“Reste Atase Avek Mon Parol”

“Si zot reste atase avek mon parol, zot vreman mon bann disip.”—ZAN 8:31, NW.

1. (a) Kan Zezi ti retourn dan lesyel, ki i ti kit deryer lo later? (b) Ki bann kestyon ki nou pou egzaminen?

KAN Zezi Kri, Fondater larelizyon Kretyen, ti retourn dan lesyel, i pa ti kit deryer okenn liv ki i ti’n ekrir, ni moniman ki i ti’n konstri, ni larises ki i ti’n anmase. Me i ti kit deryer bann disip e bann kondisyon spesifik pour en dimoun kapab vin en disip. Anfet, dan Levanzil Zan, nou trouve ki Zezi ti mansyonn trwa kondisyon enportan ki en dimoun i bezwen ranpli pour kapab vin son disip. Lekel sa bann kondisyon? Ki nou kapab fer pour ranpli sa bann kondisyon? Konman nou kapab fer sir ki nou personnelman kalifye konman en disip Kris ozordi? *

2. Ki sa kondisyon enportan pour kapab vin en disip, parey i’n ganny rikorde dan Levanzil Zan?

² Apepre sis mwan avan son lanmor, Zezi ti mont Zerizalenm e pres avek lafoul ki ti’n rasanble laba pour selebre Lafet bann Payot ki ti dir pour en semenn. An rezilta sa, kan lafet ti’n ariv preski lanmwatye “ti annan bokou ki ti krwar li.” Zezi ti kontinyen prese, ki fer ki dernyen zour lafet, ankor enn fwa ‘bokou ti krwar dan li.’ (Zan 7:10, 14, 31, 37; 8:30) Apre sa, Zezi ti diriz son latansyon anver bann nouvo krwayan. I ti sit en kondisyon enportan pour vin disip, parey zapot Zan in rikorde: “Si zot reste atase avek mon parol, zot vreman mon bann disip.”—Zan 8:31, NW.

3. Ki kalite ki neseser pour dimoun ‘reste atase avek parol [Zezi]’?

³ Par sa parol, Zezi pa ti oule dir ki bann nouvo krwayan pa ti annan ase lafwa. Plito, i ti pe fer resorti ki zot ti annan sa loportinite devan zot pour vin son vre disip, si selman zot reste atase avek son parol, oubyen persevere. Zot ti’n aksepte son parol, me aprezan zot ti bezwen kontinyen reste atase avek sa parol. (Zan 4:34; Ebre 3:14) Anfet, Zezi ti vwar perseverans konman en kalite vreman enportan pour son bann disip. Menm dan son dernyen konversasyon avek son bann zapot, rikorde dan Levanzil Zan, de fwa Zezi ti sipliye: “Kontinyen swiv mwan.” (Zan 21:19, 22, NW ) Bokou premye Kretyen ti fer egzakteman sanmenm. (2 Zan 4) Kwa ki ti ed zot pour persevere?

4. Kwa ki ti fer bann premye Kretyen kapab persevere?

⁴ Zapot Zan, en disip fidel Kris pour apepre 70 an, ti fer resorti en fakter enportan. I ti felisit bann Kretyen fidel, an dizan: “Zot for. Parol Bondye i reste dan zot e zot in ganny laviktwar lo move.” Sa bann disip Kris ti persevere, oubyen reste atase avek parol Bondye, akoz parol Bondye ti reste dan zot. Zot ti annan en lapresyasyon senser pour parol Bondye. (1 Zan 2:14, 24) Pareyman ozordi, pour kapab “reste fidel ziska  lafen,” nou bezwen fer sir ki parol Bondye i reste dan nou. (Matye 24:13) Konman nou kapab fer sa? En parabol ki Zezi ti donnen i fourni larepons.

“Tann Parol Bondye”

5. (a) Ki sa bann diferan kalite later ki Zezi i mansyonnen dan enn son parabol? (b) Ki sa lagrenn ek sa later dan parabol Zezi i reprezante?

⁵ Zezi ti rakont parabol senmer lagrenn. Sa in ganny rikorde dan Levanzil Matye, Mark, ek Lik. (Matye 13:1-9, 18-23; Mark 4:1-9, 14-20; Lik 8:4-8, 11-15) Anmezir ki ou lir sa bann resi, ou pou remarke ki laspe enportan sa parabol i ki menm kalite lagrenn i tonm lo diferan later, e prodwir diferan rezilta. Premye later i dir, dezyenm pa ase profon, e trwazyenm in ganny anvai avek pikan. Katriyenm kalite later, pa parey sa trwa lezot. Sa enn i en “bon later.” Dapre leksplikasyon Zezi, sa lagrenn i mesaz Rwayonm ki trouve dan Parol Bondye, e sa later i reprezant bann dimoun avek diferan kondisyon leker. Sa bann dimoun ki ganny reprezante par sa diferan kalite later i annan serten keksoz an komen. Me sa bann ki ganny reprezante par sa bon later i annan en karakteristik ki fer zot diferan avek lezot.

6. (a) Konman ki sa katriyenm kalite later dan parabol Zezi i diferan avek sa trwa lezot, e ki sa i vedir? (b) Kwa ki esansyel pour persevere konman bann disip Kris?

⁶ Sa resi dan Lik 8:12-15 i montre ki dan tou le kat ka, bann dimoun i “tann laparol.” Pourtan, bann ki annan “en leker onnet e bon” i fer plis ki zis “tann laparol.” Zot “gard li . . . e avek perseverans zot prodwi bokou fri.” Sa bon later i mou e profon, alors i permet bann rasin pour desann byen dan fon. An rezilta, sa lagrenn i pouse e prodwir fri. (Lik 8:8) Pareyman, bann ki annan en bon leker i konpran, apresye, e konsantre dan parol Bondye. (Romen 10:10; 2 Timote 2:7) Parol Bondye i reste dan zot. An konsekans, avek perseverans zot prodwir fri. En lapresyasyon profon e senser pour Parol Bondye i alor esansyel pour nou kapab persevere konman bann disip Kris. (1 Timote 4:15) Parkont, konman nou kapab devlop en lapresyasyon senser pour Parol Bondye?

Kondisyon Leker ek Refleksyon profon

7. Avek ki en bon leker i souvan ganny asosye?

⁷ Remarke avek ki Labib i souvan asosye en leker onnet e bon. “Leker sa enn ki drwat i reflesir pour kapab reponn.” (Proverb 15:28) “Les bann parol ki sorti dan mon labous ek refleksyon ki sorti dan mon leker vin en keksoz agreab pour ou, O Zeova.” (Psonm 19:14) “Dan mon leker, mon pou reflesir lo bann bon keksoz.”—Psonm 49:3.

8. (a) Kan nou lir Labib, ki nou devret evite me ki nou devret fer? (b) Ki byenfe nou gannyen kan nou reflesir lo Parol Bondye ansanm avek lapriyer? (Enkli bwat “Byen etabli dan Laverite.”)

⁸ Parey bann ekriven Labib, nou osi nou bezwen reflesir lo Parol ek aksyon Bondye. Nou fer sa avek lapresyasyon e avek lapriyer. Kan nou lir Labib ek bann piblikasyon Kretyen, nou pa devret fer parey bann touris ki al dan bann zoli landrwa me ki pa vreman pran letan pour apresye peizaz akoz zot pe filmen tou keksoz. Okontrer, kan nou etidye Labib, nou devret pran letan pour arete e apresye sa  verse Labib konmsi nou pe apresye en peizaz. * Anmezir ki nou reflesir silansyezman lo sa ki nou lir, parol Bondye i enfliyans nou leker. I tous nou e moul nou fason panse. I osi motiv nou pour partaz nou panse entim avek Bondye dan lapriyer. An konsekans, nou latasman avek Zeova i ganny ranforsi, e nou lanmour pour li i pous nou pour kontinyen swiv Zezi, menm dan bann sirkonstans difisil. (Matye 10:22) I kler ki reflesir lo sa ki Bondye i dir, i esansyel si nou anvi reste fidel ziska lafen.—Lik 21:19.

9. Konman nou pou fer sir ki nou leker i kontinyen resevwar parol Bondye?

⁹ Parabol Zezi i osi montre ki i annan lobstak ki anpes sa lagrenn, setadir parol Bondye, pouse. Alors, pour reste bann disip fidel Zezi, nou devret (1) idantifye bann lobstak ki ganny reprezante par bann later ki pa bon ki ganny mansyonnen dan parabol Zezi e (2) pran bann pa pour koriz oubyen evit zot. Dan sa fason, nou pou fer sir ki nou leker i kontinyen resevwar sa lagrenn Rwayonm e kontinyen prodwir fri.

“Dan bor Semen”—Bann ki preokipe

10. Dekrir sa premye kalite later dan parabol Zezi, e eksplik son sinifikasyon.

¹⁰ Sa premye kalite later ki sa lagrenn i tonm lo la i “dan bor semen” kot “dimoun ti mars lo la.” (Lik 8:5) Later dan bor sa semen ki anmenn dan en plantasyon dible i dir akoz bokou dimoun i ale vini lo la. (Mark 2:23) Pareyman bann ki les bann aktivite dan lavi toulezour pran tro bokou zot letan ek  lenerzi i kapab vwar ki zot tro okipe pour devlop okenn lapresyasyon senser pour parol Bondye. Zot tann parol Bondye me zot pa reflesir lo la. Alor zot leker pa ganny pouse pour fer nanryen. Avan ki zot devlop en lanmour pour sa parol, “dyab i vin retir tou parol dan zot leker pour ki zot pa krwar e ganny sove.” (Lik 8:12) Eski sa i kapab ganny evite?

11. Konman nou kapab anpes nou kondisyon leker vin parey later dir?

¹¹ I annan bokou keksoz ki kapab ganny fer pour anpes nou leker vin parey sa later ki pa prodiktif dan bor semen. Later ki dimoun in mars en kantite lo la e ki dir, i kapab vin mou e prodiktif si i ganny laboure e si dimoun ek transpor i pas lo en lot semen. Pareyman, fer letan pour etidye e reflesir lo Parol Bondye i kapab fer leker en dimoun vin parey bon later ki prodiktif. Solisyon se ki nou pa tro preokip nou avek bann keksoz dan lavi toulezour. (Lik 12:13-15) Okontrer, fer sir ki ou annan ase letan pour reflesir lo “bann keksoz pli enportan” dan lavi.—Filipyen 1:9-11, NW.

“Lo Ros”—Bann ki per

12. Pour ki rezon sa pti plant i fletri dan dezyenm kalite later dan parabol Zezi?

¹² Letan sa lagrenn i tonm lo sa dezyenm kalite later, i pa zis reste anler lo la, parey dan premye ka. I ganny rasin e pouse. Me apre kan soley i tape, sa pti plant i ganny brile par lasaler soley e fletri. Toudmenm, remark sa detay enportan. Vre rezon akoz sa pti plant i fletri se pa lasaler. Apre tou, sa plant ki pous dan bon later li osi i ganny ekspoze avek soley, me i pa fletri. Okontrer, i byen pouse. Kwa ki fer sa diferans? Zezi ti eksplike ki sa pti plant ti fletri “akoz later pa ti profon” e “akoz ti tro sek.” (Matye 13:5, 6; Lik 8:6) En “ros” zis par anba sa kous later anler, i anpes sa lagrenn byen anrasinen dan fon pour kapab ganny limidite ek stabilite. Sa pti plant i fletri akoz later pa ti ase profon.

13. Ki kalite dimoun ki parey later ki pa ase profon, e akoz zot reazir dan sa fason?

¹³ Sa bout dan sa parabol i refer avek bann endividi ki ‘resevwar sa parol avek lazwa’ e zot swiv Zezi avek devouman “pour en pti moman.” (Lik 8:13) Kan zot ganny ekspoze avek soley for ki vedir “troub ek persekisyon,” zot sitan per ki zot perdi zot lazwa ek lafors. Finalman zot aret swiv Kris. (Matye 13:21) Parkont, rezon prensipal akoz zot per, i pa lopozisyon. Apre tou, plizyer milyon disip Kris in andir diferan form leprev. Kantmenm sa, zot in reste fidel. (2 Korentyen 2:4; 7:5) Vre rezon akoz serten i per e tonbe dan laverite i akoz kondisyon zot leker ki parey ros i anpes zot reflesir oprofon lo bann keksoz pozitif e spirityel. An konsekans, sa lapresyasyon ki zot devlope pour Zeova ek son parol i pa ase profon e i tro feb pour kapab reziste lopozisyon. Konman en dimoun i kapab anpes sa arive?

14. Ki bann pa en dimoun i devret pran pour anpes son kondisyon leker vin parey later ki pa ase profon?

¹⁴ En dimoun i bezwen fer sir ki napa okenn lobstak ki parey ros ki pran plas dan son leker. Sa bann lobstak i kapab rankin anver en dimoun, bann lentere personnel ki pa evidan deswit, oubyen bann move santiman ki nou gard anndan. Si en tel baryer i deza egziste, pwisans ki parol Bondye i annan i kapab retir li. (Zeremi 23:29; Efezyen 4:22; Ebre 4:12) Par laswit, refleksyon avek lapriyer pou fer ‘laparol ki Bondye in plante’ pouse dan fon leker sa dimoun. (Zak 1:21) Sa pou donn li sa lafors pour fer fas avek dekourazman  ek sa kouraz pour reste fidel malgre bann leprev.

“Parmi Pye Pikan” —Bann ki annan en Leker divize

15. (a) Akoz sa trwazyenm kalite later mansyonnen par Zezi i sirtou merit nou latansyon? (b) Finalman, ki arive avek sa trwazyenm kalite later, e akoz?

¹⁵ Sa trwazyenm kalite later, sa enn avek pikan, i sirtou merit nou latansyon akoz dan serten fason i parey sa bon later. Parey sa bon later, sa enn avek pye pikan i les sa lagrenn pran rasin e pouse. Okonmansman, napa okenn diferans dan lafason ki sa nouvo plant pe pouse dan sa de diferan later. Parkont, avek letan en sitiasyon i devlope ki finalman touf sa plant. Kontrerman avek sa bon later, sa later i ganny anvair avek pikan. Anmezir ki sa pti plant i konmans pouse dan sa later, i lite avek ‘bann pye pikan ki grandi avek li.’ Pour en serten letan tou le de plant i lite pour ganny nitrisyon, lalimyer, lespas, me finalman bann pye pikan i fer lonbraz lo sa plant e ‘touf li.’—Lik 8:7.

16. (a) Ki kalite dimoun ki resanble sa later ranpli avek pye pikan? (b) Dapre sa trwa Levanzil, ki sa bann pye pikan i reprezante?—Vwar not anba lo paz.

¹⁶ Ki kalite dimoun ki resanble sa later ranpli avek pye pikan? Zezi i eksplike: “Se bann ki tande, me traka larzan ek plezir lavi i touf zot lafwa e zot fri pa zanmen mir.” (Lik 8:14) Zis parey lagrenn sa senmer ek bann pye pikan i pous anmenmtan, demenm serten dimoun i esey pran parol Bondye ek “plezir lavi” anmenmtan. Laverite dan parol Bondye i ganny senmen dan zot leker, me i bezwen lit avek lezot aktivite ki demann zot latansyon. Zot leker senbolik i ganny divize. (Lik 9:57-62) Sa i anpes zot pran ase letan pour reflesir lo parol Bondye seryezman ansanm avek lapriyer. Zot pa arive donn tou zot latansyon parol Bondye e alors zot mank sa lapresyasyon senser ki zot bezwen pour andire. Bann aktivite ki pa spirityel i gradyelman domin zot lentere spirityel ziska ki i “touf” zot. * Sa i en lafen tris pour tou bann ki pa kontan Zeova avek tou zot leker!—Matye 6:24; 22:37.

17. Ki bann swa ki nou devret fer dan lavi pour ki sa bann pye pikan senbolik ki ganny mansyonnen par Zezi pa touf nou?

¹⁷ Letan nou donn priyorite keksoz spirityel olye keksoz materyel, nou evite ganny toufe par bann traka ek plezir sa lemonn. (Matye 6:31-33; Lik 21:34-36) Nou pa devret zanmen negliz lektir Labib ek refleksyon lo sa ki nou’n lir. Nou pou trouv plis letan pour reflesir avek konsantrasyon ek lapriyer si nou senplifye nou lavi otan ki posib. (1 Timote 6:6-8) Bann serviter Bondye ki dan en sans in derasin bann pye pikan pour donn plis nitrisyon, lalimyer, ek lespas sa plant ki prodwir fri, pe eksperyans benediksyon Zeova. Sandra, aze 26 an i dir: “Kan mon reflesir lo bann byenfe ki mon gannyen dan  laverite, mon realize ki napa nanryen sa lemonn i kapab ofer ki vo plis ki sa!”—Psonm 84:11.

18. Konman nou kapab reste atase avek parol Bondye e persevere konman Kretyen?

¹⁸ Alors, i kler ki nou tou, zenn konman vye, nou pou reste atase avek parol Bondye e persevere konman bann disip Kris osi lontan ki parol Bondye i reste dan nou. Pour sa rezon, annou fer sir ki later nou leker senbolik pa vin dir, pa anler anler, oubyen pa ganny anvair, me ki i reste mou e profon. Dan sa fason nou pou kapab konsantre dan parol Bondye e ‘avek perseverans prodwi bokou fri.’—Lik 8:15.

[Not anba lo paz]

Ki ou pou reponn?

• Akoz nou bezwen ‘reste atase avek parol Zezi’?

• Konman nou kapab les parol Bondye reste dan nou leker?

• Ki kalite dimoun ki ganny reprezante par sa kat diferan kalite later ki Zezi i mansyonnen?

• Konman ou kapab trouv letan pour reflesir lo parol Bondye?

[Kestyon]

[Bwat/Portre lo paz 19]

“BYEN ETABLI DAN LAVERITE”

PLIZYER ki disip Kris depi lontan in prouve lannen apre lannen ki zot “byen etabli dan laverite.” (2 Pyer 1:12) Kwa ki ed zot pour persevere? Annou vwar serten zot bann komanter.

“Mon termin sak lazournen par lir en porsyon Labib e fer en lapriyer. Apre mon mazin lo sa ki mon’n lir.”—Jean, batize 1939.

“Reflesir lo konman Zeova, sa gran personnaz, i kontan nou avek tou son leker i fer mwan santi an sekirite e donn mwan sa lafors pour kontinyen reste fidel.”—Patricia, batize 1946.

“Par gard bann bon labitid letid Labib e par konsantre lo ‘bann keksoz pli profon Bondye,’ mon’n kapab kontinyen servi Zeova.”—1 Korentyen 2:10, NW; Anna, batize 1939.

“Mon lir Labib ek bann piblikasyon baze lo Labib avek bi pour egzamin mon leker ek mon bann motivasyon.”—Zelda, batize 1943.

“Mon bann pli bon moman se kan mon kapab fer en pti marse e koz avek Zeova dan lapriyer e zis fer li konnen konman mon santi vreman.”—Ralph, batize 1947.

“Mon konmans lazournen par egzamin teks pour lazournen e lir en porsyon Labib. Sa i donn mwan keksoz nouvo pour reflesir lo la pandan lazournen.”—Marie, batize 1935.

“Pour mwan, bann diskisyon verse par verse lo en liv Labib i vreman fortifye mwan.”—Daniel, batize 1946.

Kan eski ou pran letan pour reflesir lo Parol Bondye dan lapriyer?—Danyel 6:10b; Mark 1:35; Akt 10:9.

[Portre lo paz 22]

Si nou met keksoz spirityel premye, nou kapab ‘avek perseverans prodwi bokou fri’