Kestyon Lekter

Si en dimoun i fer en ve avek Bondye, eski i toultan oblize akonpli li?

Dan Labib, en ve i en promes serye ki en dimoun i fer avek Bondye. I kapab enkli fer ou donn en serten keksoz, aksepte en serten travay ouswa responsabilite, oubyen pa fer serten keksoz ki pa defann fer. Labib i kontyen resi lo bann ve ki’n ganny fer avek kondisyon. Zot ti enplik en promes ki en dimoun ti fer pour akonpli en keksoz, si Bondye i fer serten keksoz avan. Par egzanp, Ana, manman profet Samyel, “ti fer en ve, i ti dir: ‘O Zeova bann larme, si . . . ou pa oubliy ou lesklav e si vreman ou donn ou lesklav en garson, mon pou donn li avek Zeova pour tou son lavi, e okenn razwar pa pou ganny pase lo son latet.’ ” (1 Samyel 1:11) Deplis, i evidan ki bann ve dan Labib, ti ganny fer volonterman. Ziska ki degre en dimoun i oblize akonpli bann ve ki i’n fer avek Bondye?

Salomon ki ti lerwa ansyen Izrael i dir: “Kan ou fer en ve avek Bondye, pa ezite pour akonpli li.” I azoute: “Ve ki ou fer, akonpli li. I pli bon ou pa fer en ve, ki ou fer enn e pa akonpli li.” (Eklezyast 5:4, 5) Lalwa ki ti ganny donnen avek Izrael atraver Moiz i deklare: “Si ou fer en ve avek Zeova ou Bondye, ou bezwen pa tarde pour akonpli li, akoz Zeova ou Bondye pou san fot ekspekte ou akonpli li e vreman sa pou vin en pese pour ou.” (Deterononm 23:21) I evidan ki fer en ve avek Bondye i en keksoz serye. I devret ganny fer avek en motif apropriye, e sa enn ki pe fer li i bezwen asire ki i pou kapab akonpli sa ki i’n promet dan sa ve. Sankwa, i pli bon ki i pa fer sa ve. Me enn fwa ki i’n ganny fer, eski en dimoun i oblize akonpli tou ve ki i’n fer?

Si en dimoun i fer en ve pour akonpli serten keksoz me apre i aprann ki sa keksoz pa an armoni avek lavolonte Bondye, ki i pou fer? Dizon i ti en ve ki ti pou dan en serten fason asosye imoralite avek vre ladorasyon? (Deterononm 23:18) Definitivman, sa dimoun pa oblize akonpli en tel ve. Deplis, anba Lalwa Mozaik, en ve ki en madanm ti fer ti kapab ganny anile par son papa oubyen son mari.—Nonm 30:3-15.

Konsider osi sa ka kot en dimoun in fer en ve avek Bondye pour pa marye me aprezan i trouv li dan en sitiasyon kot i bezwen fer en swa. Son ve in met li dan en pozisyon kot i santi ki si i akonpli li, sa i kapab fer li kas bann standar Bondye konsernan moralite. Dan en sitiasyon koumsa, eski i devret atoupri esey akonpli son ve? Eski pa i pou pli bon si i pa akonpli son ve, pour li pa vin koupab pour imoralite plitar e plito rod pitye Bondye e enplor Bondye pour pardonn li? Zis sa dimoun ki kapab deside ki i pou fer. Okenn lezot dimoun pa kapab fer sa desizyon pour li.

Ki en dimoun pou fer si i fer en ve e apre plitar i realize ki i’n fer li tro vit? Eski i devret toudmenm esey akonpli sa ve? I pa ti fasil pour Yifta akonpli son ve ki i ti’n fer avek Bondye, me i ti konsyansyezman akonpli li. (Ziz 11:30-40) Si en dimoun pa arive akonpli en ve, sa i kapab fer Bondye ankoler e detrir sa ki sa  dimoun in akonpli. (Eklezyast 5:6) Pa pran oserye en ve pour akonpli, i kapab fer en dimoun perdi faver Bondye.

Zezi Kri ti dir: “Dir wi kan i wi, oubyen non kan i non. Tou sa ki zot dir an plis i sorti kot dyab.” (Matye 5:37, nou ki’n met an italik.) En Kretyen i devret konsernen pa selman avek akonpli en ve anver Bondye me osi prouve ki i en dimoun parol devan Bondye e devan zonm. Ki i arive si i’n fer en lagreman avek en dimoun ki ti paret byen okonmansman me ler i’n etidye sa keksoz pli pre i vwar ki sa pa ti en bon zafer? I pa devret pran sa size alalezer. Me atraver en diskisyon serye, sa lot dimoun i kapab dakor pour retir sa lobligasyon lo li.—Psonm 15:4; Proverb 6:2, 3.

An sa ki konsern bann ve ek tou lezot keksoz, kwa ki devret konsern nou plis? Se pour nou toultan esey gard en bon relasyon avek Zeova.

[Portre lo paz 30]

Ana pa ti ezite pour akonpli son ve

[Portre lo paz 31]

Kantmenm i pa ti fasil pour li, Yifta ti akonpli son ve