‘Kontinyen Veye’!
‘Kontinyen Veye’!
“Sa ki mon dir avek zot, mon dir avek tou dimoun: Veye.” —Mark 13:37.
1, 2. (a) Ki leson Juan ti aprann konsernan protez son byen? (b) Dapre legzanp Zezi lo sa voler, ki nou kapab aprann konsernan reste vizilan?
JUAN ti gard tou son bann keksoz valer kot li. I ti gard zot anba son lili. Dapre li, sa ti landrwa pli an sekirite dan son lakaz. Parkont, en zour swar, kan li ek son madanm ti pe dormi, en voler ti antre dan lasanm. Aparaman, sa voler ti konn egzakteman kote pour gete. San fer okenn tapaz, i ti retir tou keksoz valer anba lili osi byen larzan ki Juan ti’n kit dan tirwar tab-de-nwi. Lannmen bomaten, Juan ti dekouver ki son bann keksoz ti’n ganny vole. Pour bokou letan i pou rapel sa leson ki i’n aprann: En dimoun ki dormi pa kapab vey son bann keksoz.
2 I menm parey dan en sans spirityel. Nou pa kapab protez nou lesperans ek nou lafwa si nou tonm dormi. Pour sa rezon, Pol i donn sa konsey: “Fodre pa ki nou dormi parey lezot, me annou reste vizilan e azen.” (1 Tesalonisyen 5:6) Zezi ti servi legzanp en voler pour montre konman i enportan ki nou reste vizilan. I ti dekrir bann levennman ki ti pou arive zis avan i vin pas son zizman. Apre i ti averti: “Veye alor, akoz zot pa konnen ki zour zot Senyer pou arive. Konpran byen sa: si met lakaz ti konnen ki ler voler pou vini, i pa ti pou dormi e i pa ti pou les voler antre dan son lakaz. Zot osi met zot pare, akoz Fis-de-Lonm pou vini ler ki zot pa pe ekspekte li.” (Matye 24:42-44) En voler pa anonse davans kan i pe vini. I pou vin en letan kot personn pa pe ekspekte li. Dan en menm fason, parey Zezi ti dir, lafen sa sistenm pou ‘vin en ler ki nou pa pe ekspekte li.’
“Reste vizilan, reste ferm dan Lafwa”
3. Zezi ti servi legzanp bann serviter ki pe esper zot met sorti en maryaz. Konman sa i montre nou lenportans pour reste vizilan?
3 Dan Levanzil Lik, Zezi i konpar bann Kretyen avek bann serviter ki pe esper zot met retournen sorti en maryaz. Zot bezwen reste vizilan pour ki ler i vini zot pa ava pe dormi, me pare pour resevwar li. Dan en menm fason, Zezi ti dir: ‘Fis-de-Lonm pou vin nenport ler ki zot pa pe espere.’ (Lik 12:40) I kapab arive ki serten ki pe servi Zeova depi byen lontan nepli konsyan aprezan ki letan i kourt. Zot kapab menm konklir ki lafen i ankor byen lwen. Sa bann fason panse i kapab fer nou tir nou latansyon lo keksoz spirityel e vir ver bann lobzektif materyel, ki kapab fer nou sou spirityelman.—Lik 8:14; 21:34, 35.
4. Ki konviksyon ki pou motiv nou pour veye, e konman Zezi ti montre sa?
4 Nou kapab tir en lot leson dan legzanp Zezi. Sa bann serviter pa ti konnen ki ler zot met ti pou arive, me zot ti konn sa zour swar ki i ti pou vini. I ti pou difisil pour zot reste vizilan sa zour swar si zot ti mazinen ki zot met ti a kapab vin en lot swar. Me zot ti konnen ki swar ki i ti pe vini, e sa ti fer zot determinen pour reste vizilan. Dan en menm fason, bann profesi Labib i klerman montre ki nou pe viv dan letan lafen. Me zot pa dir nou ki zour oubyen ki ler lafen pou vini. (Matye 24:36) Nou krwayans ki lafen pe vini i ed nou pour reste vizilan. Me si nou konvenki ki zour Zeova i vreman pros, nou pou annan pli bon motivasyon pour veye.—Tsefanya 1:14.
5. Konman nou kapab reazir anver konsey Pol pour “reste vizilan”?
5 Kan i ti ekrir bann Korentyen, Pol ti ankouraz zot: “Reste vizilan, reste ferm dan lafwa.” (1 Korentyen 16:13, NW ) Wi, reste vizilan i relye avek reste ferm dan lafwa Kretyen. Konman nou kapab reste vizilan? Par ganny en konnesans pli oprofon lo Parol Bondye. (2 Timote 3:14, 15) Bon labitid letid ek lasistans regilye dan renyon i ede ranforsi nou lafwa. Gard antet zour Zeova i en laspe enportan nou lafwa. Tanzantan revwar bann laprev biblik ki nou pe viv byen pros avek lafen sa sistenm. Sa osi pou ed nou pour pa bliy bann laverite enportan konsernan lafen. * I bon osi si nou not bann levennman mondyal ki pe arive ki pe akonplir bann profesi Labib. En frer an Lalmanny ti ekrir: “Sak fwa ki mon get nouvel e mon vwar bann lager, tranbleman-d-ter, vyolans, ek polisyon nou plannet, i fer mwan pli konvenki ki lafen i vreman pros.”
6. Dan ki fason Zezi ti montre sa tandans pour perdi nou vizilans spirityel anmezir ki letan i pase?
6 Dan Mark sapit 13, nou vwar en lot resi kot Zezi pe demann son bann disip pour reste vizilan. Dapre sa sapit, Zezi i konpar zot sitiasyon avek en gardyen ki pe esper son met retournen sorti en vwayaz aletranze. Sa gardyen pa ti konnen ki ler son met pou retournen. I ti bezwen zis veye. Sa met ti kapab ariv pandan sa kat diferan peryod letan ki Zezi ti refer avek. Sa katriyenm peryod letan i dir depi trwa er bomaten ziska soley leve. Pandan sa letan, sa gardyen ti kapab fasilman konmans ganny sonmey. Aparaman, bann solda i konsider sa letan zis avan granmaten konman pli bon letan pour atrap en voler par sirpriz. Pareyman, nou kapab vwar li pli difisil pour reste vizilan la ki nou pe apros lafen sa bann dernyen zour, kot lemonn otour nou i dan en profon sonmey spirityelman. (Romen 13:11, 12) Alors, dan son legzanp, Zezi ti sipliye plizyer fwa: “Fer atansyon, veye . . . Veye alor . . . Sa ki mon dir avek zot, mon dir avek tou dimoun: Veye.”—Mark 13:32-37.
7. Ki gran danze ki egziste? Avek sa antet, ki lankourazman ki nou souvan lir dan Labib?
7 Plizyer fwa pandan son minister e apre son rezireksyon Zezi ti ankouraz dimoun pour reste vizilan. Annefe, sak fwa ki Labib i refer avek lafen sa sistenm, nou vwar sa lavertisman pour reste vizilan oubyen kontinyen veye. * (Lik 12:38, 40; Revelasyon 3:2; 16:14-16) I kler ki ganny sonmey spirityelman i en gran danze. Nou tou nou bezwen sa bann lavertisman!—1 Korentyen 10:12; 1 Tesalonisyen 5:2, 6.
Trwa Zapot ki pa ti reisi veye
8. Dan zarden Zetsemane, konman sa trwa disip Zezi ti reazir ler Zezi ti demann zot pour veye avek li?
8 Parey nou vwar dan legzanp Pyer, Zak, ek Zan, i demann plis ki bon lentansyon pour reste vizilan. Sa trwa zapot ti bann zonm spirityel ki ti fidelman swiv Zezi e ki ti annan lafeksyon profon pour li. Toudmenm, sa zour swar le 14 Nizan, lannen 33 N.L., zot pa ti reisi reste vizilan. An kitan sa lasanm anler kot zot ti’n selebre Lapak, sa trwa zapot ti akonpanny Zezi dan zarden Zetsemane. Laba Zezi ti dir avek zot: “Mon leker i ranpli avek en tristes lanmor. Reste isi e veye avek mwan.” (Matye 26:38) Trwa fwa Zezi ti priy son Papa seles avek bokou santiman. Tou le trwa fwa letan i ti retournen, i ti vwar son bann zanmi pe dormi.—Matye 26:40, 43, 45.
9. Petet kwa ki ti’n kapab fer sa bann zapot ganny sonmey?
9 Akoz sa trwa zonm fidel ti dezapwent Zezi sa zour swar? Lafatig fizik ti en fakter. Ti tar, petet apre minwi, e “zot lizye ti lour” avek sonmey. (Matye 26:43) Kantmenm sa, Zezi ti dir: “Veye e priye pour zot pa tonm dan tantasyon. Lespri i dispoze, me laser i feb.”—Matye 26:41.
10, 11. (a) Malgre i ti fatige, kwa ki ti ed Zezi pour reste eveye dan zarden Zetsemane? (b) Ki nou kapab aprann atraver sa ki ti arive avek sa trwa zapot kan Zezi ti demann zot pour veye avek li?
10 San dout, sa zour swar istorik Zezi osi ti fatige. Parkont, olye dormi, i ti pas sa bann dernyen moman enportan kot i ti ankor lib pour fer lapriyer senser. Detrwa zour avan, i ti’n enplor son bann disip pour priye, an dizan: “Veye alor e priye tou letan, pour zot ganny lafors pour pas atraver tou sa bann keksoz ki pou arive, e ki zot ava tenir debout devan Fis-de-Lonm.” (Lik 21:36; Efezyen 6:18) Si nou pran kont lavertisman Zezi e swiv son bon legzanp an sa ki konsern lapriyer, nou siplikasyon senser avek Zeova pou ed nou reste vizilan spirityelman.
11 Byensir, Zezi ti konpran ki byento i ti pou ganny arete e ganny kondannen amor. Son bann disip pa ti ankor konpran sa. Son bann leprev ti pou termin dan en fason trazik lo poto siplis. Zezi ti’n averti son bann zapot konsernan sa bann keksoz, me zot pa ti’n konpran ki i ti pe dir. Alors, zot ti ganny sonmey tandis ki li i ti reste eveye e priye. (Mark 14:27-31; Lik 22:15-18) Parey dan ka bann zapot, nou laser osi i feb e i annan keksoz ki nou pa ankor konnen. Kantmenm sa, si nou oubliye ki nou pe viv dan en letan kritik, nou pou kapab tonm dormi dan en sans spirityel. Si nou reste vizilan, nou pou evite tonm dormi.
Trwa Kalite enportan
12. Lekel sa trwa kalite ki Pol i mansyonnen ki ed nou reste dan nou bon sans?
12 Konman nou kapab reste konsyan ki sa letan ki nou pe viv ladan i irzan? Nou’n deza vwar lenportans lapriyer ek nesesite pour gard antet zour Zeova. Anplis ki sa, Pol i osi mansyonn trwa kalite ki nou devret kiltive. I dir: “Parski nou fer parti lizour, annou reste azen [oubyen “dan nou bon sans,” NW ] e abiy nou dan lafwa ek lanmour parey en lenz proteksyon; pour kas proteksyon lo nou latet nou annan lesperans dan delivrans.” (1 Tesalonisyen 5:8) Annou konsider briyevman konman lafwa, lesperans, ek lanmour i kapab kit nou vizilan spirityelman.
13. Ki rol lafwa i zwe pour fer nou reste vizilan?
13 Nou bezwen annan en lafwa solid ki Zeova i egziste e ki “i rekonpans tou bann ki rod li.” (Ebre 11:6) Profesi Zezi konsernan lafen ti ganny en premye lakonplisman dan premye syek. Sa i ranforsi nou lafwa dan son pli gran lakonplisman dan nou letan. Nou lafwa i osi ed nou pour esper avek pasyans zour Zeova, avek lasirans ki “[sa vizyon profetik] san dout pou vin vre. I pa pou an retar.”—Abakouk 2:3.
14. Konman lesperans i enportan si nou anvi reste vizilan?
14 Nou lesperans asire i parey en “lank solid e ferm pour nou lam.” Menm si nou bezwen esper serten lakonplisman promes Bondye, nou lesperans i ed nou pour andir bann difikilte. (Ebre 6:18, 19) Margaret i en Kretyen swazir, i aze 90 an, e i annan 70 an depi ki i’n batize. I admet: “Kan mon msye ti pe mor avek kanser an 1963, mon ti santi ki ti pou pli bon si lafen ti ariv vitman. Me aprezan mon realize ki mon ti pe mazin zis mon prop lentere. Sa letan nou ti napa okenn lide ziska ki degre sa travay ti pou ogmante partou dan lemonn. Menm la konmela, i ankor annan plizyer landrwa kot sa travay in fek konmanse. Alor mon kontan ki Zeova in demontre pasyans.” Zapot Pol i asir nou: “Perseverans i prodwi fidelite dan leprev e fidelite i prodwi lesperans. Sa lesperans pa tronp nou.”—Romen 5:3-5.
15. Konman lanmour pou motiv nou, menm si i paret ki nou’n esper pour en bon pe letan?
15 Lanmour i en kalite remarkab pour en Kretyen akoz i sa kalite ki pli motiv nou dan tou sa ki nou fer. Nou servi Zeova akoz nou kontan li, san pran kont konman i’n fer son plan. Lanmour pour nou prosen i pous nou pour pres sa bon nouvel avek zot. Nou fer sa nenport ki kantite letan Bondye i oule nou fer li oubyen nenport ki kantite fwa nou pas kot menm lakaz. Parey Pol in ekrir, “trwa keksoz i reste: lafwa, lesperans ek lanmour. Me dan tou, lanmour i pli gran.” (1 Korentyen 13:13) Lanmour i fer nou kontinyen andire e i ed nou pour reste vizilan. “[Lanmour] i esper tou, i siport tou. Lanmour i reste pour touzour.”—1 Korentyen 13:7, 8.
“Gard byen for sa ki ou posede”
16. Olye ki nou bes lebra, ki latitid nou devret kiltive?
16 Nou pe viv dan en letan enportan kot bann levennman mondyal pe konstaman rapel nou ki nou dan bann dernyen zour. (2 Timote 3:1-5) La i pa le moman pour nou bes lebra me plito pour ‘gard byen for sa ki nou posede.’ (Revelasyon 3:11) Par annan ‘en lespri vizilan pour nou kapab priye’ e par kiltiv lafwa, lesperans, ek lanmour nou pou prouve ki nou pare pour letan maler. (1 Pyer 4:7) Nou annan en kantite pour fer dan travay Senyer. Reste okipe dan bann aktivite ki montre ki nou atase avek Bondye, pou ed nou reste vizilan.—2 Pyer 3:11.
17. (a) Akoz nou pa devret les bann dezapwentman ki arive tanzantan dekouraz nou? (Vwar bwat lo paz 31.) (b) Konman nou kapab imit Zeova, e ki benediksyon bann ki fer sa pou gannyen?
17 Zeremi ti ekrir: “Zeova i mon leritaz, se pour sa ki mon pou esper li. Zeova i bon anver sa enn ki met son lespwar dan li, anver sa enn ki kontinyen rod li. I byen ki en dimoun i esper delivrans Zeova, menm an silans.” (Lamantasyon 3:24-26) Serten parmi nou in esper pour zis en pti pe letan. Lezot in esper pour plizyer lannen pour vwar delivrans Zeova. Parkont, sa peryod letan ki nou pe espere i pti gin konpare avek leternite ki nou annan devan nou. (2 Korentyen 4:16-18) Deplis, anmezir ki nou esper letan apropriye Zeova, nou kapab kiltiv bann kalite ki esansyel pour en Kretyen. Nou kapab osi ed lezot pour benefisye avek pasyans Zeova e aksepte laverite. Alors, nou tou, annou reste vizilan. Annou imit Zeova par annan pasyans, e rekonesan pour sa lesperans ki i’n donn nou. Anmezir ki nou kontinyen reste lo nou gard, annou tenir byen for nou lesperans pour lavi eternel. Alors, sa bann promes profetik pou sirman aplik pour nou: “[Zeova] pou elev ou pour pran posesyon later. Ou pou vwar kan bann mesan pou ganny detrir.”—Psonm 37:34.
[Not anba lo paz]
^ par. 5 I kapab osi itil pour revwar sa sis laprev ki endike ki nou pe viv dan bann “dernyen zour” ki ganny trouve dan Latour Veyer le 15 Zanvye 2000 (Angle/Franse), paz 12 ek 13.—2 Timote 3:1.
^ par. 7 An rapor avek sa verb Grek ki’n ganny tradwir “veye,” ekriven en diksyonner William. E. Vine i eksplike ki i literalman vedir ‘lager avek sonmey.’ I “pa senpleman vedir ki nou eveye, me nou pe vey en keksoz.”
Konman ou pou reponn?
• Konman nou kapab ranforsi nou konviksyon ki lafen sa sistenm i pros?
• Ki nou kapab aprann atraver legzanp Pyer, Zak, ek Zan?
• Ki sa trwa kalite ki pou ed nou reste vizilan spirityelman?
• Akoz la i letan pour ‘gard byen for sa ki nou posede’?
[Kestyon]
[Bwat/Portre lo paz 31]
“Ere sa Enn ki kontinyen espere.”—Danyel 12:12
Meton en gardyen i annan soupson ki en voler i annan plan vin vole dan sa landrwa kot i pe veye. Kan aswar i fer, sa gardyen i ekout atantivman okenn pti tapaz ki kapab endik prezans sa voler. Pour bokou letan i kit son zorey ek son lizye gran ouver. I fasil pour konpran konman i kapab ganny tronpe par en fo alert. I kapab zis en pti labriz oubyen en sat ki tap avek en keksoz.—Lik 12:39, 40.
Menm keksoz i kapab arive avek sa bann ki pe “espere kan nou Senyer Zezi-Kri i ava aparet.” (1 Korentyen 1:7) Bann zapot ti panse ki Zezi ti pou “retabli rwayonm Izrael” zis apre son rezireksyon. (Akt 1:6) Plizyer lannen plitar, bann Kretyen an Tesalonik ti bezwen ganny rapele ki prezans Zezi ti pou dan le fitir. (2 Tesalonisyen 2:3, 8) Kantmenm sa, bann fo alert konsernan zour Zeova pa’n fer bann premye disip Zezi abandonn sa santye ki anmenn ver lavi.—Matye 7:13.
Dan nou letan, nou kapab ganny lenpresyon ki lafen sa sistenm pe tarde. Me sa pa devret fer nou bes lebra. En gardyen vizilan i kapab ganny tronpe par en fo alert, me i devret kontinyen veye! Sa i son louvraz. I menm parey pour en Kretyen.
[Portre lo paz 29]
Renyon, lapriyer, ek bon labitid letid i ed nou reste vizilan