Montre “Ladouser Anver Tou Dimoun”
Montre “Ladouser Anver Tou Dimoun”
“Kontinyen rapel zot . . . pour rezonnab, e montre ladouser anver tou dimoun.”—TIT 3:1, 2, NW.
1. Akoz i pa touzour fasil pour montre ladouser?
“IMIT mwan parey mwan mon imit Kris,” zapot Pol ti ekrir. (1 Korentyen 11:1) Tou serviter Bondye denozour i fer bokou zefor pour ekout sa konsey. I vre ki i pa fasil. Sa i akoz nou’n erit avek nou premye paran bann dezir egois ek bann personnalite ki pa an akor avek legzanp Kris. (Romen 3:23; 7:21-25) Toudmenm, nou tou nou kapab reisi montre ladouser si nou fer zefor. Me i pa sifi pour depan zis lo nou determinasyon. Kwa ki neseser ankor?
2. Ki mannyer nou kapab montre “ladouser anver tou dimoun”?
2 Sa kalite ladouser ki Bondye i demann nou pour kiltive i form parti fri lespri sen. Pli nou swiv gidans lafors aktif Bondye, pli son fri pou vin aparan dan nou personnalite. Se par sa mwayen selman ki nou pou kapab montre “ladouser” anver tou dimoun. (Tit 3:2, NW ) Annou vwar konman nou kapab imit legzanp Zezi e vin en sours rekonfor pour bann dimoun ki nou rankontre toulezour.—Matye 11:29; Galat 5:22, 23.
Dan Lafanmiy
3. Ki sitiasyon ki egziste dan lafanmiy ki reflekte lespri lemonn?
3 Lafanmiy i en domenn kot ladouser i vreman enportan. Lorganizasyon Mondyal pour Lasante i estimen ki vyolans dan lafanmiy i prezant en pli gran risk pour lasante bann madanm ki aksidan trafik ansanm ek malarya. Par egzanp, an Lonn, Langleter, en kar dan tou bann krim ki’n ganny raporte, i vyolans domestik. Souvannfwa, lapolis i rankontre bann dimoun ki eksprim zot santiman par “kriye ek lensilt.” Sa ki pli pir ankor, se ki serten koup in les “move santiman” afekte zot relasyon. I tris pour dir ki tousala i reflekte ‘lespri lemonn’ e zot pa akseptab dan bann fanmiy Kretyen.—Efezyen 4:31; 1 Korentyen 2:12.
4. Ki lefe ladouser i kapab annan lo lafanmiy?
4 Pour sirmont bann tandans lemonn, nou bezwen lespri Bondye. “La kot Lespri Senyer i ete, i annan laliberte.” (2 Korentyen 3:17) Lanmour, labonte, kontrol lo zot lekor, ek pasyans i fer bann koup enparfe pli ini ansanm. (Efezyen 5:33) Ladouser i fer latmosfer pli gou e i fer en gran diferans avek sa lespri dispit zanmen fini ki afekte bokou fanmiy. Sa ki en dimoun i dir i enportan, me se lafason ki i eksprim son lekor ki montre son santiman ek latitid par deryer sa ki i’n dir. Kan bann lenkyetid ek traka i ganny eksprimen avek douser, sa i redwir presyon. Lerwa saz, Salomon, ti ekrir: “En larepons, letan i ganny donnen avek douser, i detourn lakoler, me en parol ki koz douler i fer monte lakoler.”—Proverb 15:1.
5. Ki mannyer ladouser i kapab ede dan en lakour kot manm fanmiy pa dan menm larelizyon?
5 Ladouser i enportan sirtou dan en lakour kot manm fanmiy pa dan menm larelizyon. Letan i ganny demontre ansanm avek bann bon aksyon, i kapab ede pour fer bann ki opoze aksepte laverite. Pyer ti konsey bann madanm Kretyen: “Soumet sakenn avek son msye, pour ki, par zot kondwit, si serten parmi zot msye pa obei parol Bondye, zot a kapab kanmenm aksepte lafwa san laparol. Sa bann zonm i a war ki zot kondwi zot dan en fason drwat e avek respe. Zot pa devre rod montre zot labote par zot laparans: avek seve trese, bann bizou an-or, zoli lenz ki kout ser. Me zot labote i devret en labote enteryer, dan leker e ki pa kapab disparet, labote en lespri [douser, NW ] e trankil ki annan en gran valer devan Bondye.”—1 Pyer 3:1-4.
6. Ki mannyer montre ladouser i afermi relasyon ant paran ek zanfan?
6 Relasyon ant paran ek zanfan i kapab vin difisil, sirtou letan napa ase lanmour pour Zeova. Me dan tou fanmiy Kretyen i annan sa nesesite pour montre ladouser. Pol ti donn sa konsey bann papa: “Pa eksit lakoler zot zanfan, me okontrer, elve zot dan en ledikasyon ek lenstriksyon Senyer.” (Efezyen 6:4) Kan ladouser i dominen dan en fanmiy, sa i afermi relasyon ant paran ek zanfan. Dean ki sorti dan en fanmiy senk zanfan, i rapel sa konsernan son papa: “Papa ti annan en karakter dous. Mon pa rapel si mon’n deza ganny okenn diskisyon avek li, menm letan mon ti en adolesan. Menm kan i ti ankoler, i ti reste touzour kalm. Parfwa i ti anvoy mwan dan mon lasanm oubyen i pa ti les mwan fer serten aktivite ki mon ti kontan. Me nou pa ti zanmen dispit. I pa ti zis nou papa. I ti nou zanmi osi, e nou pa ti anvi dezapwent li.” Ladouser i vreman ranforsi relasyon ant paran ek zanfan.
Dan Predikasyon
7, 8. Akoz i enportan pour montre ladouser dan predikasyon?
7 En lot domenn kot ladouser i enportan i dan predikasyon. Letan nou partaz sa bon nouvel Rwayonm avek lezot, nou zwenn dimoun avek diferan karakter. Serten i byen kontan pour antann sa mesaz lespwar ki nou anmennen. Lezot i kapab pa byen resevwar sa mesaz pour en rezon ou en lot. Se la kot ladouser i vreman kapab ed nou akonpli nou devwar pour rann temwannyaz ziska tou bann landrwa pli elwannyen lo later.—Akt 1:8; 2 Timote 4:5.
8 Zapot Pyer ti ekrir: “Rann glwar dan zot leker Kris konman zot Senyer. Zot devre touzour pare pour donn en repons bann ki demann zot leksplikasyon konsernan lesperans ki dan zot. Me fer li avek [douser, NW ] ek respe.” (1 Pyer 3:15, 16) Parski nou respekte Kris konman nou Legzanp, nou veye pour montre ladouser ek respe letan nou temwanny avek bann ki koz dan en fason dir avek nou. Sa fason fer i souvan anmenn bann rezilta remarkab.
9, 10. Rakont en leksperyans pour montre lenportans ladouser dan predikasyon.
9 Letan madanm Keith ti ouver laport, li Keith i ti reste deryer. Kan son madanm ti aprann ki son viziter i en Temwen Zeova, avek lakoler i ti akiz bann Temwen konmkwa zot kriyel anver zot zanfan. Sa frer ti reste kalm. Avek douser, i ti reponn: “Mon dezole ki ou santi koumsa. Eski ou ti a permet mwan silvouple pour montre ou ki bann Temwen Zeova i panse?” Keith ki ti pe ekout konversasyon par deryer, ti vin kot laport e fer sa frer ale.
10 Plitar, sa koup ti konmans regrete akoz zot ti’n tret zot viziter dan en fason dir. Son douser ti’n tous zot. Zot ti sirprann pour vwar sa frer retournen en semenn plitar. Keith ek son madanm ti les li eksplik rezon biblik pour sa ki i ti krwar. Zot ti fer sa remark swivan: “Pandan sa de lannen ki ti swiv, nou ti ekout en kantite sa ki lezot Temwen ti dir.” Zot ti aksepte en letid Labib, e avek letan zot tou le de zot ti batize pour senboliz zot dedikasyon avek Zeova. Pa sa i en bon rezilta pour sa Temwen ki premye fwa ti pas kot Keith ek son madanm! Sa Temwen ti zwenn sa koup plizyer lannen plitar e dekouver ki zot ti aprezan son frer ek ser spirityel. Ladouser i akonpli keksoz.
11. Ki mannyer ladouser i kapab ouver semen pour en dimoun aksepte laverite?
11 Leksperyans ki Harold ti pas ladan letan i ti en solda, ti fer li vin en dimoun rankinen e i ti dout legzistans Bondye. Problenm Harold ti vin pli grav letan i ti ganny en aksidan okazyonnen par en drayver sou, ki ti fer li andikape. Kan bann Temwen Zeova ti pas kot li, Harold ti dir zot aret vizit li. Me en zour, en Temwen ki apel Bill ti pe vizit en dimoun enterese ki reste akote Harold. I ti manke e al tap laport Harold. Harold ki ti pe tenir son lekor avek de baton ti ouver laport. Deswit, Bill ti demann en leskiz e eksplike ki i ti pe vizit en lot dimoun ki reste lanmenm obor li. Ki ti reaksyon Harold? Bill pa ti konnen ki Harold ti’n vwar en nouvel lo televizyon kot bann Temwen ti pe travay ansanm pour konstri en Lasal Rwayonm dan en pti gin letan. I ti telman enpresyonnen pour vwar sitan en kantite dimoun pe travay ansanm dan linite, ki sa ti’n sanz son latitid anver bann Temwen. Sa leskiz ki Bill ti demann li byen zantiman ek sa ladouser agreab ki i ti annan ti tous Harold. I ti deside pour aksepte vizit bann Temwen. I ti etidye Labib, fer progre, e vin en serviter Zeova.
Dan Kongregasyon
12. Ki bann latitid lemonn bann manm kongregasyon i devret evite?
12 En lot domenn kot ladouser i enportan se dan kongregasyon Kretyen. Konfli i komen dan sa sosyete ki nou pe viv ladan ozordi. Deba, largiman, e dispit zanmen fini lo en senp pti keksoz, in vin normal pour bann dimoun ki get lavi parey lemonn i gete. Parfwa, sa latitid lemonn i antre dan kongregasyon Kretyen e i anmenn diskisyon ek kankan. Bann frer responsab i santi zot tris kan zot bezwen tret sa bann sitiasyon. Toudmenm, lanmour pour Zeova e pour zot bann frer ek ser i motiv zot pour esey ed bann ki pe al dan en move semen pour sanze.—Galat 5:25, 26.
13, 14. Ki i kapab arive letan nou “ansenny avek dou[s]er bann ki opoz” nou?
13 Dan premye syek, Pol ek son konpanyon Timote ti rankontre difikilte avek serten dan kongregasyon. Pol ti averti Timote kont bann frer ki parey bann resipyan ki pa ganny servi pour bann lokazyon spesyal. Pol ti rezonn avek li: “Serviter Senyer pa devret en dimoun ki fer kerel. Okontrer, i devre byen avek tou dimoun, kapab ansennyen e annan pasyans. I devre kapab ansenny avek dou[s]er bann ki opoz li.” Si nou gard nou ladouser menm kan serten i provok nou, sa i kapab fer zot reegzamin zot kritik. An retour, parey Pol i ekrir, Zeova i kapab “donn zot lokazyon sanz zot fason viv e konn laverite.” (2 Timote 2:20, 21, 24, 25) Remarke ki Pol i relye ladouser avek labonte ek pasyans.
14 Pol ti met an pratik sa ki i ti ansennyen. Kan i ti pe tret en sitiasyon ki ti enplik “bann zapot ki pas zot pour siperyer” dan kongregasyon Korentyen, i ti sipliy sa bann frer: “Mwan Pol, parey zot dir, ki ranpli avek limilite devan zot e ki ranpli avek lardyes kan mon lwen avek zot, mon fer sa siplikasyon par ladouser ek labonte Kris.” (2 Korentyen 10:1; 11:5) Pol ti vreman imit Kris. Remarke ki i ti sipliy sa bann frer “par ladouser” Kris. Alor, i ti evit en latitid arogan e dominer. Son siplikasyon ti san dout atir bann dan kongregasyon ki ti annan en leker sansib. I ti redwir bann tansyon ki ti annan antre zot e ede etabli lape ek linite dan kongregasyon. Eski sa pa i en latitid ki nou tou nou kapab fer zefor pour imite? Bann ansyen sirtou zot bezwen imit Kris ek Pol dan zot fason azir.
15. Akoz ladouser i enportan kan nou pe donn en konsey?
15 Byensir, pa zis letan lape ek linite kongregasyon i ganny menase ki nou annan sa responsabilite pour ed lezot. Avan ki konfli i arive ant bann frer ek ser, zot bezwen ganny bann konsey donnen avek lanmour. Pol ti sipliye: “Frer, si en dimoun i pran en fo pa san ki i realize, zot ki annan kalifikasyon spirityel, esey redres sa dimoun.” Me konman sa i devret ganny fer? “Dan en lespri ladouser. Anmenmtan vey zot lekor pangar zot osi zot a ganny tante.” (Galat 6:1, NW ) I pa toultan fasil pour mentenir “en lespri ladouser” sirtou akoz tou Kretyen, enkli bann ki’n ganny apwente dan kongregasyon, i ganny afekte par bann move tandans. Toudmenm, se ladouser ki pou ed sa dimoun ki pe al dan en move semen aksepte pour fer bann sanzman neseser.
16, 17. Kwa ki kapab ede sirmont okenn ezitasyon pour aplik konsey?
16 Dan langaz Grek, sa mo ki’n ganny tradwir “redres” ti kapab osi refer avek redresman en lezo kase. Sa i en prosedir ki fer mal. En dokter ki pe redres en lezo kase, i reasir sa pasyan e koz dan en fason pozitif lo byenfe ki sa prosedir i anmennen. Son fason kalm i rekonfortan. I dir en pti parol avan i konmans son prosedir pour ede soulaz bann moman pli fer mal. Pareyman, en redresman spirityel i kapab fer mal. Me ladouser pou ed sa dimoun pli aksepte li. Dan sa fason, bann bon relasyon i a ganny reetablir e sa dimoun ki ti pe al dan en move direksyon i a ganny led pour sanze. Menm si okonmansman sa dimoun i tant pour reziste sa konsey, ladouser delapar sa enn ki pe donn li konsey, i kapab sirmont okenn ezitasyon pour ekout en bon konsey baze lo Labib.—Proverb 25:15.
17 Kan nou pe ede redres en dimoun, i toultan annan tandans ki sa konsey i kapab ganny pran konman en kritik. En ekriven ti met li koumsa: “Napa en letan kot nou pli annan sa tandans pour krwar nou ki la, ki ler nou pe konsey lezot. Dan sa ka, limilite i esansyel.” Kiltiv ladouser ki sorti dan limilite, pou ed en Kretyen ki pe donn konsey evit sa tandans.
“Anver tou Dimoun”
18, 19. (a) Akoz bann Kretyen i kapab vwar li difisil pour montre ladouser anver bann lotorite sa lemonn? (b) Kwa ki pou ed bann Kretyen montre ladouser anver bann ki annan serten lotorite, e ki rezilta sa i kapab anmennen?
18 Bokou dimoun pa vwar li fasil pour montre ladouser anver bann dimoun ki annan serten lotorite dan lemonn. I vre ki fason azir serten dimoun ki byen plase, i en pe dir e mank konsiderasyon pour lezot. (Eklezyast 4:1; 8:9) Toudmenm, nou lanmour pour Zeova pou ed nou rekonnet ki son lotorite i pli o, e anmenmtan donn bann lotorite gouvernman sa soumisyon ki zot merite. (Romen 13:1, 4; 1 Timote 2:1, 2) Menm letan bann ki annan lotorite i sey limit nou ladorasyon ki nou donn Zeova, nou sey rod lezot fason ki disponib pour rann li glwar.—Ebre 13:15.
19 Nou pa pou adopte en latitid agresif dan okenn sirkonstans. Nou sey nou mye pour rezonnab, me anmenmtan nou pa pou zanmen sanz nou bann prensip drwat. Sa i permet nou bann frer kontinyen zot minister dan 234 pei atraver lemonn. Nou ekout konsey Pol pour “soumet e obeir bann gouvernman ek lotorite konman dirizan, pour pare pour fer tou bon travay, pour pa malparl personn, pour pa vin agresif, me pour rezonnab, e montre ladouser anver tou dimoun.”—Tit 3:1, 2, NW.
20. Ki rekonpans i annan pour bann ki annan ladouser?
20 I annan en kantite benediksyon ki’n ganny rezerve pour bann ki annan ladouser. Zezi ti dir: “Byennere bann ki dou, akoz zot pou posed later.” (Matye 5:5) Pour bann frer swazir Kris, kontinyen montre ladouser i garanti zot lazwa ek privilez pour renny lo later atraver Rwayonm. Pour sa “gran lafoul” ‘lezot mouton,’ zot kontinyen montre ladouser e esper avek enpasyans pour viv dan Paradi lo later. (Revelasyon 7:9; Zan 10:16; Psonm 37:11) Pa lavenir i rezerv bann keksoz merveye pour nou! Alors, annou pa zanmen negliz sa rapel ki Pol ti donn bann Kretyen an Efez: ‘Mwan ki prizonnyen akoz mon servi Senyer, mon sipliy zot pour anmenn en lavi ki dapre sa ki Bondye i oule zot viv, ler i ti apel zot. Zot bezwen montre limilite ek ladouser.’—Efezyen 4:1, 2.
Revizyon
• Ki byenfe nou gannyen kan nou montre ladouser
• dan lafanmiy?
• dan predikasyon?
• dan kongregasyon?
• Ki promes i annan pour bann ki annan en karakter dous?
[Kestyon]
[Portre lo paz 25]
Ladouser i enportan sirtou dan en lakour kot manm fanmiy pa dan menm larelizyon
[Portre lo paz 25]
Ladouser i fortifye relasyon antre fanmiy
[Portre lo paz 27]
Defann ou lafwa avek douser ek profon respe
[Portre lo paz 28]
Konsey ki ganny donnen avek douser, i kapab ed sa enn ki pe al dan en move semen