Akoz Dimoun i ganny persekite akoz zot Larelizyon?

ESKI ou krwar ki dimoun i devret ganny persekite akoz zot larelizyon? I tre probab ki ou pa pou dakor avek sa, sirtou si zot pa pe enterfer avek drwa lezot dimoun. Pourtan, depi byen lontan ziska konmela dimoun in ganny persekite akoz zot larelizyon. Par egzanp, dan Lerop ek lezot parti lemonn, bokou Temwen Zeova in souvan ganny arase zot drwa e ganny maltrete severman pandan sa 20 tyenm syek.

Diran sa letan, bann Temwen Zeova ti sibir bann persekisyon terib. Sa ti ganny fer dan en fason byen organize. Zot in osi dir pour bokou letan pandan ki sistenm Sosyalis Nasyonal ek sistenm Kominis ti pe dominen an Lerop. Ki leksperyans bann Temwen Zeova i ansenny nou konsernan persekisyon relizye? Ki nou kapab aprann par lafason ki zot ti reazir anver zot soufrans?

“Pa fer parti Lemonn”

Bann Temwen Zeova i en bann dimoun ki fer tou zot zefor pour obeir lalwa, pour viv anpe avek lezot e pour annan en bon moralite. Zot pa opoz bann gouvernman oubyen esey fer konfrontasyon avek zot. Zot pa pou ni provok persekisyon zis akoz zot anvi mor en lanmor martir. Sa bann Kretyen pa mel zot dan politik, zot pa siport okenn parti. Sa i armoni avek parol Zezi: “[Mon bann disip] pa fer parti lemonn parey mwan mon pa fer parti lemonn.” (Zan 17:16) Laplipar gouvernman i respekte pozisyon bann Temwen. Me  bann diktater pa respekte preski ditou sa ki Labib i demann bann Kretyen, setadir pour pa fer parti avek lemonn.

Dan en konferans ki ti fer kot Liniversite Heidelberg, Lalmanny, an Novanm 2000, bann eksper ti eksplike akoz sa bann dirizan i reazir koumsa. Sa konferans ti pe deroul anba tenm Repression and Self-Assertion: Jehovah’s Witnesses Under the National Socialist and Communist Dictatorships. Dokter Clemens Vollnhals sorti Lenstiti Hannah-Arendt pour resers konsernan diktatir ti dir: “Bann sistenm diktatir pa enterese zis avek bann keksoz politik. Me zot osi oule domin lavi sak dimoun.”

Vi ki bann vre Kretyen in dedye zot lavi avek zis Zeova, zot pa kapab donn zot “lavi” avek en gouvernman imen. Bann Temwen ki pe viv anba bann sistenm diktatir in dekouver ki parler sa ki Leta pe demande pa tonm dakor avek zot krwayans relizye. Ki zot in fer ler zot in rankontre bann tel konfli? Plizyer fwa dan lepase, bann Temwen Zeova in aplik sa prensip ki bann disip Zezi Kri ti dir: “Nou devre obei Bondye plito ki zonm.”—Akt 5:29.

Kantmenm bann Temwen Zeova ti ganny persekisyon vreman sever, plizyer milye zot ti reste fidel avek zot krwayans e zot pa ti pran par dan politik. Ki mannyer zot ti andire? Kote zot ti ganny lafors pour andire? Les zot rakont pour zot menm. Annou vwar konman tou dimoun, ki swa i en Temwen oubyen non, i kapab aprann atraver zot leksperyans.

[Ekstre lo paz 4]

Bann Temwen Zeova Lalmanny ti sibir persekisyon terib pour lontan anba de sistenm diktatir diran 20 tyenm syek

[Ekstre lo paz 4]

“Bann sistenm diktatir pa enterese zis avek bann keksoz politik. Me zot osi oule domin lavi sak dimoun.”​—Dr. Clemens Vollnhals

[Portre lo paz 4]

Lafanmiy Kusserow ti perdi zot liberte akoz zot pa ti fer konpromi zot lafwa

[Portre lo paz 4]

Johannes Harms ti ganny egzekite dan en prizon Nazi akoz son krwayans