Zeova I Pran Swen Avek Nou
Zeova I Pran Swen Avek Nou
“Desarz tou zot sousi lo li, parski limenm ki pran swen avek zot.”—1 PYER 5:7.
1. Dan ki domenn enportan ki Zeova ek Satan i konpletman diferan?
ZEOVA ek Satan i konpletman diferan. Nenport dimoun ki santi li atire ver Zeova, pou definitivman annan en repinyans pour Dyab. En liv referans in fer resorti sa diferans. An rapor avek aktivite Satan raporte dan liv Zob, Encyclopædia Britannica (1970) i dir: ‘Misyon Satan se pour ale vini partou lo later pour rod bann dimoun oubyen aksyon ki move. Alor son lentansyon i tou lekontrer avek sa ki “lizye Senyer” i fer, ki toultan pe rod pour ankouraz sa ki byen (2 Kron. 16:9). Satan i krwar ki imen i fer sa ki byen zis pour zot ganny serten keksoz an retour. Bondye in permet li prouv sa, me anba serten kontrol ek restriksyon.’ Antouka, i vreman annan en gran diferans ant Satan ek Zeova!—Zob 1:6-12; 2:1-7.
2, 3. (a) Konman definisyon sa mo “Dyab” i byen dekrir sa ki ti arive avek Zob? (b) Konman Labib i montre ki Satan pe kontinyen akiz serviter Bondye lo later?
2 Sa mo “Dyab” i sorti dan en mo Grek ki vedir kelken ki fer en fo lakizasyon oubyen koz manti lo en dimoun pour fer li ditor. Liv Zob i fer vwar ki Satan ti akiz Zob, en serviter fidel Zeova, konmkwa i servi Zeova pour ganny keksoz an retour. Satan ti dir: “Eski i pour nanryen ki Zob i annan lakrent pour Bondye?” (Zob 1:9) Sa resi dan liv Zob i montre ki Zob ti vin pli pros avek Zeova kantmenm i ti pas dan plizyer leprev. (Zob 10:9, 12; 12:9, 10; 19:25; 27:5; 28:28) Apre son move leksperyans, i ti dir avek Bondye: “Mon ti tann koz lo ou, me aprezan mon kapab vwar ou avek mon prop lizye.”—Zob 42:5.
3 Eski apre sa, Satan in arete akiz bann serviter Bondye? Non. Liv Revelasyon i montre ki dan sa letan lafen, Satan pe kontinyen akiz bann frer swazir Zezi ensi ki zot bann konpanyon fidel. (2 Timote 3:12; Revelasyon 12:10, 17) Alor, i vreman neseser ki nou tou ki vre Kretyen, nou soumet nou avek Bondye, en Bondye ki vreman pran nou lentere aker. Nou servi li akoz nou vreman kontan li e alor nou montre ki lakizasyon Satan i fo. Letan nou fer sa, nou fer Zeova kontan.—Proverb 27:11.
Zeova i rod Fason pour ed nou
4, 5. (a) Kontrerman avek Satan, ki Zeova i rode lo later? (b) Si nou oule ganny faver Zeova, ki nou bezwen fer?
4 Dyab pe pas partou lo later, pour rode lekel ki i pou akize e devore. (Zob 1:7, 9; 1 Pyer 5:8) Me Zeova li, pe rode lekel ki bezwen son lafors pour li ede. Profet Anani ti dir avek Lerwa Aza: “An sa ki konsern Zeova, son lizye pe rod bann ki zot leker i tou pour li lo later pour demontre son lafors an zot faver.” (2 Kronik 16:9) Pa i annan en gran diferans dan lafason ki Satan ek Zeova i obzerv later! Enn i fer li avek en gran laenn e lot avek en lentere senser.
5 Zeova pa pe vey nou pour pik lo sak pti fot ki nou fer. En psalmis ti ekrir: ‘Si ou ti vey bann fot, O Ya, O Zeova, lekel ki ti pou la?’ (Psonm 130:3) Larepons se ki personn pa ti pou kapab. (Eklezyast 7:20) Si nou apros Zeova avek en leker konplet, son lizye pou lo nou, pa pour kondann nou, me pour obzerv nou zefor e reponn nou lapriyer kan nou demann led ek pardon. Zapot Pyer ti ekrir: “Lizye Senyer i fikse lo bann zis, e son zorey i ouver pour ekout zot lapriyer, me lafas Senyer i tourn kont bann ki fer lemal.”—1 Pyer 3:12.
6. Konman ki legzanp David i en rekonfor e anmenmtan en lavertisman pour nou?
6 David ti enparfe e i ti fer pese grav. (2 Samyel 12:7-9) Me i ti devid son leker avek Zeova e apros li dan lapriyer avek bokou santiman. (Psonm 51:1-12, lentrodiksyon) I vre ki David ti rekolte bann move konsekans akoz son pese. Me Zeova ti ekout son lapriyer e pardonn li. (2 Samyel 12:10-14) Sa i devret servi konman en rekonfor ensi ki en lavertisman pour nou. I rekonfort nou pour konnen ki Zeova i pare pour pardonn nou pese si nou vreman repantir. De lot kote, letan nou realize ki pese i souvan mars avek son bann konsekans grav, sa i fer nou reflesir bokou avan ki nou fer li. (Galat 6:7-9) Si nou oule vin pli pros avek Zeova, nou devret reste pli lwen posib avek okenn keksoz ki depler li.—Psonm 97:10.
Zeova i atir Son Pep anver li
7. Ki kalite dimoun Zeova i gete, e ki mannyer i atir zot anver li?
7 David ti ekrir dan son bann psonm: “Zeova i o, e pourtan i get bann ki abes zot; me bann ki elev zot lekor, i gard son distans avek zot.” (Psonm 138:6) Pareyman, en lot psonm i dir: “Lekel ki parey Zeova nou Bondye, li ki pe reste anler? I abes li pour get lesyel ek later, i tir bann dimoun senp dan lapousyer.” (Psonm 113:5-7) Wi, Zeova i Kreater liniver e i tou pwisan. Pourtan i abes li pour get lo later e son lizye i vwar “bann ki abes zot,” bann dimoun ki “pe plennyen e zemir akoz tou sa bann keksoz degoutan ki pe arive.” (Ezekyel 9:4) I atir sa bann dimoun anver li par mwayen son Garson. Kan Zezi ti lo later, i ti dir: “Personn pa kapab vin kot mwan, si mon Papa ki’n anvoy mwan, pa atir li kot mwan . . . Personn pa kapab vin kot mwan si mon Papa pa donn li posibilite.”—Zan 6:44, 65.
8, 9. (a) Akoz nou tou nou bezwen vin kot Zezi? (b) Kwa ki sitan remarkab avek sa laranzman ki Bondye in fer pour fourni en ranson pour nou?
8 Tou imen i devret vin kot Zezi e met lafwa dan son sakrifis ranson akoz zot in ne konman peser e zot elwannyen avek Bondye. (Zan 3:36) Zot bezwen rekonsilye avek Bondye. (2 Korentyen 5:20) Bondye pa’n esper bann peser pour sipliy li pour fer serten laranzman ki pou permet zot vin anpe avek li. Zapot Pol ti ekrir: “Bondye in prouv son lanmour pour nou: kan nou ti ankor peser, Kris in mor pour nou. . . . Si kan nou ti ankor lennmi Bondye, nou ti ganny rekonsilye avek li par lanmor son Garson i annan plis rezon aprezan ki nou son zanmi ki nou ganny sove par son lavi.”—Romen 5:8, 10.
9 Zapot Zan ti konfirm sa laverite merveye ki Bondye pe rekonsilye bann imen avek li. I ti ekrir: “La ki mannyer Bondye in montre son lanmour pour nou: in anvoy son sel Garson dan lemonn pour ki par li nou ganny lavi. Lala ki vedir lanmour: Se pa nou ki’n kontan Bondye, me plito se li ki’n kontan nou e ki’n anvoy son Garson konman en viktim pour ki par li nou ganny pardon nou bann pese.” (1 Zan 4:9, 10) Pa zonm ki ti pran sa premye pa, me Bondye. Eski ou pa santi ou atire ver en Bondye ki’n montre otan lanmour pour nou, ki pa ti zis “peser” me osi son “lennmi”?—Zan 3:16.
Nou bezwen rod Zeova
10, 11. (a) Ki nou devret fer pour rod Zeova? (b) Ki mannyer nou devret vwar sa lemonn ki anba pouvwar Satan?
10 Byensir, Zeova pa fors nou pour vin kot li. Nou bezwen ‘sey rod li an tatan e nou a trouv li, parski an realite i pa lwen avek sakenn parmi nou.’ (Akt 17:27) Nou bezwen realize ki Zeova i annan drwa demann nou pour soumet avek li. Disip Zak ti ekrir: “Soumet zot avek Bondye, me reziste kont Dyab e i ava sov lwen avek zot. Apros avek Bondye, e i ava apros avek zot. Lav zot lanmen, zot ki komet pese, e pirifye zot leker.” (Zak 4:7, 8) Nou pa devret ezite pour pran en pozisyon ferm pour Zeova e kont Dyab.
11 Savedir nou bezwen elwanny nou avek lemonn mesan Satan. Zak ti osi ekrir: “Pa zot konnen ki lanmour pour lemonn i fer vin lennmi Bondye? Sa ki oule fer zanmi avek lemonn i vin lennmi Bondye.” (Zak 4:4) De lot kote, si nou anvi vin zanmi Zeova, nou bezwen ekspekte ki lemonn Satan pou ay nou.—Zan 15:19; 1 Zan 3:13.
12. (a) Ki parol rekonfortan David ti ekrir? (b) Ki lavertisman Zeova ti donnen atraver profet Azarya?
12 Kan lemonn Satan i opoz nou dan en fason ou en lot, nou bezwen sirtou apros Zeova dan lapriyer e demann li pour ed nou. David ki ti santi lanmen Zeova plizyer fwa, ti ekrir sa parol ki kapab rekonfort nou: “Zeova i pre avek tou bann ki envok li, tou bann ki envok li avek fidelite. I pou akonpli dezir bann ki annan lakrent pour li, e i pou tann zot lapel pour led, e i pou sov zot. Zeova pe protez tou sa bann ki kontan li, me tou bann mesan i pou ekstermin zot.” (Psonm 145:18-20) Sa Psonm i montre ki Zeova i kapab sov nou kan nou ganny teste endividyelman e ki i pou sov son pep dan sa ‘gran ladetres.’ (Revelasyon 7:14) Zeova pou reste pros avek nou si nou reste pros avek li. Anba gidans “lespri Bondye,” profet Azarya ti dir en parol ki vre dan lezot sitiasyon osi. I ti dir: “Zeova i avek zot osi lontan ki zot avek li. Si zot rod li, i pou les zot vwar li, me si zot kit li, i pou kit zot.”—2 Kronik 15:1, 2.
Fodre ki Zeova i reel pour nou
13. Ki mannyer nou kapab montre ki Zeova i reel pour nou?
13 Zapot Pol ti ekrir ki Moiz “ti reste ferm konmsi i vwar sa Enn ki envizib.” (Ebre 11:27) Byensir, Moiz pa’n zanmen vwar Zeova an personn. (Egzod 33:20) Me Zeova ti sitan reel pour li ki konmsi i ti’n vwar Li. Pareyman, apre ki Zob ti’n pas atraver plizyer leprev, son lizye lafwa ti vwar Zeova pli byen. I ti konpran ki i en Bondye ki permet son bann serviter fidel pas atraver bann leprev, me i pa zanmen abandonn zot. (Zob 42:5) Labib i dir ki Enok ek Noe “ti mars avek Bondye.” Zot ti fer sa par rode konman pour fer plezir Bondye e obeir li. (Zenez 5:22-24; 6:9, 22; Ebre 11:5, 7) Si Zeova i reel pour nou parey i ti ete pour Enok, Noe, Zob, ek Moiz, nou pou ‘pran li an konsiderasyon’ dan tou keksoz, e i pou “fer drwat tou [nou] santye.”—Proverb 3:5, 6.
14. Ki savedir “atase” avek Zeova?
14 Zis avan bann Izraelit ti pe al antre dan Later Promiz, Moiz ti donn zot sa konsey: “Deryer Zeova zot Bondye ki zot devret marse, e pour li ki zot devret annan lakrent, e se son bann konmannman ki zot devret garde, e se son lavwa ki zot devret ekoute, e se li ki zot devret servi, e se avek li ki zot devret atase.” (Deterononm 13:4) Zot ti bezwen swiv Zeova, annan lakrent pour li, obeir li, e atase avek li. An rapor avek sa mo ki’n ganny tradwir la konman “atase,” en spesyalis Labib i dir ki “dan langaz [Ebre] i vedir en relasyon pros e entim.” En psalmis ti deklare: “Bann ki annan lakrent pour Zeova i annan en relasyon entim avek li.” (Psonm 25:14) Nou pou kapab annan sa relasyon presye e entim avek Zeova si i reel pour nou, e si nou kontan li sitan en kantite ki nou per pangar nou a depler li dan okenn fason.—Psonm 19:9-14.
Eski ou realize ki Zeova pe pran Swen avek ou?
15, 16. (a) Konman ki Psonm 34 i montre ki Zeova i pran swen avek nou? (b) Ki nou devret fer si nou ganny difikilte pour mazin bann bon keksoz ki Zeova in fer pour nou?
15 En riz ki Satan i servi se pour esey fer nou oubliye ki nou Bondye, Zeova, pe konstaman pran swen avek son bann serviter fidel. David ki ti lerwa an Izrael, ti konn tre byen konman Zeova ti protez li menm kan i ti fer fas avek bann sitiasyon vreman danzere. Kan i ti oblize fer krwar i fou devan Lerwa Akis an Gat, i ti konpoz en sanson, en zoli psonm, kot i ti eksprim son lafwa dan Zeova: “Glorifye Zeova avek mwan, zot lepep, e annou loue son non ansanm. Mon ti demann Zeova e i ti reponn mwan, e i ti sov mwan dan tou mon lafreyer. Lanz Zeova pe kanp tou otour bann ki annan lakrent pour li, e i sov zot. Goute pep e vwar konman Zeova i bon. Ere sa zonm kosto ki pran refiz dan li. Zeova i pre avek sa bann ki annan leker brize; e i sov bann ki zot latet i fatige. Bann dimoun drwat i rankontre bokou maler, me dan tou sa bann maler, Zeova i delivre zot.”—Psonm 34:3, 4, 7, 8, 18, 19; 1 Samyel 21:10-15.
16 Eski ou konvenki ki Zeova i kapab sov ou? Eski ou realize ki i pe protez ou an servan son bann lanz? Eski ou’n deza personnelman goute e vwar konman Zeova i bon? Ki dernyen fwa ou ti realize ki Zeova in vreman montre li bon avek ou? Esey mazinen. Eski i ti kot sa dernyen lakaz ki ou ti pase dan predikasyon, zis omoman ki ou ti krwar ou nepli kapab kontinyen? Petet sa moman menm ou ti ganny en bon konversasyon avek en dimoun. Eski ou ti mazinen pour remersye Zeova pour sa lafors ki i ti donn ou pour kapab kontinyen, e osi pour sa rezilta ki ou ti gannyen? (2 Korentyen 4:7) De lot kote, petet ou pa vwar li fasil pour mazin en bon keksoz an partikilye ki Zeova in fer pour ou. Petet ou bezwen mazinen, kalkile, fer rezon menm avan ki ou trouve. Si sa i leka, akoz ou pa fer en zefor pour rapros ou avek Zeova e esey vwar konman ki i gid ou e diriz ou? Zapot Pyer ti donn sa konsey bann Kretyen: “Avek limilite plas zot anba kontrol pisans Bondye . . . Desarz tou zot sousi lo li, parski limenm ki pran swen avek zot.” (1 Pyer 5:6, 7) Anfet, ou pou etonnen pour vwar konman Zeova i pran swen avek ou!—Psonm 73:28.
Kontinyen rod Zeova
17. Si nou anvi kontinyen rod Zeova, ki nou bezwen fer?
17 Mentenir nou relasyon avek Zeova i en keksoz ki nou devret pe kontinyelman fer. Letan i ti pe koz avek son Papa dan lapriyer, Zezi ti dir: “Savedir ki zot konn ou konman sel vre Bondye, ek Zezi-Kri ki ou’n anvoye.” (Zan 17:3) Pran konnesans lo Zeova ek son Garson i demann en zefor kontinyel lo nou par. Nou bezwen led lapriyer ek lespri sen pour nou konpran bann keksoz profon Bondye. (1 Korentyen 2:10; Lik 11:13) Nou osi bezwen gidans ‘lesklav fidel e pridan’ pour nou nouri nou lespri avek nouritir spirityel ki nou gannyen “kan i ler.” (Matye 24:45) Atraver sa lesklav, Zeova in konsey nou pour lir son Parol toulezour, pour asiste bann renyon Kretyen regilyerman, e pour ede anons “sa Bonn Nouvel Rwayonm” avek tou nou leker. (Matye 24:14) Si nou fer sa, nou pou pe kontinyen rod nou Bondye, Zeova, ki pran nou lentere aker.
18, 19. (a) Ki nou devret determinen pour fer? (b) Si nou pran nou pozisyon ferm kont Dyab e nou kontinyen rod Zeova, konman nou pou ganny beni?
18 Satan pe fer tou sa ki i kapab pour anmenn persekisyon, lopozisyon, ek presyon lo pep Zeova sorti dan tou direksyon. I pe esey enteronp nou lape e gat nou bon repitasyon avek Bondye. Satan pa anvi nou kontinyen nou travay pour rod bann dimoun senser e ed zot pour pran kote pour Zeova e rezet son bann lakizasyon. Me nou bezwen determinen pour reste fidel avek Zeova e annan konfyans ki i pou sov nou dan lanmen sa mesan. Si nou les Parol Bondye gid nou e nou kontinyen reste aktif dan son lorganizasyon, nou kapab asire ki i pou touzour la pour soutenir nou.—Izai 41:8-13.
19 Alors, fotespere ki nou tou nou pran nou pozisyon ferm kont Satan ek son bann riz. Anmenmtan, annou touzour rod nou Bondye, Zeova, ki pa pou zanmen arete ‘rann nou ferm e fortifye nou.’ (1 Pyer 5:8-11) An fezan sa, nou pou ‘reste dan lanmour Bondye, an atandan ki nou Senyer Zezi-Kri, dan son labonte, i donn nou lavi eternel.’—Zid 21.
Ki ou pou reponn?
• Ki sa mo “Dyab” i vedir, e konman ki sa deskripsyon i al byen avek li?
• Konman ki Zeova i diferan avek Dyab dan lafason ki i obzerv bann dimoun lo later?
• Akoz en dimoun i bezwen aksepte Zezi konman ranson letan i pe apros avek Zeova?
• Ki savedir “atase” avek Zeova, e ki mannyer nou kapab kontinyen rod Zeova?
[Kestyon]
[Portre lo paz 15]
Malgre son bann leprev, Zob ti realize ki Zeova ti pe pran swen avek li
[Portre lo paz 16]
Lir Labib toulezour, asiste renyon regilyerman, e pres avek devouman i rapel nou ki Zeova pe pran swen avek nou