Konman pour ganny en Pwennvi Balanse Lo Travay

OZORDI, avek en marse mondyal vreman sere, konpetisyon entans, ek prodiksyon an gran kantite, bokou dimoun pa tro anvi al travay sak zour. Pourtan, nou devret kontan nou travay. Akoz? Parski nou’n ganny kree dan resanblans Bondye—e li Bondye i pran plezir dan son travay. Par egzanp, apre ki i ti pe get son travay ki i ti’n fer alafen sa sis “zour” oubyen letan kreasyon, Zenez 1:31 i dir ki “Bondye ti vwar tou keksoz ki i ti’n fer e, regarde! i ti tre bon.”

Lanmour ki Zeova i annan pour travay i san dout enn bann rezon akoz i ganny apele “Bondye ere.” (1 Timote 1:11, NW ) Alor, pa i fer sans ki pli nou imit li, pli nou pou zwaye? Konsernan sa, Salomon ki ti lerwa dan ansyen Izrael, e osi en konstrikter ek organizater remarkab, ti ekrir: “Tou zonm i devret manze, bwar e apresye dibyen pour tou son travay dir. Sa i don Bondye.”—Eklezyast 3:13.

Ozordi, dan sa lanvironnman travay ki pe sanz rapidman, i difisil pour en dimoun devlop en pwennvi balanse e apropriye anver son travay. Me Zeova i beni sa bann ki pran an konsiderasyon son bann bon gidans. (Psonm 119:99, 100) Zot vin bann travayer ki zot anplwayer i apresye e annan konfyans ladan. Alor i annan mwens posibilite ki zot perdi zot plas travay. Zot osi aprann pour pa zis get zot lavi ek travay dapre en pwennvi pirman imen me pour get li dapre en pwennvi spirityel. Sa i permet zot pour fer bann bon desizyon dan lavi. En pwennvi spirityel pou osi permet zot realize ki pour zot santi zot an sekirite e annan lazwa, i pa depan zis lo zot travay oubyen lo lekonomi ki souvan pa tro tro stab. (Matye 6:31-33; 1 Korentyen 2:14, 15) I ed zot devlop en latitid anver travay ki vreman balanse.

Devlop en Labitid ki Bondye i kontan anver Travay

Serten dimoun zot zis travay, zot met zot travay avan tou lezot keksoz. Lezot i zis espere kan 4 er pou sonnen pour zot kapab kit travay e al kot zot. Ki pwennvi balanse nou devret annan? Labib i reponn: “Vomye repoz en pe ki travay tro bokou e tay deryer divan.” (Eklezyast 4:6) An realite, travay tro dir oubyen tro bokou letan, i pa bon e i anmenn problenm olye fer dibyen. I initil, i konmsi ou pe “tay deryer divan.” Akoz sa i leka? Parski i kapab afekte bann keksoz ki vreman kapab donn nou plis lazwa: nou relasyon fanmiy ek zanmi, nou spirityalite, nou lasante, e menm lakantite letan ki nou viv. (1 Timote 6:9, 10) Pwennvi balanse se ki nou pa sarze avek tro bokou travay ki anmenn lannwi ek latristes. Me ki nou kontant nou avek mwens keksoz materyel ansanm avek en serten kantite lape.

Sa pa vedir ki Labib pe ankouraz pares. (Proverb 20:4) Pares i fer en dimoun perdi respe pour son lekor e respe ki lezot i kapab annan pour li. Sa ki pli pir se ki i gat nou relasyon avek Bondye. Labib i fransman dir ki sa dimoun ki refize travay pa merit manz lo kouraz lezot. (2 Tesalonisyen 3:10) Plito, i devret sanz son mantalite e travay dir, koumsa i ava kapab pran swen avek son lekor ek lezot ki depan lo li. Par travay dir, i menm kapab ed bann ki vreman dan bezwen, en keksoz ki Parol Bondye i ankouraze.—Proverb 21:25, 26; Efezyen 4:28.

 Fer Zanfan kontan Travay depi Lanfans

Bann bon labitid travay pa vin par azar; i en keksoz ki en dimoun i bezwen aprann byen boner dan son lavi. Pour sa rezon, Labib i konsey bann paran: “Edik en garson [oubyen fiy] dapre semen ki i devret marse, menm kan i pou’n vye i pa pou kit sa semen.” (Proverb 22:6) Apard ki demontre en bon legzanp konman bann bon travayer, bann paran ki servi byen zot lespri i konmans form zot zanfan par donn zot bann pti louvraz kot lakour ki apropriye pour zot laz. Menm si petet zanfan pa kontan fer serten pti louvraz, zot pou vwar zot ganny apresye konman en manm fanmiy—sirtou ler manman ek papa i felisit zot pour fer en bon travay. Malerezman, serten paran i fer preski tou keksoz pour zot zanfan, petet dapre zot sa i en fason pour montre ki zot en bon paran. Sa bann paran i devret reflesir lo Proverb 29:21, ki dir: “Si enn i gat son serviter [oubyen zanfan] depi son zenes, apre dan son lavi plitar i pou vin engra.”

Bann paran responsab i osi pran en gran lentere dan ledikasyon zot zanfan, ankouraz zot pour aprann e travay dir ler zot ankor lekol. Sa i kapab benefisye zot plitar ler zot antre dan lemonn travay.

Byen swazir ou Travay

Menm si Labib pa dir nou ki kalite travay pour rode, i donn nou bann bon konsey afen ki nou progre spirityel, servis pour Bondye, ek lezot responsabilite enportan pa ganny met an danze. Par egzanp, zapot Pol ti ekrir: “Letan i kourt, fodre ki aprezan bann . . . ki pe profite dan lemonn, fer konmsi zot pa ganny okenn profi, parski lemonn konman i ete, pa pou dir lontan.” (1 Korentyen 7:29-31) Napa nanryen ki permanan oubyen totalman stab dan sa lemonn konmela. Pour depans tou nou letan ek lenerzi avek sa lemonn, i konmsi nou pe envesti tou nou larzan dan en lakaz ki’n ganny konstri dan en landrwa ki abitye annan linondasyon. Pa i bet fer sa!

En lot tradiksyon Labib i tradwir sa lekspresyon “fer konmsi zot pa ganny okenn profi” konman “pa totalman preokipe avek” sa lemonn. Bann dimoun ki byen servi zot lespri pa zanmen inyor sa fe ki letan “i kourt.” Si en dimoun i “totalman preokipe” avek sa lemonn, sa pou sirman anmenn li dezapwentman ek regre.—1 Zan 2:15-17.

‘Bondye pa pou abandonn ou!’

Zeova i konn nou bann bezwen pli byen ki nou. I osi konnen ki lepok nou’n arive dan lakonplisman son plan. Alor, i rapel nou: ‘Pa les lanmour pour larzan domin nou lavi, me kontant nou avek sa ki nou annan, parski Bondye ti dir: “Mon pa pou zanmen negliz ou, mon pa pou zanmen abandonn ou.” ’ (Ebre 13:5) Wi, sa parol i vreman rekonfortan! Par imit lentere ki Bondye i annan pour son pep, Zezi ti dedye en gran porsyon son Sermon lo montanny pour ansenny son bann disip sa bon pwennvi konsernan travay ek keksoz materyel.—Matye 6:19-33.

Temwen Zeova i fer zefor pour pran oserye sa bann lansennyman. Par egzanp, ler en anplwayer ti envit en Temwen ki en elektrisyen pour travay apre ler, sa travayer ti refize. Akoz? Parski i pa ti anvi son travay enterfer avek letan  ki i ti dedye pour son fanmiy ek bann keksoz spirityel. Vi ki i ti en bon travayer e i ti diny konfyans, son anplwayer ti respekte son desizyon. Byensir, pa toultan ki keksoz i fini koumsa, e petet serten i bezwen rod en lot travay pour kapab gard en lavi balanse. Toudmenm, bann ki met tou zot konfyans dan Zeova i souvan dekouver ki zot bon kondwit ek zot bon pwennvi lo fason travay i fer zot ganny faver zot anplwayer.—Proverb 3:5, 6.

Letan tou Travay pou satisfezan

Dan sa sistenm enparfe, lanplwa ek posibilite pour trouv travay pou toultan en keksoz ki pa garanti e annan problenm. An realite, keksoz i kapab vin pli pir anmezir ki sa lemonn i vin pli enstab e lekonomi i monte desann oubyen menm kapab tonm net. Me sa sitiasyon pa pou reste koumsa. Byento, pou napa personn ki pou napa travay. Deplis, tou travay pou vreman enteresan e satisfezan. Ki mannyer sa pou posib? Kwa ki pou anmenn en tel sanzman?

Atraver son profet Izai, Zeova i endike kan sa pou arive. Zeova i dir: “Parski la mon pe kree nouvo lesyel ek en nouvo later. Bann keksoz ansyen pa pou ganny rapel, zot pa pou ni vin dan leker.” (Izai 65:17) I pe koz konsernan son nouvo gouvernman, anba ki en sosyete imen diferan e totalman nouvo pou vin en realite.—Danyel 2:44.

Konsernan lafason ki dimoun pou viv e travay sa letan, sa profesi i kontinyen: “Wi, zot pou konstri lakaz e zot pou reste ladan; wi, zot pou plant pye rezen e zot pou manz son fri. Zot pa pou konstri pour en lot reste, e zot pa pou plante pour en lot manze. Osi lontan ki en pye dibwa i viv, mon pep pou viv; e sa bann ki mon’n swazir pou profit plennman travay zot lanmen. Zot pa pou rente pour nanryen, e zot pa pou ganny zanfan pour donn problenm; akoz zot sa desandans ki Zeova in beni.”—Izai 65:21-23.

Wi sa nouvo lemonn ki Bondye in plàn pour fer, pou fer en gran diferans! Pa ou ti a kontan viv dan en lemonn koumsa, kot ou “pa pou rente pour nanryen” me ou pou apresye bokou “fri” ou travay? Me remarke lekel ki pou rezwir sa bann benediksyon: se bann “ki Zeova in beni.” Ou kapab vin enn sa bann ‘ki Zeova i beni’ par aprann konsernan Zeova e fer sa ki i ekspekte ou fer. Zezi ti dir: “Ou’n donn li pouvwar lo tou dimoun pour donn lavi eternel tou bann ki ou’n donn li. Savedir ki zot konn ou konman sel vre Bondye, ek Zezi-Kri ki ou’n anvoye.” (Zan 17:2, 3) Bann Temwen Zeova pou kontan ed ou ganny sa konnesans ki donn lavi par fer en letid lo Parol Bondye, Labib.

[Bwat lo paz 6]

“TOULTAN AN DEMANN”

Labib i dir: “Dan tou sa ki zot fer, fer li avek tou zot leker, konmsi zot pe travay pour Senyer Zezi-Kri non pa pour en zonm.” (Kolosyen 3:23) En dimoun ki son latitid travay i ganny gouvernen par sa bon prensip pou vin en travayer ki lezot pou definitivman rode. Pour sa rezon, J. Luna dan son liv How to Be Invisible, i konsey bann anplwayer ki pe rod travayer pour rod bann manm aktif dan serten group relizye. Me i azoute: “An realite, laplipar-di-tan nou deside anploy bann Temwen [Zeova].” Enn parmi bann rezon ki i donnen se ki zot annan en repitasyon konman bann dimoun onnet, e sa i fer zot “toultan an demann” dan plizyer kalite travay.

[Portre lo paz 5]

Balans travay avek bann aktivite spirityel e rekreasyonnel i anmenn satisfaksyon