Bann Zenn Ki Fer Zeova Kontan

Sa de lartik letid in ganny prepare spesyalman pour bann zenn Temwen Zeova. Alors, nou ankouraz bann zenn pour byen etidye sa de lartik e byen partisipe dan letid Latour Veyer sa zour.

“Vin saz, mon garson, e rezwir mon leker, pour ki mon a kapab reponn sa enn ki pe provok mwan.”—Proverb 27:11.

1, 2. (a) Lefe ki en dimoun i ganny atire par bann keksoz dan lemonn, eski sa i vedir ki i pa’n ne pour vin en Kretyen? (Romen 7:21) (b) Ki ou aprann atraver legzanp Azaf? (Vwar bwat lo paz 7.)

METON ou’n al aste en lenz anvil. Ou pe pran letan e get bann lenz. Toutakou, ou vwar en lenz ki deswit atir ou latansyon. I zis sa kouler ki ou kontan e son lanmod pou al byen lo ou. Deplis, i vreman bon marse. Me apre, letan ou get sa lenz en pe pli pre, ou remarke ki i en pe plim plimen lo son bor e ki i pa’n byen koud. Menm si sa latwal i zoli, i pa en bon kalite. Eski ou ti pou gaspiy ou larzan dan nanryen ditou?

² Sa legzanp i parey en sitiasyon ki ou kapab fer fas avek konman en zenn Kretyen. Premye kou, sa bann keksoz dan lemonn i kapab vreman atiran pour ou, zis parey sa lenz. Par egzanp, petet ou bann kanmarad lekol i al parti, pran drog, bwar, annan ‘boyfriend’ ek ‘girlfriend’ e menm sorti avek zot san marye. Eski parfwa ou santi ou atire par sa stil lavi? Eski ou anvi gout kantmenm en pti gin sa swadizan liberte? Si i leka, pa taye pour konklir ki ou en move dimoun e ki ou pa’n ne pour vin en Kretyen. Apre tou, Labib i admet ki lemonn i kapab vreman atiran, menm pour en dimoun ki anvi fer plezir Bondye.—2 Timote 4:10.

3. (a) Akoz i pa vo lapenn aksepte sa bann keksoz ki lemonn pe ofer? (b) Ki mannyer en Kretyen ti fer vwar ki bann keksoz ki lemonn pe ofer napa valer?

³ Aprezan, zis parey ou ti pou byen get en lenz avan ou aste, silvouple, fer parey avek sa bann keksoz ki lemonn pe ofer ou. Demann ou lekor, ‘Ki kalite materyo sa sistenm in ganny fer avek?’ Labib i dir ki “lemonn pou disparet.” (1 Zan 2:17) Okenn plezir ki nou kapab retire ladan i tanporer, menm dan bann sirkonstans pli favorab. Deplis, anmenn en move lavi i kapab kout nou ser. Sirman, i pa pou dan nou lavantaz. En Kretyen ki ti bezwen sibir sa ki i apel ‘bann soufrans akoz i ti’n gaspiy son zenes,’ ti dir: “Sa lemonn i kapab paret eksitan e atiran. I anvi fer ou krwar ki ou kapab  profit tou sa ki i pe ofer ou san ki ou bezwen sibir konsekans. Me sa i enposib. Lemonn pou servi ou e letan i’n fini avek ou, i pou zet ou dan en kwen.” * Akoz ki ou bezwen gaspiy ou zenes dan sa kalite lavi degradan?

Proteksyon kont sa enn ki mesan

4, 5. (a) Ki Zezi ti demande dan son lapriyer avan son lanmor? (b) Akoz i ti apropriye pour li demann sa?

⁴ Vi ki bann zenn Temwen Zeova i realize ki sa sistenm napa nanryen bon pour ofer, zot sey zot mye pour evite fer zanmi avek sa lemonn. (Zak 4:4) Eski ou enn sa bann zenn fidel? Si wi, nou felisit ou. I vre ki i pa fasil pour reziste presyon lezot e montre ou diferan avek zot. Me ou kapab ganny led.

⁵ Avan son lanmor, Zezi ti demann Zeova dan lapriyer pour “prezerv” son bann disip ‘kont sa enn ki mesan.’ (Zan 17:15) Zezi ti annan en bon rezon pour fer sa. I ti konnen ki pa ti pou fasil pour son bann disip reste fidel nenport ki laz ki zot annan. Akoz? Parey Zezi ti rekonnet, en rezon pour sa, se ki son bann disip ti pou fer fas avek en lennmi envizib ki tre for. Sa se Satan Dyab, ‘sa enn ki mesan.’ Labib i dir ki sa lespri mesan pe “pas partou konman en lyon ki kriye, pe rode ki i pou devore.”—1 Pyer 5:8.

6. Ki mannyer nou konnen ki Satan pa pran okenn pitye pour bann zenn?

⁶ Toudilon listwar, Satan in pran plezir pour anmenn tou sort kriyote lo bann imen. Par egzanp, mazin sa kantite maler terib ki Satan ti anmenn lo Zob ek son fanmiy. (Zob 1:13-19; 2:7) Petet ou kapab rapel serten nouvel ki’n pase dan ou letan ki demontre en legzanp tipik lespri vyolan Satan. Dyab pe rode ki i pou devore e letan i fer sa, i pa pran okenn pitye pour bann zenn. Okonmansman premye syek N.L., Erod ti fer plan pour touy tou pti garson an Betleenm ki ti annan de zan e mwens. (Matye 2:16) I tre probab ki Satan ki ti par deryer sa, zis pour kapab touy sa zanfan ki Bondye ti pou swazir pour vin Mesi e pour anmenn Son zizman lo Satan. (Zenez 3:15) I kler ki Satan pa vin zwe avek bann zenn. I anvi zis devor otan dimoun ki i kapab. Sa i pli evidan dan nou letan akoz Satan in ganny zete lo later. I annan “en gran  lakoler, akoz i konnen ki i reste li ankor zis en pti pe letan.”—Revelasyon 12:9, 12.

7. (a) Dan ki fason Zeova i tre diferan avek Satan? (b) Eski Zeova pa oule ou anmize?

⁷ Kontrerman avek Satan ki annan “en gran lakoler,” Zeova i annan bokou “konpasyon.” (Lik 1:78) Napa personn ki kontan ou plis ki li. Anfet, nou Kreater i sitan demontre sa kalite manifik, ki Labib i dir: “Bondye i lanmour.” (1 Zan 4:8) Pa i annan en gran diferans ant bondye sa sistenm ek sa Bondye ki ou annan privilez pour adore! Satan pe rode ki i pou devore, tandis ki Zeova li i “pa oule ki personn i ganny detri.” (2 Pyer 3:9) I vwar sak lavi presye—enkli ou lavi. Kan Zeova i demann ou pour pa fer parti lemonn, i pa pe sey anpes ou anmize oubyen priv ou ou liberte. (Zan 15:19) Okontrer, i pe prezerv ou kont sa enn ki mesan. Ou Papa dan lesyel i anvi en pli bon keksoz pour ou olye ki bann plezir tanporer sa lemonn. I anvi ou ganny sa “vre lavi,” setadir lavi eternel dan paradi lo later. (1 Timote 6:17-19) Zeova i anvi ou reisi dan lavi, e i pe sipliy ou pour annan sa menm lobzektif. (1 Timote 2:4) Deplis, Zeova pe ofer ou en lenvitasyon spesyal. Kwa sa?

“Rezwir mon Leker”

8, 9. (a) Ki kado ou kapab donn Zeova? (b) Parey nou kapab vwar dan ka Zob, ki mannyer Satan i provok Zeova?

⁸ Eski ou’n deza aste en kado pour ou bon zanmi e apre vwar sa lakontantman ek sirpriz lo son figir letan ou donn li sa kado? Petet ou ti bezwen pran letan e byen reflesir ki kalite kado sa dimoun ti pou kontan. Aprezan, reflesir lo sa kestyon: Ki kalite kado ou kapab donn ou Kreater, Zeova? Okonmansman, sa lide i kapab paret bet. Vi ki Zeova i Tou Pwisan, ki i pou bezwen avek en senp imen? Ki i napa, ki ou ti a kapab donn li? Labib i reponn dan Proverb 27:11: “Vin saz, mon garson, e rezwir mon leker, pour ki mon a kapab reponn sa enn ki pe provok mwan.”

⁹ Parey ou’n kapab aprann dan ou letid Labib, Satan i sa enn ki pe provok Zeova. I krwar ki tou dimoun ki servi Bondye pa fer li akoz zot kontan Bondye, me pour zot lentere personnel. Satan i dir ki si bann serviter Bondye i pas dan difikilte, deswit zot pou aret servi li. Par egzanp, get sa ki Satan ti dir avek Zeova konsernan Zob: “Pa ou menm ou’n met en baraz otour li, otour son lakaz, e otour tou sa ki i annan? Ou’n beni son travay, e son latroup zannimo in agrandi lo later. Me pour en sanzman, avans ou lanmen, silvouple, e tous tou sa ki i annan e vwar si i pa pou modi ou dan ou figir.”—Zob 1:10, 11.

10. (a) Ki mannyer nou konnen ki Satan ti kestyonn fidelite tou dimoun, pa zis Zob? (b) Ki mannyer sa kestyon ki Satan in leve i enplik ou?

¹⁰ Parey Labib i montre nou, Satan pa ti kestyonn zis fidelite Zob, me osi fidelite tou sa ki servi Bondye—enkli ou. Anfet, Satan ti pe koz lo bann imen an zeneral letan i ti dir Zeova: “Tou sa ki en zonm i annan [pa zis Zob me nenport ki], i pou donn pour son lavi.” (Zob 2:4) Eski ou vwar ki rol ou annan pour ede reponn sa kestyon enportan? Parey Proverb 27:11 i endike, Zeova pe dir ki ou kapab donn li en keksoz. Sa se en rezon pour li reponn Satan ki pe provok li. Zis mazinen. Souvren Liniver pe demann ou pour fer ou kontribisyon anver sa kestyon pli enportan ki’n deza ganny leve dan listwar. Pa ou’n ganny en responsabilite e en privilez spesyal! Eski ou kapab fer sa ki Zeova pe demann ou? Zob ti fer li. (Zob 2:9, 10) Zezi osi ti fer li ensi ki bokou lezot dan lepase, enkli bokou zenn. (Filipyen 2:8; Revelasyon 6:9) Ou osi ou kapab fer parey. Pa mazinen ki ou kapab evite pran kote avek personn dan sa zafer. Par ou kondwit,  ou pou montre ki ou siport swa provokasyon Satan oubyen larepons Zeova. Lekel ki ou pou donn ou sipor?

Zeova i enterese avek ou!

11, 12. Eski i fer okenn diferans pour Zeova si ou servi li oubyen non? Eksplike.

¹¹ Eski swa ki ou fer i vreman afekte Zeova? Eski pa i annan bokou dimoun ki’n deza montre zot fidel pour ki Zeova i donn en larepons Satan? I vre, Dyab in dir ki personn pa servi Zeova akoz i kontan li. Sa i en lakizasyon ki’n deza ganny prouve fo. Kantmenm sa, Zeova i anvi ou siport li lo size souvrennte akoz i enterese avek ou personnelman. Zezi ti dir: “Zot Papa ki dan lesyel pa oule ki okenn sa bann pti zanfan perdi.”—Matye 18:14.

¹² I kler ki Zeova i enterese avek kalite lavi ki ou swazir. Anplis ki sa, swa ki ou fer i afekte li. Labib i montre klerman ki sa ki dimoun i fer swa an byen ou an mal i afekte santiman Zeova oprofon. Par egzanp, kan bann Izraelit ti kontinyelman rebele, sa ti “sagrin” Zeova. (Psonm 78:40, 41) Avan Deliz dan letan Noe, ler “Zeova ti vwar sa kantite mesanste ki zonm ti pe fer lo later, . . . son leker ti fer mal.” (Zenez 6:5, 6) Mazinen ki sa i vedir. Si ou anmenn en move lavi, ou kapab fer ou Kreater sagren. Sa pa vedir ki Bondye i feb oubyen i les son santiman kontrol li. Plito, i kontan ou e i enterese avek ou byennet. De lot kote, letan ou fer sa ki byen, sa i rezwir leker Zeova. I kontan pa zis akoz i kapab donn en larepons Satan, me akoz aprezan i kapab rekonpans ou. Sa i en keksoz ki i anvi fer. (Ebre 11:6) Pa Zeova i en bon Papa!

Bokou Benediksyon depi la konmela

13. Konman nou ganny benediksyon depi konmela menm letan nou servi Zeova?

¹³ Bann benediksyon ki nou gannyen letan nou servi Zeova i pa zis dan lavenir. Bokou zenn Temwen Zeova i resanti lazwa ek satisfaksyon depi konmela menm, e sa i pour en bon rezon. En psalmis ti ekrir: “Bann lord Zeova i drwat, i fer leker rezwir.” (Psonm 19:8) Zeova i pli konnen kwa ki bon pour nou ki okenn lezot imen. Atraver profet Izai, Zeova ti dir: “Mwan, Zeova, mon ou Bondye, sa Enn ki pe ansenny ou pour ou prop profi, sa Enn ki pe fer ou  mars lo sa semen lo ki ou devret marse. Si selman ou atantif anver mon bann komannman! Alor ou lape pou vin zis parey en larivyer e ou lazistis parey bann laroul dan lanmer.”—Izai 48:17, 18.

14. Ki mannyer bann prensip Labib i kapab ed ou pour evit sa fardo pey det?

¹⁴ Letan ou swiv bann prensip Labib, ou pou evit bokou soufrans ek latet fer mal. Par egzanp, Labib i dir ki bann ki’n devlop en lanmour pour larzan “in met zot lekor dan en kantite tourman.” (1 Timote 6:9, 10) Eski ou konn enn ou kanmarad ki’n eksperyans sa? Serten zenn in met zot lekor dan en gro det, zis akoz zot in bezwen al rod bann lenz avek bann mark ser oubyen bann dernyen model lekipman elektronik. Kan ou bezwen pey en gro det zis akoz ou’n al aste keksoz ki ou ti napa mwayen pour aste, sa i en form lesklavaz ki vreman fer mal!—Proverb 22:7.

15. Dan ki fason bann prensip Labib i protez ou avek bann soufrans ki imoralite seksyel i anmennen?

¹⁵ Mazin osi lo imoralite seksyel. Tou le zan, en kantite adolesan ki pa ankor marye i tonm ansent partou dan lemonn. Serten zot napa ni sa lanvi ni abilite pour elve sa zanfan. I annan ki fer lavortman e apre zot bezwen viv avek en move konsyans. I osi annan bann zennonm ek zenn fiy ki anmas en maladi ki ganny transmet par sèks, parey SIDA. Pour en zenn ki konn Zeova, konsekans pli grav se ki son relasyon avek Zeova i ganny afekte. * (Galat 5:19-21) Alors, Labib i annan rezon letan i dir: “Elwanny zot avek bann pratik imoral.”—1 Korentyen 6:18.

Servi sa “Bondye ere”

16. (a) Ki mannyer nou konnen ki Zeova i anvi ou profit ou zenes? (b) Akoz Zeova i donn ou bann gidans?

¹⁶ Labib i dekrir Zeova konman en “Bondye ere.” (1 Timote 1:11, NW ) I anvi ki ou osi ou ere. Anfet, dan son prop Parol i dir: “Profit ou zenes. Rezwir la ki ou ankor  zenn.” (Eklezyast 11:9, Today’s English Version) Me Zeova i kapab vwar pli lwen ki ozordi e i kapab vwar byen davans bann konsekans move ek bon kondwit. Se pour sa ki i donn nou sa konsey: “Mazin ou Gran Kreater letan ou ankor zenn, avan ki bann zour maler i konmans arive, oubyen bann lannen i arive kot ou pou dir: ‘Mon napa gou pour viv.’ ”—Eklezyast 12:1.

17, 18. Ki mannyer en zenn Kretyen i eksprim lazwa ki i gannyen an servan Zeova? Ki mannyer ou kapab santi menm lazwa?

¹⁷ Ozordi, bokou zenn in trouv bokou lazwa an servan Zeova. Par egzanp, Lina ki annan 15 an, i dir: “Mon annan konfyans ek respe pour mon lekor. Mon an bonn sante akoz mon pa fimen e pran drog. Mon ganny bann bon gidans dan kongregasyon ki ed mwan lalit avek bann presyon Satan. Mon toultan zwaye akoz sa lasosyasyon ankourazan ki mon gannyen kot Lasal Rwayonm. Me pli bon keksoz ki mon annan ankor, se sa lespwar pour viv pour touzour lo later.”

¹⁸ Parey Lina, bokou zenn Kretyen pe lalit en kantite pour zot lafwa, e sa i fer zot ere. Zot realize ki menm si parfwa zot rankontre bokou presyon, zot lavi i annan en vre bi e en vre lavenir. Alor, kontinyen servi sa Bondye ki pran ou lentere aker. Rezwir son leker, e i ava fer ou ere la konmela e pour touzour!—Psonm 5:11.

[Not anba lo paz]

Eski ou rapel?

• Ki danze Satan i met devan ou?

• Ki mannyer ou kapab rezwir leker Zeova?

• Konman Labib i montre ki Zeova i enterese avek ou?

• Nonm bann benediksyon ki ou kapab gannyen letan ou servi Zeova.

[Kestyon]

[Bwat/Portre lo paz 7]

En Zonm drwat ki ti pros pour tonbe

Azaf ti en Levit e en mizisyen byen koni dan tanp Zeova, dan ansyen Izrael. I ti menm konpoz bann sanson ki ti ganny servi dan bann ladorasyon piblik. Me kantmenm i ti annan bann privilez spesyal, en serten moman Azaf ti ganny atire par kondwit son bann kanmarad ki pa ti pe servi Bondye. Zot ti pe kas lalwa Bondye. Pourtan, i paret ki zot pa ti pe rekolte okenn move konsekans. Plitar Azaf ti admet: “Mon lipye ti pros pour ale, mon ti pros pour glise. Parski mon ti zalou bann ki ti pe vant zot lekor, letan mon ti vwar lape ki bann dimoun mesan ti pe rezwir.”—Psonm 73:2, 3.

Plitar, Azaf ti al dan tanp Zeova e priy lo sa size. Apre sa, i ti kapab revwar keksoz dan en fason spirityel. I ti konpran ki Zeova i deteste lemal e ki avek letan, bann dimoun ki pe fer sa ki mal ensi ki bann ki pe fer sa ki byen, pou rekolte sa ki zot senmen. (Psonm 73:17-20; Galat 6:7, 8) Anfet, bann dimoun ki pe fer sa ki mal i lo en later glise. Nenport ler zot kapab tonbe. Finalman, letan Zeova pou detrir sa sistenm mesan, zot pou tonm net.—Revelasyon 21:8.

[Portre lo paz 9]

Zeova i pran ou lentere aker, tandis ki Satan i anvi devor ou

[Portre lo paz 10]

Bokou zenn i trouv bokou lazwa an servan Zeova avek zot bann konpanyon Kretyen