Met Konfyans Dan Zeova Avek Tou Ou Leker
Met Konfyans Dan Zeova Avek Tou Ou Leker
“Sa bann ki konn ou non pou met konfyans dan ou.”—PSONM 9:10.
1, 2. Nonm serten keksoz ki dimoun i krwar zot kapab ganny sekirite ladan.
OZORDI, i annan sitan bokou keksoz ki pe menas nou byennet. Alors, i normal pour nou rod sekirite swa atraver en dimoun oubyen en keksoz. Serten dimoun i krwar ki si zot annan plis larzan, sa pou fer zot get lavenir avek konfyans. Me an realite, larzan i en proteksyon ki ou pa vreman kapab kont lo la. Labib i dir: “Sa ki pe met konfyans dan son larises pou tonbe.” (Proverb 11:28) Lezot i met konfyans dan bann lider, me menm bann pli bon lider i fer fot. Deplis, avek letan zot tou zot pou mor. Alors, sa ki Labib i dir i fer sans: ‘Pa met ou konfyans dan bann dimoun enportan, ni dan zonm lo later, ki delivrans pa pour zot.’ (Psonm 146:3) Sa parol enspire i osi met nou an gard kont annan konfyans dan nou prop lekor, san ki nou bezwen led personn. Nou osi, nou bann senp ‘zonm lo later.’
2 Profet Izai ti kritik bann lider Izrael dan son letan akoz zot ti ‘fer mansonz vin zot refiz.’ (Izai 28:15-17) Zot ti rod sekirite avek bann nasyon obor zot, par fer lalyans politik avek zot. Sa bann lalyans pa ti en keksoz pour zot met konfyans ladan, zot ti senpleman mansonz. Pareyman, ozordi bokou lider bann larelizyon i fer zanmi avek bann lider politik. Pour fini kont, sa bann lalyans pou ganny devwale konman “mansonz.” (Revelasyon 17:16, 17) Zot pa pou anmenn sekirite ki dirab.
Zozye ek Kaleb i de bon Legzanp
3, 4. Ki rapor diferan avek sa dis lezot espyon, Zozye ek Kaleb ti anmennen ler zot ti sorti Later Promiz?
3 Alors, ver lekel ki nou pou ale pour ganny sekirite? Ver menm sours ki Zozye ek Kaleb ti ale dan letan Moiz. Apre ki nasyon Izrael ti’n ganny libere an Lezip, zot ti met zot pare pour antre dan Later Promiz, an Kanaan. Douz zonm ti ganny anvoye pour verifye sa pei e apre 40 zour, zot ti retournen pour donn zot rapor. Zis de zot, Zozye ek Kaleb, ki ti dir ki Izrael i kapab reisi pran Kanaan. Lezot ti admet ki sa pei ti atiran me anmenmtan zot ti dir: “Selman, sa bann dimoun ki reste dan sa pei i for, e sa bann lavil proteze avek miray i tre gran . . . Nou pa kapab al debout avek sa bann dimoun, akoz zot pli for ki nou.”—Nonm 13:27, 28, 31.
4 Bann Izraelit ti krwar sa dis espyon e zot ti sitan per ki zot ti konmans konplent kont Moiz. Finalman, avek bokou santiman Zozye ek Kaleb ti dir: “Sa pei kot nou’n ale pour eksplore i en tre tre bon pei. Si nou annan faver dan lizye Zeova, alor i pou fer nou antre dan sa pei e donn nou sa pei, en pei ki koul dile ek dimyel. Selman pa rebel kont Zeova; e zot, pa bezwen ki zot per sa bann dimoun dan sa pei.” (Nonm 14:6-9) Kantmenm sa, bann Izraelit pa ti oule ekoute, e akoz sa, zot ti bezwen esper bokou letan avan antre dan Later Promiz.
5. Akoz Zozye ek Kaleb ti donn en bon rapor?
5 Akoz Zozye ek Kaleb ti donn en bon rapor, tandis ki sa dis lezot espyon ti donn en move rapor? Tou le 12 ti’n vwar sa bann menm lavil pwisan ek zot bann pep ki ti’n byen etabli. Deplis, sa dis espyon ti annan rezon letan zot ti dir ki nasyon Izrael pa ti ase for pour konkerir sa pei. Zozye ek Kaleb ti konn sa zot osi. Parkont sa dis zot, zot ti get keksoz lafason ki en imen pou gete normalman. Tandis ki Zozye ek Kaleb zot, zot ti met zot konfyans dan Zeova. Zot ti’n vwar son pwisans par sa ki i ti fer Lezip, kot Lanmer Rouz, e anba Montanny Sinai. Plizyer lannen apre, zis sa bann rapor tousel ti ase pour pous Raab pour riske son lavi pour pep Zeova! (Zozye 2:1-24; 6:22-25) Zozye ek Kaleb, ki ti’n vwar Zeova azir avek zot prop lizye, ti annan konfyans total ki Bondye ti pou kontinyen konbat pour son pep. Karant an plitar, en nouvo zenerasyon Izraelit ti antre Kanaan e konkerir li, avek Zozye konman zot lider. Sa ti prouve ki Zozye ek Kaleb ti’n byen fer pour met zot konfyans dan Zeova.
Akoz nou devret met tou nou Konfyans dan Zeova
6. Akoz bann Kretyen ozordi i anba presyon, e dan ki zot devret met zot konfyans?
6 Dan sa “letan difisil,” nou pe fer fas avek bann lennmi ki pli for ki nou, zis parey bann Izraelit. (2 Timote 3:1) Nou rankontre bann leprev moral, spirityel, e dan serten ka menm fizik. Nou pa kapab reziste sa bann presyon lo nou menm, parski zot sorti kot en sours pli for ki nou, Satan Dyab. (Efezyen 6:12; 1 Zan 5:19) Alors, kote nou pou ale pour ganny led? En zonm fidel ti dir sa dan son lapriyer avek Zeova: “Sa bann ki konn ou non pou met konfyans dan ou.” (Psonm 9:10) Si nou vreman konn Zeova e nou konpran sinifikasyon son non, nou pou annan konfyans dan li zis parey Zozye ek Kaleb.—Zan 17:3.
7, 8. (a) Ki rezon kreasyon i donn nou pour met konfyans dan Zeova? (b) Ki rezon Labib i donnen pour annan konfyans dan Zeova?
7 Akoz nou devret met nou konfyans dan Zeova? En rezon akoz Zozye ek Kaleb ti met konfyans dan Zeova, se akoz zot ti’n vwar laprev ki i pwisan. Nou osi nou’n vwar sa bann laprev. Pran par egzanp travay kreasyon Zeova, enkli liniver avek tou son bilyon group zetwal ek plannet. Tou sa bann lafors natirel ki Zeova i kontrole i demontre ki i vreman Tou Pwisan. Letan nou reflesir lo mervey kreasyon, nou bezwen dakor avek sa ki Zob ti dir lo Zeova: “Lekel ki kapab reziste li? Lekel ki pou dir li: ‘Ki ou pe fer?’ ” (Zob 9:12) Anfet, si Zeova i lo nou kote, nou pa devret per personn dan liniver antye.—Romen 8:31.
8 Reflesir osi lo Parol Zeova, Labib. I en sours lasazes enfini ki annan sa pwisans pour ed nou sirmont bann move pratik e konform nou lavi avek lavolonte Zeova. (Ebre 4:12) Se atraver Labib ki nou arive konn Zeova, konn son non, e sinifikasyon son non. (Egzod 3:14) Nou realize ki Zeova i kapab vin sa ki i oule—en Papa lanmour, en Ziz drwat, e Gerye viktorye—pour li akonpli son plan. Deplis, nou vwar konman son parol i touzour vin vre. Letan nou etidye Parol Bondye, nou santi nou pouse pour dir parey sa psalmis: “Mon’n met konfyans dan ou parol.”—Psonm 119:42; Izai 40:8.
9. Konman ki laranzman pour en ranson ek rezireksyon Zezi i ogmant nou konfyans dan Zeova?
9 Laranzman pour en ranson i en lot rezon pour met konfyans dan Zeova. (Matye 20:28) Pa i en keksoz merveye pour Bondye anvoy son Garson pour mor konman en ranson pour nou! Deplis, sa ranson i vreman pwisan. I kouver pese tou dimoun ki repantir e ki tourn ver Zeova avek en leker senser. (Zan 3:16; Ebre 6:10; 1 Zan 4:16, 19) Pour kapab pey sa ranson, i ti neseser pour Zezi resisite. Sa mirak ki’n ganny ateste par plizyer santenn temwen, i en lot rezon pour met nou konfyans dan Zeova. I en garanti ki nou lespwar pou vreman ganny realize.—Akt 17:31; Romen 5:5; 1 Korentyen 15:3-8.
10. Ki rezon personnel nou annan pour met konfyans dan Zeova?
10 Sa i zis ennde rezon akoz nou kapab e nou devret annan konfyans total dan Zeova. I annan ankor bokou plis rezon. Serten i bann rezon personnel. Par egzanp, detanzaot nou fer fas avek bann sitiasyon difisil dan lavi. Letan nou rod gidans Zeova pour kapab fer fas avek zot, nou vwar ki son gidans i vreman pratik. (Zak 1:5-8) Pli nou depan lo Zeova dan nou lavi toulezour e vwar konman ki sa i anmenn bon rezilta, pli nou konfyans dan li pou ogmante.
David ti annan Konfyans dan Zeova
11. Malgre ki bann sirkonstans ki David ti met konfyans dan Zeova?
11 David ki ti viv dan ansyen Izrael ti annan konfyans dan Zeova. I ti bezwen fer fas avek menas Lerwa Sail, ki ti anvi touy li, e osi larme pwisan Filisten, ki ti pe esey konkerir Izrael. Kantmenm sa, i ti sirviv e i ti menm sorti viktorye. Akoz? David li menm i eksplike: “Zeova i mon lalimyer ek mon delivrans. Mon pou per ki sennla? Zeova i mon proteksyon. Mon pou annan lafreyer pour ki sennla?” (Psonm 27:1) Nou osi nou pou reisi si nou annan menm konfyans dan Zeova.
12, 13. Ki mannyer David ti montre ki nou devret met konfyans dan Zeova menm kan nou bann lennmi i servi zot lalang kont nou?
12 En fwa David ti priye: “Ekout mon lavwa, O mon Bondye, dan mon lenkyetid. Fer mwan pa per mon bann lennmi. Kasyet mwan lwen avek bann koze an misouk ki bann dimoun mesan i fer, lwen avek azitasyon bann ki pratik sa ki mal, ki’n fit zot lalang zis parey en lepe, e ki’n viz zot dart, zot parol anmer, pour tir lo en inosan dan en landrwa kasyet.” (Psonm 64:1-4) Nou pa asire kwa ki ti fer David ekrir sa parol. Me nou konnen ki ozordi osi, nou bann lennmi i ‘fit zot lalang’ par servi parol konman en lepe pour lager kont nou. Zot “tir” lo bann Kretyen inosan, an servan parol an ekrir oubyen verbal konman bann “dart” ki donn en fo lenpresyon lo nou. Ki pou arive si nou kontinyen met nou konfyans dan Zeova?
13 David i kontinyen, an dizan: “En sel kou, Bondye pou anvoy en dart lo zot. Zot in ganny blese, e zot fer kelken tonbe. Me zot lalang in vir kont zot. . . . Sa enn ki drwat pou rezwir an Zeova e pou vreman pran refiz dan li.” (Psonm 64:7-10) Wi, kantmenm nou bann lennmi i fit zot lalang kont nou, alafendizour ‘zot lalang pou vir kont zot menm.’ Avek letan, Zeova i fer ki keksoz i fini byen, afen ki bann ki’n met konfyans dan li i kapab rezwir akoz li.
Izkiya ti annan Rezon met Konfyans dan Zeova
14. (a) Malgre ki sitiasyon danzere Izkiya ti met konfyans dan Zeova? (b) Konman Izkiya ti montre ki i pa ti krwar bann mansonz Lasiri?
14 Lerwa Izkiya ti en lot dimoun ki ti annan rezon met son konfyans dan Zeova. Pandan renny Izkiya, larme pwisan Lasiri ti menas Zerizalenm. Larme Lasiri ti’n defet bokou lezot nasyon. I ti’n menm konkerir bann lavil dan Zida. Ti reste zis Zerizalenm pour li konkerir, e avek lafyerte Senakerib ti dir ki i pou pran sa lavil osi. I ti fer Rabsake dir ki i pa vo lapenn pour zot met konfyans dan Lezip pour ganny led. Sa i vre, me apre i ti dir: “ Pa les zot Bondye ki zot annan konfyans ladan tronp zot, an dizan: ‘Zerizalenm pa pou ganny donnen dan lanmen lerwa Lasiri. ’ ” (Izai 37:10) Parkont, Izkiya li, i ti konnen ki Zeova pa ti pou abandonn li. Alor, i ti priye: “O Zeova nou Bondye, delivre nou dan son lanmen [lanmen Lasiri], pour ki tou rwayonm lo later i konnen ki ou, O Zeova, zis ou tousel ki Bondye.” (Izai 37:20) Zeova ti ekout lapriyer Izkiya. Dan zis en lannwit, en lanz ti touy 185,000 solda Asiryen. Zerizalenm pa ti ganny detrir, e Senakerib ti kit later Izrael. Tou sa ki ti antann konsernan sa levennman ti rekonnet ki Zeova i gran.
15. Ki sa sel mwayen ki pou ed nou prepar nou pour okenn difikilte ki nou kapab rankontre dan sa lemonn enstab?
15 Ozordi, zis parey Izkiya, nou enplike dan en batay. Me dan nou ka, nou batay i spirityel. Toudmenm, nou konman bann gerye spirityel, nou bezwen devlop bann skil ki neseser pour reste vivan lo plan spirityel. Nou bezwen prevwar bann latak e prepar nou pour ki nou kapab reziste zot. (Efezyen 6:11, 12, 17) Dan sa lemonn enstab, sitiasyon i kapab sanz en sel kou. Lager sivil i kapab deklare san ekspekte. Bann pei ki oparavan in toler dimoun avek diferan krwayans relizye, i kapab sanze e nepli toler sa. Parey Izkiya, sel mwayen pour prepar nou pour nenport kwa ki kapab arive i par batir en konfyans total dan Zeova.
Ki savedir annan Konfyans dan Zeova
16, 17. Ki mannyer nou kapab montre ki nou annan konfyans dan Zeova?
16 Konfyans dan Zeova pa zis en keksoz ki nou dir nou annan. I enplik nou leker e nou demontre li par nou aksyon. Si nou annan konfyans dan Zeova, nou pou met tou nou konfyans dan son Parol, Labib. Nou pou lir li toulezour, reflesir lo son parol, e les li gid nou lavi. (Psonm 119:105) Annan konfyans dan Zeova i osi vedir annan konfyans dan pouvwar son lespri sen. Avek led lespri sen, nou kapab kiltiv sa fri lespri ki fer plezir Zeova e nou kapab sirmont bann move labitid ki’n anrasinen dan nou. (1 Korentyen 6:11; Galat 5:22-24) Se pour sa ki avek led lespri sen, bokou dimoun in kapab aret fimen oubyen pran drog. Lezot in kapab arete viv en lavi imoral. Wi, si nou annan konfyans dan Zeova, nou pa pou azir avek nou prop lafors, me avek lafors Zeova.—Efezyen 3:14-18.
17 Deplis, annan konfyans dan Zeova i vedir met konfyans dan bann ki Zeova i annan konfyans ladan. Par egzanp, Zeova in fer en laranzman pour ‘lesklav fidel e pridan’ okip son bann lentere Rwayonm lo later. (Matye 24:45-47) Vi ki nou annan konfyans dan laranzman Zeova, nou pa esey azir endepandan e inyor sa laranzman ki i’n fer. Deplis, dapre zapot Pol, bann ansyen ki servi dan bann kongregasyon Kretyen in ganny apwente par lespri sen. (Akt 20:28) Ler nou korpere avek sa laranzman ansyen dan kongregasyon, nou osi montre ki nou annan konfyans dan Zeova.—Ebre 13:17.
Swiv Legzanp Pol
18. Ki mannyer bann Kretyen ozordi i swiv legzanp Pol, me dan ki zot met zot konfyans?
18 Zapot Pol ti fer fas avek bokou presyon dan son minister, zis parey nou. Dan son letan, bann lotorite gouvernman ti annan bann fo lenpresyon lo vre larelizyon Kretyen. Parfwa, Pol ti sey koriz sa bann fo lenpresyon oubyen sey fer travay predikasyon ganny rekonnet legalman. (Akt 28:19-22; Filipyen 1:7) Ozordi, bann Kretyen i swiv son legzanp. Kan i neseser, nou ed lezot par donn zot plis leklersisman lo sa travay ki nou pe fer, an servan nenport mwayen ki disponib. Nou osi fer zefor pour defann sa bon nouvel e fer li ganny rekonnet legalman. De lot kote, nou pa antyerman met konfyans dan nou bann zefor akoz nou pa krwar ki lareisit i depan lo ganny bann zafer ankour oubyen lo ganny bann bon piblisite. Plito, nou met nou konfyans dan Zeova. Nou gard antet lankourazman ki i ti donn ansyen Izrael: “Zot lafors i ganny prouve letan zot reste kalm e annan konfyans.”—Izai 30:15.
19. Akoz nou bann frer ti annan rezon pour met konfyans dan Zeova kantmenm zot ti ganny persekite?
19 I ti annan en serten letan ki nou travay ti ganny enterdi oubyen restrikte dan Les ek Was Lerop, dan serten rezyon Lazi ek Lafrik, e dan serten pei Sid ek Nor Lanmerik. Eski sa i vedir ki nou’n mal fer pour met nou konfyans dan Zeova? Non. Menm si parfwa Zeova in permet persekisyon sever pour en bon rezon, i’n touzour fortifye bann ki’n pli ganny targete pandan persekisyon. Bokou Kretyen in arive batir en bon repitasyon an sa ki konsern lafwa ek konfyans dan Bondye pandan persekisyon.
20. Menm si lotorite i akord nou serten liberte, dan ki domenn nou pa pou zanmen aksepte pour sanz nou pozisyon?
20 De lot kote, nou ganny rekonnet legalman dan laplipar pei, e parfwa nou ganny bann bon piblisite dan medya. Nou rekonesan pour sa e nou rekonnet ki sa i osi ede pour akonpli plan Zeova. Avek son benediksyon, nou servi sa liberte ki nou gannyen, pa pour amelyor nou lavi personnel, me pour servi Zeova ouvertman e antyerman. Toudmenm, nou pa pou zanmen aksepte pour sanz nou pozisyon vizavi sa lemonn, redwir nou aktivite predikasyon oubyen kalite nou servis ki nou donn Zeova, zis akoz nou oule ganny respe lotorite. Nou, nou sitwayen Rwayonm Zezi e nou antyerman siport souvrennte Zeova. Nou pa met nou lespwar dan sa sistenm me dan sa nouvo lemonn, kot Rwayonm Zezi pou sa sel gouvernman ki pou diriz later. Okenn bonm, ni misil, oubyen menm latak nikleer pa pou kapab sekwe sa gouvernman oubyen fer li tonbe dan lesyel. I en gouvernman ki personn pa pou kapab konkerir e i pou realiz plan Zeova.—Danyel 2:44; Ebre 12:28; Revelasyon 6:2.
21. Ki nou determinen pour fer?
21 Pol i dir: “Nou, nou pa parmi sa bann dimoun ki retourn an aryer e ki ganny detri, okontrer nou parmi bann ki annan lafwa e ganny sove.” (Ebre 10:39) Alors, annou fidelman servi Zeova ziska lafen. Nou annan tou rezon pour met tou nou konfyans dan Zeova depi konmela menm e pour touzour.—Psonm 37:3; 125:1.
Ki ou’n aprann?
• Akoz Zozye ek Kaleb ti anmenn en bon rapor?
• Nonm serten rezon ki fer nou met tou nou konfyans dan Zeova.
• Ki savedir annan konfyans dan Zeova?
• Vi ki nou annan konfyans dan Zeova, ki pozisyon nou determinen pour pran?
[Kestyon]
[Portre lo paz 28]
Akoz Zozye ek Kaleb ti donn en bon rapor?
[Portre lo paz 29]
Tou le trwa portre: Courtesy of Anglo-Australian Observatory, photograph by David Malin
[Portre lo paz 29]
Kreasyon i donn nou bon rezon pour met konfyans dan Zeova
[Portre lo paz 31]
Met konfyans dan Zeova i vedir met konfyans dan bann ki i annan konfyans ladan