Bann Kretyen i bezwen kanmarad

“Nou tou ansanm nou manm en sel lekor.”—EFEZYEN 4:25.

1. Ki en ansiklopedi i dir konsernan lekor imen?

LEKOR imen i en kreasyon merveye! The World Book Encyclopedia i dir: “Parfwa dimoun i dekrir lekor imen konman en masin—en masin pli sofistike ki’n deza ganny envante. Byensir, lekor imen pa en masin. Me i kapab ganny konpare avek enn dan plizyer fason. Nou lekor i annan plizyer parti zis parey en masin. Sak parti nou lekor i annan son fonksyon spesyal parey sak konponan dan en masin. Me tou parti i travay ansanm e ansanm zot fer sa lekor oubyen masin fonksyonn konman fodre.”

2. Dan ki fason lekor imen ek kongregasyon Kretyen i parey?

² Wi, nou lekor i annan diferan parti, oubyen manm, e sak parti i fer en keksoz ki bezwen ganny fer. Napa ni en lavenn, ni en misk, oubyen okenn lezot manm ki napa son litilite. Pareyman, sak manm kongregasyon Kretyen i kapab kontribye dan en fason ou en lot anver lasante ek labote spirityel kongregasyon. (1 Korentyen 12:14-26) I vre ki okenn manm kongregasyon pa devret krwar ki i pli siperyer ki lezot. De lot kote, personn osi pa devret santi ki i pa vo nanryen.—Romen 12:3.

3. Konman Efezyen 4:25 i endike ki bann Kretyen i bezwen kanmarad?

³ Bann Kretyen i bezwen kanmarad zis parey diferan parti nou lekor i depan lo kanmarad. Zapot Pol ti dir son bann konpanyon Kretyen ki’n ganny swazir: “Alor pour sa rezon rezet mansonz! Sakenn devre koz laverite avek son prosen akoz nou tou ansanm nou manm en sel lekor.” (Efezyen 4:25) Vi ki bann manm Izrael spirityel i “manm en sel lekor”—“lekor Kris”—zot koz laverite avek kanmarad e korpere ansanm. Wi, zot tou zot form en sel lekor. (Efezyen 4:11-13) Lezot Kretyen senser ki annan lespwar pour viv lo later, i travay ansanm avek zot dan lazwa.

4. Dan ki fason nou kapab ed bann nouvo?

⁴ Tou le zan, plizyer milye dimoun ki ti a swete viv dan paradi lo later i batize. Lezot manm kongregasyon i kontan pour ed zot “avanse pour ariv dan en matirite adilt.” (Ebre 6:1-3) Zot fer sa par reponn okenn kestyon ki sa bann nouvo i annan lo Labib oubyen par asiste zot dan en fason pratik dan predikasyon. Nou kapab ed bann nouvo par donn zot en bon legzanp letan nou partisip regilyerman dan renyon. Dan letan ladetres, nou kapab osi ankouraz oubyen petet konsol zot. (1 Tesalonisyen 5:14, 15) Nou devret rod diferan fason pour ed lezot “swiv laverite.” (3 Zan 4) Ki swa nou zenn oubyen aze, nou’n fek zwenn laverite oubyen nou la depi lontan, nou kapab promot byennet spirityel nou bann konpanyon Kretyen. Zot vreman bezwen nou.

Zot ti ed bann ki ti dan Bezwen

5. Konman Akilas ek Prisil ti ed Pol?

⁵ Bann koup Kretyen i retir bokou satisfaksyon letan zot ed lezot Kretyen. Par egzanp, Akilas ek son madanm, Prisil, ti ed Pol. Zot ti resevwar li se zot, travay avek li pour fer latant, e zot ti ed li batir en nouvo kongregasyon an Korent. (Akt 18:1-4) Nou pa konnen konman, me zot ti menm riske zot lavi pour Pol. Zot ti pe reste an  Ronm letan Pol ti dir bann Kretyen laba: “Fer salanm Prisil ek Akilas, mon bann koleg travay pour Kris Zezi. Zot in riske zot prop lavi pour sov sa ki pour mwan; pa zis mwan tousel ki rekonnesan anver zot me osi tou bann [kongregasyon] dan lemonn non-Zwif.” (Romen 16:3, 4) Parey Akilas ek Prisil, serten Kretyen denozour i batir kongregasyon e ed zot bann frer ek ser dan diferan fason. Parler, zot menm riske zot prop lavi pour anpes lezot serviter Bondye sibir britalite oubyen ganny touye par bann persekiter.

6. Ki led Apolos ti gannyen?

⁶ Akilas ek Prisil ti osi ed Apolos ki ti pe ansenny bann zabitan Efez konsernan Zezi Kri. Apolos ti en Kretyen ki ti pres byen. Me selman sa letan, i ti konn zis batenm Zan ki ti ganny fer an senbol repantans pour pese kont Lalwa. Akilas ek Prisil ti remarke ki Apolos ti bezwen serten led, alors zot ti “eksplik li pli byen Semen Bondye.” Petet zot ti eksplike ki batenm Kretyen ti enplik ganny plonze anba delo e resevwar lespri sen. Apolos ti aplik byen sa ki i ti’n aprann. Plitar an Akai, “i ti vin byen itil pour bann ki par lagras Bondye ti krwar. Parski avek son bann largiman solid, i ti montre bann Zwif piblikman ki zot ti dan lerer, i ti prouve par Lekritir ki Zezi ti Kris.” (Akt 18:24-28) Souvannfwa, bann komanter ki nou bann konpanyon Kretyen i fer, i kapab ed nou pour pli byen konpran Parol Bondye. Dan sa domenn osi, nou bezwen kanmarad.

Fourni Led materyel

7. Konman bann Filipyen ti reazir letan zot bann konpanyon Kretyen ti bezwen led materyel?

⁷ Bann manm kongregasyon Filip ti kontan Pol en kantite e zot ti anvoy li sa ki i ti bezwen letan i ti pe reste an Tesalonik. (Filipyen 4:15, 16) Kan bann frer an Zerizalenm ti bezwen led materyel, bann Filipyen ti pare pour kontribye menm plis ki sa ki zot ti annan. Pol ti sitan apresye sa bon leta lespri ki son bann frer ek ser an Filip ti demontre, ki i ti servi zot konman en legzanp letan i ti koz avek lezot krwayan.—2 Korentyen 8:1-6.

8. Ki leta lespri Epafrodit ti demontre?

⁸ Kan Pol ti’n ganny anprizonnen, bann Filipyen pa ti zis anvoy bann kado pour li me zot ti osi anvoy Epafrodit, zot reprezantan personnel. Pol ti dir: “Parski [Epafrodit] ti pre pour mor pour travay Kris. I’n riske son lavi pour ed mwan, parski zotmenm zot pa ti kapab fer li.” (Filipyen 2:25-30; 4:18) Nou pa konnen si Epafrodit ti en ansyen oubyen en asistan ministeryel. Toudmenm,  i ti en Kretyen ki ti pare pour ede e sakrifye son lekor. Deplis, Pol ti vreman bezwen li. Eski i annan en dimoun ki parey Epafrodit dan ou kongregasyon?

Zot ti en “gran Rekonfor”

9. Ki legzanp Aristark in donnen?

⁹ Dan nenport kongregasyon, bann frer ek ser parey Akilas, Prisil, ek Epafrodit, i vreman ganny apresye. Serten nou bann frer ek ser i kapab parey Aristark, en Kretyen premye syek. Li ansanm avek lezot Kretyen ti en “gran rekonfor” pour Pol. Petet zot ti rekonfort Pol oubyen ed li dan bann keksoz debaz e dan en fason pratik. (Kolosyen 4:10, 11) Lefe ki i ti ed Pol, Aristark ti vin en vre zanmi pour li dan bann moman difisil. I ti sa kalite dimoun ki ganny mansyonnen dan Proverb 17:17: “En vre konpanyon i kontan ou toultan, e i en frer ki’n ne pour letan ladetres.” Eski pa nou tou nou devret sey nou mye pour vin en “gran rekonfor” pour nou bann konpanyon Kretyen? Nou devret sirtou pare pour asiste bann ki pe soufer dan en fason ou en lot.

10. Ki legzanp Pyer in fourni pour bann ansyen?

¹⁰ Bann ansyen sirtou i bezwen vin en gran rekonfor pour zot frer ek ser spirityel. Kris ti dir zapot Pyer: “Ankouraz ou bann frer.” (Lik 22:32) Pyer ti kapab fer sa akoz i ti annan bann bon kalite, sirtou apre rezireksyon Zezi. Ou ki en ansyen, sey ou mye pour fer parey. Fer li avek tou ou leker e avek lanmour. Ou bann frer ek ser i bezwen ou.—Akt 20:28-30; 1 Pyer 5:2, 3.

11. Ki mannyer nou kapab benefisye letan nou reflesir lo leta lespri Timote?

¹¹ Timote, ki ti akonpanny Pol dan son bann voyaz, ti en ansyen ki ti annan en gran lentere pour lezot Kretyen. Kantmenm i ti annan serten problenm lasante, Timote ti annan en lafwa solid e i ti ‘travay ansanm avek Pol dan servis levanzil.’ Alor, Pol ti kapab dir bann Filipyen: “Personn pa’n partaz mon gran preokipasyon parey li, e pran sousi vreman pour zot byennet.” (Filipyen 2:20, 22; 1 Timote 5:23; 2 Timote 1:5) Si nou demontre en leta lespri parey Timote, nou kapab vin en benediksyon pour nou bann frer ek ser. I vre ki nou bezwen lalit avek nou prop febles oubyen fer fas avek diferan leprev, me nou osi nou bezwen demontre en lafwa solid ek en lentere senser dan nou bann frer ek ser. Nou devret toultan mazinen ki zot bezwen nou.

Bann Madanm ki ti pran Swen avek lezot

12. Ki nou kapab aprann atraver legzanp Dorkas?

¹² Dorkas ti en madanm Kretyen ki ti pran swen avek lezot. Kan i ti mor, bann disip ti fer apel Pyer e anmenn li dan en lasanm anler dan letaz. La, “tou bann vev ti apros li [an] pleran. Zot ti montre li tou bann semiz ek lezot lenz ki Dorkas ti fer ler i ti ankor vivan.” Dorkas ti ganny resisite e san dout i ti kontinyen ‘fer dibyen e ed bann pov.’ Ozordi i annan serten ser dan kongregasyon ki parey Dorkas. Petet zot koud oubyen fer lezot pti keksoz pour bann ki dan bezwen. Byensir, parmi tou zot bon travay, soutenir  bann lentere Rwayonm e fer disip i vin premye.—Akt 9:36-42; Matye 6:33; 28:19, 20.

13. Ki mannyer Lidi ti montre lentere pour bann konpanyon Kretyen?

¹³ En madanm Kretyen ki ti apel Lidi ti pran swen avek lezot. I ti en dimoun Tyatir, me i ti pe reste an Filip kan Pol ti pe pres laba dan lannen 50 N.L. I kapab ki Lidi ti en Zwif konverti, me ti napa bokou Zwif an Filip, ni menm en sinagog. En zour Lidi ti’n zwenn ansanm avek lezot madanm obor larivyer pour priye. Se la kot zapot Pol ti zwenn li e anons li sa bon nouvel. Resi i rakonte: “Senyer ti ouver lespri [Lidi] pour li ekout byen tou sa ki Pol ti pe dir. Li avek tou son fanmir ti batize. Apre i ti fer nou sa lenvitasyon. ‘Si zot in aksepte ki mon’n vreman krwar dan Senyer, vin reste kot mwan.’ I ti obliz nou aksepte son lenvitasyon.” (Akt 16:12-15) Vi ki Lidi ti anvi fer dibyen lezot, i ti reisi fer Pol ek son bann konpanyon aksepte pour vin reste kot li. Pa nou apresye letan nou bann frer ek ser Kretyen i montre lospitalite koumsa!—Romen 12:13; 1 Pyer 4:9.

Zenn—Nou bezwen zot osi

14. Konman Zezi Kri ti tret bann zenn?

¹⁴ Kongregasyon Kretyen ti konmans avek Garson Bondye, ki ti vreman zantiy e annan bokou lafeksyon pour lezot. Dimoun ti santi zot alez avek li akoz i ti kontan zot e annan pitye pour zot. En zour, kan bann dimoun ti pe anmenn zot zanfan kot Zezi, son bann disip ti pe sey anpes zot. Me Zezi ti dir: “Les bann zanfan vin kot mwan, pa anpes zot, akoz Rwayonm Bondye i pour sa ki resanble zot. An verite mon dir zot, sa ki pa resevwar Rwayonm Bondye parey en zanfan pa pou zanmen antre dan Rwayonm.” (Mark 10:13-15) Pour nou resevwar bann benediksyon Rwayonm, nou bezwen abes nou e les nou ganny ansennyen parey bann pti zanfan. Zezi ti montre lanmour pour bann zanfan par pran zot dan son lebra e beni zot. (Mark 10:16) Pareyman, nou asir nou bann zenn dan kongregasyon ozordi ki nou kontan zot e nou bezwen zot.

15. Ki levennman konsernan lavi Zezi ki’n ganny rikorde dan Lik 2:40-52, e ki legzanp i’n kite pour bann zenn?

¹⁵ Letan Zezi ti ankor zenn, i ti montre ki i kontan Bondye e kontan Son Parol. Alaz 12 an, li ek son paran, Zozef ek Mari, ti fer en vwayaz sorti an Nazaret pour al Zerizalenm pour selebre Lapak. Letan zot ti pe retournen, paran Zezi ti realize ki Zezi pa ti dan group ansanm avek zot. Finalman, zot ti vwar li pe asize dan tanp, pe ekout bann profeser Zwif e demann zot kestyon. Zezi ti sirprann akoz Zozef ek Mari pa ti konnen kote pour trouv li. Alors, i ti demann zot: “Zot pa konnen ki mon bezwen dan lakaz mon Papa?” I ti retourn kot li avek son paran. I ti kontinyen soumet avek zot, kontinyen grandi fizikman, e devlope an sazes. (Lik 2:40-52) Pa Zezi in kit en bon legzanp pour nou bann zenn! Byensir, zot devret obeir zot paran e enterese pour aprann bann keksoz spirityel.—Deterononm 5:16; Efezyen 6:1-3.

16. (a) Ki bann pti garson ti kriye letan Zezi ti pe donn temwannyaz kot tanp? (b) Ki privilez bann zenn Kretyen i annan ozordi?

¹⁶ Si ou en zenn, petet ou pe donn temwannyaz lo Zeova kot lekol oubyen kan ou al port-an-port avek ou paran. (Izai 43:10-12; Akt 20:20, 21) Zis avan son lanmor, letan Zezi ti pe temwanny avek bann dimoun e geri zot kot tanp, bann pti garson ti kriye: “Ozana Garson David!” Bann sef pret ek profeser lalwa ti ankoler e zot ti proteste: “Ou tande ki zot pe dir?” Zezi ti reponn: “Wi. Zanmen zot in deza lir: ‘Dan labous bann zanfan ek bann pti baba, ou’n fer sorti kantik’?” (Matye 21:15-17) Zenn, parey sa bann zanfan, zot annan sa gran privilez pour loue Bondye ek son Garson.  Nou anvi e nou bezwen zot pour travay ansanm avek nou pour anons sa Rwayonm.

Kan Maler i arive

17, 18. (a) Akoz Pol ti organiz bann fon pour bann Kretyen an Zide? (b) Ki lefe bann kontribisyon volonter pour bann frer an Zide ti annan lo bann Zwif ensi ki non Zwif?

¹⁷ Nenport sitiasyon ki nou ladan, lanmour i pous nou pour ed nou bann konpanyon Kretyen ki dan bezwen. (Zan 13:34, 35; Zak 2:14-17) Se lanmour pour son bann frer ek ser an Zide ki ti pous Pol pour organiz bann fon pour zot dan kongregasyon Akai, Galat, Masedwann, ek distrik Lazi. Persekisyon, troub, ek lafamin ki bann disip an Zerizalenm ti pe pas ladan ti’n kapab anmenn sa ki Pol ti apel “soufrans,” ganny “maltrete piblikman,” e “ganny arase zot byen.” (Ebre 10:32-34; Akt 11:27–12:1) Alor i ti organiz en fon pour bann Kretyen ki ti mizer an Zida.—1 Korentyen 16:1-3; 2 Korentyen 8:1-4, 13-15; 9:1, 2, 7.

¹⁸ Sa bann kontribisyon volonter ki ti ganny fer pour bann sen an Zide ti prouve ki en bon relasyon ti egziste ant bann Zwif ek bann non Zwif ki ti ador Zeova. Sa bann kontribisyon ti osi en lokazyon pour bann non Zwif montre zot lapresyasyon anver bann frer an Zide pour sa larises spirityel ki zot ti’n resevwar avek zot. Alors, ti annan en lesanz keksoz materyel e spirityel. (Romen 15:26, 27) Kontribisyon ki nou fer pour nou bann frer ek ser ki dan bezwen ozordi, i osi ganny fer volonterman e i ganny motive par lanmour. (Mark 12:28-31) Dan sa domenn osi, nou bezwen kanmarad, pour ki nou ava egal e ‘sa ki annan pti gin pa ava annan tro pti gin.’—2 Korentyen 8:15.

19, 20. Donn en legzanp pour montre konman pep Zeova i fourni led kan bann dezas i arive.

¹⁹ Vi ki nou konnen ki bann Kretyen i bezwen kanmarad, nou pare pour ed nou bann frer ek ser kan zot dan bezwen. Par egzanp, annou vwar ki ti arive kan tranbleman-de-ter ek deboulir later ti arive an El Salvador boner lannen 2001. En rapor ti dir: “Bann frer dan tou rezyon El Salvador ti organiz bann led sekour. Bann frer sorti Gwatemala, Letazini, ek Kanada ti vin ed nou. . . . Plis ki 500 lakaz ek 3 zoli Lasal Rwayonm ti ganny konstri dan en pti lespas letan. En bon temwannyaz ti ganny donnen  lefe ki bann frer ti travay dir e korpere avek kanmarad.”

²⁰ En rapor sorti Sidafrik ti dir: “Sa linondasyon terib ki ti ravaz en gran parti Mozanbik ti osi afekte bokou nou bann frer Kretyen. Biro brans Mozanbik ti pran swen avek zot dan preski tou laspe. Me zot ti demande ki nou anvoy bann lenz ki ankor bon pour mete pour bann frer ek ser ki ti bezwen. Nou ti anmas ase lenz e anvoy en kontener 12 met plen avek lenz pour nou bann frer ek ser an Mozanbik.” Wi, ankor dan sa domenn, nou bezwen kanmarad.

21. Ki nou pou diskite dan lartik swivan?

²¹ Parey nou’n fer resorti okonmansman, tou parti lekor en imen i enportan. Definitivman sa i leka avek kongregasyon Kretyen. Tou manm kongregasyon i bezwen kanmarad. Zot bezwen osi kontinyen servi Zeova dan linite. Lartik swivan pou diskit serten fakter ki fer sa posib.

Ki ou pou reponn?

• Dan ki fason lekor imen ek kongregasyon Kretyen i parey?

• Konman bann premye Kretyen ti reazir letan zot bann frer ti bezwen led?

• Donn serten legzanp dan Labib ki montre ki bann Kretyen i bezwen kanmarad e ed kanmarad?

[Kestyon]

[Portre lo paz 10]

Akilas ek Prisil ti pran swen avek lezot

[Portre lo paz 12]

Pep Zeova i ed kanmarad e osi lezot kan maler i arive