Ladouser I En Kalite Esansyel Pour Tou Kretyen
Ladouser I En Kalite Esansyel Pour Tou Kretyen
“Zot devre ranpli avek . . . ladouser.”—KOLOSYEN 3:12.
1. Kwa ki fer ladouser en kalite remarkab?
KAN ou pe ekout en santer ki annan en lavwa dous, i fer ou relaks. Kan en dimoun i annan en karakter dous, i en plezir pour pas letan avek li. Parkont, Lerwa Salomon dan son lasazes ti dir: “En lalang dous i kapab kraz en lezo.” (Proverb 25:15) Ladouser i en kalite remarkab ki armoniz plezir ek lafors.
2, 3. Ki relasyon i annan ant ladouser ek lespri sen, e ki nou pou egzaminen dan sa lartik?
2 Zapot Pol ti enkli ladouser dan son lalis “fri Lespri,” ki ganny trouve dan Galat 5:22, 23. Lafason ki serten versyon Labib in tradwir sa mo “ladouser” dan verse 23, i met lanfaz plis lo lapolites. Parkont, son mo orizinal Grek i annan en sinifikasyon pli profon. I pa zis lapolites oubyen fason ki en dimoun i konport li devan lezot. I plito en konsiderasyon oubyen lentere senser, ki reflekte fason panse sa dimoun e sa ki annan dan son leker.
3 Pour ed nou konpran pli byen ki savedir ladouser e ki son lenportans, annou egzamin kat legzanp dan Labib. (Romen 15:4) Letan nou fer sa, nou pa pou zis aprann ki sa kalite i enplike me osi konman nou kapab devlop e demontre li dan tou sa ki nou fer.
“Annan en gran Valer devan Bondye”
4. Ki mannyer nou konnen ki Zeova i atas en gran valer avek ladouser?
4 Vi ki ladouser i form parti fri lespri Bondye, alors i normal pour li ganny asosye avek personnalite merveye Bondye. Zapot Pyer ti ekrir ki en “lespri [dous, NW ] e trankil” i “annan en gran valer devan Bondye.” (1 Pyer 3:4) Anfet, ladouser i en kalite ki Zeova li menm i annan e i atas en gran valer avek. Sirman, zis sa rezon i ase pour tou serviter Bondye kiltiv ladouser. Ki mannyer Bondye tou pwisan, sa enn ki annan lotorite pli o dan liniver, i demontre ladouser?
5. Ki lespwar nou’n gannyen pour lavenir gras a ladouser Zeova?
5 Kan premye koup imen, Adan ek Ev, ti dezobei komannman kler Bondye pour pa manz fri dan pye konnesans bon e move, zot ti fer li par ekspre. (Zenez 2:16, 17) Lefe ki zot ti dezobei Bondye volonterman, sa ti fer zot ek zot fitir desandans fer pese, mor, e elwannyen avek Bondye. (Romen 5:12) Menm si Zeova ti annan tou rezon pour pas sa zizman, i pa ti abandonn lafanmiy imen konpletman konmsi i enposib pour zot sanze e rekipere. (Psonm 130:3) Okontrer, Zeova in fer en laranzman atraver ki bann imen peser i kapab apros avek li e ganny son laprouvasyon. Sa i akoz i annan konpasyon e i pa ekspekte tro bokou avek imen—en fason ki ladouser i ganny demontre. Wi, par mwayen sakrifis ranson son Garson ki en kado, Zeova i fer li posib pour nou apros son gran tronn san lafreyer.—Romen 6:23; Ebre 4:14-16; 1 Zan 4:9, 10, 18.
6. Konman ladouser ti evidan dan fason ki Bondye ti reazir avek Kaen?
6 Bokou bokou letan avan Zezi ti vin lo later, Zeova ti demontre ladouser letan Kaen ek Abel, garson Adan, ti ofer sakrifis avek Bondye. Vi ki Zeova ti kapab vwar kondisyon zot leker, i ti rezet lofrann Kaen me i ti “get avek faver” lo Abel ek son lofrann. Kaen ti reazir dan en move fason akoz Bondye ti get Abel ek son sakrifis avek faver. Labib i dir: “Kaen ti anflanmen avek en gran lakoler, e i ti fer son figir long.” Ki mannyer Zeova ti reazir? Eski i ti ofanse akoz sa move latitid ki Kaen ti demontre? Non. Avek douser, i ti demann Kaen akoz i ti sitan ankoler. Zeova ti menm dir Kaen ki i kapab fer pour “ganny eleve.” (Zenez 4:3-7) Vreman, Zeova i demontre ladouser dan en fason parfe.—Egzod 34:6.
Ladouser i atir e rekonfort Lezot
7, 8. (a) Ki mannyer nou kapab konpran ladouser Zeova? (b) Ki sa parol dan Matye 11:27-29 i revele konsernan Zeova ek Zezi?
7 Enn bann pli bon fason pour konpran bann kalite Zeova se ler nou etidye lavi ek minister Zezi Kri. (Zan 1:18; 14:6-9) Kan Zezi ti an Galile pandan son dezyenm lannen kanpanny predikasyon, i ti fer plizyer travay enpresyonan an Korazen, Betsayda, Kapernaoum, ek lezot landrwa dan zanmirant. Pourtan, laplipar dimoun ti montre en latitid orgeye e endiferan, e zot pa ti oule krwar. Ki mannyer Zezi ti reazir? I ti rapel zot konsekans ki zot ti pou gannyen akoz zot mank lafwa. Me anmenmtan, i ti pran pitye pour bann dimoun senp e ordiner akoz zot ti dan en kondisyon deplorab spirityelman.—Matye 9:35, 36; 11:20-24.
8 Sa ki Zezi ti fer apre, ti montre ki i ti vreman “konn son Papa” e imit li. I ti ofer bann dimoun ordiner sa lenvitasyon ranpli avek lafeksyon: “Vin kot mwan zot tou ki fatige e ki pe anmenn en fardo e mwan, mon a donn zot repo. Pran mon zoug e aksepte mon legzanp akoz mon dou e mon annan limilite dan mon leker e zot a ganny repo.” Konman sa parol ti rekonfort e redonn lafors bann ki ti pe ganny abize! Menm ozordi sa parol i rekonfort nou. Si nou senserman kiltiv ladouser, alor nou pou parmi bann ki “Garson in swazir pour revel son Papa.”—Matye 11:27-29.
9. Ki kalite ki relye avek ladouser, e konman ki Zezi i en bon legzanp dan sa domenn?
9 “Limilite” i relye etrwatman avek ladouser. De lot kote, lorgey i fer en dimoun elev son lekor e souvannfwa fer li tret lezot dan en fason dir e san pitye. (Proverb 16:18, 19) Zezi ti demontre limilite diran tou son minister lo later. Menm kan i ti antre Zerizalenm sis zour avan son lanmor e ganny aklanmen konman Lerwa bann Zwif, Zezi ti tre diferan avek bann dirizan lemonn. I ti akonpli profesi Zekarya konsernan Mesi: “Dir fiy Siyon: La ou Lerwa pe vin kot ou, i vin avek limilite, monte lo en bourik. E lo en pti bourik, piti en bourik.” (Matye 21:5; Zekarya 9:9) Profet fidel, Danyel, ti vwar en vizyon dan ki Zeova ti donn son Garson lotorite pour dirize. Pourtan dan en lot profesi avan sa, i ti dekrir Zezi konman sa enn ki “annan plis limilite parmi bann imen.” Ladouser ek limilite i vreman mars ansanm avek kanmarad.—Danyel 4:17; 7:13, 14.
10. Akoz ladouser ki Kretyen i demontre pa en febles?
10 Sa ladouser ki Zeova ek Zezi in demontre i ed nou apros pli pre avek zot. (Zak 4:8) Byensir, ladouser pa en febles. Zeova ki en Bondye tou pwisan, i ranpli avek en kantite lenerzi ek pwisans. I annan en gran lakoler kont lemal. (Izai 30:27; 40:26) Pareyman, Zezi ti determinen pour pa les li ganny enfliyanse, menm kan i ti ganny atake par Satan Dyab. I pa ti toler bann sef relizye dan son letan pour fer komers ilegal. (Matye 4:1-11; 21:12, 13; Zan 2:13-17) Pourtan, i ti tret febles son bann disip avek douser e avek pasyans i ti siport zot defo. (Matye 20:20-28) Lafason ki en spesyalis Labib ti dekrir ladouser i byen apropriye. I ti dir: “Par deryer ladouser i annan en lafors feray.” Annou demontre ladouser parey Kris ti fer.
Pli dous dan son Letan
11, 12. Letan nou pran an konsiderasyon ledikasyon Moiz, kwa ki fer son ladouser remarkab?
11 Moiz i sa trwazyenm legzanp ki nou pou egzaminen. Labib i dekrir li konman en “zonm ki ti pli dous ki tou zonm lo sirfas later.” (Nonm 12:3, not anba lo paz) Sa deskripsyon ti ganny ekrir anba lenspirasyon divin. Sa douser remarkab ki Moiz ti annan ti fer li pare pour swiv gidans Zeova.
12 Moiz pa ti ganny elve parey preski tou zanfan. Zeova ti fer sir ki sa pti garson ti ganny prezerve pandan en letan traizon ek mert. Ler Moiz ti ankor ptipti, son manman ki ti pran swen avek li. I ti fer zefor pour ansenny li konsernan sa vre Bondye, Zeova. Plitar, Moiz ti ganny pran pour al viv dan en landrwa ki ti tre diferan. Etyenn ki ti mor pour son lafwa ti rakonte: “Moiz ti ganny edike dan tou sa ki bann Ezipsyen ti devre konnen, e i ti vin en zonm byen enportan dan son parol konman dan son bann laksyon.” (Akt 7:22) Son lafwa ti vin evidan letan i ti obzerv lenzistis ki son bann frer ti pe sibir anba lanmen bann serviter Faraon. Moiz ti bezwen sove Lezip pour al Madyann akoz i ti touy en Ezipsyen ki i ti vwar pe bat en Ebre.—Egzod 1:15, 16; 2:1-15; Ebre 11:24, 25.
13. Ki lefe sa 40 lannen ki Moiz ti reste Madyann ti fer lo li?
13 Alaz 40 an, Moiz ti bezwen pran swen avek son lekor dan dezer. An Madyann, i ti rankontre sa set fiy Reouel e i ti ed zot pour tir delo pour sa gran troupo ki zot papa ti annan. Letan zot ti retourn se zot, sa bann zenn fiy ti eksplik Reouel ki en “serten Ezipsyen” ti’n sov zot dan lanmen serten berze ki ti pe fer problenm avek zot. Reouel ti envit Moiz pour reste avek zot e i ti aksepte. Bann difikilte ki i ti pas ladan pa ti fer li vin en dimoun anmer e pa ni ti anpes li aprann adapte son fason viv avek son nouvo lanvironnman. Son dezir pour fer lavolonte Zeova ti reste touzour parey. Pandan sa 40 lannen ki i ti okip bann mouton Reouel, marye avek Sipora, e elve son bann garson, Moiz ti devlop e amelyor sa kalite ki ti pou idantifye li plitar. Wi atraver bann difikilte, Moiz ti kiltiv ladouser.—Egzod 2:16-22; Akt 7:29, 30.
14. Dekrir en lensidan ki montre ki Moiz ti annan ladouser kan i ti lider Izrael.
14 Apre ki Zeova ti swazir li konman lider nasyon Izrael, Moiz ti kontinyen demontre ladouser. En zennonm ti raport avek Moiz ki Eldad ek Medad ti pe konport zot parey bann profet dan kan, menm si zot pa ti la kan Zeova ti vers son lespri lo sa 70 ansyen ki ti pou ed Moiz. Zozye ti dir: “Mon senyer Moiz, anpes zot!” Avek douser, Moiz ti reponn: “Eski ou zalou pour mwan? Non, mon swete ki tou pep Zeova ti ava bann profet, akoz Zeova ti pou met son lespri lo zot!” (Nonm 11:26-29) Ladouser ti ede kalme sa latmosfer.
15. Menm si Moiz ti enparfe, akoz i en bon legzanp pour nou swiv?
15 En fwa, i paret ki Moiz ti mank ladouser dan sa ki i ti fer. I pa ti fer loner al pour Zeova ki ti’n fer sa mirak kot Meriba, obor Kades. (Nonm 20:1, 9-13) Me malgre son lenperfeksyon, son lafwa solid ti soutenir li toudilon son lavi, e menm ozordi son ladouser remarkab i atir nou.—Ebre 11:23-28.
Britalite oubyen Ladouser
16, 17. Ki lavertisman nou kapab retire dan resi Nabal ek Abigail?
16 I annan en legzanp ki servi konman en lavertisman pour nou. Sa ti ariv dan letan David, zis apre lanmor profet Bondye, Samyel. I enplik en koup marye, Nabal ek son madanm, Abigail. Zot ti vreman diferan! Abigail ti “byen pridan” tandis ki son mari ti “dir e move dan son fason azir.” Kan bann zonm David ti demann Nabal en pe rafresisman, Nabal ti refiz zot dan en fason brit. Pourtan, zot ti ede protez troupo Nabal kont bann voler. David ti annan rezon ankoler. Li ek son group zonm ti pran zot lepe pour al lager avek Nabal.—1 Samyel 25:2-13.
17 Kan Abigail ti tann sa ki ti’n arive, i ti depese e prepar dipen, diven, lavyann, gato rezen ek gato fig e al zwenn David. I ti sipliy li: “Les sa fot vin lo mwan, O mon senyer. Silvouple, les ou lesklav koz dan ou zorey, e ekout parol ou lesklav.” Siplikasyon Abigail ranpli avek ladouser ti apez lakoler David. Apre ki i ti’n ekout leksplikasyon Abigail, David ti dir: “Beni Zeova Bondye Izrael ki’n anvoy ou ozordi pour rankontre mwan! Beni ou bon zizman, e beni ou ki’n anpes mwan vers disan ozordi.” (1 Samyel 25:18, 24, 32, 33) Leker dir Nabal ti finalman fer li trouv son lanmor. Bann bon kalite Abigail ti fer li vin madanm David ki ti anmenn li bokou lazwa. Son ladouser i en bon legzanp pour tou bann ki servi Zeova ozordi.—1 Samyel 25:36-42.
Fer tou ou posib pour devlop Ladouser
18, 19. (a) Ki bann sanzman ki aparan letan nou devlop ladouser? (b) Kwa ki kapab ed nou pour fer en egzaminasyon efikas lo nou menm?
18 Ladouser i alors en kalite esansyel. I pa zis lapolites me i en personnalite atiran ki rekonfort lezot. Dan lepase, petet nou ti abitye koz oubyen azir dan en fason dir. Parkont, letan nou ti aprann laverite dan Labib, nou ti sanze e vin en dimoun pli dous. Pol ti koz lo sa sanzman kan i ti ankouraz son bann konpanyon Kretyen: “Zot devre ranpli avek konpasyon, labonte, limilite, ladouser ek pasyans.” (Kolosyen 3:12) Labib i konpar sa transformasyon avek sanzman pour sorti en zannimo feros parey loulou, leopar, lyon, lours, ek kobra, pour vin en zannimo domestik parey en mouton, pti kabri, oubyen pti bef. (Izai 11:6-9; 65:25) Sa bann sanzman dan personnalite i sitan remarkab ki bann dimoun ki obzerve i sirprann. Parkont, nou nou krwar ki sa transformasyon i posib gras a lespri Bondye, parski ladouser i form parti son fri vreman remarkab.
19 Eski sa i vedir ki enn fwa ki nou’n fer bann sanzman neseser e nou’n dedye nou lavi avek Zeova, nou nepli bezwen fer zefor pour devlop ladouser? Pa ditou. En lenz ki nef pa pou reste prop e prezantab si nou pa pran swen avek. Letan nou get dan Parol Bondye e reflesir lo bann legzanp ki i kontyen, sa i ed nou pour reegzamin nou lekor onnetman. Ki Parol Bondye, ki parey en laglas, i revele lo ou?—Zak 1:23-25.
20. Ki mannyer nou kapab reisi demontre ladouser?
20 Normalman, personnalite dimoun i diferan. Serten serviter Bondye i vwar li pli fasil pour demontre ladouser ki lezot. Toudmenm, tou Kretyen i bezwen kiltiv fri lespri Bondye, ki enkli ladouser. Avek lanmour, Pol ti donn Timote sa konsey: “Fer tou ou posib pour atas ou avek lazistis, atas ou avek Bondye, gard lafwa dan Kris, annan lanmour pour lezot ek perseverans e tret lezot avek [douser, NW.]” (1 Timote 6:11) Sa lekspresyon “fer tou ou posib” i endike ki nou bezwen fer zefor. En tradiksyon Labib i tradwir li konman ‘met ou leker ladan.’ (New Testament in Modern English, par J. B. Phillips) Si ou fer zefor pour reflesir lo bann bon legzanp dan Parol Bondye, zot kapab reste grave dan ou lespri, zis parey en keksoz ki’n ganny mete dan ou. Zot pou form ou personnalite e gid ou.—Zak 1:21.
21. (a) Akoz nou devret fer tou nou posib pour devlop ladouser? (b) Ki nou pou diskite dan nou prosen lartik?
21 Lafason ki nou kondwir nou anver lezot, i montre ki kantite nou pe fer dan sa domenn. Disip Zak ti demande: “Eski parmi zot i annan ki posed lasazes avek lentelizans? I devre prouv li par son bon lavi, par son bann bon laksyon, fer avek douser ek sazes.” (Zak 3:13) Ki mannyer nou kapab demontre ladouser dan lakour, dan predikasyon, e dan kongregasyon? Nou prosen lartik pou ed nou dan sa domenn.
Revizyon
• Ki ou’n aprann lo ladouser atraver legzanp
• Zeova?
• Zezi?
• Moiz?
• Abigail?
• Akoz nou bezwen fer tou nou posib pour devlop ladouser?
[Kestyon]
[Portre lo paz 20]
Akoz Zeova ti get lofrann Abel avek faver?
[Portre lo paz 21]
Zezi ti montre ki ladouser ek limilite i mars ansanm
[Portre lo paz 22]
Moiz in demontre en bon legzanp an sa ki konsern ladouser