Kwa sa Dernyen Repa Zezi?

LER OU antann sa lekspresyon “dernyen repa” kwa ki vin dan ou lespri? Bokou dimoun pou mazin sa zoli tablo ki artis Leonardo da Vinci in fer an Milan, Itali (1452-1519). An realite, Dernyen Repa ti vin en tenm popiler pour bann artis, ekriven, ek mizisyen pour bokou syek.

Me kwa sa Dernyen Repa, e ki sinifikasyon i annan pour dimoun ki pe viv ozordi? Bann ansiklopedi ek diksyonner i fer resorti ki Dernyen Repa Zezi, ki osi ganny apele Lasenn sen oubyen Repa Senyer, i sa repa ki Zezi Kri ti pran avek son bann zapot sa zour swar avan i ti donn son lavi. Vi ki i ti dernyen repa ki Zezi ti pran avek son bann disip fidel, alors dimoun i apel li Dernyen Repa. Osi, vi ki i ti ganny entrodwir par Senyer, Zezi Kri li menm, sa non Repa Senyer i apropriye.

Pandan bann lannen ki’n pase, plizyer dimoun in pare pour mor pour bann rezon ki zot in santi i vo lapenn. Pour en peryod letan, serten dimoun in benefisye akoz sa bann lanmor. Me kantmenm zot ti kapab annan valer, napa enn sa bann lanmor ki ti sitan enportan parey lanmor Zezi. Deplis, napa okenn lanmor dan listwar imen ki kapab annan en sitan gran lenfliyans parey pour Zezi. Akoz?

Pour reponn sa kestyon e pour ed ou dekouver ki sinifikasyon Repa Senyer i annan pour ou, nou envit ou pour lir sa lartik swivan.