Ki Repa Senyer I Vedir Pour Ou?
Ki Repa Senyer I Vedir Pour Ou?
“Si en dimoun i manz dipen Senyer ou bwar son lakoup dan en fason endiny i fer en pese kont lekor ek disan Senyer.”—1 KORENTYEN 11:27.
1. Ki sa levennman pli enportan ki’n ganny plàn pour lannen 2003, e kan ki i ti konmanse?
LEVENNMAN pli enportan ki’n ganny plàn pour lannen 2003 pou ganny fer le 16 Avril apre soley kouse. Bann Temwen Zeova pou rasanble ansanm pour komemor Memoryal lanmor Zezi Kri. Parey nou’n vwar dan lartik presedan, Zezi ti entrodwir sa komemorasyon, ki osi ganny apele Repa Senyer, apre ki li avek son bann zapot ti’n selebre Lapak le 14 Nizan, lannen 33 N.L. Bann lanblenm Memoryal, setadir dipen san lelven ek diven rouz, i senboliz lekor Kris ki san pese ek son disan ki’n ganny verse. Sa i sa sel sakrifis ki kapab liber limanite avek pese ek lanmor ki zot in erite.—Romen 5:12; 6:23.
2. Ki lavertisman ki ganny rikorde dan 1 Korentyen 11:27?
2 Bann ki pran lanblenm Memoryal i devret fer li avek bokou respe. Zapot Pol ti fer sa byen kler, kan i ti ekrir bann Kretyen dan ansyen Korent, kot Repa Senyer pa ti pe ganny komemore dan en bon fason. (1 Korentyen 11:20-22) Pol ti ekrir: “Si en dimoun i manz dipen Senyer ou bwar son lakoup dan en fason endiny i fer en pese kont lekor ek disan Senyer.” (1 Korentyen 11:27) Ki sa parol i vedir?
Serten ti komemor Memoryal dan en Fason endiny
3. Konman bokou Kretyen an Korent ti pe konport zot pandan bann komemorasyon Repa Senyer?
3 Plizyer Kretyen an Korent ti pran lanblenm Memoryal dan en fason endiny. I ti annan divizyon parmi zot, e ti menm annan en letan kot serten ti anmenn zot dinen e manze avan oubyen pandan renyon. Souvan zot ti manze e bwar an ekse. Zot pa ti lo zot gard, ni mantalman ni spirityelman. Sa ti fer zot “fer en pese kont lekor ek disan Senyer.” Bann ki ti napa dinen ti lafen e zot pa ti kapab byen konsantre. Wi, plizyer ti pran lanblenm san okenn respe e san realiz lenportans sa levennman. I pa etonnan alor ki zot ti anmenn kondannasyon lo zot menm!—1 Korentyen 11:27-34.
4, 5. Akoz i enportan pour bann ki abitye pran lanblenm Memoryal egzamin zot menm?
4 Sak lannen, anmezir ki Memoryal i aprose, i enportan pour bann ki abitye pran lanblenm egzamin zot menm. Pour kapab byen partisip dan sa repa konminyon, zot bezwen dan en bon kondisyon spirityel. Okenn dimoun ki napa respe, menm mepriz sakrifis Zezi, i kapab ganny ‘retranse parmi pep Bondye’ ki en danze pour li. Sa i menm parey dan ka en Izraelit ki ti partisip dan repa konminyon dan en leta enpir.—Levitik 7:20; Ebre 10:28-31.
5 Pol ti konpar Memoryal avek en repa konminyon dan ansyen Izrael. I ti koz lo bann ki pran lanblenm ansanm avek Kris e apre dir: “Zot pa kapab bwar an menm-tan lakoup Senyer ek lakoup demon. Zot pa kapab an menm-tan partisip atab avek Senyer e avek demon.” (1 Korentyen 10:16-21) Si en dimoun ki abitye pran lanblenm i komet en pese grav, i devret konfes sa avek Zeova e osi rod lasistans spirityel bann ansyen dan kongregasyon. (Proverb 28:13; Zak 5:13-16) Si i vreman repantir e prodwir bann fri ki apropriye pour montre repantans, i pa pou pe pran lanblenm dan en fason endiny.—Lik 3:8.
Asiste e obzerv avek respe
6. Pour lekel ki Bondye in rezerv sa privilez pour pran par dan Repa Senyer?
6 Bann ki pe fer dibyen larestan sa 144,000 frer Kris, eski zot devret pran par dan Repa Senyer? (Matye 25:31-40; Revelasyon 14:1) Non. Bondye in rezerv sa privilez pour bann endividi ki i’n swazir par lespri sen pour vin “zeritye ansanm avek Kris.” (Romen 8:14-18; 1 Zan 2:20) Alors, ki rol sa bann ki annan lespwar pour viv dan en paradi lo later anba dominasyon Rwayonm i zwe? (Lik 23:43; Revelasyon 21:3, 4) Vi ki zot pa zeritye ansanm avek Zezi pour al viv dan lesyel, zot asiste e obzerv Memoryal avek respe.—Romen 6:3-5.
7. Akoz bann Kretyen dan premye syek ti konnen ki zot devret pran lanblenm Memoryal?
7 Bann vre Kretyen dan premye syek ti ganny swazir par lespri sen. Bokou zot ti kapab servi enn oubyen plizyer bann don ki lespri ti akord zot, tel parey koz dan bann lalang etranze. Alors, i pa ti pou difisil pour zot konnen ki se zot ki’n ganny swazir par lespri e devret pran lanblenm Memoryal. Parkont, dan nou letan, pour en dimoun konnen ki i’n ganny swazir par lespri, i kapab determin sa lo baz sa parol enspire: “Tou sa ki les li ganny gide par Lespri Bondye, i bann garson Bondye. Parski zot pa’n resevwar en Lespri ki rann zot lesklav e ranpli zot ankor avek lafreyer, me zot in resevwar en Lespri ki fer zot vin garson Bondye e ki permet nou kriy: ‘Aba! Papa!’ ”—Romen 8:14, 15.
8. Lekel ki ganny reprezante par sa “dible” ek “move zerb” ki ganny mansyonnen dan Matye sapit 13?
8 Depi ki kongregasyon Kretyen ti formen dan premye syek, bann vre Kretyen swazir in pous parey “dible” dan en plantasyon “move zerb,” setadir parmi bann fo Kretyen. (Matye 13:24-30, 36-43) Depi bann lannen 1870, sa “dible” ti vin deplizanpli evidan, e apepre 100 an plitar bann sirveyan Kretyen swazir ti ganny dir: “Bann ansyen . . . i devret met devan sa bann ki’n rasanble [pour Memoryal] sa bann kondisyon,—(1) lafwa dan disan [Kris]; ek (2) dedikasyon avek Senyer ek son servis, menm ziska lanmor. Zot devret alor envit tou bann ki dispoze dan sa fason e ki’n dedye zot pour partisip dan komemorasyon lanmor Kris.”—Studies in the Scriptures, Series VI, The New Creation, paz 473. *
Rod ‘lezot mouton’
9. Konman ki lidantite sa “gran lafoul” ti ganny klarifye an 1935, e konman sa ti afekte serten ki ti pe pran lanblenm Memoryal?
9 Avek letan, lorganizasyon Zeova in konmans konsantre lo lezot dimoun apard ki bann disip swazir Kris. En devlopman remarkab dan sa domenn ti ariv dan milye bann lannen 1930. Avan sa, pep Bondye ti vwar sa “gran lafoul” dan Revelasyon 7:9 konman en dezyenm group spirityel ki ti pou asosye avek sa 144,000 dan lesyel. Zot ti pou parey fiy-d-oner oubyen konpanyon nouvel marye Kris. (Psonm 45:14, 15; Revelasyon 7:4; 21:2, 9) Me le 31 Me, 1935, ti annan en leksplikasyon baze lo Labib, ki ti montre ki sa “gran lafoul” i refer avek ‘lezot mouton’ ki pe viv dan letan lafen. Sa ti ganny fer dan en diskour dan en lasanble Temwen Zeova an Washington, D.C., Letazini. (Zan 10:16) Apre sa lasanble, serten ki oparavan ti pe pran lanblenm Memoryal ti arete pran akoz zot ti realize ki zot lesperans se pa pour al viv dan lesyel, me pour viv lo later.
10. Konman ou pou dekrir lesperans ek responsabilite bann ‘lezot mouton’ ki pe viv dan nou letan?
10 Sirtou depi 1935, i’n annan en zefor ki’n ganny fer pour rod bann ki vin ‘lezot mouton,’ ki annan lafwa dan sa ranson, ki dedye zot lavi avek Bondye, e siport sa “pti troupo” dan aktivite predikasyon Rwayonm. (Lik 12:32) Sa bann lezot mouton i annan lesperans pour viv lo later, me dan tou lezot laspe, zot resanble larestan bann zeritye Rwayonm ozordi. Bann rezidan etranze dan ansyen Izrael ti ador Zeova e soumet avek Lalwa. Pareyman, ozordi bann lezot mouton i aksepte bann responsabilite Kretyen, tel parey pres sa bon nouvel ansanm avek bann manm Izrael spirityel. (Galat 6:16) Parkont, en rezidan etranze pa ti kapab vin lerwa oubyen pret Izrael. Demenm, ni bann manm lezot mouton pa kapab rennyen dan Rwayonm lesyel oubyen servi konman bann pret.—Deterononm 17:15.
11. Akoz ki dat batenm en dimoun i kapab annan en lefe lo son lesperans?
11 Alor, pandan bann lannen 1930, i ti vin evidan ki sa group ki pou al viv dan lesyel ti’n fini ganny swazir. I fer apepre 70 an aprezan ki zefor pe ganny fer pour rasanble bann lezot mouton, ki annan lesperans pour reste lo later. Si en Kretyen swazir i vin enfidel, i tre probab ki en dimoun ki’n servi Bondye fidelman pour en bon pe letan konman en manm lezot mouton pou ganny swazir pour pran son plas.
Akoz serten i krwar ki zot annan Lesperans seles
12. Anba ki sirkonstans ki en dimoun i devret aret pran lanblenm Memoryal, e akoz?
12 Bann Kretyen swazir i konpletman asire ki zot in ganny apele pour al viv dan lesyel. Si serten dimoun ki pa’n ganny apele pour al viv dan lesyel ti pe pran lanblenm, ki i pou fer dan sa ka? Aprezan ki zot konnen ki zot pa’n zanmen annan sa lesperans pour al viv dan lesyel, sirman zot konsyans pou fors zot pour aret pran lanblenm. Bondye pa pou aprouv okenn dimoun ki pe dir ki i’n ganny apele pour vin en lerwa oubyen pret dan lesyel kan i konnen i pa vreman leka. (Romen 9:16; Revelasyon 20:6) Zeova ti egzekit Kora ki ti en Levit akoz par larogans i ti anvi ganny pretriz Aaron. (Egzod 28:1; Nonm 16:4-11, 31-35) Si okenn Kretyen i arive konnen ki par linyorans i ti pe pran lanblenm, i bezwen aret pran e avek limilite priye pour demann pardon Zeova.—Psonm 19:13.
13, 14. Akoz serten dimoun i kapab panse ki i’n ganny apele pour al viv dan lesyel?
13 Akoz serten i kapab annan sa fo krwayans ki i’n ganny apele pour viv dan lesyel? Lanmor sa dimoun ki ou ti’n marye avek oubyen en lot trazedi i kapab fer sa dimoun perdi lentere pour viv lo later. Oubyen zot annan sa dezir pour al viv dan lesyel akoz enn zot zanmi pros in dir ki i en Kretyen swazir. Byensir, Bondye pa’n donn personn sa drwa pour ankouraz lezot dimoun pour al viv dan lesyel. I pa ni swazir bann zeritye Rwayonm par fer zot tann bann lavwa avek bann mesaz pour konfirm sa.
14 Sa fo krwayans relizye ki tou bon dimoun i al dan lesyel i kapab fer serten mazinen ki zot in ganny apele pour al viv dan lesyel. Alors, nou bezwen veye ki nou pa ganny enfliyanse par bann fo pwennvi ki nou ti annan dan lepase oubyen par lezot fakter. Par egzanp, serten i kapab demann zot lekor: ‘Eski mon pe servi tretman medikal ki fer lefe lo mon santiman? Eski mon en dimoun ki tant pour vin tro emosyonnel, ki kapab fer mwan fer en move zizman?’
15, 16. Akoz serten i kapab tir move konklizyon ki zot sa bann ki’n ganny swazir?
15 Serten dimoun i kapab demann zot lekor: ‘Eski mon anvi ganny rekonnet par lezot? Eski mon anbisye pour ganny lotorite la konmela oubyen dan lavenir konman en zeritye ansanm avek Kris?’ Kan bann zeritye Rwayonm ti ganny apele dan premye syek, pa zot tou ki ti annan bann pozisyon responsab dan kongregasyon. Bann dimoun ki ganny apele pour al viv dan lesyel pa rod popilarite oubyen fer vantar akoz zot in ganny swazir. Zot demontre limilite ki ganny ekspekte avek bann ki annan “Lespri Kris.”—1 Korentyen 2:16.
16 Serten i kapab konklir ki zot in ganny apele pour al viv dan lesyel akoz zot in ganny en bon pe konnesans lo Labib. Me bann ki’n ganny swazir par lespri pa ganny en konprenezon ekstraordiner, akoz Pol ti bezwen enstri e konsey serten parmi zot. (1 Korentyen 3:1-3; Ebre 5:11-14) Bondye i annan en laranzman pour fourni nouritir spirityel pour tou son pep. (Matye 24:45-47) Personn pa devret mazinen ki akoz i en Kretyen swazir, sa i donn li lasazes pli siperyer ki bann ki annan lesperans pour viv lo later. I pa depan lo abilite pour byen reponn bann kestyon baze lo Labib, prese, oubyen donn bann diskour biblik pour kapab idantifye lekel ki’n ganny swazir. Serten Kretyen ki annan lesperans pour viv lo later i osi fer byen dan sa bann domenn.
17. Pour ganny swazir par lespri i depan lo kwa e lo lekel?
17 Si en konpanyon Kretyen i annan kestyon konsernan ganny apele pour al viv dan lesyel, en ansyen oubyen en lot Kretyen matir i kapab diskit sa size avek li. Parkont, en dimoun pa kapab fer sa desizyon pour en lot dimoun. En dimoun ki vreman ganny apele pour al viv dan lesyel pa bezwen demann lezot si i annan en tel lesperans. Bann ki’n ganny swazir “in ganny en nouvo lavi, non pa par en semans ki kapab ganny detri, me par enn ki pa kapab ganny detri, par parol Bondye, ki vivan e reste pour touzour.” (1 Pyer 1:23) Par son lespri ek son Parol, Bondye i plant sa “semans” ki fer sa dimoun “en kreasyon nouvo,” avek en lesperans pour al viv dan lesyel. (2 Korentyen 5:17) Se Zeova ki fer sa swa. Pour ganny swazir i “pa depann lo ni sa ki zonm i oule, ni lo son zefor, me zis lo Bondye.” (Romen 9:16) Alors, konman en dimoun i kapab asire ki i’n ganny apele pour al viv dan lesyel?
Akoz zot asire
18. Konman lespri Bondye i konfirm sa ki dan lespri bann ki’n ganny swazir?
18 Lespri Bondye i fer konnen e konvenk bann Kretyen swazir ki zot annan sa lespwar pour al viv dan lesyel. Pol ti ekrir: “Zot in resevwar en Lespri ki fer zot vin garson Bondye e ki permet nou kriy: ‘Aba! Papa!’ Lespri limenm i konfirm sa ki dan nou lespri, ki nou zanfan Bondye. E si nou son bann zanfan, alor nou osi nou son bann zeritye: zeritye Bondye, e zeritye ansanm avek Kris, parski si nou soufer avek li, avek li, nou osi ganny glorifye.” (Romen 8:15-17) Anba lenfliyans lespri sen, latitid dominan oubyen lespri bann ki’n ganny swazir i pous zot pour aplik sa ki Labib i dir konsernan bann zanfan spirityel Zeova. (1 Zan 3:2) Lespri Bondye i fer zot santi ki zot bann garson Bondye e li i zot Papa. I osi prodwir dan zot en lesperans inik. (Galat 4:6, 7) Wi, lavi eternel lo later konman bann imen parfe antoure avek zot fanmiy ek zanmi ti pou merveye. Me sa i pa sa lesperans ki Bondye in donn zot. Par mwayen son lespri, Bondye in prodwir dan zot en lesperans pour al viv dan lesyel ki sitan for. Sa lesperans i fer zot pare pour met dekote tou bann santiman ek lespwar ki zot annan isi lo later.—2 Korentyen 5:1-5, 8; 2 Pyer 1:13, 14.
19. Ki rol sa nouvo lalyans i zwe dan lavi en Kretyen swazir?
19 Bann Kretyen swazir i konvenki ki zot in ganny apele pour al viv dan lesyel, ki zot in ganny anmennen dan en nouvo lalyans. Zezi ti mansyonn sa kan i ti entrodwir Memoryal e dir: “Sa lakoup i nouvo lalyans ki’n ganny sele par mon disan, verse pour zot.” (Lik 22:20) Bann partisipan dan sa nouvo lalyans i Bondye ek sa bann ki’n ganny swazir. (Zeremi 31:31-34; Ebre 12:22-24) Zezi i sa medyater. Depi ki sa nouvo lalyans in pran lefe par disan Kris ki’n ganny verse, sa nouvo lalyans in fer en pep pour non Zeova e fer zot form parti avek “desandan” Abraam. Sa bann dimoun pa sorti zis parmi bann Zwif me osi dan bann nasyon. (Galat 3:26-29; Akt 15:14) Sa “lalyans eternel” i fer posib ki tou bann Izraelit spirityel i ganny resisite pour lavi imortel dan lesyel.—Ebre 13:20.
20. Ki lalyans ki Kris in fer avek bann ki’n ganny swazir?
20 Bann Kretyen swazir i annan lasirans pour zot lesperans. Zezi in fer en lot lalyans avek zot, sa i lalyans Rwayonm. Konsernan zot partisipasyon avek Kris, Zezi ti dir: “Zot bann ki’n reste fidel anver mwan dan tou mon difikilte ek soufrans. [Mon fer en lalyans avek zot, zis parey mon Papa ti fer en lalyans avek mwan, pour en Rwayonm, NW.]” (Lik 22:28-30) Sa lalyans ant Zezi ek son bann lerwa asosye i reste an fonksyon pour touzour.—Revelasyon 22:5.
Peryod Memoryal—En Moman zwaye
21. Konman nou kapab retir bokou byenfe pandan peryod Memoryal?
21 I annan plizyer lokazyon zwaye kan Memoryal pe aprose. Nou kapab benefisye avek lektir Labib ki’n ganny progranmen pour sa peryod. I osi en letan apropriye pour priye, pour reflesir lo lavi Zezi lo later ek son lanmor, e pour partisip dan travay predikasyon Rwayonm. (Psonm 77:12; Filipyen 4:6, 7) Sa komemorasyon li menm i rapel nou sa lanmour ki Bondye ek Kris in montre an rapor avek sakrifis ranson Zezi. (Matye 20:28; Zan 3:16) Sa provizyon i donn nou lespwar ek rekonfor. I devret osi ranforsi nou determinasyon pour swiv sa semen ki Zezi in trase. (Egzod 34:6; Ebre 12:3) Memoryal i devret osi fortifye nou pour akonpli nou dedikasyon konman serviter Bondye e pour vin bann disip fidel son Garson byenneme.
22. Lekel pli gran kado ki Bondye in donn limanite, e konman nou kapab montre lapresyasyon pour sa?
22 Pa Zeova i donn nou bann kado ekselan! (Zak 1:17) Nou annan gidans son Parol, led son lespri, ek lespwar pour ganny lavi eternel. Pli gran kado Zeova, i sakrifis Zezi pour pese bann ki’n ganny swazir e pour tou lezot ki demontre lafwa. (1 Zan 2:1, 2) Alors, ki kantite valer lanmor Zezi i annan pour ou? I pou annan bokou dimoun ki pou montre rekonesans par rasanble ansanm apre soley kouse le 16 Avril 2003, pour komemor Repa Senyer. Eski ou pou parmi sa bann dimoun?
[Not anba lo paz]
^ par. 8 Pibliye par Temwen Zeova; nepli annan aprezan.
Ki ou pou reponn?
• Lekel ki devret pran lanblenm Memoryal?
• Akoz ‘lezot mouton’ i zis asiste e obzerv Memoryal avek respe?
• Konman bann Kretyen swazir i konnen ki zot devret pran dipen ek diven zour Memoryal lanmor Kris?
• Peryod Memoryal i en moman apropriye pour fer kwa?
[Kestyon]
[Tablo/Portre lo paz 14]
(Pour prezantasyon, vwar piblikasyon)
Lasistans Memoryal
PAR MILYON
15,597,746 15
14
13,147,201
13
12
11
10
9
8
7
6
5
4,925,643
4
3
2
1
878,303
63,146
1935 1955 1975 1995 2002
[Portre lo paz 14]
Eski ou pou prezan pour Repa Senyer sa lannen?
[Portre lo paz 17]
Peryod Memoryal i en moman apropriye pour ogmant lektir Labib ek partisipasyon dan travay predikasyon Rwayonm