Kestyon Lekter

Eski aste en batiman avek en lot larelizyon e transform li dan en Lasal Rwayonm, pou ganny konsidere konman nou pe mel avek lezot larelizyon?

Normalman, Temwen Zeova i evite fer bann tel tranzaksyon avek lezot larelizyon. Me si en tranzaksyon parey i ganny fer, i kapab pa ganny konsidere konman mel avek lezot larelizyon. I kapab senpleman ganny konsidere konman en tranzaksyon biznes ki fini lanmenm. Sa kongregasyon Temwen Zeova pa pe kolabor avek en lot group relizye pour konstri en landrwa ladorasyon ki tou le de group pou servi.

Dapre pwennvi Zeova, ki savedir mel avek lezot larelizyon? Annou egzamin sa ki zapot Pol ti dir: “Pa bezwen asosye zot avek bann non-krwaryan. Ki i annan an komen ant lazistis ek mesanste? Ki linyon i kapab annan ant lalimyer avek fernwanr? Ki mannyer Kris i kapab tonm dakor avek Dyab? Ki mannyer en krwaryan i kapab partisip avek en non-krwaryan? Ki Tanp Bondye i annan an komen avek bann zidol? Parski noumenm ki tanp Bondye vivan, parey in dir: ‘Mon pou reste avek zot e mon pou mars parmi zot. Mon pou vin zot Bondye, e zot pou vin mon pep’ ‘Pour sa rezon, sorti parmi zot, E separe avek zot, Senyer i dir. Pa tous okenn keksoz enpir, e mon a resevwar zot.’” (2 Korentyen 6:​14-​17) Ki Pol ti oule dir par sa de mo “annan an komen” ek “linyon”?

Sa lekspresyon “annan an komen” ki Pol ti mansyonnen, i klerman enplik ladorasyon ek bann aktivite spirityel avek bann dimoun ki ador zidol oubyen bann dimoun lezot larelizyon. I ti averti bann Korentyen pour pa “partisip atab avek . . . demon.” (1 Korentyen 10:20, 21) Alor, mel avek lezot larelizyon i vedir partisip dan ladorasyon oubyen dan bann aktivite spirityel avek lezot lorganizasyon relizye. (Egzod 20:5; 23:13; 34:12) Ler nou aste en batiman ki en lot larelizyon ti servi, sa i ganny fer zis pour nou ganny sa batiman ki neseser pour en Lasal Rwayonm. Avan ki i ganny servi konman en Lasal Rwayonm, tou keksoz ki i annan pour fer avek fo ladorasyon i ganny retire. Apre ki sa batiman in ganny aranze e modifye, i ganny dedye pour Zeova. E i pou ganny servi zis pour son ladorasyon. Napa okenn partisipasyon oubyen keksoz an komen ant vre e fo ladorasyon.

Ler pe diskit bann detay konsernan en tel tranzaksyon, fodre nou limit kontak avek sa lot group e i devret ganny fer zis pour kapab aste sa propriyete. Bann manm kongregasyon Kretyen i devret gard antet lavertisman Pol pour “pa bezwen asosye zot avek bann non-krwaryan.” Kantmenm nou pa santi nou siperyer avek bann dimoun dan lezot larelizyon, nou evite partisip dan bann aktivite sosyal avek zot oubyen ganny enfliyanse pour zwenn dan zot ladorasyon. *

Me si en kongregasyon i anvi lwe en batiman ki pour en lorganizasyon relizye? Normalman lwe en batiman i vedir annan kontak regilye avek manm sa lorganizasyon relizye, en keksoz ki devret ganny evite. Menm si pour lwe en batiman koumsa zis pour en levennman, konsey ansyen dan kongregasyon i devret konsider sa bann kestyon swivan: Eski i pou annan okenn zidol oubyen senbol relizye anndan oubyen an deor sa batiman? Ki dimoun dan kominote pou panse? Si nou servi sa batiman, eski sa i kapab afekte serten dan kongregasyon? (Matye 18:6; 1 Korentyen 8:​7-​13) Bann ansyen i evalye sa bann fakter e apre pran en desizyon. Zot devret osi pran an konsiderasyon zot prop konsyans enkli pour zot frer ek ser dan kongregasyon, ler zot pe deside, si pour aste e transform en tel batiman dan en Lasal Rwayonm.

 Eski i mal pour mans en pti sonm dan bann zwe larzan?

Parol Bondye pa diskit zwe larzan an detay, me sa ki i dir i ase pour montre nou ki tou kalite zwe larzan pa an akor avek bann prensip Labib. * Par egzanp, bokou dimoun i aksepte ki zwe larzan i fer en dimoun vin voras. Zis sa fe tousel i en keksoz enportan pour bann Kretyen konsidere, vi ki Labib i dir ki “bann anvye” oubyen voras pa pou erit Rwayonm Bondye. I osi dir ki move dezir pour akapar keksoz dimoun i en form ladorasyon zidol.​—1 Korentyen 6:​9, 10; Kolosyen 3:5.

Zwe larzan i osi fer dimoun vin egois e devlop en leta lespri konpetitif ki pa bon, e en gran dezir pour gannyen. Zapot Pol ti averti kont sa bann keksoz, ler i ti ekrir: “Annou pa orgeye, annou pa pran lakoler avek kanmarad, e annou pa groker avek kanmarad.” (Galat 5:​26) Deplis, zwe larzan i ankouraz serten dimoun pour vin siperstisye e depan lo lasans. Bann ki zwe larzan i devlop tou sort kalite siperstisyon. Zot mazinen ki sa pou ogmant zot lasans. Zot fer nou rapel bann Izraelit enfidel ki ti “pe aranz en latab pour bondye Lasans e bann ki pe ranpli diven melanze pour bondye Desten.”​—Izai 65:11.

Serten dimoun i kapab rezonnen ki napa nanryen mal pour mans en pti sonm larzan ler zot pe zwe en pti parti kart oubyen lezot zwe antre fanmiy ouswa avek zanmi. I vre, en dimoun ki mans en pti sonm larzan i kapab pa konsider li konman en dimoun voras, orgeye, konpetitif, oubyen siperstisye. Toudmenm, ki lefe sa pou annan lo bann ki pe zwe larzan avek li? Bokou dimoun ki zwe larzan en kantite ti konmans par mans bann pti sonm larzan. Pour zot i ti ‘zis en divertisman.’ (Lik 16:10) En pastan ki ti paret napa nanryen mal avek, in vin en keksoz danzere pour zot.

Sa i vre sirtou dan ka bann zanfan. Apre ki zot in eksperyans sa leksitasyon pour gannyen ler zot in mans en pti sonm, bokou in ganny tante pour mans bann pli gro sonm. (1 Timote 6:​10) En letid ki’n ganny fer an Letazini par Arizona Council on Compulsive Gambling i konfirmen ki depi byen zenn bokou dimoun i vin adik avek zwe larzan. Sa i konmans “par mans bann pti sonm larzan lo bann levennman sportif ouswa zwe kart avek zanmi oubyen fanmiy.” En lot rapor i dir ki “bann zanfan i konmans zwe larzan kot lakour, souvan dan bann zwe kart antre fanmiy ek zanmi.” Sa rapor i azoute ki “30 poursan zanfan ti konmans zwe larzan avan zot ganny 11 an.” Dapre en letid apele Why Do People Gamble Too Much​—Pathological and Problem Gambling, bokou adolesan ki zwe larzan i bezwen fer krim oubyen imoralite pour zot kapab siport zot labitid. Vreman en move rezilta konsernan en keksoz ki pa ti paret annan nanryen mal avek okonmansman!

Vi ki nou pe viv dan en lemonn ki deza annan tro bokou pyez ek tantasyon, akfer ekspoz nou lekor avek en lot? Enn ki nou ti kapab evite. (Proverb 27:12) Zwe larzan​—ki swa zanfan i prezan ou non, pour en pti oubyen en gro sonm larzan​—i en danze pour nou ladorasyon avek Bondye e i devret ganny evite. Pour bann Kretyen ki kontan bann zwe kart oubyen lezot zwe, i pli bon pour zot senpleman mark pwen oubyen zis zwe li pour lanmizman san mark pwen. Bann Kretyen ki saz e ki pran swen avek zot prop spirityalite osi byen pour zot zanmi ek fanmiy i evite zwe larzan​—menm pour zis en pti sonm.

[Not anba lo paz]

[Portre lo paz 30]

Sa batiman, ki ti en sinagog avan, ti ganny aste e repare pour fer en Lasal Rwayonm