Eski Ou Vreman Annan Lafwa Dan Sa Bon Nouvel?
Eski Ou Vreman Annan Lafwa Dan Sa Bon Nouvel?
“Rwayonm Bondye i pros, sanz zot lavi e krwar dan sa Bonn Nouvel.”—MARK 1:15.
1, 2. Ki mannyer ou pou eksplik Mark 1:14, 15?
TI DAN lannen 30 N.L. An Galile, Zezi ti’n konmans son minister vreman enportan. I ti pe pres “Levanzil,” e bokou Galileen ti ganny motive par sa ki i ti dir: “Ler in arive, Rwayonm Bondye i pros, sanz zot lavi e krwar dan sa Bonn Nouvel.”—Mark 1:14, 15.
2 ‘Ler ti’n arive’ pour Zezi konmans son minister e pour dimoun fer en desizyon ki ti pou fer zot ganny laprouvasyon Bondye. (Lik 12:54-56) ‘Rwayonm Bondye ti pros’ akoz Zezi ki ti’n ganny swazir pour vin lerwa sa Rwayonm ti la prezan. Son travay predikasyon ti pous bann dimoun senser pour sanz zot lavi. Me konman zot ti montre ki zot “krwar dan sa Bonn Nouvel”? Konman ki nou osi nou kapab fer parey?
3. Ki bann dimoun in fer pour montre ki zot annan lafwa dan sa bon nouvel?
3 Parey Zezi, zapot Pyer osi ti ankouraz bann dimoun pour sanz zot lavi. Letan i ti pe adres bann Zwif an Zerizalenm zour Lapannkot lannen 33 N.L., Pyer ti dir: “Sanz zot lavi e ki sakenn ant zot i ganny batize o non Zezi-Kri pour ki zot ganny pardon zot bann pese. Alor zot a resevwar kado Bondye, Sent-Espri.” Plizyer milye dimoun ti sanz zot lavi, batize, e vin disip Zezi. (Akt 2:38, 41; 4:4) Dan lannen 36 N.L., bann dimoun lezot nasyon ki ti repantir ti fer menm parey zot osi. (Akt 10:1-48) Dan nou letan, lafwa dan sa bon nouvel pe pous plizyer milye dimoun pour repantir pour zot pese, dedye zot lavi avek Bondye, e batize. Zot in aksepte sa bon nouvel konsernan delivrans e zot pe montre ki zot annan lafwa dan sakrifis ranson Zezi. Deplis, zot pe fer sa ki byen e zot in pran zot pozisyon pour Rwayonm Bondye.
4. Kisisa lafwa?
4 Me kisisa lafwa? Zapot Pol ti ekrir: “Lafwa i lasirans dan keksoz ki ou pe espere, e sertitid keksoz ki ou pa’n war.” (Ebre 11:1) Nou lafwa i fer nou annan lasirans ki tou keksoz ki Bondye in promet dan son Parol i garanti. I konmsi nou annan en dokiman legal ki prouve ki nou posed en serten keksoz. Lafwa i osi “sertitid keksoz ki ou pa’n war.” Nou lespri ek nou leker deborde avek lapresyasyon i fer nou konvenki ki sa bann keksoz i reel menm si nou pa’n vwar zot.—2 Korentyen 5:7; Efezyen 1:18.
Nou bezwen Lafwa!
5. Akoz lafwa i sitan enportan?
5 Nou’n ne avek en bezwen spirityel me pa avek lafwa. Anfet, “pa tou dimoun ki annan lafwa.” (2 Tesalonisyen 3:2) Me parkont, bann Kretyen i bezwen annan lafwa pour erit bann promes Bondye. (Ebre 6:12) Apre ki i ti’n sit legzanp plizyer dimoun ki ti annan lafwa, Pol ti ekrir: “Alor, parski nou ganny antoure avek en si gro nyaz temwen, debaras nou avek tou fardo ki zenn nou e tou pese ki anvlop nou si fasilman e avek determinasyon annou fer sa lakours ki i’n propoz nou. Annou gard nou regar fikse lo Zezi, sa enn ki linisyater nou lafwa, e ki anmenn li ziska perfeksyon.” (Ebre 12:1, 2) Lekel sa “pese ki anvlop nou si fasilman”? Sa se en mank lafwa. I kapab menm en lafwa ki nou ti annan oparavan me ki’n aprezan perdi. Pour gard nou lafwa for, nou bezwen “gard nou regar fikse lo Zezi” e swiv son legzanp. Nou bezwen osi rezet imoralite, konbat bann aktivite natir imen, e evite tay deryer bann keksoz materyel, bann filozofi lemonn ek bann tradisyon ki kont prensip Labib. (Galat 5:19-21; Kolosyen 2:8; 1 Timote 6:9, 10; Zid 3, 4) Deplis, nou bezwen krwar ki Bondye i avek nou e ki bann konsey dan son Parol i vreman marse.
6, 7. Akoz i byen priye pour ganny lafwa?
6 Nou pa pou arive devlop lafwa par nou prop determinasyon. Lafwa i form parti fri lespri Bondye, oubyen son lafors aktif. (Galat 5:22, 23) Alors, ki nou bezwen fer si nou anvi ranforsi nou lafwa? Zezi ti dir: “Si, zot . . . kapab donn bon keksoz zot zanfan, i annan plis rezon pour ki zot Papa ki dan lesyel pou donn son Lespri Sen tou bann ki demann li?” (Lik 11:13) Wi, annou priye pour ganny lespri sen. Parski i kapab prodwir dan nou, lafwa ki nou bezwen pour fer lavolonte Bondye menm dan bann sirkonstans tre difisil.—Efezyen 3:20.
7 I byen ki nou priye pour ganny plis lafwa. Kan Zezi ti pe al sas en demon dan en garson, papa sa garson ti sipliye: “Mon krwar; me ed mwan pour ganny plis lafwa.” (Mark 9:24) Bann disip Zezi osi ti dir: “Fer nou ganny plis lafwa!” (Lik 17:5) Alors, annou priye pour ganny lafwa, avek lasirans ki Bondye pou reponn bann lapriyer koumsa.—1 Zan 5:14.
Lafwa dan Parol Bondye i esansyel
8. Ki mannyer lafwa dan Parol Bondye i kapab ed nou?
8 Zis avan son lanmor, Zezi ti dir son bann disip: “Pa bezwen enkyet; krwar dan Bondye e krwar dan mwan osi.” (Zan 14:1) Konman Kretyen, nou krwar oubyen annan lafwa dan Bondye e dan son Garson. Me eski nou annan lafwa dan Parol Bondye? I kapab annan en gran lenfliyans lo nou pour fer sa ki byen si nou etidye li e met li an pratik. Anmenmtan fodre nou annan konfyans total ki Parol Bondye i fourni nou pli bon konsey ek gidans.—Ebre 4:12.
9, 10. Ki mannyer ou pou eksplik sa ki Zak 1:5-8 i dir konsernan lafwa?
9 Nou lavi konman imen enparfe i ranpli avek problenm. Toudmenm, lafwa dan Parol Bondye i kapab vreman ed nou. (Zob 14:1) Par egzanp, meton nou pa konnen konman pour fer fas avek en serten leprev. Parol Bondye i donn nou sa konsey: “Si i annan parmi zot ki mank lasazes, ki i demann Bondye e Bondye a donn li parski i donn tou dimoun zenerezman san fer okenn repros. Me fodre ki i demann avek lafwa san doute, parski en dimoun ki doute i parey laroul lo lanmer ki divan i anmennen e pous dan tou direksyon. En tel dimoun fodre pa ki i mazinen ki i pou ganny okenn keksoz avek Senyer, parski i en dimoun endesi e enserten dan sa ki i fer.”—Zak 1:5-8.
10 Zeova pa pou repros nou si nou mank lasazes e nou demann li dan lapriyer. Okontrer, i pou ed nou pour vwar sa leprev dan en bon fason. Nou bann konpanyon Kretyen i kapab atir nou latansyon lo serten teks Labib ki kapab itil. Oubyen letan nou pe etidye Labib, nou menm nou kapab vwar serten teks ki kapab ed nou. Ouswa nou kapab ganny gide par lespri sen Zeova dan lezot fason. Nou Papa seles pou donn nou lasazes pour fer fas avek leprev si nou kontinyen “demann avek lafwa san doute.” Si nou parey laroul lo lanmer ki divan i anmennen, nou pa kapab ekspekte resevwar nanryen avek Bondye. Akoz? Parski sa pou vedir ki nou endesi e enserten dan nou lapriyer oubyen dan lezot fason, menm dan nou lafwa dan Bondye. Alors, nou bezwen annan en lafwa ferm dan Parol Bondye e dan gidans ki i fourni. Annou vwar serten legzanp konman lafwa i ed nou e gid nou.
Lafwa ek Nesesite Lavi
11. Ki lasirans lafwa dan Parol Bondye i donn nou konsernan nou nesesite toulezour?
11 Meton nou pe viv dan lapovrete oubyen nou mank serten nesesite debaz parey nouritir. Lafwa dan Parol Bondye i donn nou lasirans ki Zeova pou donn nou sa ki nou bezwen sak zour. I osi donn nou lasirans ki dan nouvo lemonn sa ki kontan li pou annan dekwa pour manze. (Psonm 72:16; Lik 11:2, 3) Nou kapab vwar li ankourazan pour medit lo konman Zeova ti fourni profet Eliya manze pandan en lafanmin. Plitar, par mirak, Bondye ti fer en pe lafarin ek delwil pa fini, ki ti kit en madanm, son garson, ek Eliya vivan. (1 Lerwa 17:2-16) Pareyman, Zeova ti donn profet Zeremi son bezwen neseser pandan latak Babilonn lo Zerizalenm. (Zeremi 37:21) Menm si Zeremi ek Eliya ti napa bokou pour manze, Zeova ti pran swen avek zot. Demenm, i pran swen avek bann ki demontre lafwa dan li ozordi.—Matye 6:11, 25-34.
12. Ki mannyer lafwa pou ed nou pour ganny nou bouse manze?
12 Lafwa ansanm avek laplikasyon bann prensip Labib pa pou fer nou ris lo plan materyel. Me i pou ed nou pour ganny nou bouse manze. Par egzanp, Labib i konsey nou pour vin en dimoun ki onnet, konpetan, e ki travay dir. (Proverb 22:29; Eklezyast 5:18, 19; 2 Korentyen 8:21) Nou pa devret zanmen sou estim lenportans annan en bon repitasyon dan travay. Menm dan bann landrwa kot i difisil pour trouv en bon travay, bann travayer ki onnet, ki travay byen, e travay dir, i pli byen pase ki lezot. Menm si petet sa bann travayer napa bokou keksoz, normalman zot annan zot nesesite debaz. Zot osi satisfe akoz zot manz sa ki zot menm zot in travay pour gannyen.—2 Tesalonisyen 3:11, 12.
Lafwa i ed nou sirmont nou Sagren
13, 14. Ki mannyer lafwa i ed nou sirmont nou sagren?
13 Parol Bondye i montre ki i normal pour nou sagren letan en dimoun ki nou ti pros avek i mor. Patrias fidel, Abraam, ti plere letan son madanm Sara ki i ti byen kontan ti mor. (Zenez 23:2) David ti vreman ganny afekte letan i ti tann lanmor son garson Absalon. (2 Samyel 18:33) Menm Zezi, ki ti en zonm parfe, ti plere letan son zanmi Lazar ti mor. (Zan 11:35, 36) Kan en dimoun ki nou pros avek i mor, sa i kapab afekte nou en kantite. Me lafwa dan bann promes Bondye i kapab ed nou sirmont nou sagren.
14 Pol ti dir: ‘Mon annan sa menm lesperans dan Bondye ki tou dimoun bon konman move, pour resisite.’ (Akt 24:15) Nou bezwen annan lafwa dan laranzman ki Bondye in fer pour en gran kantite dimoun ganny resisite. (Zan 5:28, 29) Parmi zot, pou annan Abraam, Sara, Izaak, Rebeka, Zakob, ek Lea. Zot tou zot pe dormi dan lanmor e pe esper rezireksyon dan nouvo lemonn Bondye. (Zenez 49:29-32) Pa i pou gou letan bann ki nou ti pros avek pou resisite pour viv ankor lo later! (Revelasyon 20:11-15) Pour lemoman, lafwa pa pou efas tou nou lapenn. Me i pou gard nou pros avek Bondye, ki ed nou sirmont nou sagren.—Psonm 121:1-3; 2 Korentyen 1:3.
Lafwa i fortifye bann ki dan Depresyon
15, 16. (a) Akoz nou kapab dir ki i pa drol pour bann ki annan lafwa ganny depresyon? (b) Ki nou kapab fer pour fer fas avek depresyon?
15 Parol Bondye i montre ki menm bann ki annan lafwa i kapab vin viktim depresyon. Letan Zob ti pe ganny teste severman, i ti krwar Bondye in abandonn li. (Zob 29:2-5) Leta deplorab Zerizalenm ek son miray ti fer Neemya vreman tris. (Neemya 2:1-3) Pyer ti sitan dezapwente apre ki i ti’n renye Zezi ki i ti “plere asodlarm.” (Lik 22:62) Pol ti demann bann konpanyon Kretyen dan kongregasyon Tesalonik pour “koz dan en fason rekonfortan avek bann ki dekouraze.” (1 Tesalonisyen 5:14, NW ) Alors, i pa drol pour bann ki annan lafwa ozordi ganny depresyon. Me ki nou kapab fer alors, pour fer fas avek depresyon?
16 Nou kapab ganny depresyon akoz nou annan serten problenm grav. Olye vwar zot konman en sitiasyon dezespere, petet nou kapab rezourd nou problenm enn par enn par aplik bann prensip Labib. Sa i kapab amelyor nou sitiasyon. Bann aktivite ekilibre ek sifizaman repo i kapab osi ede. En keksoz ki sir se: Lafwa dan Bondye e dan son Parol i promot byennet spirityel akoz i ranforsi nou konviksyon ki Bondye i vreman enterese avek nou.
17. Ki mannyer nou konnen ki Zeova i enterese avek nou?
17 Pyer i donn nou sa lasirans rekonfortan: “Avek limilite plas zot anba kontrol pisans Bondye pour ki dan son ler ki i’n fikse, i a elev zot. Desarz tou zot sousi lo li, parski limenm ki pran swen avek zot.” (1 Pyer 5:6, 7) En psalmis ti sante: “Zeova pe donn sipor tou sa bann ki pe tonbe, e pe redres tou sa bann ki’n kourbe.” (Psonm 145:14) Nou devret krwar sa bann lasirans akoz zot sorti dan Parol Bondye. Petet depresyon i kapab persiste. Me pa i ankourazan pour konnen ki nou kapab larg nou traka lo nou Papa lanmour!
Lafwa ek lezot Leprev
18, 19. Ki mannyer lafwa i ed nou pour siport en maladi oubyen pour rekonfort bann konpanyon Kretyen ki malad?
18 Nou lafwa i kapab vreman ganny teste letan nou oubyen en dimoun ki nou pros avek i byen malad. Napa okenn landrwa dan Labib ki dir ki bann Kretyen parey Epafrodit, Timote, ek Trofim ti ganny geri par mirak. Me san dout, Zeova ti ed zot pour andire. (Filipyen 2:25-30; 1 Timote 5:23; 2 Timote 4:20) Deplis, konsernan “sa enn ki pran konsiderasyon anver sa enn ki pti,” en psalmis ti sante: “Zeova li menm pou soutenir li lo kanape soufrans; Wi, ou pou sanz tou son lili pandan son maladi.” (Psonm 41:1-3) Konman parol sa psalmis i ed nou pour rekonfort bann frer ek ser ki malad?
19 Priy pour oubyen avek bann ki malad i en fason pour ed zot spirityelman. Nou pa ekspekte Bondye pour fer mirak e geri zot. Kantmenm sa, nou kapab demann Li pour donn zot kouraz ek lafors spirityel ki zot bezwen pour siport bann moman pli difisil. Zeova pou soutenir zot. Deplis, letan zot get dan lavenir kot “okenn zabitan pa pou dir: ‘Mon malad,’ ” zot lafwa pou vin pli ferm. (Izai 33:24) Pa i rekonfort nou pour konnen ki bann imen obeisan pou ganny libere avek pese, maladi, ek lanmor! Sa pou ganny realize atraver Zezi Kri e par mwayen Rwayonm Bondye. Pour tou sa bann keksoz merveye, nou remersi Zeova, ‘ki geri tou nou maladi.’—Psonm 103:1-3; Revelasyon 21:1-5.
20. Akoz nou kapab dir ki lafwa i kapab ed nou pas atraver bann “zour maler,” setadir nou vye zour?
20 Lafwa i kapab osi ed nou pas atraver “bann zour maler.” Sa se dan nou vye zour kot lasante ek lafors i afebli. (Eklezyast 12:1-7) Alors, bann aze parmi nou i kapab priye parey en psalmis ki ti pe antre dan laz ti sante: “Se ou mon lespwar, O Souvren Senyer Zeova . . . Pa rezet mwan pandan letan lavyeyes; zis letan mon lafors in afebli, pa kit mwan.” (Psonm 71:5, 9) Sa psalmis ti santi ki i bezwen sipor Zeova, parey bokou nou bann aze ki’n pas bokou lannen dan servis Bondye. Akoz zot lafwa, zot kapab asire ki Zeova pou touzour la pour soutenir zot.—Deterononm 33:27.
Gard Lafwa dan Parol Bondye
21, 22. Si nou annan lafwa, konman ki sa i afekte nou relasyon avek Bondye?
21 Lafwa dan sa bon nouvel e dan Parol Bondye an zeneral, i ed nou apros ankor pli pre avek Zeova. (Zak 4:8) I vre ki i nou Souvren Senyer, me i osi nou Kreater e nou Papa. (Izai 64:8; Matye 6:9; Akt 4:24) En psalmis ti sante: “Ou mon Papa, mon Bondye e mon sover.” (Psonm 89:26) Si nou demontre lafwa dan Zeova e dan son Parol enspire, nou osi nou kapab konsider li konman ‘nou sover.’ Pa sa i en privilez ki rekonfort nou!
22 Zeova i Papa bann Kretyen ki’n ganny swazir par Son lespri ek zot bann konpanyon ki pou viv lo later. (Romen 8:15) Nou pa pou zanmen dezapwente akoz nou’n annan lafwa dan nou Papa seles. David ti dir: “Si mon manman ek mon papa i kit mwan, Zeova li menm pou resevwar mwan.” (Psonm 27:10) Deplis, nou annan sa lasirans: “Zeova pa pou abandonn son pep akoz son gran non.”—1 Samyel 12:22.
23. Ki nou bezwen pour nou annan en relasyon dirab avek Zeova?
23 Pour annan en relasyon dirab avek Zeova nou bezwen byensir annan lafwa dan sa bon nouvel e aksepte Labib konman parol Bondye parey i vreman ete. (1 Tesalonisyen 2:13) Nou bezwen annan lafwa total dan Zeova e les son Parol kler nou semen. (Psonm 119:105; Proverb 3:5, 6) Nou lafwa pou grandi ofiramezir ki nou priy li, e annan konfyans dan son konpasyon, mizerikord, ek sipor.
24. Ki panse rekonfortan Romen 14:8 i ofer?
24 Lafwa i pous nou pour dedye nou lavi avek Bondye pour touzour. Letan nou annan en lafwa for, menm si nou mor, nou reste son serviter avek lespwar pour ganny resisite. Wi, “swa ki nou viv swa ki nou mor, nou apartenir a Senyer.” (Romen 14:8) Annou gard sa panse rekonfortan dan nou leker anmenmtan ki nou gard konfyans dan Parol Bondye e kontinyen annan lafwa dan sa bon nouvel.
Ki ou pou reponn?
• Kisisa lafwa, e akoz nou bezwen sa kalite?
• Akoz i neseser pour nou annan lafwa dan sa bon nouvel e dan Labib an zeneral?
• Konman lafwa i ed nou fer fas avek diferan leprev?
• Kwa ki pou ed nou gard nou lafwa?
[Kestyon]
[Portre lo paz 8]
Zeova ti soutenir Zeremi ek Eliya akoz zot ti annan lafwa
[Portre lo paz 9]
Zob, Pyer, ek Neemya ti annan lafwa for
[Portre lo paz 11]
Pour annan en relasyon dirab avek Zeova, nou bezwen annan lafwa dan sa bon nouvel