Esey Vwar Lezot Parey Zeova I Vwar Zot
Esey Vwar Lezot Parey Zeova I Vwar Zot
“Bondye pa vwar parey zonm i vwar.”—1 SAMYEL 16:7.
1, 2. Ki mannyer pwennvi Zeova lo Eliab ti diferan avek sa ki pour Samyel, e ki nou kapab aprann atraver sa?
DAN 11 zyenm syek A.N.L., Zeova ti anvoy profet Samyel lo en latas sekre. I ti demann sa profet pour al dan lakaz en zonm ki apel Zese e devid delwil lo latet enn son garson ki ti pou vin lerwa Izrael dan lavenir. Kan Samyel ti vwar Eliab, premye garson Zese, i ti asire ki i ti’n trouv sa enn ki Zeova ti’n swazir. Me Zeova ti dir: “Pa get son laparans ni son grander, parski mon’n rezet li. Parski Bondye pa vwar parey zonm i vwar, akoz zonm i vwar sa ki aparet devan son lizye; me Zeova li, i vwar sa ki dan leker.” (1 Samyel 16:6, 7) Samyel pa ti vwar Eliab parey Zeova ti vwar li. *
2 I telman fasil pour bann imen mal ziz lezot! Lo en kote, nou kapab ganny tronpe par personnalite bann dimoun ki vreman atiran, me ki anndan zot mank prensip moral. Lo lot kote, nou kapab sever e strik dan nou lopinyon lo bann dimoun senser ki zot personnalite i annwiy nou.
3, 4. (a) Si en problenm i leve ant de Kretyen, ki sakenn ant zot i devret determinen pour fer? (b) Ki kestyon nou devret demann nou lekor kan nou ganny en gro dezakor avek en konpanyon Kretyen?
3 Bann problenm i kapab leve kan nou ziz lezot vitman, menm sa bann ki nou’n konnen pour plizyer lannen. Petet ou’n ganny en gro dezakor avek en Kretyen ki ti enn ou bon zanmi. Eski ou ti a kontan revin zanmi avek li? Kwa ki pou ed ou fer sa?
4 Akoz ou pa pran letan pour byen egzamin ou frer oubyen ser Kretyen dan en fason pozitif? Fer sa par konsider parol Zezi: “Personn pa kapab vin kot mwan, si mon Papa ki’n anvoy mwan, pa atir li kot mwan.” (Zan 6:44) Apre demann ou lekor: ‘Akoz Zeova in atir sa dimoun kot Son Garson? Ki bann bon kalite ki sa dimoun i annan? Eski mon’n inyor sa bann kalite oubyen vwar zot pa enportan? Premyerman, akoz nou ti vin zanmi? Kwa ki ti atir mwan avek sa dimoun?’ Okonmansman, ou kapab vwar li difisil pour mazin bann bon pwen, sirtou si ou’n konmans devlop bann move santiman pour en pe letan. Parkont, sa i en pa enportan pour kapab rezourd sa dezakor ant zot de. Pour donn en legzanp konman sa i kapab ganny fer, annou regard bann bon laspe dan personnalite de zonm kantmenm nou parfwa konsantre lo zot fot. Sa de zonm i profet Yona ek zapot Pyer.
En Egzaminasyon onnet lo Yona
5. Ki lord Yona ti gannyen, e konman i ti reazir?
5 Profet Yona ti servi konman en profet pour rwayonm nor Izrael dan lepok Lerwa Yarobam 2, garson Yeoas. (2 Lerwa 14:23-25) En zour, Zeova ti demann Yona pour kit Izrael e fer en voyaz pour al Niniv, kapital Lanpir Asiryen. Akoz? Pour averti bann zabitan Niniv ki zot gran lavil ti pe al ganny detrir. (Yona 1:1, 2) Olye swiv gidans Zeova, Yona ti sove! I ti anbark lo en gro bato ki ti pe al Tarsis, byen lwen avek Niniv.—Yona 1:3.
6. Akoz Zeova ti swazir Yona pour al Niniv?
6 Kwa ki vin dan ou lespri kan ou mazin Yona? Eski ou konsider li konman en profet dezobeisan? Si ou pa pran letan pour byen reflesir lo li, ou kapab retir en tel konklizyon. Me eski ou krwar ki Bondye ti swazir Yona konman en profet akoz i ti dezobeisan? Byensir ki non! Yona ti bezwen annan bann bon kalite. Annou egzamin son resi konman en profet.
7. Dan ki sirkonstans ki Yona ti pe servi Zeova an Izrael? Letan nou konn sa, ki lefe i annan lo nou pwennvi lo li?
7 Annefe, Yona ti’n travay dir e fidelman an Izrael, en teritwar kot bann dimoun ti napa okenn lentere. Profet Amos ti viv apepre menm lepok ki Yona. I ti dekrir bann Izraelit dan son letan konman bann dimoun ki kontan plezir ek keksoz materyel. * Bann Izraelit ti konpletman inyor move keksoz ki ti pe deroule dan pei. (Amos 3:13-15; 4:4; 6:4-6) Pourtan, zour apre zour Yona ti fidelman kontinyen son latas pour pres avek zot. Si ou en proklanmater sa bon nouvel, ou konnen ki mannyer i difisil pour koz avek bann dimoun ki santi zot satisfe avek zot lavi e ki pa montre okenn lentere dan keksoz spirityel. Alors, menm si nou rekonnet bann febles Yona, annou pa inyor son fidelite ek perseverans ler i ti pe pres avek bann Izraelit ki ti napa lafwa.
8. Ki bann latas difisil ki ti pe esper en profet Izraelit an Niniv?
8 Sa misyon pour al Niniv ti en latas pli difisil ankor. Pour ariv dan sa lavil, Yona ti bezwen vwayaz apepre 800 kilomet apye. Sa ti en vwayaz difisil ki ti pou pran apepre en mwan. An arivan laba, profet Yona ti pou bezwen pres avek bann Asiryen ki ti renonmen pour zot kriyote. Zot bann lager ti souvan enkli fer dimoun soufer zis pour plezir. Zot ti menm fer vantar konsernan zot kriyote. Alors, i pa drol Niniv ti ganny apele ‘lavil ki touy dimoun’!—Naoum 3:1, 7.
9. Kan en tanpet vyolan ti menas bann maren, ki bann kalite ki Yona ti demontre?
9 Yona ti ezite pour obeir lord Zeova. I ti anbark lo en bato ki ti anmenn li deplizanpli pli lwen avek son misyon. Kantmenm sa, Zeova pa ti perdi konfyans dan son profet oubyen fer laranzman ki en lot dimoun i ranplas li. Okontrer, Zeova ti esey fer Yona realize ki sa latas i serye. Bondye ti fer en gro tanpet lo lanmer. Sa bato ki ti pe anmenn Yona ti balote avek laroul. Bann zonm inosan ti pres pour perdi zot lavi, zis akoz Yona! (Yona 1:4) Ki ti reaksyon Yona? Vi ki i pa ti anvi ki bann maren ki ti lo sa bato perdi zot lavi akoz li, Yona ti dir zot: “Lev mwan anler e zet mwan dan lanmer, e lanmer pou kalmi.” (Yona 1:12) I ti napa okenn rezon pour krwar ki ler bann maren ti finalman zet li dan lanmer, Zeova ti pou sov li. (Yona 1:15) Kantmenm sa, Yona ti pare pour mor, pour ki bann maren pa perdi zot lavi. Eski pa nou vwar par sa ki Yona ti fer, ki i ti annan kouraz, limilite, ek lanmour?
10. Ki ti arive apre ki Zeova ti redemann Yona pour pres avek bann zabitan Niniv?
10 Finalman, Zeova ti sov Yona. Eski sa ki Yona ti’n fer ti anpes Zeova pour servi li ankor konman son reprezantan? Non, avek lanmour ek pasyans, Zeova ti redemann Yona pour pres avek bann zabitan Niniv. Kan Yona ti ariv an Niniv, avek kouraz i ti dir sa bann zabitan ki Bondye ti pe obzerv tou zot mesanste e ki zot lavil ti pou ganny detrir dan 40 zour. (Yona 1:2; 3:4) Apre ki zot ti’n tann sa mesaz ki Yona ti’n vin anons zot, bann zabitan Niniv ti repantir, e zot lavil ti ganny eparnyen.
11. Kwa ki endike ki Yona ti aprann en bon leson?
11 Kantmenm sa, Yona ti napa sa bon pwennvi. Pourtan, par mwayen en leson pratik e avek pasyans, Zeova ti ed Yona pour aprann ki I vwar pli lwen ki laparans. I egzamin leker. (Yona 4:5-11) I evidan ki Yona ti aprann en bon leson vi ki i ti pare pour rakont son resi. I ti pare pour ekrir son bann febles, menm bann detay anbarasan. Sa i donn nou plis levidans ki i ti annan limilite. I demann kouraz pour admet nou fot!
12. (a) Konman nou konnen ki Zezi i partaz menm pwennvi avek Zeova lo bann dimoun? (b) Ki pwennvi nou ganny ankouraze pour toultan annan lo bann dimoun ki nou pres sa bon nouvel avek? (Vwar bwat lo paz 9.)
12 Plizyer syek plitar, Zezi Kri ti fer en deklarasyon pozitif konsernan en levennman dan lavi Yona. I ti dir: “Parey Zonas ti pas trwa zour ek trwa lannwit dan vant [en gro pwason, NW ] Fis-de-Lonm pou pas trwa zour ek trwa lannwit dan vant later.” (Matye 12:40) Kan Yona pou resisite, i pou aprann ki Zezi ti konpar Son prop letan dan latonm avek sa peryod fernwanr dan lavi sa profet. Eski pa nou kontan pour servi en Bondye ki pa rezet son bann serviter dek ki zot fer en fot? Sa psalmis ti ekrir: “Parey en papa i montre mizerikord pour son bann garson, Zeova in montre mizerikord pour bann ki annan lakrent pour li. Parski li i konn byen avek ki nou’n ganny formen, i mazinen ki nou lapousyer.” (Psonm 103:13, 14) Anfet, sa “lapousyer,” ki enkli bann dimoun enparfe ozordi, i kapab akonpli en bon pe keksoz avek led lespri sen Bondye!
En Pwennvi balanse lo Pyer
13. Ki kalite dan personnalite Pyer ki kapab vin dan nou lespri, me akoz Zezi ti swazir li konman en zapot?
13 Aprezan annou briyevman konsider en dezyenm legzanp, zapot Pyer. Si ou ganny demande pour dekrir Pyer, eski ou pou deswit mazin en dimoun ki koze san reflesir, ki annan lodas, e menm en karakter vif ? Parfwa Pyer ti azir koumsa. Pourtan, eski Zezi ti pou swazir Pyer konman enn son 12 zapot si Pyer ti vreman en zonm ki koze san reflesir, ki annan lodas, e en karakter vif ? (Lik 6:12-14) Byensir ki non! Zezi ti klerman inyor sa bann defo e vwar bann bon kalite ki Pyer ti annan.
14. (a) Ki mannyer nou kapab eksplike akoz Pyer ti toultan fran? (b) Akoz nou devret rekonesan ki Pyer ti souvan demann kestyon?
14 Pyer ti parfwa azir konman en portparol pour lezot zapot. Serten i kapab vwar sa konman en levidans mank modesti. Me eski sa i neseserman vre? Serten dimoun i dir ki Pyer ti kapab pli vye ki lezot zapot, petet menm pli vye ki Zezi li menm. Si sa i vre, i kapab donn nou en lide akoz Pyer ti souvan premye pour koze. (Matye 16:22) Parkont, i annan en lot fakter pour konsidere. Pyer ti en zonm spirityel. Son laswaf pour konnesans ti motiv li pour demann kestyon. Sa in benefisye nou. Zezi ti fer en kantite deklarasyon presye pour reponn bann kestyon Pyer, e sa in ganny prezerve dan Labib. Par egzanp, Zezi ti koz lo “sa serviter fidel” pour reponn en deklarasyon ki Pyer ti’n fer. (Lik 12:41-44) Konsider osi sa kestyon ki Pyer ti demande: “Be nou alor ki’n kit tou keksoz pour swiv ou, ki nou pou gannyen?” Sa ti fer Zezi fer en promes rekonfortan: “Tou bann ki’n kit zot lakaz, zot frer, zot ser, zot papa, zot manman, zot zanfan, zot propriyete akoz mwan pou ganny san fwa plis e pou erit lavi eternel.”—Matye 15:15; 18:21, 22; 19:27-29.
15. Akoz nou kapab dir ki Pyer ti vreman fidel?
15 Pyer ti annan ankor en lot bon kalite. I ti fidel. Kan plizyer disip ti aret swiv Zezi akoz zot pa ti’n konpran enn son lansennyman, se Pyer ki ti koz an faver sa 12 zapot e dir: “Senyer, kot lekel nou pou ale? Ou annan parol lavi eternel.” (Zan 6:66-68) Sa parol ti sirman fer plezir Zezi! Plitar kan en group bandi ti vin aret zot Met, laplipar zapot ti sove. Parkont, Pyer ti swiv sa lafoul a en serten distans e i ti antre dan lakour gran pret. Se kouraz e non pa lafreyer ki ti anmenn li laba. Kan Zezi ti pe ganny kestyonnen, Pyer ti zwenn en group Zwif ki ti pe sof zot obor en dife. Enn parmi bann lesklav gran pret ti rekonnet li e akiz li ki i ti avek Zezi. Wi, Pyer ti renye son Met, me annou pa oubliye ki se fidelite ek konsern pour Zezi ki ti met Pyer dan sa sitiasyon danzere, en sitiasyon ki laplipar bann zapot pa ti oze fer fas avek.—Zan 18:15-27.
16. Pour ki rezon pratik ki nou’n konsider bann bon kalite ki Yona ek Pyer ti annan?
16 Bann bon kalite ki Pyer ti annan ti pli enportan ki son febles. I menm parey dan ka Yona. Zis parey nou’n egzamin bann bon kote Yona ek Pyer, ki parler nou pa touzour fer, demenm nou kapab aprann pour vwar bann bon kote ki nou frer ek ser spirityel i annan. Kan nou fer sa, nou pou annan en pli bon relasyon avek zot. Akoz i vreman neseser pour fer sa?
Aplik sa Leson ozordi
17, 18. (a) Akoz bann konfli i kapab devlope ant bann Kretyen? (b) Ki konsey Labib ki kapab ed nou pour rezourd bann difikilte avek bann konpanyon Kretyen?
17 Ozordi zonm, fanm, zanfan ki annan diferan sitiasyon ekonomik osi byen ki ledikasyon ek ras pe servi Zeova ansanm dan linite. (Revelasyon 7:9, 10) Nou vwar en kantite diferan personnalite dan kongregasyon Kretyen. Vi ki nou pe servi Bondye ansanm avek kanmarad, nou pa kapab anpes bann dezakor arive parfwa.—Romen 12:10; Filipyen 2:3.
18 Menm si nou remark febles nou bann frer ek ser, nou pa konsantre lo la. Nou esey fer zefor pour imit Zeova, ki sa psalmis ti sant sa lo li: “Si ou ti vey bann fot, O Ya, O Zeova, lekel ki ti pou kapab debout devan ou?” (Psonm 130:3) Olye tir lizye lo defo nou kanmarad ki kapab diviz nou, annou “rod sa bann keksoz ki prodwi lape, e rann nou for ansanm dan lafwa.” (Romen 14:19) Annou annan sa dezir pour vwar sak endividi parey Zeova i vwar zot, inyor zot bann defo e konsantre lo zot bon kalite. Kan nou fer sa, i ed nou pour “siport kanmarad.”—Kolosyen 3:13.
19. Nonm diferan keksoz ki en Kretyen i kapab fer pour rezourd bann dezakor.
19 Me si bann mal konprenezon i arive ki nou pa kapab rezourd, e ki kontinyen fatig nou? (Psonm 4:4) Eski sa in deza arive ant ou ek en konpanyon Kretyen? Akoz ou pa esey rezourd sa sitiasyon? (Zenez 32:13-15) Premyerman, apros Zeova dan lapriyer, demann li son gidans. Apre, avek bann bon kalite sa dimoun antet, apros li avek “douser ek sazes.” (Zak 3:13) Dir li ki ou anvi fer lape avek li. Rapel sa konsey enspire: “Pare pou ekoute, me pran letan avan koze, avan pran lakoler.” (Zak 1:19) Sa konsey pour ‘pran letan avan pran lakoler’ i endike ki sa lot dimoun i kapab endirekteman dir ou en keksoz ki kapab fer ou ankoler. Si sa i arive, demann Zeova led pour kontrol lo ou lekor. (Galat 5:22, 23) Les ou konpanyon Kretyen dir sa ki i annan pour dir, e ekout atantivman. Pa enteronp li, menm si ou pa dakor avek tou keksoz ki i dir. Son pwennvi i kapab mal, me sa i son pwennvi. Esey vwar sa problenm dapre fason ki li i vwar keksoz. Sa i kapab enkli egzamin ou prop lekor, dapre pwennvi ou konpanyon Kretyen.—Proverb 18:17.
20. Kan nou pe rezourd bann dezakor, ki lezot mezir ki tre probab pou anmenn rekonsilyasyon?
20 Kan i ariv ou tour pour koze, koz dan en fason agreab. (Kolosyen 4:6) Dir ou frer kwa ki ou apresye dan li. Demann leskiz pour okenn rol ki ou’n annan dan sa mal konprenezon. Si ou zefor ki ou fer avek limilite i anmenn rekonsilyasyon, remersi Zeova. Si non, kontinyen demann Zeova son gidans e anmenmtan rod lezot loportinite pour fer lape.—Romen 12:18.
21. Konman sa diskisyon in ed ou pour vwar lezot parey Zeova i vwar zot?
21 Zeova i kontan tou son serviter. Malgre nou lenperfeksyon, i pran plezir pour servi nou tou dan son servis. Anmezir ki nou aprann konsernan son pwennvi lo lezot, nou lanmour pour nou bann frer ek ser pou agrandir. Si nou’n vin fre avek en konpanyon Kretyen, nou kapab ptit-a-pti esey reganny nou lanmitye avek li. Nou pou resevwar en kantite benediksyon si nou determinen pour demontre en pwennvi pozitif lo lezot, wi, si nou vwar zot parey Zeova i vwar zot!
[Not anba lo paz]
^ par. 1 I ti evidan plitar ki Eliab, menm si i ti en zoli garson, ti napa sa potansyel pour vin en lerwa apropriye pour Izrael. Kan Golyat, sa zean Filisten ti demann bann Izraelit pour konbat avek li, Eliab, ansanm avek lezot Izraelit, ti rekile akoz zot ti per.—1 Samyel 17:11, 28-30.
^ par. 7 Lerwa Yarobam 2 ti fer bann rezyon enportan vin anba son dominasyon. I ti repran bann teritwar e probableman kolekte taks avek zot. Avek sa sikse ki Yarobam 2 ti fer, larises rwayonm nor ti bezwen ogmant en bon pe.—2 Samyel 8:6; 2 Lerwa 14:23-28; 2 Kronik 8:3, 4; Amos 6:2.
Konman ou pou reponn?
• Konman Zeova i vwar febles son bann serviter fidel?
• Ki bann bon kalite ki Yona ek Pyer ti annan?
• Ki pwennvi lo ou bann frer ek ser Kretyen ou determinen pour toultan annan?
[Kestyon]
[Bwat lo paz 9]
Mazinen konman Bondye i vwar Lezot
Anmezir ki ou reflesir lo resi Yona, eski ou vwar li neseser pour konsider bann dimoun ki ou pres sa bon nouvel avek dan en lot fason? Zot kapab byen satisfe avek zot lavi oubyen pa montre okenn lentere dan keksoz spirityel, parey bann Izraelit. Zot menm kapab opoz mesaz Bondye. Kantmenm sa, konman Zeova i vwar zot? Menm bann dimoun ki byen renonmen dan sa sistenm i kapab en zour tourn ver Zeova, parey lerwa Niniv ti repantir gras a predikasyon Yona.—Yona 3:6, 7.
[Portre lo paz 8]
Eski ou vwar lezot parey Zeova i vwar zot?
[Portre lo paz 10]
Zezi ti vwar en keksoz pozitif pour dir lo leksperyans Yona