‘Fodre Ou Pran Kouraz E For!’
‘Fodre Ou Pran Kouraz E For!’
“Pran kouraz, mon’n ranport laviktwar lo lemonn.”—ZAN 16:33.
1. Lefe ki bann lennmi ti pe esper bann Izraelit an Kanaan, ki lankourazman zot ti gannyen?
KAN bann Izraelit ti pe al travers Larivyer Zourden pour ariv dan Later Promiz, Moiz ti dir zot: “Fodre ki zot pran kouraz e for. Pa per e pa tranble devan zot, akoz Zeova zot Bondye i sa enn ki pe mars avek zot.” Apre Moiz ti apel Zozye, ki ti’n ganny swazir pour anmenn bann Izraelit an Kanaan, e repet avek li personnelman sa konsey pour li pran kouraz. (Deterononm 31:6, 7) Plitar, Zeova li menm ti ankouraz Zozye, an dizan: “Fodre ou pran kouraz e for, . . . Selman, fodre ou pran kouraz e byen for.” (Zozye 1:6, 7, 9) Sa parol ti vin en moman apropriye. Bann Izraelit ti bezwen kouraz pour fer fas avek bann lennmi tre for ki ti pe esper zot lot kote Larivyer Zourden.
2. Ki sitiasyon ki nou vwar nou ladan ozordi, e ki nou bezwen?
2 Bann vre Kretyen pou byento antre dan later Promiz, e parey Zozye zot bezwen annan kouraz. (2 Pyer 3:13; Revelasyon 7:14) De lot kote, nou sitiasyon i diferan avek pour Zozye. Zozye ti lager avek lepe ek lans. Nou, nou annan en batay spirityel e nou pa zanmen servi zarm literal. (Izai 2:2-4; Efezyen 6:11-17) Deplis, Zozye ti bezwen lager dan plizyer batay feros menm apre ki i ti’n antre dan Later Promiz. Me nou, nou bann lalit pli dir i depi la konmela, avan nou antre dan nouvo lemonn. Annou vwar serten sitiasyon ki demann kouraz pour kapab fer fas avek.
Akoz nou bezwen lite?
3. Ki Labib i revele lo nou lennmi prensipal?
3 Zapot Zan ti ekrir: “Nou konnen ki nou apartenir a Bondye, e lemonn antye i dan pouvwar dyab.” (1 Zan 5:19) Sa i montre nou rezon prensipal akoz bann Kretyen i bezwen lite pour gard zot lafwa. Letan en Kretyen i reste fidel, dan en sans, sa i en defet pour Satan. Se pour sa ki Satan pe pas partou parey “en lyon ki [pe] kriye” e pe sey fer per e devor bann Kretyen fidel. (1 Pyer 5:8) Anfet, i pe fer lager avek bann Kretyen swazir ek zot bann konpanyon. (Revelasyon 12:17) Dan sa lager, i servi bann imen, ki swa zot konnen ou non, pour akonpli son lobzektif. I demann kouraz pour kapab reste ferm kont Satan ek son bann reprezantan.
4. Ki lavertisman Zezi ti donnen, me ki kalite ki bann vre Kretyen in demontre?
4 Vi ki Zezi ti konnen ki Satan ek son bann reprezantan ti pou fer tou pour opoz sa bon nouvel, i ti averti son bann disip: “Zot pou ganny persekite e met a-mor. Tou dimoun pou ay zot akoz mwan.” (Matye 24:9) Sa parol ti vin en realite dan premye syek e ozordi osi i en realite. Anfet, persekisyon ki serten Temwen Zeova dan nou letan in eksperyanse in osi sever ki okenn lezot persekisyon dan listwar. Kantmenm sa, bann vre Kretyen in montre zot kouraze kan zot in fer fas avek bann tel presyon. Zot konnen ki “tranble devan zonm se sa ki vin en latrap,” e zot pa anvi tonm dan sa latrap.—Proverb 29:25.
5, 6. (a) Ki sitiasyon ki demann kouraz lo nou par? (b) Konman bann Kretyen fidel i reazir letan zot kouraz i ganny teste?
5 Apard ki persekisyon, i annan lezot difikilte ki demann kouraz lo nou par. Pour serten, i pa fasil pour al koz avek bann dimoun ki zot pa konn ditou lo sa bon nouvel. Kouraz serten zanfan kot lekol i ganny teste letan zot ganny demande pour sant lim nasyonal oubyen pour pret serman avek zot pei oubyen paviyon. Vi ki sa bann keksoz i an realite en form ladorasyon, avek kouraz bann zanfan Kretyen in determinen pour azir dan en fason ki fer plezir Bondye. Zot bon legzanp i vreman rekonfortan.
6 Nou osi bezwen kouraz kan bann ki opoz nou i enfliyans medya pour fann bann move rapor lo serviter Bondye. Oubyen kan zot sey restrikte vre ladorasyon par “servi lalwa pour kree problenm.” (Psonm 94:20) Par egzanp, konman nou devret santi letan bann zournal, radyo, oubyen televizyon i donn en rapor ki’n ganny aranze oubyen ki konpletman fo lo bann Temwen Zeova? Eski nou devret soke? Non. Nou ekspekte sa bann keksoz koumsa. (Psonm 109:2) Deplis, nou pa sirprann letan serten dimoun i krwar sa bann mansonz oubyen keksoz ki’n ganny aranze, akoz “sa ki napa leksperyans i met lafwa dan tou parol.” (Proverb 14:15) Me bann Kretyen fidel zot, zot refize krwar nenport kwa ki ganny dir lo zot bann frer ek ser. Deplis, zot pa les sa bann fo rapor fer zot mank renyon, partisip mwens dan predikasyon, oubyen afebli zot lafwa. Okontrer, zot ‘fer tou zot posib pour viv konman bann serviter Bondye . . . kantmenm zot ganny loner e ganny laont, kantmenm zot ganny bon repitasyon konman move repitasyon. Oubyen kantmenm zot pas konman manter menm ki zot pe dir laverite.’—2 Korentyen 6:4, 8.
7. Ki bann kestyon nou kapab demande pour nou egzamin nou lekor?
7 Ler Pol ti ekrir Timote, i ti dir: “Bondye pa’n donn ou en lespri timidite, me okontrer, en lespri ki ranpli nou avek lafors . . . Pa bezwen onte pour koz an faver nou Senyer.” (2 Timote 1:7, 8; Mark 8:38) Apre ki nou’n lir sa parol, nou kapab demann nou lekor: ‘Eski mon onte akoz mon larelizyon, oubyen eski mon annan kouraz? Dan landrwa travay (oubyen lekol), eski mon fer lezot otour mwan konnen ki mon en Temwen Zeova, oubyen mon sey kasyet? Eski mon onte ki mon diferan avek lezot, oubyen mon fyer ki mon relasyon avek Zeova i fer mwan diferan?’ Si i annan ki per pour pres sa bon nouvel oubyen pour pran en pozisyon pour son krwayans menm si dimoun pa kontan, ti a byen si i mazin konsey ki Zeova ti donn Zozye: “Fodre ki ou pran kouraz e for.” Pa zanmen oubliye ki se pwennvi Zeova ek Zezi ki enportan, pa nou kanmarad travay oubyen lekol.—Galat 1:10.
Ki mannyer nou kapab ganny Kouraz
8, 9. (a) Konman kouraz bann premye Kretyen ti ganny teste? (b) Ki mannyer Pyer ek Zan ti reazir letan zot ti ganny menase, e ki zot ek zot bann frer ti eksperyanse?
8 Konman nou kapab ganny sa kouraz ki pou permet nou reste fidel dan bann letan difisil? Ki mannyer bann premye Kretyen ti ganny kouraz? Mazin sa ki ti arive kan bann sef pret ek bann ansyen an Zerizalenm ti demann Pyer ek Zan pour aret pres lo non Zezi. Bann disip ti refize, zot ti ganny menase, e apre zot ti ganny large. Deswit, zot ti rezwenn zot bann frer e zot ti priy ansanm, an dizan: “Senyer, regard menas ki zot in fer, e permet ou bann serviter anons ou mesaz avek lasirans san okenn lafreyer.” (Akt 4:13-29) An retour, Zeova ti fortifye zot avek lespri sen, e parey bann sef Zwif ti endike plitar, zot ti “fann zot lansennyman dan Zerizalenm antye.”—Akt 5:28.
9 Annou egzamin en pe pli pre ki ti arive sa zour. Kan bann disip ti ganny menase par bann sef Zwif, zot pa ti mazin pour aret prese akoz sa presyon. Okontrer bann disip ti priye pour ganny kouraz pour kontinyen prese. Apre zot ti azir an armoni avek zot lapriyer e Zeova ti fortifye zot avek son lespri. Zot leksperyans i montre ki sa ki Pol ti ekrir plitar lo en lot size, i aplik pour bann Kretyen kan zot ganny persekite. Pol ti dir: “Mon kapab fer fas avek tou par Kris ki donn mwan lafors.”—Filipyen 4:13.
10. Konman leksperyans Zeremi i kapab ed bann ki timid?
10 Be sipoze en dimoun i timid. Eski i kapab kantmenm sa servi Zeova avek kouraz dan lopozisyon? Byensir! Mazin reaksyon Zeremi letan Zeova ti apwent li konman en profet. Sa zennonm ti dir: “Mon ankor tro zenn.” I kler ki i pa ti santi li kalifye pour akonpli sa latas. Kantmenm sa, Zeova ti ankouraz li an dizan: “Pa dir, ‘Mon ankor tro zenn.’ Me ou devret al kot tou sa bann ki mon pe anvoy ou; e ou devret dir tou sa ki mon demann ou. Pa per akoz zot figir, parski ‘Mon avek ou pour delivre ou.’ ” (Zeremi 1:6-10) Zeremi ti met konfyans dan Zeova. An rezilta, i ti sirmont son ezitasyon pour koze e i ti vin en temwen ranpli avek kouraz an Izrael.
11. Kwa ki ed bann Kretyen ozordi pour fer parey Zeremi?
11 Denozour, bann Kretyen swazir i annan en latas parey pour Zeremi. Avek sipor “sa gran lafoul” ‘lezot mouton,’ zot pe kontinyen fer konnen plan Zeova malgre lendiferans, sikannri, ek persekisyon. (Revelasyon 7:9; Zan 10:16) Zot ganny kouraz atraver parol ki Zeova ti dir Zeremi: “Pa per.” Zot pa zanmen oubliye ki se Bondye ki’n donn zot sa travay pour fer e ki zot pe pres son mesaz.—2 Korentyen 2:17.
Imit Legzanp bann ki ti demontre Kouraz
12. Ki legzanp kouraz Zezi in donnen, e konman i ti ankouraz son bann disip?
12 Si nou reflesir lo legzanp bann dimoun tel parey Zeremi, ki ti annan kouraz, sa i kapab ed nou dan nou zefor pour ganny plis kouraz. (Psonm 77:12) Par egzanp, letan nou egzamin minister Zezi, nou admir son kouraz ler i ti ganny tante avek Satan e kan bann sef Zwif ti pe fer tou sa ki zot kapab pour opoz li. (Lik 4:1-13; 20:19-47) Avek lafors ki Zeova ti donn li, Zezi ti sitan for ki personn pa ti kapab afebli son konviksyon. Zis avan son lanmor, i ti dir avek son bann disip: “Dan lemonn zot bezwen soufer. Me pran kouraz, mon’n ranport laviktwar lo lemonn.” (Zan 16:33; 17:16) Si bann disip Zezi ti swiv son legzanp, zot osi zot ti pou kapab ranport laviktwar. (1 Zan 2:6; Revelasyon 2:7, 11, 17, 26) Me zot ti pou bezwen “pran kouraz.”
13. Ki lankourazman Pol ti donn bann Filipyen?
13 En pe letan apre lanmor Zezi, Pol ek Silas ti ganny met dan prizon an Filip. Plitar, Pol ti ankouraz kongregasyon Filipyen pour kontinyen “reste ferm, ini dan menm lentansyon, e avek en menm lespri konbat ansanm pour lafwa dan levanzil. Pa bezwen per zot bann lennmi.” Pour kapab fer sa, Pol ti fortifye zot an dizan: “Sa [lefe ki bann Kretyen pe ganny persekite] i a montre zot lennmi ki zot pe al dan semen destriksyon, tandis ki pour zot i ava en siny ki zot lo semen delivrans ki sorti kot Bondye. Zot, zot in ganny privilez pour servi Kris, pa zis pour krwar li, me osi pour soufer pour li.”—Filipyen 1:27-29.
14. Lefe ki Pol ti annan kouraz, ki rezilta sa ti anmennen an Ronm?
14 Kan Pol ti ekrir kongregasyon Filip, ankor enn fwa i ti dan prizon, me safwasi an Ronm. Kantmenm sa, avek kouraz i ti kontinyen pres avek lezot. Ki ti son rezilta? I ti ekrir: “Annefe tou bann gard dan pale ek tou lezot ankor in konnen ki mon dan prizon pour Kris, e konfyans laplipar bann frer dan Senyer, in ogmante, akoz mon letan dan prizon, e deplizanpli zot in vin pli brav pour pres mesaz Bondye san okenn lafreyer.”—Filipyen 1:13, 14.
15. Kote nou kapab trouv bann bon legzanp lafwa ki pou fer nou pli determinen pour ganny plis kouraz?
15 Legzanp Pol i ankouraz nou. Pareyman nou ganny ankouraze par legzanp bann Kretyen dan nou letan ki’n andir persekisyon dan bann pei kot i annan en gouvernman diktater oubyen enn dominen par bann sef relizye. Zot bann leksperyans in ganny rakonte dan magazin Latour Veyer ek Réveillez-vous! e osi dan Annuaire des Témoins de Jéhovah. Letan ou lir sa bann resi, mazinen ki sa bann dimoun ki zot leksperyans in ganny rakonte, ti bann dimoun normal parey nou. Me kan zot ti dan bann sitiasyon tre difisil, Zeova ti donn zot lafors ki lo zot menm zot pa ti pou gannyen e zot ti andire. Nou kapab annan lasirans ki i pou fer parey pour nou, dan bann sitiasyon difisil.
Nou Kouraz i fer Plezir Zeova e onor li
16, 17. Konman nou kapab ganny plis kouraz ozordi?
16 Si en Kretyen i reste ferm avek laverite ek ladrwatir, i annan kouraz. Si en lot i fer parey, menm si i annan serten lafreyer anndan, i annan plis kouraz ankor. Anfet, tou Kretyen i kapab annan kouraz si i vreman anvi fer lavolonte Zeova, si i determinen pour reste fidel, si i kontinyelman depan lo Bondye, e si i pa zanmen oubliye ki Zeova in fortifye bokou lezot parey li oparavan. Deplis, letan nou realize ki nou kouraz i fer plezir Zeova e onor li, nou pli determinen ankor pour pa afebli. Nou pare pour sibir bann sikannri oubyen bann tretman pli pir ki sa akoz nou kontan Zeova en kantite.—1 Zan 2:5; 4:18.
17 Pa zanmen oubliye ki letan nou soufer akoz nou lafwa, sa pa vedir ki nou’n fer en keksoz mal. (1 Pyer 3:17) Nou soufer akoz nou pe defann souvrennte Zeova, akoz nou pe fer sa ki byen, e akoz nou pa fer parti avek sa lemonn. An rapor avek sa, zapot Pyer ti dir: “Si ou soufer avek pasyans pour sa ki ou’n byen fer, sa i ganny aprouve par Bondye.” Pyer ti osi dir: “Bann ki soufer dapre lavolonte Bondye i devre kontinyen fer sa ki byen, e konfye zot konpletman dan zot Kreater ki touzour gard son promes.” (1 Pyer 2:20; 4:19) Wi, nou lafwa i rezwir nou Bondye lanmour, Zeova, e i anmenn loner pour li. Pa sa i en rezon enportan pour nou annan plis kouraz!
Kan nou bezwen koz devan Lotorite
18, 19. Kan nou debout avek kouraz devan en ziz, ki mesaz nou pe an realite transmet?
18 Kan Zezi ti dir son bann disip ki zot pou ganny persekite, i ti osi dir: “Zot pou ganny arete e ganny anmennen devan lakour, e zot pou ganny fwete dan sinagog. Akoz mwan, zot pou ganny anmennen devan bann gouverner ek bann lerwa, pour anons zot ek bann non-Zwif Bonn Nouvel.” (Matye 10:17, 18) I demann kouraz pour aparet devan en ziz oubyen en o-zofisye akoz bann fo lakizasyon. Kantmenm sa, letan nou servi sa loportinite pour temwanny avek sa bann dimoun, nou pe profit sa lokazyon menm si i pa fasil pour akonpli en keksoz enportan. An realite, nou pe transmet parol Zeova avek sa bann ziz, ki’n ganny rikorde dan Psonm sapit 2: “Aprezan, zot bann lerwa, montre zot pridan; zot bann ziz lo later, les zot ganny korize. Servi Zeova avek lakrent.” (Psonm 2:10, 11) Souvannfwa letan Temwen Zeova in ganny anmennen an kour akoz bann fo lakizasyon, bann ziz in respekte laliberte relizye e sa nou apresye bokou. Parkont, serten ziz in les zot ganny enfliyanse par bann ki opoz nou. Parol Bondye i annan sa pour dir zot: “Les zot ganny korize.”
19 Bann ziz i devret gard antet ki lalwa Bondye i pli enportan ki tou. Zot pa devret oubliye ki tou dimoun, enkli bann ziz, i bezwen rann kont avek Zeova ek Zezi Kri. (Romen 14:10) Tandis ki nou, menm si en ziz i donn nou lazistis oubyen non, nou annan tou rezon pour nou annan kouraz akoz Zeova i siport nou. Labib i dir: “Ere tou bann ki pran refiz dan li.”—Psonm 2:12.
20. Akoz nou kapab santi nou ere menm si nou sibir persekisyon ek bann fo lakizasyon?
20 Dan son Sermon lo montanny, Zezi ti dir: “Zot byennere, kan en dimoun i ensilte zot, persekit zot, e koz manti pour dir tou sort keksoz mal kont zot akoz zot mon disip. Rezoui e santi zot ere akoz zot annan en gran rekonpans dan lesyel. Parski koumsa menm zot bann zanset ti persekit bann profet avan zot.” (Matye 5:11, 12) Byensir, i pa gou letan nou ganny persekite. Me kan nou reste ferm malgre persekisyon, enkli bann fo rapor par medya, sa i en rezon pour nou rezwir. I montre ki nou pe fer plezir Zeova e ki nou pou ganny rekonpanse. Nou kouraz i montre ki nou annan en lafwa senser e i asir nou ki nou annan laprouvasyon Zeova. Anfet, i montre ki nou annan konfyans total dan Zeova. En tel konfyans i tre enportan pour en Kretyen, parey nou lartik swivan pou montre.
Ki ou’n aprann?
• Ki bann sitiasyon ozordi ki demann kouraz pour fer fas avek?
• Ki mannyer nou kapab ganny plis kouraz?
• Nonm ennde legzanp bann ki’n demontre kouraz.
• Akoz nou anvi demontre kouraz?
[Kestyon]
[Portre lo paz 22]
Simone Arnold (ki aprezan siny Liebster) an Lalmanny, Widdas Madona an Malawi, e Lydia ek Oleksii Kurdas an Likrenn ti demontre kouraz e zot ti reziste sa ki mesan
[Portre lo paz 23]
Nou pa onte pour pres sa bon nouvel
[Portre lo paz 24]
Kouraz ki Pol ti demontre dan prizon ti ede promot sa bon nouvel
[Portre lo paz 25]
Si avek kouraz nou eksplik en ziz nou pozisyon ki baze lo Labib, nou pe delivre en mesaz enportan