“Reziste Kont Dyab”
“Reziste Kont Dyab”
“Reziste kont Dyab e i ava sov lwen avek zot.”—ZAK 4:7.
1. Ki nou kapab dir lo sa lemonn ozordi, e akoz bann Kretyen swazir ek zot konpanyon i bezwen vizilan?
“BONDYE in disparet, me Dyab in reste lanmenm.” Sa i parol en ekriven Franse, André Malraux, ki aplik byen dan sa lemonn ki nou pe viv. I paret ki aktivite zonm i plis reflekte bann riz Dyab ki lavolonte Bondye. Satan pe anbet dimoun avek “tou sort mirak ek bann trik pour tronp zot. I pe servi lemal dan tou sort kalite fason pour tronp bann ki . . . pou ganny detri.” (2 Tesalonisyen 2:9, 10) Me dan sa “bann dernyen zour,” Satan pe konsantre plis son zefor lo bann ki’n dedye zot lavi avek Bondye. I pe fer en lager avek bann Kretyen swazir ki “obei konmannman Bondye e ki fidel avek temwanyaz Zezi.” (2 Timote 3:1; Revelasyon 12:9, 17) Alor, sa bann Temwen ek zot konpanyon ki annan lespwar pour viv lo later i bezwen byen vizilan.
2. Ki mannyer Satan ti tronp Ev, e pour ki rezon Pol ti enkyet?
2 Satan i en gran rizer. An servan en serpan pour kasyet son lidantite, i ti trik Ev par fer li krwar ki i pou pli ere si i pa depan lo Bondye. (Zenez 3:1-6) Apepre kat mil an plitar, zapot Pol ti enkyet ki bann Kretyen swazir an Korent i kapab tonm dan pyez Satan. Pol ti ekrir: “Mon per ki parey [Ev] ti ganny tronpe par riz serpan, zot les zot lentelizans ganny egare lwen avek senplisite ek lapirte Kris.” (2 Korentyen 11:3) Satan i polye lespri dimoun e tourn zot fason panse. Zis parey i ti tronp Ev, i kapab anbet bann Kretyen e fer zot krwar ki zot lazwa i depan lo en keksoz ki Zeova ek son Garson pa kontan.
3. Ki proteksyon kont Dyab Zeova i fourni?
3 Satan i kapab ganny konpare avek en dimoun ki atrap zwazo. I met son latrap pour tyonbo bann ki pa konsyan danze. Pour evit latrap Satan, nou bezwen “reste dan landrwa sekre [Bondye] Tre O.” Sa i en landrwa senbolik kot Zeova i protez bann ki aksepte son lotorite dan tou sa ki zot fer. (Psonm 91:1-3) Nou tou nou bezwen sa proteksyon ki Bondye i fourni atraver son Parol, son lespri, ek son lorganizasyon afen ki nou a “kapab reziste kont tou bann riz Dyab.” (Efezyen 6:11) San dout, Dyab i servi bokou trik ek riz dan son zefor pour fer bann serviter Zeova tonm dan son pyez.
Latrap ki Satan ti mete pour bann premye Kretyen
4. Ki kalite lanvironnman bann premye Kretyen ti viv ladan?
4 Bann Kretyen ki ti viv dan premye ek dezyenm syek N.L., ti pe viv dan en letan kot lanpir Romen ti lo pik son pouvwar. Lape ki ti egziste dan sa lanpir ti ede pour fer zot prospere dan komers. Sa prosperite ti fer bann dirizan annan bokou letan lwazir. Bann dirizan ti fer sir ki lepep i ganny bokou lanmizman pour zot pa rebele. Ti annan en letan kot ti annan preski menm kantite konze piblik ki zour travay. Bann dirizan ti servi larzan lepep pour fer dimoun diverti kontan. Zot ti fer sir ki bann dimoun i ganny dekwa pour manze e pour distrer zot.
5, 6. (a) Akoz i pa ti apropriye pour Kretyen frekant bann lasal teat ek bann stad Romen? (b) Ki riz Satan ti servi, e ki mannyer bann Kretyen ti kapab evit sa?
5 Eski sa sitiasyon ti kree en danze pour bann premye Kretyen? Dapre lavertisman bann ekriven, parey Tertilyen, ki ti viv zis apre lepok bann zapot, laplipar bann aktivite lwazir sa letan ti plen avek danze spirityel e moral pour bann vre Kretyen. En danze se ki laplipar sa bann festival ek levennman sportif ti ganny organize an loner bann bondye payen. (2 Korentyen 6:14-18) Dan bann lasal teat, menm bann pyes teat ti sal oubyen tre vyolan. Apre en serten letan, dimoun ti’n ganny ase avek sa bann pyes teat, e zot ti ganny ranplase par bann ladans degoutan. Dan son liv Daily Life in Ancient Rome, istoryen Jérôme Carcopino i dir: “Dan sa bann pyes teat, bann aktris ti kapab dezabiy zot net . . . En kantite disan ti ganny verse. . . . [Bann mim] ti eksplwat vis seksyel dan tou son profonder, bann vis ki lamazorite dimoun [an Ronm] ti’n aksepte. Sa bann keksoz pa ti rann zot malad akoz zot ti’n fini abitye vwar sa bann kriyote lo stad ki ti’n fer zot leker vin dir e sanz zot dezir natirel.”—Matye 5:27, 28.
6 Dan bann stad, bann zonm ti lager avek kanmarad ziska enn i mor, oubyen zot ti lager avek zannimo feros ziska swa zot ti touy sa zannimo ouswa sa zannimo ti touy zot. Bann kriminel ki ti’n ganny kondannen, e finalman bokou Kretyen, ti ganny anvoye avek bann bebet feros. Menm dan sa letan, riz Satan ti pour fer dimoun perdi tou pider e ptit-a-pti aksepte imoralite ek vyolans ziska ki sa bann keksoz ti vin normal e piblik ti demann sanmenm. Sel fason pour evit sa latrap ti par evite frekant bann lasal teat ek stad.—1 Korentyen 15:32, 33.
7, 8. (a) Akoz i pa ti pou apropriye pour en Kretyen al get bann paryaz saret? (b) Konman Satan ti’n kapab servi sa bann landrwa piblik pour bennyen pour fer bann Kretyen tonm dan son pyez?
7 Bann paryaz saret ki ti ganny fer dan bann gran gran stad ti san dout tre eksitan, me i pa ti apropriye pour Kretyen akoz souvan lafoul ti vin vyolan. En ekriven trwazyenm syek ti raporte ki serten spektater ti lager antre zot. Carcopino ti dir ki “bann deviner ek prostitye ti fer zot biznes” lanmenm la anba larantre bann stad. I kler ki sa bann stad Romen pa ti en landrwa pour bann Kretyen frekante.—1 Korentyen 6:9, 10.
8 Dan letan bann Romen, ti osi annan bann landrwa piblik pour bennyen. Eski zot ti apropriye pour bann Kretyen? Byensir, napa nanryen mal avek bennyen pour gard nou prop. Me bokou sa bann landrwa ti bann gran fasilite ki ti enkli bann lasanm pour fer masaz, pour fer bann sport anndan, pour zwe larzan, e osi bann landrwa pour manze e bwar. Kantmenm zonm ek fanm pa ti sipoze benny anmenmtan, sa ti souvan ganny tolere. Kleman sorti Alekzandri ti ekrir ki sa bann landrwa bennyen ti ankouraz limoralite seksyel parski i ti ouver pour zonm ek fanm bennyen anmenmtan, e zot ti tir zot touni. Alors, Satan ti kapab fasilman servi en landrwa piblik ki ganny konsidere konman akseptab pour fer bann Kretyen tonm dan son pyez. Bann ki ti pridan pa ti frekant sa bann landrwa.
9. Ki bann latrap bann premye Kretyen ti bezwen evite?
9 Zwe larzan ti en pastan prefere bann dimoun kan Lanpir Romen ti lo son pik. Dimoun ti manse pour bann paryaz saret. Bann premye Kretyen ti pou kapab evit sa par senpleman pa vin dan sa landrwa. Dan bann pti lotel ek bar, dimoun ti zwe larzan ansousekre. Zot ti zwe en zwe manrmay pour larzan. Zwe larzan ti fer lavi bann dimoun pli eksitan, parski i ti donn zot sa lespwar pour fer larzan vitman. (Efezyen 5:5) Deplis, laplipar-di-tan bann servez dan sa bann bar ti bann prostitye, ki ti anmenn ankor en lot danze, imoralite seksyel. Sa ti serten bann latrap ki Satan ti mete pour bann Kretyen ki ti viv dan bann lavil Lanpir Romen. Eski keksoz i diferan ozordi?
Latrap ki Satan i servi denozour
10. Ki mannyer sitiasyon denozour i resanble sitiasyon ki ti egziste dan Lanpir Romen?
10 An zeneral, bann riz Satan pa’n sanze pandan sa bann syek ki’n pase. Pour bann Kretyen ki ti pe viv dan lavil Korent pa ganny “anbete par Satan,” zapot Pol ti donn zot en lavertisman ferm. I ti dir zot: “Nou konn byen bann lentansyon [Satan].” (2 Korentyen 2:11) Dan bokou pei devlope ozordi, sitiasyon i menm parey avek sa ki ti egziste dan Lanpir Romen letan i ti lo son pik. Bokou dimoun i annan plis letan detant ki zanmen oparavan. Lotri nasyonal i osi donn bann mwen fortinen en pti lespwar. I annan en kantite lanmizman bon marse ki kit lespri dimoun okipe. Bann stad sport i plen, dimoun i manse, parler lafoul i vin vyolan, tandis ki bann zwer aswiv zot anrose. Bann lanmizik degradan i rezonnen dan zorey dimoun. Televizyon ek sinema i prezant zot bann progranm sal, e lasenn teat i donn sa ki pour li. Dan serten pei, i popiler pour bann zonm ek fanm pran bann ben lavaper ansanm oubyen benny dan bann sours delo so. Deplis, i annan serten lans kot dimoun i benny touni. Zis parey dan premye syek, Satan pe servi bann aktivite lwazir ki annan dan sa lemonn pour esey atir bann serviter Bondye.
11. Ki latrap i kapab annan pour bann ki anvi detann en pe?
11 Dan sa lemonn kot i annan bokou presyon, i normal pour nou anvi relaks en kou oubyen fer en keksoz diferan. Me zis parey sa bann landrwa piblik pour bennyen dan letan Romen ti kapab danzere pour bann premye Kretyen, denozour Satan in servi serten fasilite oubyen letablisman touristik konman en latrap pour fer bann Kretyen tonm dan imoralite oubyen bwar an ekse. Pol ti ekrir bann Kretyen an Korent: “Pa les zot ganny anbete: ‘Move frekantasyon i gat repitasyon.’ Vin rezonnab, e aret fer pese. . . . I annan ki pa konn Bondye.”—1 Korentyen 15:33, 34.
12. Nonm serten trik ki Satan i servi denozour pour fer serviter Zeova tonm dan son pyez.
12 Nou’n vwar konman ki Satan ti servi riz pour fer Ev rezonn dan en move fason. (2 Korentyen 11:3) Ozordi, enn son pyez se pour fer bann Kretyen krwar ki si zot sey otan ki zot kapab pour montre ki Temwen Zeova i parey lezot dimoun, zot pou reisi atir serten dimoun dan laverite. Parfwa zot al tro lwen e olye atir dimoun, se zot ki elwanye avek laverite. (Agai 2:12-14) En lot trik ki Satan i servi se pour ankouraz bann Kretyen pour viv de kalite lavi e ‘sagrin lespri sen Bondye.’ Sa i arive avek bann zenn ensi ki adilt. (Efezyen 4:30) Serten in tonm dan sa latrap par mal servi Internet.
13. Nonm en riz Satan ki pa sitan evidan. Ki konsey Proverb i donn nou dan sa domenn?
13 Satan i osi servi bann keksoz misterye ki paret napa nanryen mal ladan pour anmenn bann Kretyen dan son pyez. Napa okenn vre Kretyen ki ti pou volonterman partisip dan ladorasyon Satan oubyen konsilte en bonnonm dibwa. Parkont, serten i neglizan an sa ki konsern regard bann film, progranm televizyon, zwe video, e menm bann liv oubyen band desinen pour zanfan ki annan vyolans oubyen mazik ladan. Nou bezwen evit okenn keksoz ki nou prezimen i kapab annan pour fer avek bann pratik misterye. En proverb i dir: “Bann pikan ek pyez i dan semen dimoun malonnet; sa ki vey son nanm i reste byen lwen avek zot.” (Proverb 22:5) Vi ki Satan i ‘bondye sa syek,’ i tre probab ki bann keksoz tre popiler pe maske enn son latrap.—2 Korentyen 4:4; 1 Zan 2:15, 16.
Zezi ti reziste Dyab
14. Konman Zezi ti reziste premye tantasyon Dyab?
14 Zezi in donn nou en bon legzanp an sa ki konsern reziste Dyab e fer li ale. Apre ki i ti’n batize e zennen pour 40 zour, Satan ti tant Zezi. (Matye 4:1-11) Vi ki i pa ti’n manze pour 40 zour, natirelman Zezi ti lafen. Alor, Satan ti profit lo sa febles dan son premye tantasyon. I ti demann li pour fer son premye mirak pour satisfer en bezwen fizik. Zezi ti sit Deterononm 8:3 e refize pour servi son pouvwar dan en fason egois. I ti met nouritir spirityel avan nouritir fizik.
15. (a) Ki dezir natirel Satan ti servi pour tant Zezi avek? (b) Ki riz Dyab i servi pli souvan kont serviter Bondye ozordi, me konman nou kapab reziste li?
15 En keksoz enteresan avek sa tantasyon, i ki Dyab pa ti esey rod pour fer Zezi komet en pese seksyel. Vi ki Zezi ti lafen, dan sa ka lanvi manze ti paret sa dezir pli for pour Satan servi pour tant Zezi. Ki tantasyon Dyab i servi pour atir pep Bondye denozour? I servi plizyer kalite. Me tantasyon seksyel i enn parmi son bann riz ki i servi pli souvan pour kas fidelite pep Bondye. Nou kapab opoz Dyab e reziste son bann tantasyon par imit Zezi. Zezi ti anpes Satan konvenk li si fasilman, par rapel bann lekritir apropriye. Kan nou ganny tante, nou osi nou kapab mazin bann verse Labib parey Zenez 39:9 ek 1 Korentyen 6:18.
16. (a) Ki mannyer Satan ti tant Zezi en dezyenm fwa? (b) Konman ki Satan i kapab sey tant nou pour teste Zeova?
16 Apre sa, Dyab ti envit Zezi pour zet son lekor anba, sorti anler lo miray tanp e gete si Bondye i kapab anvoy Son bann lanz pour protez li. An sitan Deterononm 6:16, Zezi ti refize pour teste son Papa. Satan pa pou tant nou pour zet nou lekor anba sorti anler lo en gran miray, me i kapab tant nou pour teste Zeova. Eski nou ganny tante pour gete ki kantite lanmod lemonn nou kapab swiv dan nou fason sanze ek nou laparans san ki nou ganny konseye personnelman? Eski nou ganny tante pour partisip dan bann aktivite detant ki pa tro apropriye pour Kretyen? Si i leka, alors nou kapab pe teste Zeova. Si nou annan sa bann tandans, olye kit nou, Satan i kapab kal kal avek nou e atoupri sey trenn nou lo son kote.
17. (a) Konman Satan ti tant Zezi pour en trwazyenm fwa? (b) Konman nou kapab eksperyans sa ki Zak 4:7 i dir?
17 Kan Satan ti ofer Zezi tou rwayonm lemonn pour zis en akt ladorasyon, ankor enn fwa Zezi ti reziste li an sitan Lekritir. I ti determinen pour ador zis son Papa tousel. (Deterononm 5:9; 6:13; 10:20) Petet Satan pa pou ofer nou bann rwayonm lemonn, me i pe konstaman tant nou avek sa bann keksoz ki briye dan nou lizye. I menm tant nou avek en lanvi pour annan nou prop pti paradi. Eski nou reazir parey Zezi, pour donn zis Zeova tousel nou latasman? Si wi, alors sa ki ti arive avek Zezi pou ariv avek nou osi. Resi Matye i dir: “Alor dyab ti kit Zezi.” (Matye 4:11) Satan pou kit nou si nou pran en pozisyon ferm kont li, par mazin bann prensip Labib apropriye e met zot an pratik. Disip Zak ti ekrir: “Reziste kont Dyab e i ava sov lwen avek zot.” (Zak 4:7) En Kretyen ti ekrir biro brans Temwen Zeova an Frans: “Satan i vreman rize. Kantmenm mon annan bann bon lentansyon, mon vwar li tre difisil pour kontrol mon bann santiman ek dezir. Toudmenm, avek kouraz, pasyans, e sirtou avek led Zeova, mon’n kapab reste fidel e reste atase avek laverite.”
Byen ekipe pour reziste Dyab
18. Ki lekipman batay ki ekip nou pour reziste Dyab?
18 Pour nou kapab “reziste kont tou bann riz Dyab,” Zeova in ekip nou avek bann lekipman batay spirityel. (Efezyen 6:11-18) Nou lanmour pour laverite pou ser nou leren, oubyen prepar nou, pour bann aktivite Kretyen. Nou determinasyon pour reste fidel avek bann standar drwat Zeova, pou vin konman en proteksyon pour nou leker. Si sa bon nouvel i konman en soulye dan nou lipye, i pou toultan anmenn nou dan predikasyon. Sa an retour, pou fortifye e protez nou spirityelman. Nou lafwa pou parey en gran boukliye ki protez nou kont “bann dart alimen ki Dyab i anvoye,” son bann latak ek tantasyon byen rize. Nou konfyans dan realizasyon bann promes Zeova pou parey en kas lo nou latet ki protez nou panse e donn nou lape lespri. (Filipyen 4:7) Si nou kapab byen servi Parol Bondye, i pou vin parey en lepe ki nou servi pour ede liber bann dimoun dan sa lesklavaz spirityel ki Satan in met zot ladan. Nou kapab osi servi li pour defann nou lekor, zis parey Zezi ti fer letan i ti ganny tante.
19. Apard ki ‘reziste Dyab,’ ki nou bezwen fer?
19 Par gard lo nou tou sa “bann lekipman batay ki Bondye i donnen,” e par kontinyen priye, nou kapab annan konfyans ki Zeova pou protez nou kan Satan i atak nou. (Zan 17:15; 1 Korentyen 10:13) Me Zak ti montre ki i pa sifi zis pour ‘reziste Dyab.’ Anplis ki sa, nou bezwen sirtou ‘soumet nou avek Bondye,’ en Bondye ki pran nou lentere aker. (Zak 4:7, 8) Nou pou vwar ki mannyer nou kapab fer sa dan nou prosen lartik.
Ki ou pou reponn?
• Ki latrap Satan bann premye Kretyen ti bezwen evite?
• Ki bann riz Satan i servi ozordi pour esey fer serviter Bondye tonm dan son pyez?
• Konman Zezi ti reziste bann tantasyon Satan?
• Ki lekipman batay spirityel ki ed nou pour reziste Dyab?
[Kestyon]
[Portre lo paz 9]
Zezi ti reziste Dyab avek bokou determinasyon
[Portre lo paz 10]
Bann premye Kretyen ti rezet bann divertisman vyolan e imoral
[Portre lo paz 10]
The Complete Encyclopedia of Illustration/J. G. Heck