Tou Dimoun i bezwen ganny felisite

SA PTI fiy ti’n pas en bon lazournen. Kantmenm oparavan son manman ti’n bezwen koriz li, me sa zour la i ti’n vreman byen konport li. Aswar, apre ki son manman ti’n met li lo lili pour dormi, i ti antann li pe plere. Ler i ti demann li akoz i pe plere, i ti reponn: “Pa mon’n fer en bon pti fiy ozordi?”

Sa kestyon ti desir leker son manman. I’n toultan pare pour koriz son pti fiy. Me sa zour, kantmenm i ti’n remarke ki kantite zefor son pti fiy ti’n fer pour esey byen konport li, sa manman ti’n neglize pour dir li ki i’n apresye zefor ki i’n fer.

Pa zis bann pti fiy ki bezwen ganny felisite e ankouraze. Nou tou nou bezwen, zis parey nou bezwen konsey ek koreksyon.

Ki mannyer nou santi ler en dimoun i felisit nou senserman? Eski pa i ankourazan e fer nou leker kontan? I fer nou realize ki lezot i remark sa ki nou pe fer e ki zot enterese avek nou. I fer nou konnen ki zefor ki nou’n fer ti vo lapenn, e i motiv nou pour travay pli dir ankor dan lavenir. I pa sirprenan ki felisitasyon senser i souvan atir nou anver sa dimoun ki trouv letan pour dir en keksoz ankourazan.​—Proverb 15:23.

Zezi Kri ti konpran sa nesesite pour felisit lezot. Dan parabol trwa serviter, sa met (ki reprezant Zezi li menm) ti kordyalman felisit sa de lesklav fidel, an dizan: “Ou’n byen fer. Ou en serviter bon e fidel!” Wi sa ti vreman en parol ankourazan! Menm si zot ti annan diferan abilite e zot ti’n akonpli diferan keksoz, zot ti ganny felisite parey.​—Matye 25:19-​23.

Alor annou rapel manman sa pti fiy. Pa fodre ki nou les lezot plere avan ki nou felisit zot. Plito, nou devret fer sir ki nou rod bann loportinite pour felisite. Wi nou pou annan bon rezon pour felisit lezot senserman dan tou lokazyon.