Zenn​—Eski zot pe progrese spirityelman?

KAN i mazin son bann lannen dan lekol segonder, Hideo i dir: “Menm si mon ti pe asiste bann renyon Kretyen, mon ti napa sa dezir senser pour servi Zeova. Tanzantan mon ti mazinen ki mannyer ti pou ete si mon ti popiler parmi mon bann kanmarad lekol e pe marse byen vantar lo semen avek en bouldou. Mon ti napa lobzektif spesifik, e mon pa ti enterese pour progrese spirityelman.” Parey Hideo, i paret ki bokou zenn napa en bi dan zot lavi, zot napa okenn dezir pour akonpli okenn lobzektif ki vo lapenn oubyen pour fer okenn progre.

Si ou en zenn, i tre probab ki ler ou fer sport oubyen enplike dan en pastan, sa i rann ou eksite. Me kekfwa ou pa santi menm parey konsernan keksoz spirityel. Eski bann lobzektif spirityel i kapab fer ou eksite? Reflesir lo parol sa psalmis: “Rapel Zeova i diny konfyans, i fer sa ki napa leksperyans saz. . . . Komannman Zeova i prop, i fer lizye briye.” (Psonm 19:7, 8) Parol Bondye i kapab diriz “sa ki napa leksperyans” pour azir dan en fason saz, ‘fer son lizye briye.’ Wi, ou kapab trouv bokou plezir dan bann keksoz spirityel. Me kwa ki neseser pour ou santi koumsa? Kote ou devret konmanse?

Motive pour servi Bondye

Premyerman, fodre ki ou menm ou motive. Konsider ka zenn Lerwa Yosiya an Zida. Kan liv Lalwa Zeova ti ganny dekouver dan tanp, Yosiya ti fer lir sa liv lalwa e i ti ganny touse oprofon par sa ki i ti tande. An rezilta, “Yosiya ti retir tou move keksoz dan pei ki ti pour bann garson Izrael.” (2 Kronik 34:14-21, 33) Sa ki Yosiya ti tande ler Parol Bondye ti ganny lir ti motiv li pour fer bokou plis pour promot ladorasyon pir.

Ou osi ou kapab kiltiv en dezir pour servi Zeova par lir Labib regilyerman e reflesir lo sa ki ou lir. Se sa ki ti motiv Hideo. I ti konmans frekant en pionye pli aze, en minis aplentan Temwen Zeova. Sa pionye ti etidye Labib seryezman, e i ti fer bokou zefor pour aplik lansennyman Labib dan son lavi. Legzanp sa pionye ti ankouraz Hideo en kantite, ki li osi i ti konmans fer parey e devlop en gran dezir pour servi Bondye ek lezot dimoun. Son progre spirityel ti fer son lavi annan en bi.

Lir Labib toulezour i kapab motiv bann zenn. Takahiro i eksplike: “Sak fwa ki mon ti al dormi e apre realize ki mon pa ti ankor fer  mon lektir Labib pour lazournen, mon ti pou leve e fer li. An rezilta, mon ti santi gidans Zeova. Lir Labib toulezour in ed mwan bokou pour progrese spirityelman. Mon ti konmans fer pionye ordiner zis apre ki mon ti’n ganny mon diplonm dan lekol segonder. Mon ti fer sa akoz mon ti determinen pour fer plis dan servis Zeova. Mon pe trouv bokou lazwa dan sa servis.”

Apard ki lir Labib, kwa ki kapab ed ou pour ranforsi ou motivasyon pour loue Zeova? Tomohiro ti ganny ansennyen laverite dan Labib avek son manman. I dir: “Se apre ki mon ti’n fer en letid oprofon dan sa liv La vie a bien un but a laz 19 an, ki mon ti santi mwan touse ofon mon leker par lanmour Zeova ek sakrifis Zezi. Sa lapresyasyon pour lanmour Bondye ti motiv mwan pour fer plis dan servis Zeova.” (2 Korentyen 5:14, 15) Parey Tomohiro, bokou zenn i ganny ankouraze pour fer progre spirityel par fer en letid personnel oprofon dan Labib.

Menm apre ki ou’n fer tousala, ki ou pou fer si ou pa ankor devlop en dezir senser pour servi Zeova? Eski i annan kelken ki ou kapab tourn ver li pour led? Zapot Pol ti ekrir: “Parski Bondye i travay dan zot, e i donn zot lavolonte e rann zot kapab akonpli tou.” (Filipyen 2:13) Si ou priy Zeova pour led, i pou volonterman donn ou son lespri sen. Son lespri sen pa pou selman donn ou lafors pour ‘rann ou kapab akonpli tou’ me i pou osi donn ou sa “lavolonte.” Sa i vedir ki lespri sen Bondye pou ogmant ou dezir pour fer ou mye dan servis Zeova e pou ed ou grandi spirityelman. Atoupri, met ou konfyans dan pwisans Zeova e fortifye ou leker!

Etablir ou prop Lobzektif

Enn fwa ki ou’n determinen pour servi Zeova pli plennman, ou bezwen etablir bann lobzektif personnel pour kapab progrese spirityelman. Mana, en zenn fiy Kretyen, ti dir: “Etablir bann lobzektif ti en gran led pour mwan. Olye retourn an aryer, mon ti kapab bouz pli devan avek kouraz. Avek mon bann lobzektif antet, mon ti senserman priy Zeova pour son gidans. Sa ti fer mwan kapab fer progre san ganny distrer avek lezot keksoz.”

Ou bann lobzektif i bezwen rezonnab e osi ki i posib pour ou akonpli zot. Lir en sapit Labib sak zour i kapab enn sa lobzektif. Ou osi kapab konmans en proze resers. Pour donn en legzanp avek en keksoz ki disponib an Angle, ou kapab etidye bann kalite Zeova ki ganny mansyonnen anba soutit “Qualities by Name” anba tit “Jehovah” dan Watch Tower Publications Index. I annan apepre 40 size ki ou kapab konsidere, e san dout sa resers pou fer ou vin pli pros avek Zeova e donn ou sa lanvi pour fer plis pour li. Lezot lobzektif ki ou kapab akonpli i enkli fer omwen en komanter dan sak renyon Kretyen kot lodyans i ganny demande pour partisipe. Esey konn omwen en manm kongregasyon pli byen dan sak renyon, e pa les en zour pase san priy Zeova e koz lo li avek lezot.

Si ou pa ankor met ou non dan Lekol Minister Teokratik ziska prezan, sa ti pou en bon lobzektif pour ou. Eski ou pe partisip dan predikasyon? Si non, petet ou kapab progrese pour vin en proklanmater non batize. Reflesir seryezman lo ou relasyon avek Zeova e dedye ou lavi avek li pou natirelman vin sa lot letap. Plizyer zenn i fer zot mye pour viv an akor avek zot dedikasyon par fikse en lobzektif pour fer servis aplentan e akonpli li.

 Menm si i bon pour annan bann lobzektif dan ou lavi, fer atansyon ki ou pa devlop en lespri konpetisyon. Ou pou trouv plis lazwa dan sa ki ou fer si ou pa konpar ou avek lezot.—Galat 5:26; 6:4.

Petet ou santi ki ou napa leksperyans e trouv li difisil pour etablir bann lobzektif rezonnab. Dan sa ka swiv sa konsey Labib: “Ouver ou zorey e antann parol bann ki annan lasazes.” (Proverb 22:17) Rod led avek ou paran oubyen avek lezot Kretyen matir. Byensir, bann paran ek lezot dimoun i devret rezonnab e ankourazan dan sa domenn. Si bann zenn i santi ki lezot pe met presyon lo zot pour akonpli en lobzektif ki’n ganny etablir pour zot, sa i kapab fer zot perdi lazwa e menm anpes zot etablir bann lobzektif. Sa ti arive avek en fiy, ki ti dir: “Mon paran ti etablir lobzektif enn apre lot pour mwan, tel parey met mon non dan Lekol Minister Teokratik, partisip dan predikasyon, batize, e vin en pionye. Mon ti fer tou sa ki mon ti kapab pour akonpli sak lobzektif. Kan mon ti akonpli en lobzektif, mon paran pa ti felisit mwan, me plito, zot ti met devan mwan en lot lobzektif pour mwan akonpli. An rezilta, mon ti toultan santi mwan ganny forse pour akonpli bann lobzektif. Mon ti nepli annan lafors e mon ti santi ki mon pa ti’n akonpli nanryen.” Kwa ki ti al mal? Tou sa bann lobzektif ti bon, me zot pa ti son prop lobzektif. Pour kapab reisi, fodre ki ou menm ou motive pour pran linisyativ pour etablir en lobzektif pour ou menm!

Mazin Zezi Kri. Kan i ti vin lo later, i ti konnen kwa ki son Papa, Zeova, ti ekspekte avek li. Fer lavolonte Zeova pa ti zis en lobzektif pour Zezi, me ti en misyon ki ti bezwen ganny akonpli. Konman Zezi ti vwar son travay ki i ti’n gannyen? I ti dir: “Mon nouritir se pour obeir lavolonte sa enn ki’n anvoy mwan, e fini travay ki i’n donn mwan.” (Zan 4:34) Zezi ti pran plezir pour fer lavolonte Zeova e i pa ti dezapwent son Papa. I ti parey nouritir pour Zezi e i ti trouv plezir ek satisfaksyon pour fini sa travay ki ti ekspekte avek li. (Ebre 10:5-10) Ou osi ou kapab trouv plezir kan ou byen motive pour fer sa ki ou paran i ankouraz ou pour fer.

Pa aret fer sa ki byen

Enn fwa ki ou annan en lobzektif antet, travay dir pour akonpli li. Galat 6:9 i dir: “Annou pa aret fer sa ki byen, parski nou pou rekolte kan letan i a’n arive, si nou pa arete.” Pa depan zis lo ou prop lafors oubyen abilite. I tre probab ki ou pou rankontre bann lobstak e parfwa ou kapab menm tanporerman santi ki ou pa pe reisi. Me Labib i asir nou: “Dan tou ou semen pran [Bondye] an konsiderasyon, e li i pou fer drwat tou ou santye.” (Proverb 3:6) Zeova pou soutenir ou anmezir ki ou travay dir pour akonpli ou bann lobzektif spirityel.

Wi, par devlop sa dezir pour servi Zeova e par akonpli bann lobzektif spirityel, ou pou kapab fer ‘tou dimoun war ou progre.’ (1 Timote 4:15) An fezan sa, ou pou rezwir en lavi ki fer sans dan servis Bondye.

[Portre lo paz 31]

Lir Labib e reflesir lo sa ki ou lir pou motiv ou pour servi Zeova

[Portre lo paz 32]

Zezi ti akonpli tou sa ki son Papa ti ekspekte avek li