Pran Plezir Dan Letid Personnel Lo Parol Bondye

“Mon pou sirman medit lo tou ou aktivite, e mon pou enterese avek ou mannyer azir.”—PSONM 77:12.

1, 2. (a) Akoz nou devret met letan dekote pour medite? (b) Ki savedir “medite”?

KONMAN bann disip Zezi Kri, keksoz ki devret pli konsern nou se nou relasyon avek Bondye e nou bann rezon pour servi Li. Pourtan, ozordi, dimoun i telman okipe ki zot pa met letan dekote pour zot medite. Zot in pri dan bann aktivite lavi toulezour tel parey tay deryer larzan, aste zanmen fini, e diverti kontan. Ki mannyer nou kapab anpes nou tonm dan sa kalite lavi initil? Zis parey nou rezerv en letan sak zour pour bann aktivite esansyel, parey manze e dormi, nou bezwen pareyman fer letan pour medit lo bann aktivite ek mannyer azir Zeova.—Deterononm 8:3; Matye 4:4.

² Eski annandeler ou pran letan pour medite? Ki savedir medite? Medite i vedir konsantre lo en keksoz, reflesir, oubyen mazin lontan lo la. I osi enplik mazin oubyen reflesir lo en keksoz, sirtou trankilman, seryezman, e oprofon. Ki sa i vedir pour nou?

3. Fer progre spirityel i relye direkteman avek kwa?

³ Premyerman, i devret fer nou rapel sa ki zapot Pol ti ekrir son konpanyon servis Timote: “Ziska ki mon arive, pas ou letan dan lektir parol Bondye an piblik, pres laparol e ansennyen. . . . [Reflesir lo sa bann keksoz; konsantre ladan, NW] pour ki tou dimoun i a war ou progre.” Wi, Pol ti ekspekte Timote fer progre, e son bann parol i montre ki i annan en relasyon direk ant reflesir lo bann keksoz spirityel e fer progre. Menm prensip i aplikab denozour. Pour kapab rezwir satisfaksyon ki progre spirityel i anmennen, nou ankor touzour bezwen “reflesir” e “konsantre” dan bann keksoz ki annan pour fer avek Parol Bondye.—1 Timote 4:13-15.

4. Ki nou kapab servi pour ed nou reflesir lo Parol Zeova regilyerman?

⁴ Pli bon letan pour ou medite i depan lo ou ek progranm ou fanmiy. Plizyer dimoun i reflesir lo en teks Labib byen bomaten kan zot lir dan sa pti liv Egzamin Labib sak Zour. Annefe, apepre 20,000 volonter dan bann Betel partou dan lemonn i konmans zot lazournen par konsider en teks Labib pandan 15 minit. Pandan ki zis detrwa parmi lafanmiy Betel i donn en komanter, lezot i reflesir lo sa ki pe ganny dir e lir. Lezot Temwen i reflesir lo Parol Zeova pandan ki zot pe al travay. Zot ekout Labib, magazin Latour Veyer ek Réveillez-vous! lo kaset ki disponib dan serten langaz. Plizyer madanm ki reste kot lakour i fer sa kan zot pe fer zot louvraz. Anfet, zot pe imit psalmis Azaf, ki ti ekrir: “Mon pou rapel bann fason azir Ya; akoz mon pou rapel sa bann keksoz merveye ki ou’n fer dan lepase. Mon  pou sertennman medit lo tou ou aktivite, e mon pou enterese avek ou mannyer azir.”—Psonm 77:11, 12.

Bon Latitid i anmenn bann Rezilta pozitif

5. Akoz letid personnel i devret enportan pour nou?

⁵ Dan nou lepok, laplipar dimoun nepli annan sa dezir pour lir akoz lektir in ganny ranplase par televizyon, video, ek konpiter. Sa i sertennman pa devret leka parmi bann Temwen Zeova. Apre tou, lir Labib i vreman enportan pour etablir en relasyon ant nou ek Zeova. Plizyer milye lannen pase, Zozye ti siksed Moiz konman Lider Izrael. Pour ganny benediksyon Zeova, Zozye ti devret lir Parol Bondye pour li menm. (Zozye 1:8; Psonm 1:1, 2) Sa i ankor en nesesite ozordi. Serten, akoz zot napa ase ledikasyon i kapab ganny difikilte pour lir oubyen vwar li fatigan. Alors, kwa ki kapab ed nou pour anvi lir e etidye Parol Bondye? Nou kapab trouv larepons dan bann parol Lerwa Salomon ki’n ganny rikorde dan Proverb 2:1-6. Silvouple ouver ou Labib e lir sa bann verse. Apre nou pou diskit zot ansanm.

6. Ki latitid nou devret montre anver konnesans Bondye?

⁶ Pour konmanse, nou trouv sa konsey: “Mon garson, si ou resevwar mon bann parol e apresye mon bann komannman, pour ekout atantivman lasazes, afen ki ou a ouver ou leker pour konpran oprofon; . . .” (Proverb 2:1, 2) Ki nou aprann par sa bann parol? Ki nou tou nou annan sa responsabilite pour etidye Parol Bondye. Remarke ki i konmans avek “si ou resevwar mon bann parol.” Sa “si” i tre enportan akoz lamazorite imen pa fatig zot avek Parol Bondye. Pour nou kapab trouv lazwa kan nou etidye Parol Bondye, nou bezwen pare pour aksepte parol Zeova e tret zot konman en trezor ki nou pa anvi perdi. Nou pa devret zanmen les nou bann aktivite toulezour fer nou vin tro okipe oubyen pran nou latansyon ki nou konmans mank lentere e menm annan dout lo Parol Bondye.—Romen 3:3, 4.

7. Dan tou moman posib, akoz nou devret prezan e ekout atantivman dan nou bann renyon Kretyen?

⁷ Eski nou vreman “ekout atantivman” kan Parol Bondye pe ganny eksplike dan nou bann renyon Kretyen? (Efezyen 4:20, 21) Eski nou ‘ouver nou leker’ pour nou konpran oprofon? Menm si sa orater pa sa enn ki pli bon, vi ki i pe servi Parol Bondye, i merit ganny tou nou latansyon. Byensir pour nou kapab ekout atantivman lasazes sorti kot Zeova, nou bezwen prezan dan nou bann renyon Kretyen kan i posib. (Proverb 18:1) Imazin dezapwentman bann disip Zezi si zot ti’n mank sa renyon dan sa lasanm an Zerizalenm zour Lapannkot lannen 33 N.L.! Menm si nou bann renyon pa sitan enpresyonan parey sa enn, Labib, nou liv prensipal, i ganny diskite. Alors, tou renyon i kapab vin en benediksyon pour nou si nou ekout atantivman e swiv ansanm dan nou Labib.—Akt 2:1-4; Ebre 10:24, 25.

8, 9. (a) Ki ou bezwen fer dan ou letid personnel? (b) Ki mannyer ou kapab konpar valer lor avek konprenezon lo konnesans Bondye?

⁸ Sa lerwa saz i kontinyen: ‘Si, anplis ki sa, ou esey konpran e ou anvi annan bon zizman, . . .’ (Proverb 2:3) Dapre sa bann parol, ki latitid ek leta lespri nou devret annan? En dezir senser pour konpran Parol Zeova. Sa i enplik en gran dezir pour etidye avek bi pour konpran oprofon, e pour konpran kisisa lavolonte Zeova. Byensir, i demann zefor, e sa i diriz nou latansyon ver prosen parol ek ilistrasyon ki Salomon i servi.—Efezyen 5:15-17.

⁹ I kontinyen: “Si ou kontinyen rod li [konprenezon] konmsi larzan, e ou kontinyen resers li konmsi ou pe resers en trezor kasyet, . . .” (Proverb 2:4) Sa i fer nou mazin lakonplisman bann zonm ki pandan plizyer syek in fouye pour ganny bann swadizan metal presye parey larzan ek lor. Serten in touy lezot pour lor. Lezot in pas tou zot lavi pour  esey trouv lor. Selman, ki vre valer lor i annan? Si ou ti’n perdi dan en dezer e pe mor laswaf, ki ou ti pou prefere: en bar lor oubyen en ver delo? Pourtan bann zonm in fer tou pou ganny lor kantmenm i napa en vre valer e son pri pe toultan sanze! * Avek konbyen plis devouman nou devret resers lasazes, konprenezon profon, ek lavolonte Bondye! Ki byenfe nou gannyen ler nou fer en tel resers?—Psonm 19:7-10; Proverb 3:13-18.

10. Ki nou kapab trouve si nou etidye Parol Bondye?

¹⁰ Diskour Salomon i kontinyen: “Dan sa ka, ou pou konpran lakrent Zeova, e ou pou trouv konnesans Bondye.” (Proverb 2:5) Sa i en panse merveye—ki nou konman imen enparfe nou kapab trouv “konnesans Bondye,” Zeova, Souvren Senyer liniver! (Psonm 73:28; Akt 4:24) Pour plizyer syek bann filozof ek swadizan savan dan lemonn in eseye pour konpran bann mister konsernan lavi ek liniver. Toutfwa, zot pa’n reisi trouv “konnesans Bondye.” Akoz? Menm si i’n disponib pour plizyer milye lannen dan Parol Bondye, Labib, zot rezet li konmkwa i tro senp e alor zot pa’n reisi aksepte e konpran li.—1 Korentyen 1:18-21.

11. Ki bann benefis nou gannyen gras a letid personnel?

¹¹ La en lot lankourazman ki Salomon i fer resorti: “Zeova li menm i donn lasazes; dan son labous i sorti konnesans ek konprenezon profon.” (Proverb 2:6) Zeova i donn lasazes, konnesans, konprenezon profon volonterman e zenerezman avek nenport ki ki pare pour rod zot. Sirman nou annan tou rezon pour apresye letid personnel lo Parol Bondye, menm si i demann zefor, disiplin, ek sakrifis. Omwen nou annan bann kopi Labib an ekrir e nou pa bezwen kopye nou menm, parey serten dan letan ansyen ti fer!—Deterononm 17:18, 19.

Viv en Lavi ki Bondye i aprouve

12. Kwa ki devret motiv nou kan nou pe resers konnesans Bondye?

¹² Kwa ki devret motiv nou pour fer letid  personnel? Pour paret pli meyer ki lezot? Pour demontre ki nou annan pli gran konnesans? Pour vin parey bann dimoun ki konn tou lo Labib? Non. Nou bi se pour vin bann Kretyen dan tou nou kondwit, setadir dan tou sa ki nou dir, e dan tou sa ki nou fer. Nou devret touzour pare pour ed lezot, avek menm latitid ki Kris ki ti en vin vre rekonfor pour lezot. (Matye 11:28-30) Zapot Pol ti averti: “Konnesans i fer nou gonfle, me tandis ki lanmour i konstri.” (1 Korentyen 8:1) Alors, nou devret annan menm limilite ki Moiz ti demontre kan i ti dir avek Zeova: “Fer mwan konn ou bann semen, silvouple, pour ki mon ava konn ou, afen ki mon kapab trouv faver dan ou lizye.” (Egzod 33:13) Wi, nou devret anvi ganny konnesans pour kapab fer plezir Bondye, pa pour enpresyonn zonm. Nou anvi vin bann serviter Bondye ki annan limilite e ki Bondye i aprouve. Ki mannyer nou kapab atenn sa lobzektif?

13. Ki en dimoun i bezwen fer pour vin en serviter ki Bondye i aprouve?

¹³ Pol ti donn Timote en konsey konsernan konman pour fer plezir Bondye, an dizan: “Fer tou pour paret devan Bondye konman en zonm ki’n fer leksperyans, konman en zouvriye ki napa nanryen pour onte me ki anons byen mesaz laverite.” (2 Timote 2:15) Sa mo Grek pour “anons byen” ti orizinalman vedir “koup drwat.” (Kingdom Interlinear) Dapre serten spesyalis Labib, sa i donn lide en tayer ki pe koup son latwal dapre en model, en fermye ki pe fouy en fose dan son plantasyon. Dan nenport ka, rezilta ki nou pou gannyen pou drwat. Pwen enportan se ki pour vin en serviter ki Bondye i aprouve, Timote ti pou bezwen “fer tou” pour fer sir ki son lansennyman ek son kondwit i an akor avek parol laverite.—1 Timote 4:16.

14. Ki mannyer nou letid personnel i afekte sa ki nou dir e fer?

¹⁴ Pol ti fer resorti menm pwen kan i ti ankouraz bann konpanyon Kretyen an Kolos pour “viv en lavi ki Bondye i aprouve e fer li plezir dan tou sa ki zot fer.” Zot ti pou fer sa par ‘prodwir fri par zot bon travay, e progrese dan konnesans Bondye.’ (Kolosyen 1:10) La Pol i relye ganny aprouve par Zeova avek ‘prodwir fri par nou bon travay’ osi byen ki “progrese dan konnesans Bondye.” Andotmo, sa ki pli enportan pour Zeova se pa kantite valer ki nou atase avek konnesans me ki kantite nou obeir Parol Bondye dan sa ki nou fer e dir. (Romen 2:21, 22) Sa i vedir ki letid personnel i devret enfliyans nou panse ek nou kondwit si nou anvi fer plezir Bondye.

15. Konman eski nou kapab protez e kontrol nou lespri ek nou panse?

¹⁵ Ozordi, Satan i determinen pour detrir nou spirityalite par fer nou lalit avek nou panse. (Romen 7:14-25) Alors, nou bezwen protez e kontrol nou lespri ek nou panse pour ki Zeova i aprouv nou. Zarm ki nou annan se “konnesans Bondye,” ki kapab “anmenn tou [panse, NW] konman prizonnyen pour fer obei Kris.” Sa i donn nou ankor plis rezon pour nou pran oserye letid Labib toulezour, si nou anvi retir bann move panse egois dan nou lespri.—2 Korentyen 10:5.

 Bann Led pour konpran Labib

16. Ki mannyer nou kapab benefisye personnelman avek lansennyman Zeova?

¹⁶ Bann lansennyman Zeova i anmenn bann byenfe spirityel e fizik. I pa annwiyan oubyen mank valer pratik. Par egzanp, nou lir: “Mwan, Zeova, mon ou Bondye, sa Enn ki pe ansenny ou pour ou prop profi, sa Enn ki pe fer ou mars lo sa semen lo ki ou devret marse.” (Izai 48:17) Konman Zeova i fer nou mars dan sa semen ki pou benefisye nou? Premyerman, nou annan son Parol enspire, Labib Sen. Sa i nou liv prensipal, ki nou refer avek konstaman. Se pour sa ki i bon ki nou swiv ansanm dan nou Labib dan bann renyon Kretyen. Bann bon rezilta ki nou gannyen kan nou fer sa i kapab ganny vwar dan sa resi konsernan sa zofisye Etyopyen, ki’n ganny rikorde dan Akt sapit 8.

17. Ki ti arive dan ka sa zofisye Etyopyen, e ki leson nou kapab aprann atraver sa?

¹⁷ Sa zofisye Etyopyen ti’n konverti dan larelizyon Zwif. I ti senserman krwar dan Bondye, e i ti etidye serten liv Labib. I ti pe vwayaze dan son kales e pe lir liv Izai kan Filip ti tay akote li e demann li: “Eski ou konpran sa ki ou pe lir?” Konman sa zofisye ti reponn? “‘Ki mannyer mon kapab konpran si personn pa eksplik mwan?’ I ti envit Filip pour mont dan son kales e asiz akote li.” Apre sa Filip, anba direksyon lespri sen, ti ed sa zofisye pour konpran profesi Izai. (Akt 8:27-35) Ki leson nou kapab aprann? Ki lir Labib nou tousel pa ase pour ganny konprenezon. Zeova, par son lespri, i servi lesklav fidel e pridan pour ed nou konpran son Parol kan i ler. Ki mannyer sa i ganny fer?—Matye 24:45-47; Lik 12:42.

18. Ki mannyer lesklav fidel e pridan i ed nou?

¹⁸ Menm si sa lesklav i ganny dekrir konman “fidel e pridan,” Zezi pa ti zanmen dir ki sa lesklav i parfe. Akoz i konpoze avek bann frer swazir ki fidel me ankor enparfe. Menm avek bann bon lentansyon, zot kapab fer fot, parey bann zonm parfwa dan premye syek ti fer. (Akt 10: 9-15; Galat 2:8, 11-14) Parkont, zot annan bann bon motif, e Zeova pe servi zot pour fourni nou led pour etidye Labib ki batir nou lafwa dan Parol Bondye e dan son bann promes. Zouti prensipal pour letid personnel ki sa lesklav in donn nou se Les Saintes Écritures—Traduction du monde nouveau. I aprezan disponib an antye oubyen an parti dan 42 langaz. 114 milyon kopi in ganny enprimen dan diferan edisyon. Konman nou kapab servi li dan en fason efikas pour nou letid personnel?—2 Timote 3:14-17.

19. Ki detrwa karakteristik ki Traduction du monde nouveau—avec notes et références i annan ki kapab itil dan nou letid personnel?

¹⁹ Pran par egzanp, Les Saintes Écritures—Traduction du monde nouveau—avec notes et références. I annan en kolonn dan milye  paz ki refer avek lezot teks. I osi annan not anba lo paz, en lalis bann mo biblik ek en lalis bann not anba lo paz, e osi lenformasyon siplemanter ki kouver 43 size, enkli bann map ek latab. I osi annan en Lentrodiksyon, ki eksplik plizyer sours ki’n ganny servi pour fer sa tradiksyon Labib inik. Si i disponib dan en langaz ki ou kapab konpran, fer tou ou posib pour familyariz ou avek sa bann karakteristik e servi zot. Antouka, Labib i pwen depar pour nou progranm letid, e Traduction du monde nouveau i en versyon ki aksantye non Bondye korekteman e anmenmtan i met lanfaz lo dominasyon Rwayonm Bondye.—Psonm 149:1-9; Danyel 2:44; Matye 6:9, 10.

20. Ki bann kestyon konsernan letid personnel ki merit ganny en larepons?

²⁰ Aprezan, nou kapab demande: ‘Ki led anplis ki nou bezwen pour konpran Labib? Konman nou kapab fer en progranm pour letid personnel? Ki mannyer nou kapab fer nou letid pli efikas? Konman nou letid i devret fer lefe lo lezot?’ Sa prosenn lartik pou konsider sa bann laspe enportan dan nou progre konman Kretyen.

[Not anba lo paz]

Eski ou rapel?

• Ki savedir “medite”?

• Ki latitid nou devret annan anver letid lo Parol Bondye?

• Ki motif nou devret annan dan nou letid personnel?

• Ki bann led nou annan pour konpran Labib?

[Kestyon]

[Portre lo paz 21]

Bann manm fanmiy Betel i vwar ki konmans en lazournen par konsider en teks Labib i ranforsi zot spirityelman

[Portre lo paz 21]

Letan presye i kapab ganny servi an ekoutan bann kaset Labib kan nou vwayaze

[Portre lo paz 22]

Bann zonm in travay dir pour kapab ganny lor. Ki kantite zefor ou fer pour etidye Parol Bondye?

[Portre lo paz 22]

Courtesy of California State Parks, 2002

[Portre lo paz 23]

Labib i en trezor ki kapab anmenn ver lavi eternel