik, pour zwenn ansanm pour inogirasyon. Vi ki sa trwa zanmi Danyel ti’n ganny apwente administrater distrik Babilonn, alor sa lord ti aplik pour zot. Ti ariv en letan dan seremoni kot tou dimoun ki ti la ti bezwen tonm devan sa zimaz pour ador li. Me sa bann Ebre ti konnen ki sa ti kont lalwa Bondye. Alors, letan tou dimoun ti tonm ater, zot ti reste debout. (Deterononm 5:8-10) Par dezobei lord lerwa, zot ti pros pour eksperyans en lanmor vreman efreyan. Zis en mirak ki ti kapab sov zot. Me zot ti swazir pour riske zot lavi olye dezobei Zeova.—Danyel 2:49–3:29.
16, 17. Konman ki bann zapot ti reazir letan zot ti ganny lord pour aret prese, e akoz?
16 Dan premye syek, bann sef Zwif an Zerizalenm ti apel bann zapot Zezi e demann zot pour aret pres lo non Zezi. Ki mannyer zot ti pou reazir? Zezi ti’n donn zot lord pour fer disip dan tou nasyon, enkli Zide. I ti osi demann zot pour vin son temwen an Zerizalenm ensi ki dan lezot landrwa lo later. (Matye 28:19, 20; Akt 1:8) Bann zapot ti konnen ki sa lord ki Zezi ti’n donn zot, ti sanmenm sa ki Bondye i oule zot fer. (Zan 5:30; 8:28) Alor, zot ti dir: “Nou devre obei Bondye plito ki zonm.”—Akt 4:19, 20; 5:29.
17 Bann zapot pa ti pe rebele. (Proverb 24:21) Selman, letan bann dirizan lemonn ti anpes zot fer lavolonte Bondye, sel keksoz zot ti kapab dir se, ‘Nou bezwen obeir Bondye, pa zonm.’ Zezi ti dir ki nou devret “rann Sezar sa ki pour Sezar, e Bondye sa ki pour Bondye.” (Mark 12:17) Si nou dezobei lord Bondye akoz en dimoun i demann nou pour fer li, alors nou pe donn zonm sa ki sipoze pour Bondye. Okontrer, nou devret rann Sezar tou sa ki pour li, me rekonnet ki Zeova i annan pli gran lotorite. I sa enn ki pli o dan liniver, i Kreater, e Sours tou lotorite.—Revelasyon 4:11.
Nou pou reste ferm
18, 19. Ki pozisyon egzanpler bokou nou bann frer in pran, e konman nou kapab swiv zot legzanp?
18 Ziska prezan, laplipar gouvernman i respekte pozisyon Temwen Zeova lo sa size, e nou tre rekonesan pour sa. Parkont, dan serten pei, bann Temwen in eksperyans lopozisyon sever. Pandan sa 20 tyenm syek ziska nou letan, serten nou bann frer ek ser in lalit en kantite. Dan en sans spirityel, zot in konbat “sa bon konba dan lafwa.”—1 Timote 6:12.
19 Ki mannyer nou kapab reste ferm parey zot? Premyerman, mazinen ki nou bezwen ekspekte lopozisyon. Nou pa devret soke oubyen menm sirprann si nou rankontre lopozisyon. Pol ti averti Timote: “Tou sa ki oule viv en lavi fidel dan Kris Zezi pou ganny persekite.” (2 Timote 3:12; 1 Pyer 4:12) Nou pe viv dan en lemonn kot lenfliyans Satan pe dominen, alors akoz nou pa ava rankontre lopozisyon? (Revelasyon 12:17) Osi lontan ki nou reste fidel, i pou touzour annan serten ki ‘pou trouv sa drol, e kritik nou.’—1 Pyer 4:4.
20. Ki realite ki vreman fortifye nou letan nou mazinen?
20 Dezyenmman, nou konvenki ki Zeova ek son bann lanz pou soutenir nou. Parey Elisa dan lepase ti dir, “i annan plis ki avek nou ki bann ki avek zot.” (2 Lerwa 6:16; Psonm 34:7) Petet pour rezon son plan, Zeova i permet nou bann lennmi kontinyen met presyon lo nou pour en serten letan. Kantmenm sa, i pou touzour donn nou lafors ki nou bezwen pour andire. (Izai 41:9, 10) Serten in ganny touye, me sa pa fer nou per. Zezi ti dir: “Pa per bann ki touy lekor me ki pa kapab touy lam; per plito sa ki kapab detri ou lekor ek ou lam.” (Matye 10:16-23, 28) Nou zis bann “vwayazer” dan sa sistenm. Nou pe servi sa letan ki nou annan la pour byen sezi sa “vre lavi,” lavi eternel dan nouvo lemonn Bondye. (1 Pyer 2:11; 1 Timote 6:19) Napa personn ki kapab anpes nou ganny sa rekonpans si nou reste fidel avek Bondye.
21. Ki nou devret touzour gard antet?
21 Alors, annou mazin nou relasyon presye ki nou annan avek Zeova. Fotespere ki nou touzour apresye ki nou’n kapab vin bann disip Kris e sitwayen sa Rwayonm. Annou kontan nou frer avek tou nou leker e apresye sa lanmour ki zot donn nou. Pli enportan ankor, annou pran aker parol sa psalmis: “Esper an Zeova; annan kouraz e fodre ki ou leker i for. Wi, esper an Zeova.” (Psonm 27:14; Izai 54:17) Alors, nou pou kapab reste ferm dan nou lesperans parey bokou Kretyen ki’n viv avan nou—bann Kretyen fidel ki ti pa fer parti lemonn.
Eski ou kapab eksplike?
• Ki mannyer nou relasyon avek Zeova i fer nou separe avek sa lemonn?
• Vi ki nou sitwayen Rwayonm Bondye, konman nou montre ki nou pa mel dan zafer sa lemonn?
• Dan ki fason lanmour pour nou frer i fer nou reste separe avek sa lemonn?
[Kestyon]
[Portre lo paz 25]
Konman nou soumisyon anver Rwayonm Bondye i afekte nou relasyon avek lemonn?
[Portre lo paz 26]
En Outou ek en Toutsi pe travay ansanm dan lazwa
[Portre lo paz 27]
Bann frer Kretyen Zwif ek Arab
[Portre lo paz 27]
Bann Kretyen Serb, Bosnyen, ek Kroat pe profit konpanni kanmarad
[Portre lo paz 28]
Ki nou devret fer si bann dirizan i demann nou pour kas lalwa Bondye?