En Pwennvi balanse lo Lotorite

PRENSIP lotorite ti vin an legzistans kan sa de premye imen ti ganny kree. Zonm ti ganny kree dan resanblans Bondye, e i ti ganny sa liberte pour swazir. I ti annan sa liberte pour swazir pour fer sa ki byen ouswa sa ki mal. Par volonterman obeir son Kreater avek lanmour, i ti dan en pozisyon pour anmenn loner ek laglwar pour Bondye. I ti kapab byen loue Bondye pour Son bann kalite merveye e siport Son drwa pour dirize.

Me Adan pa ti ganny liberte total; i ti zis en serten degre. I ti pou kapab kontinyen viv dan lazwa si selman i ti rekonnet drwa Zeova pour dirize. Sa ti ganny endike par sa pye dibwa konnesans bon e move, ki Adan ti ganny demande pour pa manz son fri. Manz fri sa pye dibwa ti pou vin en akt dezobeisans, en rebelyon kont drwa Bondye pour dirize.—Zenez 2:9, 16, 17.

I egalman enportan ki bann adorater Bondye ozordi i apresye pwennvi Bondye lo lotorite. Prensip debaz lotorite i ganny rikorde dan 1 Korentyen 11:3: “Kris i sef tou zonm, ki en mari i sef son madanm e Bondye i sef Kris.”

Pozisyon Zezi Kri

Konman sef kongregasyon Kretyen, Zezi Kri i annan drwa fer bann desizyon ki enplik kongregasyon e pour demontre lotorite lo kongregasyon. (Efezyen 5:23) Me son lotorite i osi obliz li pour aksepte sa devwar pour pran swen avek kongregasyon e pour pran responsabilite pour son bann desizyon.

Zezi Kri in toultan azir an akor avek prensip lotorite. Par son parol ek aksyon Zezi in demontre ki i totalman rekonnet lotorite son Papa. Menm apre ki i’n renny lo later pour mil an, i pou rekonnet lotorite iniversel Zeova par remet Rwayonm dan lanmen Zeova. An fezan sa, i pou soumet “son lekor avek sa enn ki’n soumet tou keksoz avek li, e alor Bondye i ava tou pour tou dimoun.”—1 Korentyen 15:24-28; Filipyen 2:5-8.

Pozisyon Zonm

Menm si zonm i egzers lotorite dan lafanmiy, i pa vedir ki i endepandan oubyen ki i pa bezwen rekonnet ki i annan en “sef.” Plito, i oblize swiv bann gidans ek legzanp ki son sef, Kris, in fourni. (1 Zan 2:6) Sa i leka, pa selman dan son bann aktivite relizye, me osi dan son bann aktivite personnel.

Par egzanp, si i en sef lafanmiy, i devret obeir konsey pour reste avek son madanm dapre konnesans, ‘rekonnet ki i annan en natir pli feb e tret li avek respe.’ Sa i akoz i annan respe pour son sef, Kris. I devret osi fer en zefor senser pour byen elve son zanfan.—1 Pyer 3:7; Efezyen 6:4.

Vi ki zonm ti ganny kree avan fanm, se zonm ki’n ganny lotorite lo fanm. (1 Timote 2:12, 13) Fanm ti ganny fer avek en kot ki ti ganny pran avek zonm. (Zenez 2:22,  23) I ti ganny kree pour zonm, me pa zonm pour fanm. (1 Korentyen 11:9) Alors, dan laranzman Bondye pour lafanmiy, fanm ti bezwen  toultan soumet avek son mari e pa esey pran son lotorite. (Efezyen 5:22, 23) Dan kongregasyon osi, fanm napa drwa ansenny bann frer oubyen egzers lotorite lo zot.—1 Timote 2:12.

Bann Ebre dan letan ansyen ti rekonnet sa pozisyon siperyer ki zonm ti annan dan lafanmiy e dan laranzman tribi. Sara ti montre soumisyon. I ti apel Abraam “senyer,” e i ganny mansyonnen konman en bon legzanp soumisyon anver lotorite son mari.—Zenez 18:12; 1 Pyer 3:5, 6.

Pozisyon Fanm

Dan letan ansyen, ti annan bann sirkonstans kot bann fanm ti bezwen kouver zot latet pour demontre soumisyon. (Zenez 24:65) Kan i ti pe diskit lo laranzman lotorite dan kongregasyon Kretyen, Pol ti eksplike ki si en madanm i priye oubyen profetize dan kongregasyon, savedir ki i pe okip en pozisyon ki Bondye in donn avek zonm, i devret kouver son latet.

En ser i fer sa bann keksoz tanporerman akoz napa frer pour fer zot. Menm si sa madanm i annan seve long, i pa devret argimante ki son seve long i ase pour demontre son soumisyon. Plito, i devret les son prop aksyon demontre son soumisyon e ki i rekonnet lotorite zonm. Sa ser i fer sa par kouver son latet konman “en siny lotorite.”—1 Korentyen 11:5-16, NW.

Sa i devret ganny fer “akoz bann lanz,” ki obzerv bann aksyon en Kretyen e ki, parey bann ki servi kongregasyon Kretyen, zot konsernen avek sa. Par kouver son latet kan i neseser pour bann rezon spirityel, sa fanm Kretyen i rekonnet laranzman Bondye konsernan lotorite.—Ebre 1:14.

Sa bon lord teokratik dan kongregasyon e dan lafanmiy pa anpes sa madanm servi Bondye, ni fer li difisil pour li akonpli son bann aktivite ek responsabilite dan lafanmiy. Sa laranzman i permet li annan laliberte total baze lo Labib pour servi dan son pozisyon, anmenmtan ki Bondye i pran plezir dan li an armoni avek sa prensip: “Bondye in plas sak parti lekor, dan fason ki li i oule.”—1 Korentyen 12:18.

Menm si zot in rekonnet lotorite zonm, sa pa’n anpes plizyer fanm dan lepase ganny bann privilez ekselan e rezwir boner ek satisfaksyon dan zot lavi. Parmi zot ti annan Sara, Rebeka, Abigail, ek bann madanm Kretyen parey Prisil ek Febe.

Byenfe Lotorite

Ler en dimoun i egzers lotorite ki Labib i otorize, sa i donn li serten drwa me i osi enplik bann devwar oubyen lobligasyon. Par egzanp, kan en mari i egzers son lotorite i annan drwa pour fer desizyon final e pour fourni sirveyans. Me deplis, i annan sa devwar pour aksepte responsabilite pour son fanmiy. Se li ki annan sa lobligasyon pour fourni keksoz materyel e spirityel pour son fanmiy.—1 Timote 5:8.

En zonm Kretyen i bezwen egzers son lotorite dan en bon fason, e kontan son madanm parey i kontan son prop lekor. (Efezyen 5:33) Zezi Kri i egzers son lotorite lo kongregasyon Kretyen dan sa fason. (Efezyen 5:28, 29) Konman sef son bann zanfan, en papa pa devret eksit zot lakoler me i devret elve zot “dan en ledikasyon ek lenstriksyon Senyer.”—Efezyen 6:4.

Konman bann berze troupo Bondye, “bann ansyen” dan kongregasyon Kretyen pa devret domin lo “mouton” Bondye, me zot devret rapel zot soumisyon anver Zezi Kri ek Zeova Bondye. (1 Pyer 5:1-4) Bann Kretyen, disip Zezi Kri, i osi rekonnet lotorite siprenm Zeova. Zot adres zot lapriyer avek li e rekonnet li konman Papa ek Bondye Tou Pwisan.—Matye 6:9; Revelasyon 1:8.

Sertennman, egzers byen lotorite parey Labib i demande i anmenn bann byenfe pour limanite. Sa lape ek larmoni ki ganny prodwir i anmenn laglwar pour Kreater limanite.