Ki Kantite For Ou Lafwa I For?
Ki Kantite For Ou Lafwa I For?
“Zot deza ferm dan zot lafwa.”—2 KORENTYEN 1:24.
1, 2. Akoz nou bezwen annan lafwa e konman nou lafwa i kapab vin pli for?
BANN serviter Zeova i konnen ki zot bezwen annan lafwa. Anfet, “san lafwa personn pa kapab fer plezir Bondye.” (Ebre 11:6) Alors, nou priye pour ganny lespri sen ek lafwa, ki form parti son fri atiran. (Lik 11:13; Galat 5:22, 23) Imit lafwa nou bann konpanyon Kretyen i kapab osi ranforsi nou prop lafwa.—2 Timote 1:5; Ebre 13:7.
2 Nou lafwa pou vin pli for si nou persiste dan sa semen ki Parol Bondye in trase pour tou Kretyen. Lir Labib sak zour e etidye li avek led bann piblikasyon fourni par ‘lesklav fidel’ i kapab afermi nou lafwa. (Lik 12:42-44; Zozye 1:7, 8) Nou ganny ankouraze par lafwa nou bann frer ek ser letan nou regilyerman asiste bann renyon ek lasanble Kretyen. (Romen 1:11, 12; Ebre 10:24, 25) Anplis ki sa, nou lafwa i vin pli for letan nou koz avek lezot dan predikasyon.—Psonm 145:10-13; Romen 10:11-15.
3. Ki led nou gannyen avek bann ansyen an rapor avek nou lafwa?
3 Avek lanmour, bann ansyen i ede pour batir nou lafwa par ofer bann konsey ek lankourazman ki baze lo Labib. Zot annan en leta lespri parey pour zapot Pol, ki ti dir bann Korentyen: “Zot deza ferm dan zot lafwa, me nou pe kontribye dan zot lazwa.” (2 Korentyen 1:23, 24) En lot tradiksyon i lir koumsa: “Nou pe travay avek zot pour fer zot kontan, akoz zot lafwa i for.” (Contemporary English Version) Bann dimoun drwat i viv par zot lafwa. Byensir, napa personn ki kapab demontre lafwa dan nou plas oubyen fer nou reste fidel. Dan sa laspe, “sakenn i devre anmenn son prop fardo.”—Galat 3:11; 6:5.
4. Konman bann resi lo bann serviter fidel Bondye i ede fortifye nou prop lafwa?
4 Dan Labib nou kapab trouv plizyer resi lo bann ki ti annan lafwa. Petet nou ase familye avek bann keksoz remarkab ki zot ti fer. Me ki nou pou dir lo zot lafwa ki zot ti demontre sak zour, petet pour bokou lannen? Aprezan nou pou vwar konman zot ti demontre sa kalite dan bann sirkonstans parey pour nou. Sa i kapab ede ranforsi nou prop lafwa.
Lafwa i donn nou Kouraz
5. Ki laprev i annan dan Labib ki lafwa i donn nou kouraz pour anons parol Bondye?
5 Lafwa i donn nou kouraz pour anons sa bon nouvel. Avek kouraz, Enok ti anons zizman Bondye. I ti dir: “La Senyer pe vini avek plizyer dizenn milye lanz sen, pour ziz tou dimoun, e pour kondann tou peser, pour zot move laksyon ki zot in fer dan zot revolt kont Bondye, e pour tou zot parol lensilt ki zot in dir kont li.” (Zid 14, 15) San dout, bann lennmi Enok ki pa ti servi Bondye ti anvi touy li letan zot ti tann sa parol. Toudmenm, avek lafwa i ti koz avek lardyes, e Bondye ti ‘anlev li’ par termin son lavi san ki i bezwen pas dan douler lanmor. (Zenez 5:24; Ebre 11:5) Nou nou pa eksperyans sa bann mirak. Me Zeova i reponn nou lapriyer afen ki nou kapab anons son parol avek lafwa ek kouraz.—Akt 4:24-31.
6. Ki mannyer lafwa ek kouraz ki Bondye ti donn Noe ti ed li?
6 Par lafwa, Noe ti “konstri en lars pour sov son fanmir.” (Ebre 11:7; Zenez 6:13-22) Noe ti osi “en predikater lazistis.” Avek kouraz, i ti averti bann dimoun dan son letan konsernan sa Deliz ki ti pe vini. (2 Pyer 2:5) Zot ti’n bezwen monk li akoz sa mesaz, zis parey serten i monk nou letan nou montre zot laprev dan Labib ki sa sistenm i pros pour ganny detrir. (2 Pyer 3:3-12) Toudmenm, parey Enok ek Noe nou kapab delivre sa mesaz gras a nou lafwa ek kouraz ki Bondye i donn nou.
Lafwa i fer nou pasyante
7. Ki mannyer Abraam ek lezot ti demontre lafwa ek pasyans?
7 Nou bezwen annan lafwa ek pasyans, sirtou akoz nou pe esper lafen sa sistenm mesan. Abraam ki ti annan lakrent pour Bondye i enn parmi bann “ki par lafwa ek pasyans i erit bann promes Bondye.” (Ebre 6:11, 12) Par lafwa i ti kit lavil Our, avek tou son bann fasilite, e i ti vin en etranze dan en pei enkoni ki Bondye ti’n promet li. Izaak ek Zakob osi ti pou erit sa menm promes. Me “zot tou, zot in mor dan lafwa, san ki zot i’n resevwar sa bann keksoz ki zot in ganny promet.” Par lafwa zot ‘ti aspir pour ganny en landrwa pli meyer, setadir, enn ki pour lesyel.’ Alors, Bondye ti’n “prepar en lavil pour zot.” (Ebre 11:8-16) Wi, Abraam, Izaak, ek Zakob, ansanm avek zot madanm ki ti annan lakrent pour Bondye, ti esper Rwayonm Bondye avek pasyans. Se anba sa Rwayonm ki zot pou ganny resisite pour viv lo later.
8. Abraam, Izaak, ek Zakob ti demontre pasyans ek lafwa malgre kwa?
8 Abraam, Izaak, ek Zakob pa ti perdi lafwa. Zot pa ti pran kontrol lo Later Promiz, e zot pa ti vwar tou bann nasyon ganny beni atraver desandans Abraam. (Zenez 15:5-7; 22:15-18) Sa ‘lavil ki Bondye ti’n prepare’ ti pou vin en realite plizyer santenn lannen apre. Kantmenm sa, sa bann zonm ti kontinyen demontre lafwa ek pasyans toudilon zot lavi. Sirman nou devret fer parey, la ki sa Rwayonm Mesyanik i en realite dan lesyel.—Psonm 42:5, 11; 43:5.
Lafwa i fer nou annan bann pli bon Lobzektif
9. Konman lafwa i enfliyans nou bann lobzektif ?
9 Bann patrias fidel pa ti zanmen swiv sa kalite lavi degradan ki bann Kananeen ti annan. Sa se akoz zot ti annan bann pli bon lobzektif. Pareyman, lafwa i fer nou annan bann lobzektif spirityel ki ed nou pour pa ganny absorbe dan sa lemonn kontrole par Satan Dyab.—1 Zan 2:15-17; 5:19.
10. Ki mannyer nou konnen ki Zozef ti pourswiv en pli bon lobzektif olye ganny rekonnet dan sa lemonn?
10 Gras a gidans Bondye, Zozef garson Zakob ti servi konman administrater manze an Lezip. Me i pa ti son lobzektif pour vin en gran dimoun dan sa lemonn. Avek lafwa dan lakonplisman promes Zeova, Zozef aze 110 an ti dir son bann frer: “Mon pe mor, me Bondye pou sirman tourn son latansyon ver zot. I pou tir zot dan sa pei e anmenn zot dan sa pei ki i ti promet Abraam, Izaak, ek Zakob.” Zozef ti demann zot pour anter li dan sa pei ki zot ti’n ganny promet. Kan i ti mor, zot ti anbonm li e met li dan en serkey an Lezip. Me kan bann Izraelit ti ganny delivre an Lezip, profet Moiz ti fer anmenn lezo Zozef pour anter li dan Later Promiz. (Zenez 50:22-26; Egzod 13:19) Lafwa parey sa ki Zozef ti demontre, i devret motiv nou pour pourswiv bann pli bon lobzektif olye ganny rekonnet dan sa lemonn.—1 Korentyen 7:29-31.
11. Konman Moiz ti demontre ki i annan bann lobzektif spirityel?
11 Konman en manm lafanmiy rwayal Lezip ki ti’n ganny byen edike, Moiz “ti swazir ganny maltrete ansanm avek pep Bondye, plito ki zouir pese pandan en pti pe letan.” (Ebre 11:23-26; Akt 7:20-22) Sa ti kout li en pozisyon dan sa lemonn e petet en gran lanterman dan en serkey byen dekore dan enn bann landrwa renonmen an Lezip. Me sa ti napa okenn valer konpare avek sa privilez ki i ti gannyen pour vin en adorater sa vre Bondye, sa enn atraver ki Lalwa ti ganny donnen, profet Zeova, e en ekriven Labib. (Ezra 3:2) Eski ou pe rod promosyon dan sa lemonn oubyen eski ou lafwa in fer ou pourswiv bann pli bon lobzektif spirityel?
Lafwa i fer nou annan en Lavi satisfezan
12. Ki lefe lafwa ti fer dan lavi Raab?
12 Lafwa pa zis fer nou annan bann pli bon lobzektif me i osi fer nou annan en lavi satisfezan. Raab ki ti sorti Zeriko ti’n bezwen santi son lavi konman en prostitye napa sans. Toudmenm, tou ti sanze letan i ti demontre lafwa! I ti “ganny rann zis devan Bondye par son bann laksyon [lafwa] ler i ti resevwar bann mesaze [Izraelit] ki i ti ede e fer zot pas par en lot semen” pour evit zot bann lennmi Kananeen. (Zak 2:24-26) Letan i ti realize ki Zeova i sa vre Bondye, Raab ti osi demontre lafwa ler i ti aret son lavi prostitye. (Zozye 2:9-11; Ebre 11:30, 31) I ti marye avek en serviter Zeova, pa avek en Kananeen ki pa ti krwar dan Zeova. (Deterononm 7:3, 4; 1 Korentyen 7:39) Raab ti ganny sa gran privilez pour vin en zanset Mesi. (1 Kronik 2:3-15; Rit 4:20-22; Matye 1:5, 6) Parey lezot ki’n kit zot lavi imoral, Raab pou ganny ankor en lot rekonpans. Sa se rezireksyon dan paradi lo later.
13. Ki pese David ti fer, me ki latitid i ti demontre?
13 Apre ki i ti’n aret son move lavi, i paret ki Raab ti kontinyen viv en bon lavi. De lot kote, serten ki’n dedye zot lavi avek Bondye in fer bann pese grav. Lerwa David ti fer adilter avek Batseba. Apre i ti fer mari Batseba ganny touye dan en lager e pran Batseba konman son madanm. (2 Samyel 11:1-27) David ti regret en kantite pour sa ki i ti’n fer. I ti demann Zeova: “Pa pran ou lespri sen avek mwan.” David pa ti perdi lespri sen Bondye. I ti annan lafwa ki Zeova i annan pitye e i pa pou mepriz “en leker brize e kraze” akoz pese. (Psonm 51:11, 17; 103:10-14) Akoz zot lafwa, David ek Batseba ti ganny rekonpanse avek privilez pour vin enn bann zanset Mesi.—1 Kronik 3:5; Matye 1:6, 16; Lik 3:23, 31.
Lasirans i ranforsi nou Lafwa
14. Ki lasirans Gideonn ti gannyen, e ki lefe sa resi i kapab fer lo nou lafwa?
14 Kantmenm nou annan lafwa, i kapab arive ki parfwa nou bezwen lasirans ki Bondye pou ed nou. Sa ti leka avek Ziz Gideonn, ki ti enn parmi sa bann ki “par lafwa, zot ti ganny laviktwar lo bann rwayonm.” (Ebre 11:32, 33) Kan bann Madyanit ek zot bann zanmi ti anvair Izrael, lespri Bondye ti anvlop Gideonn. I ti anvi ganny lasirans ki Zeova i avek li. Alor i ti sizere pour fer de tes avek en fourir lalenn ki i ti les ater pandan lannwit. Dan premye tes, laroze ti formen zis lo sa fourir tandis ki later ti reste sek. Dan dezyenm tes, sitiasyon ti sanze e vin tou lekontrer. Sa lasirans ti fortifye Gideonn ki ti’n montre li pridan e avek lafwa i ti ganny laviktwar lo bann lennmi Izrael. (Ziz 6:33-40; 7:19-25) Si nou rod lasirans letan nou annan en desizyon pour fer, sa pa vedir ki nou mank lafwa. An realite, nou pe demontre lafwa letan nou konsilte Labib ek bann piblikasyon Kretyen, e letan nou priy pour gidans lespri sen pour fer en desizyon.—Romen 8:26, 27.
15. Konman letan nou reflesir lo lafwa Barak, sa i kapab vin konman en led pour nou?
15 Lafwa Ziz Barak ti ganny fortifye par lankourazman ki ti donn li lasirans. Profet Debora ti ankouraz li pour pran linisyativ pour liber bann Izraelit ki ti pe ganny trete dan en fason kriyel par Lerwa Kananeen Yabin. Avek lafwa ek lasirans ki i pou ganny sipor Bondye, Barak ti diriz son 10,000 zonm ki pa ti byen ekipe dan batay. I ti ganny laviktwar lo lafors larme Yabin komande par Sisera, ki ti bokou pli siperyer. Debora ek Barak ti selebre sa laviktwar avek en sanson sansasyonnel. (Ziz 4:1–5:31) Debora ti ankouraz Barak pour azir konman lider Izrael, apwente par Bondye. Barak ti enn bann serviter Zeova ki par lafwa “ti bat bann larme etranze.” (Ebre 11:34) Bondye ti beni Barak pour azir avek lafwa. Letan nou reflesir lo sa, i kapab osi pous nou pour pran aksyon si nou ti en pe ezite pour pran en responsabilite difisil dan servis Zeova.
Lafwa i promot Lape
16. Ki bon legzanp Abraam in montre an sa ki konsern fer lape avek Lot?
16 Zis parey lafwa i ed nou pour akonpli bann latas difisil dan servis Bondye, i osi promot lape ek trankilite. Kan zot ti bezwen separe akoz diskisyon ant zot bann gardyen troupo, Abraam ki ti pli aze ti les son neve Lot swazir pli bon landrwa. (Zenez 13:7-12) Abraam ti’n bezwen priye avek lafwa pour Bondye ed li rezourd sa problenm. Olye met son prop lentere avan, i ti rezourd keksoz dan lape. Si nou ganny en diskisyon avek nou frer oubyen ser Kretyen, annou priye avek lafwa e “fer lape.” Gard antet legzanp Abraam ki ti montre konsiderasyon avek lanmour anver Lot.—1 Pyer 3:10-12.
17. Akoz nou kapab dir ki sa dezakor ki ti arive ant Pol, Barnabas, ek Mark ti ganny rezourd dan lape?
17 Annou vwar konman aplik bann prensip Labib avek lafwa i kapab ed nou promot lape. Kan Pol ti pe al lo son dezyenm vwayaz misyonner, Barnabas ti dakor pour zot revizit bann kongregasyon an Sip ek Lazi Miner. Me Barnabas ti anvi anmenn son kouzen Mark avek zot. Pol pa ti dakor avek sa akoz Mark ti’n abandonn zot an Panfili. “Zot ti ganny en largiman byen serye” e sa ti fer zot separe. Barnabas ti anmenn Mark avek li an Sip, tandis ki Pol li i ti swazir Silas konman son konpanyon. Zot ti “travers Siri ek Silisi e fortifye bann legliz dan lafwa.” (Akt 15:36-41) Avek letan, sa dezakor ti ganny rezourd akoz Mark ti ansanm avek Pol an Ronm. Deplis Pol ti koz an byen lo Mark. (Kolosyen 4:10; Filemon 23, 24) Kan Pol ti’n ganny anprizonnen an Ronm dan lannen 65 N.L., i ti dir Timote: “Anmenn Mark avek ou, i itil pour mwan dan servis Bondye.” (2 Timote 4:11) Aparaman, Pol ti priy avek lafwa konsernan son relasyon avek Barnabas ek Mark. Sa ti anmenn sa trankilite ki relye avek “lape Bondye.”—Filipyen 4:6, 7.
18. Dan ka Evodi ek Sentis ki zot ti’n kapab fer pour rezourd zot problenm?
18 Vi ki nou enparfe, alors nou tou “nou komet lerer dan plizyer mannyer.” (Zak 3:2) Ti annan problenm ant de ser Kretyen e Pol ti ekrir sa konsernan zot: “Mon demann Evodi, mon demann Sentis, pour viv an-akor dan Senyer. . . . Ed sa bann madanm ki’n konbat akote mwan pour fer konn levanzil.” (Filipyen 4:1-3) I tre probab ki sa de ser Kretyen ti rezourd zot problenm dan lape par aplik bann konsey parey sa enn dan Matye 5:23, 24. Aplik bann prensip Labib avek lafwa i kapab ed en kantite pour promot lape ozordi.
Lafwa i ed nou andire
19. Ki sitiasyon difisil ki pa ti zanmen detrir lafwa Izaak ek Rebeka?
19 Avek lafwa nou kapab osi andir bann difikilte. Petet nou dezapwente akoz en manm nou fanmiy ki’n batize in dezobei Bondye par marye avek en dimoun ki pa Temwen. (1 Korentyen 7:39) Izaak ek Rebeka ti soufer akoz zot garson Ezai ti’n marye avek bann fanm payen. Degre son bann madanm Itit ti “en sours lanmertim” pour zot, Rebeka ti dir: “Mon’n ay mon lavi akoz sa bann fiy Et. Si zanmen Zakob i pran en madanm parmi bann fiy Et parey sa bann parmi bann fiy sa pei, akfer mon pou viv?” (Zenez 26:34, 35; 27:46) Pourtan, sa sitiasyon difisil pa ti zanmen detri lafwa Izaak ek Rebeka. Fotespere ki nou gard nou lafwa for menm si nou rankontre bann sitiasyon ki difisil pour fer fas avek.
20. Ki legzanp lafwa Rit ek Naomi ti demontre?
20 Naomi ti en vev aze e i ti en Zideen. I ti konnen ki serten madanm an Zida ti kapab donn nesans bann garson ki ti pou vin zanset Mesi. Dan son ka, son bann garson ti’n mor san ki zot annan zanfan e li i ti’n fini depas laz pour annan zanfan. Alors, ti napa gran posibilite pour son fanmiy vin enn bann zanset Mesi. Toudmenm, son belfiy Rit ti marye avek Boaz ki ti en pe alaz e zot ti ganny en garson ki ti vin en zanset Zezi! (Zenez 49:10, 33; Rit 1:3-5; 4:13-22; Matye 1:1, 5) Lafwa Naomi ek Rit ti fer zot andir bann difikilte e anmenn lazwa pour zot. Nou osi nou pou eksperyans bokou lazwa si nou kontinyen annan lafwa malgre bann difikilte.
21. Ki byenfe lafwa i anmennen pour nou, e ki nou devret determinen pour fer?
21 Menm si nou pa konnen ki demen pou anmennen pour nou personnelman, par lafwa nou kapab sirmont nenport difikilte. Lafwa i fer nou kouraze e pasyante. I fer nou annan bann pli bon lobzektif ek en lavi satisfezan. Lafwa i annan en lefe pozitif lo nou relasyon avek lezot e i fer nou kapab andir bann difikilte. Alor, annou vin enn sa “bann ki annan lafwa e ganny sove.” (Ebre 10:39) Avek lafors ki Zeova i donn nou, annou kontinyen demontre lafwa for pour son laglwar.
Ki ou pou reponn?
• Ki laprev dan Labib ki montre nou ki lafwa i fer nou kouraze?
• Akoz nou kapab dir ki lafwa i fer nou annan en lavi satisfezan?
• Ki mannyer lafwa i promot lape?
• Ki laprev i annan pour montre ki lafwa i fer nou kapab andir bann difikilte?
[Kestyon]
[Portre lo paz 12]
Lafwa ti fer Noe ek Enok annan kouraz pour anons mesaz Zeova
[Portre lo paz 13]
Lafwa parey pour Moiz i motiv nou pour pourswiv lobzektif spirityel
[Portre lo paz 14]
Lafwa Barak, Debora, ek Gideonn ti ganny fortifye ler zot ti ganny lasirans ki Bondye pou ed zot