Repa Senyer I annan en gran Sinifikasyon pour ou

ESKI Repa Senyer i annan lenportans ek sinifikasyon dirab pour ou? Pour reponn sa kestyon, annou premyerman vwar ki sinifikasyon Zezi Kri ti atase avek sa levennman spesyal.

Le 14 Nizan, 33 Nou Lepok, Zezi ti reini aswar avek son 12 zapot dan en lasanm anler an Zerizalenm pour selebre Lapak ki ti ganny fer tou le zan. Apre ki zot ti’n fini manz repa Lapak, Zida ti sorti e ale pour trai Zezi. (Zan 13:21, 26-30) Avek sa 11 zapot ki ti reste, Zezi ti entrodwir “repa Senyer.” (1 Korentyen 11:20) I osi ganny apele Memoryal, akoz Zezi ti demann son bann disip: “Fer sa an mon souvenir.” Sa i sel levennman ki bann Kretyen ti ganny demande pour obzerve.—1 Korentyen 11:24.

Dapre diksyonner Webster, en memoryal i en keksoz ki ed dimoun pour gard an memwar ouswa pour rapel en levennman oubyen en dimoun. Dan bokou pei, dimoun i enstal en moniman oubyen dedye en zour spesyal pour rapel en dimoun oubyen en keksoz enportan. Tandis ki Zezi li, i ti entrodwir en repa ki ti pou ganny servi konman en led pour dimoun rapel li. Sa repa ti pou ed son bann disip pour gard an memwar sinifikasyon profon sa levennman. Pour bann fitir zenerasyon, sa repa memoryal ti pou ed bann ki asiste, rapel sinifikasyon profon sa ki Zezi ti fer sa zour swar, sirtou konsernan bann lanblenm oubyen senbol ki i ti servi. Ki lanblenm Zezi ti servi, e ki zot sinifikasyon? Annou egzamin resi Labib konsernan sa ki ti arive sa zour swar lannen 33 Nou Lepok.

Sinifikasyon Dipen ek Diven

“I ti pran dipen, e apre ki i ti’n remersi Bondye i ti kas li an morso e i ti donn zot an dizan, ‘Sa [i reprezant, NW ] mon lekor ki’n ganny ofer pour zot. Fer sa an mon memwar.’ ”—Lik 22:19.

Ler Zezi ti pran sa dipen e dir ‘sa i reprezant mon lekor,’ i ti pe endike ki sa dipen san lelven ti reprezant oubyen i en senbol son prop lekor imen ki ti san pese, ki i ti donnen “pour ki lemonn i viv.” (Zan 6:51) Kantmenm serten tradiksyon Labib i dir “Sa i [Grek, es·tinʹ] mon lekor,” Thayer’s  Greek-English Lexicon of the New Testament i dir ki sa verb i souvan vedir “reprezant, sinifye, e endike.” I donn sa lide pe reprezante oubyen pe senbolize.—Matye 26:26.

I menm zafer avek sa lakoup diven. Zezi ti dir: “Sa lakoup [i reprezant, NW ] nouvo lalyans ki’n ganny sele par mon disan, verse pour zot.”—Lik 22:20.

Dan resi Matye, Zezi ti dir konsernan sa lakoup: “Sa [i reprezant, NW ] mon disan, disan lalyans ki’n koule pour bokou, pour pardon pese.” (Matye 26:28) Zezi ti pe servi sa diven dan sa lakoup konman en reprezantasyon, oubyen senbol, son prop disan. Son disan ki i ti verse ti sa fondasyon pour en “nouvo lalyans” pour bann Kretyen swazir. Zot sa bann ki pou renny konman lerwa ek pret avek li dan lesyel.—Zeremi 31:31-33; Zan 14:2, 3; 2 Korentyen 5:5; Revelasyon 1:5, 6; 5:9, 10; 20:4, 6.

Sa diven dan sa lakoup ti osi servi konman en rapel ki disan Zezi, ki’n ganny verse i fer li posib pour nou ganny ‘pardonnen nou pese.’ Sa i fer posib pour bann ki pran lanblenm ganny apele pour viv dan lesyel konman bann zeritye avek Kris. Pour sa rezon, ki zis sa pti gin ki’n ganny apele pour viv dan lesyel, ki pran dipen ek diven zour Memoryal.—Lik 12:32; Efezyen 1:13, 14; Ebre 9:22; 1 Pyer 1:3, 4.

Me ki lespwar bann disip Zezi ki pa form parti dan sa nouvo lalyans i annan? Zot ‘lezot mouton’ Senyer Zezi, e zot lespwar se pour viv pour touzour dan paradi lo later. Zot pa pou diriz avek Kris dan lesyel. (Zan 10:16; Lik 23:43; Revelasyon 21:3, 4) Konman “en gran lafoul” bann Kretyen fidel ki pe “ofer [Bondye] ladorasyon lizour konman aswar,” zot kontan pour obzerv Repa Senyer avek lapresyasyon. Annefe, zot parol ek aksyon i deklare: “Nou delivrans i sorti kot nou Bondye ki asize lo tronn ek kot Lanyo!”—Revelasyon 7:9, 10, 14, 15.

Ki Kantite Fwa i devret ganny fer?

“Fer sa an mon memwar.”—Lik 22:19.

Ki kantite fwa nou devret selebre Memoryal pour nou gard an memwar lanmor Kris? Zezi pa ti spesifye. Me vi ki i ti entrodwir Repa Senyer le 14 Nizan, ki ti zour Lapak, ki bann Izraelit ti selebre tou le zan, i evidan ki Zezi ti anvi ki Memoryal i ganny obzerve dan sa menm fason. Parey bann Izraelit ti selebre zot delivrans anba lesklavaz Lezip tou le zan, demenm bann Kretyen i selebre zot delivrans anba pese ek lanmor tou le zan.—Egzod 12:11, 17; Romen 5:20, 21.

Sa prensip pour fer en selebrasyon annyel pour komemor en levennman enportan i pa en keksoz ki drol. Par egzanp, konsider ler en koup i selebre zot lanniverser maryaz oubyen ler en nasyon i komemor en levennman enportan dan son listwar. Normalman, sa komemorasyon i ganny fer enn fwa par an, zour lanniverser sa levennman enportan. Pour plizyer syek apre lanmor Kris, bokou Kretyen ti ganny apele Bann Katorzyenm, akoz zot ti komemor lanmor Zezi enn fwa par an, tou le 14 Nizan.

 Senp e annan gran Lenportans

Zapot Pol ti eksplike ki par obzerv Repa Senyer, sa ti pou permet bann disip Zezi kontinyen “anons lanmor Senyer Zezi ziska ki i vini.” (1 Korentyen 11:26) Alor, sa komemorasyon ti pou konsantre lo rol prensipal ki Zezi, par son lanmor, ti zwe dan lakonplisman plan Bondye.

Par son fidelite ziska son lanmor, Zezi Kri ti prouve ki Zeova i en Kreater ki saz, en Dirizan ki drwat e annan lanmour. Kontrerman avek sa ki Satan ti dir, Zezi ti demontre ki i ti diferan avek Adan, par prouve ki i posib pour en imen reste fidel avek Bondye, menm anba bokou presyon.—Zob 2:4, 5.

Repa Senyer i osi fer nou kontinyen apresye lanmour dezenterese Zezi. Menm si i ti rankontre bann leprev sever, Zezi ti parfetman obeir son Papa. Alor i ti kapab ofer son prop lavi imen parfe pour pey sa gro det ki pese Adan ti’n anmennen. Parey Zezi li menm ti eksplike, i’n vin pour “donn son lavi konman pri pour liberasyon bokou dimoun.” (Matye 20:28) An rezilta sa, tou dimoun ki met lafwa dan Zezi i kapab ganny pardonnen zot pese e resevwar lavi eternel an armoni avek plan orizinal Zeova pour limanite.—Romen 5:6, 8, 12, 18, 19; 6:23; 1 Timote 2:5, 6. *

Tousala i osi montre sa gran labonte ki Zeova i annan par fourni delivrans pour limanite. Labib i dir: “La ki mannyer Bondye in montre son lanmour pour nou: in anvoy son sel Garson dan lemonn pour ki par li nou ganny lavi. Lala ki vedir lanmour: Se pa nou ki’n kontan Bondye, me plito se li ki’n kontan nou e ki’n anvoy son Garson konman en viktim pour ki par li nou ganny pardon nou bann pese.”—1 Zan 4:9, 10.

Wi, obzerv Memoryal i vreman en levennman merveye! I senp e i fasil pour organize dan lemonn antye anba diferan sirkonstans. Anmenmtan, sa bann senbol pou reste konman en rapel profon pour en gran peryod letan.

Son Sinifikasyon pour ou

Lanmor sakrifisyel nou Senyer Zezi Kri ti kout Zezi ek son Papa, Zeova, bokou. Konman  en zonm parfe, Zezi pa ti pou mor sa lanmor ki nou tou nou’n erite. (Romen 5:12; Ebre 7:26) I ti annan sa drwa pour kontinyen viv pour touzour. Personn pa ti pou kapab pran son lavi, menm par lafors san ki li i ti permet sa. I ti dir: “Personn pa pran mon lavi, me mon donn li par mon prop volonte.”—Zan 10:18.

Pourtan, Zezi ti volonterman ofer son lavi imen parfe konman en sakrifis afen ki “par son lanmor, i detri sa enn ki annan pouvwar donn lanmor, setadir dyab, e delivre bann ki, akoz zot lafreyer lanmor ti viv konman lesklav pandan tou zot lavi.” (Ebre 2:14, 15) Lanmour dezenterese ki Zezi i annan ti osi evidan par lafason ki i ti pare pour mor. I ti konn byen fason ki i ti pou bezwen soufer e mor.—Matye 17:22; 20:17-19.

Memoryal i osi rapel nou pli gran lekspresyon lanmour ki’n deza ganny montre par nou Papa dan lesyel, Zeova. Sa ti vreman fer Zeova soufer en kantite, li ki “ranpli avek labonte ek konpasyon,” pour vwar e antann “leokri ek larm” Zezi dan zarden Zetsemane, vwar li ganny bate britalman, kloute lo poto dan en fason kriyel, e vwar son Garson pe langir. (Zak 5:11, not anba lo paz dan Traduction du monde nouveau; Ebre 5:7; Zan 3:16; 1 Zan 4:7, 8) Ziska konmela, plizyer syek apre lanmor Zezi, bokou dimoun i santi zot tris ler zot reflesir lo lanmor Zezi.

Zis mazinen, Zeova ek Zezi Kri ti pey en sitan gran pri pour nou bann peser! (Romen 3:23) Toulezour nou konsyan ki nou bann peser e ki nou enparfe. Me si nou annan lafwa dan sakrifis ranson Zezi, nou kapab demann Bondye pardon. (1 Zan 2:1, 2) Sa i fer li posib pour nou kapab koz avek konfyans ek en konsyans kler avek Bondye. (Ebre 4:14-16; 9:13, 14) Deplis, nou kapab rezwir sa lespwar pour viv dan en paradi lo later pour leternite. (Zan 17:3; Revelasyon 21:3, 4) Sa bann benediksyon ek lezot ankor, i posib gras a sa pli gran aksyon dezenterese delapar Zezi.

Montre Lapresyasyon pour Repa Senyer

Repa Senyer i definitivman en laprev merveye ‘sa gran lagras Bondye.’ Laranzman sakrifis ranson ki Zeova in fourni, ki’n posib gras a lanmour dezenterese Zezi, i vreman son “gran don.” (2 Korentyen 9:14, 15) Eski sa labonte ki Bondye in demontre atraver Zezi Kri pa fer ou santi en lapresyasyon ek rekonesans profon?

Nou asire ki zot fer ou annan sa santiman. Alor, nou kordyalman envit ou pour zwenn ansanm avek Temwen Zeova pour komemor lanmor Zezi. Sa lannen, Memoryal pou ganny fer le 16 Avril, apre soley kouse. Bann Temwen Zeova kot ou reste pou annan plezir enform ou ler ek landrwa egzakt sa levennman tre enportan.

[Not anba lo paz]

[Bwat/Portre lo paz 6]

“SA I MON LEKOR” OUBYEN “SA I REPREZANT MON LEKOR” LEKEL KI BYEN?

Kan Zezi ti dir, “mwanmenm laport” e “mwanmenm vre pye rezen,” personn pa ti mazinen ki Zezi ti literalman en laport oubyen literalman en pye rezen. (Zan 10:7; 15:1) Pareyman, ler Nouvo Testaman i sit Zezi pe dir: “Sa lakoup i nouvo lalyans,” nou pa retir konklizyon ki sa lakoup li menm ti literalman sa nouvo lalyans. Menm zafer osi, ler i ti dir ki sa dipen ‘ti’ son lekor, i evidan ki sa dipen ti reprezant, oubyen senboliz, son lekor. Pour sa menm rezon, ki tradiksyon Charles B. Williams i dir: “Sa i reprezant mon lekor.”—Lik 22:19, 20.

[Portre lo paz 5]

Sa dipen san lelven ek sa diven, i bann senbol apropriye lekor san pese Zezi ek son disan ki i ti verse

[Portre lo paz 7]

Memoryal i rapel nou sa gran lanmour ki Zeova Bondye ek Zezi Kri ti demontre