Rekonfort Bann Ki Dan Lapenn

“Zeova in swazir mwan . . . pour konsol tou bann ki an dey.” —IZAI 61:1, 2.

1, 2. Lekel ki nou devret rekonforte e akoz?

ZEOVA i Bondye tou vre rekonfor. I ansenny nou pour montre lentere dan lezot kan maler i ariv lo zot. I ansenny nou pour “koz dan en fason rekonfortan avek bann ki dekouraze” e pour rekonfort bann ki an dey. (1 Tesalonisyen 5:14, NW ) Nou ed nou bann konpanyon Kretyen dan sa fason kan i neseser. Nou osi montre lanmour anver bann ki pa dan kongregasyon, menm bann ki pa’n montre okenn lanmour pour nou dan lepase.—Matye 5:43-48; Galat 6:10.

² Zezi Kri ti lir e fer vwar ki se li ki pou akonpli sa latas profetik: “Lespri Souvren Senyer Zeova i lo mwan, akoz Zeova in swazir mwan pour anons bon nouvel bann dimoun dous. I’n anvoy mwan pour pans sa bann ki annan leker brize, . . . pour konsol tou bann ki an dey.” (Izai 61:1, 2; Lik 4:16-19) Dan nou letan, bann Kretyen swazir in realize ki zot osi zot bezwen akonpli sa latas, e ‘lezot mouton’ in zwenn zot volonterman dan sa travay.—Zan 10:16.

3. Kan dimoun i demande, “Akoz Bondye i les sa bann maler arive?,” ki mannyer nou kapab ed zot?

³ Kan maler i arive e dimoun i tonm dan en profon sagren, zot souvan demande, “Akoz Bondye i les sa bann maler arive?” Labib i klerman reponn sa kestyon. Toudmenm, i kapab pran letan pour en dimoun ki pa  etidye Labib konpran byen larepons sa kestyon. Bann piblikasyon pibliye par Temwen Zeova i fourni led dan sa domenn. * Me pour konmanse, serten dimoun in ganny rekonforte zis par vwar en pasaz Labib parey sa enn dan Izai 61:1, 2, parski sa i montre ki Bondye i anvi bann imen ganny rekonforte.

4. Ki mannyer en Temwen an Lapolonny ti ed en kanmarad lekol ki ti boulverse? Ki mannyer sa leksperyans i kapab ed ou pour ed lezot?

⁴ Bann zenn, osi byen ki bann aze, i bezwen rekonfor. En adolesan ki ti dan depresyon an Lapolonny ti rod konsey avek en zanmi. Atraver bann kestyon ki i ti demande zantiman, sa zanmi ki ti en Temwen Zeova, ti kapab konpran ki sa fiy ti trouble avek bann kestyon ek dout parey: “Akoz i annan sitan kantite mesanste? Akoz dimoun i soufer? Akoz mon ser paralize i soufer? Akoz mon malad leker? Legliz i dir ki Bondye i oule li koumsa. Si sa i vre, mon pou aret krwar dan li!” Sa Temwen ti priy Zeova an silans e apre i ti dir: “Mon kontan ki ou’n demann mwan sa. Mon a sey ed ou.” I ti rakonte ki li osi i ti annan dout kan i ti ankor pli zenn e ki bann Temwen Zeova in ed li. I ti eksplike: “Mon ti aprann ki Bondye pa fer dimoun soufer. I kontan zot, i anvi sa ki pli bon pour zot, e byento i pou anmenn bann gran sanzman lo later. I pou retir maladi, problenm lavyeyes, ek lanmor. Bann dimoun obeisan pou reste la lo later pour touzour.” I ti montre sa fiy Revelasyon 21:3, 4; Zob 33:25; Izai 35:5-7 ek 65:21-25. Apre en gran diskisyon, sa fiy ti santi li soulaze e i ti dir: “Aprezan mon konnen akoz mon pe viv. Eski mon kapab vin vwar ou ankor?” I ti konmans etidye Labib de fwa par semenn.

Rekonfort lezot avek sa Rekonfor ki Bondye i donnen

5. Kan nou eksprim nou senpati, kwa ki pou donn sa vre rekonfor?

⁵ Kan nou pe rekonfort lezot, i byen pour eksprim nou senpati. Par nou parol ek nou ton lavwa, nou sey fer sa dimoun ki dan lapenn konnen ki nou vreman enterese avek son sitiasyon. Me bann parol vid ki dimoun i souvan repete dan bann ka parey, pa vreman akonpli sa. Labib i dir nou ki “par pasyans ek konsolasyon ki Lekritir i donnen nou posed lesperans.” (Romen 15:4, nou ki’n met an italik.) Alors, dan en letan apropriye nou kapab eksplik sa dimoun kisisa Rwayonm Bondye e montre li dan Labib konman i pou rezourd sa bann problenm ki nou vwar ozordi. Apre, nou kapab diskit avek li lo akoz sa i en lespwar ki nou kapab vreman depan lo la. Dan sa fason, nou pou kapab rekonfort li.

6. Ki nou devret ed dimoun konpran pour zot kapab pli benefisye avek sa rekonfor dan Labib?

⁶ Pour pli benefisye avek sa rekonfor ki nou pe donnen, en dimoun i bezwen konn sa vre Bondye. I bezwen konnen ki kalite Bondye i ete, e ziska ki degre nou kapab depan lo son bann promes. Kan nou pe sey ed en dimoun ki pa en adorater Zeova, i byen pour eksplik sa bann pwen swivan. (1) Ki sa rekonfor dan Labib i sorti kot Zeova, sa vre Bondye. (2) Zeova i Tou pwisan, Kreater lesyel ek later. I en Bondye lanmour e i ranpli  avek labonte leker ek laverite. (3) Nou kapab ganny lafors pour fer fas avek serten sitiasyon si nou apros avek Bondye par ganny konnesans egzakt dan son Parol. (4) Dan Labib i annan bann pasaz ki rakont bann problenm spesifik ki diferan dimoun ti fer fas avek.

7. (a) Ki nou kapab akonpli par met lanfaz lo sa lekspresyon “nou resevwar en gran konsolasyon par Kris”? (b) Ki mannyer ou kapab rekonfort en dimoun ki realize ki i ti annan en move kondwit?

⁷ Serten in donn en rekonfor spirityel bann ki familye avek Labib par lir 2 Korentyen 1:3-7. Zot in sirtou met lanfaz lo sa lekspresyon “nou resevwar en gran konsolasyon par Kris.” (Nou ki’n met an italik.) Sa pasaz Labib i kapab ed en dimoun pour realize ki Labib i en sours rekonfor ki i devret donn plis latansyon. I osi kapab vin konman en fondasyon pour en lot diskisyon, petet en lot zour. Si en dimoun i krwar ki bann move keksoz ki i’n fer i lakoz son problenm, alor san ki nou kritik li, nou kapab dir li ki i rekonfortan pour konn sa ki dan 1 Zan 2:1, 2 ek Psonm 103:11-14. Dan sa fason, nou vreman rekonfort lezot avek sa rekonfor ki Bondye i donnen.

Bann ki ganny afekte avek Vyolans oubyen Problenm ekonomik

8, 9. Ki mannyer nou kapab rekonfort bann dimoun ki pe soufer akoz vyolans?

⁸ I annan sitan bokou dimoun ki’n ganny afekte par vyolans. Sa i kapab enplik bann krim dan kominote oubyen lager. Ki mannyer nou kapab rekonfort zot?

⁹ Bann vre Kretyen i fer sir ki zot pa siport okenn group dan okenn konfli lemonn, ni par zot parol ni par aksyon. (Zan 17:16) Me zot servi Labib pour montre ki sa bann kondisyon difisil ki annan ozordi pa pou reste pour touzour. Zot kapab lir Psonm 11:5 pour montre konman Zeova i santi konsernan bann ki kontan vyolans. Oubyen zot kapab lir Psonm 37:1-4 pour fer resorti ki Bondye i ankouraz nou pour pa revanze me pour plito met konfyans dan li. Psonm 72:12-14 i montre konman Gran Salomon, Zezi Kri, ki aprezan Lerwa dan lesyel, i santi konsernan bann inosan ki pe soufer akoz vyolans.

10. Si ou’n viv dan bann pei lager pour bokou lannen, konman sa bann teks Labib ki’n ganny site i kapab rekonfort ou?

¹⁰ Serten dimoun in vwar en konfli apre lot, avek bann parti ki pe lager pouvwar. Zot prezimen ki lager ek son konsekans i en par dan lavi. Sel lespwar ki zot annan se sov dan en lot pei akoz zot krwar ki zot pou pli byen laba. Me laplipar zot pa zanmen reisi fer sa. Bokou ki’n seye, in perdi zot lavi. Bann ki reisi ariv dan en lot pei, i dekouver ki zot in senpleman sov en problenm pour tonm dan en lot. Psonm 146:3-6 i kapab ganny servi pour ed sa bann dimoun met zot lespwar dan en keksoz ki pli sir ki sanz landrwa. Profesi dan Matye 24:3, 7, 14 oubyen 2 Timote 3:1-5 i kapab ed zot pour pli byen konpran sitiasyon ki nou ladan, e ki son sinifikasyon. Savedir zot pou konpran ki nou pe viv dan bann dernyen zour sa sistenm. Bann teks Labib parey Psonm 46:1-3, 8, 9 ek Izai 2:2-4 i kapab ed zot pour realize ki i vreman annan lespwar pour lape dan lavenir.

11. Ki bann teks Labib ki ti rekonfort en madanm dan Was Lafrik, e akoz?

¹¹ Pandan en letan kot lager ti pe persiste dan Was Lafrik, en madanm ti bezwen sov son lakour par koul bann bal fizi. Son lavi ti ranpli avek lafreyer, latristes, ek bann gran dezapwentman. Plitar, ler i ti pe viv dan en lot pei avek son fanmiy, son msye ti deside pour bril zot sertifika maryaz. I ti fer son madanm ki ti ansent sa letan ek son pti garson dis an ale, e li i ti antre pret. Kan en dimoun ti lir Filipyen 4:6, 7 ek Psonm 55:22 avek sa madanm, ansanm avek serten lartik dan Latour Veyer ek Réveillez-vous!, i ti anfen trouv rekonfor ek en bi dan lavi.

12. (a) Ki soulazman Labib i ofer pour bann ki dan problenm ekonomik? (b) Ki mannyer en Temwen an Lazi ti kapab ed en kliyan?

¹² Problenm ekonomik in gat lavi bokou dimoun. Parfwa, sa i osi ganny koze par  lager ek son konsekans. Akoz serten polisi bet bann gouvernman, ansanm avek legois ek malonnekte bann ki o pouvwar, dimoun in perdi tou zot pti larzan ki zot ti’n anmase e oblize abandonn zot bann byen. Serten dimoun zot, zot pa’n zanmen ganny ase nesesite lavi. Tou sa bann dimoun i kapab ganny rekonforte pour konnen ki Bondye i asir bann ki met konfyans dan li ki zot pou ganny soulazman. I osi garanti nou en lemonn drwat kot dimoun pou kapab tir bokou satisfaksyon dan zot travay. (Psonm 146:6, 7; Izai 65:17, 21-23; 2 Pyer 3:13) En Temwen dan en pei Lazi ti antann en kliyan pe eksprim son konsern lo sitiasyon ekonomik laba. I ti eksplik li ki sa ki pe arive dan zot pei i form parti bann levennman ki pe arive dan lemonn antye. Apre en diskisyon lo Matye 24:3-14 ek Psonm 37:9-11, en letid Labib ti konmanse.

13. (a) Kan dimoun i dezapwente akoz bann promes vid, konman nou kapab servi Labib pour ed zot? (b) Si dimoun i krwar ki sa bann move kondisyon i prouve ki napa en Bondye, ki mannyer ou kapab sey rezonn avek zot?

¹³ Kan dimoun in soufer lannen apre lannen oubyen dezapwente akoz bann promes vid, zot kapab vin parey bann Izraelit ki pa ti oule ekoute akoz “zot ti dekouraze.” (Egzod 6:9) Dan bann ka koumsa, i ti a byen pour atir zot latansyon lo bann fason ki Labib i kapab ed zot fer fas avek bann problenm aktyel e osi evit bann pyez ki rin lavi bokou dimoun. (1 Timote 4:8) Serten i kapab vwar sa move kondisyon ki zot pe viv ladan konman en laprev ki napa en Bondye oubyen ki i pa enterese avek zot. Petet ou ti a kapab rezonn avek zot lo bann teks apropriye pour ed zot realize ki Bondye in fourni led me bokou pa’n aksepte.—Izai 48:17, 18.

Bann ki ganny afekte avek Tanpet ek Tranbleman-d-ter

14, 15. Kan en katastrof ti kit bokou dimoun dan sok, konman bann Temwen Zeova ti montre lentere dan lezot?

¹⁴ En tanpet, en tranbleman-d-ter, en dife, oubyen en leksplozyon i kapab fer en kantite dega. I kapab kit bokou dimoun dan sagren. Ki nou kapab fer pour rekonfort bann sirvivan?

¹⁵ Dimoun i bezwen konnen ki i annan kelken ki enterese avek zot. Apre en latak teroris dan en pei, bokou dimoun ti reste dan sok. Plizyer zot ti perdi en fanmiy, bann ki anmenn dipen kot lakour, ek bann zanmi. I annan ki ti perdi zot travay, oubyen sa sekirite ki zot ti krwar zot annan. Bann Temwen Zeova ti ofer led tou dimoun dan kominote. Zot ti senserman eksprim senpati pour sa ki zot ti’n perdi e ofer zot bann parol rekonfortan dan Labib. Bokou dimoun ti vreman apresye sa lentere ki zot ti montre.

16. Kan en dezas ti arive dan rezyon El Salvador, akoz predikasyon bann Temwen dan sa rezyon ti tre efikas?

¹⁶ Lannen 2001, ti annan en gro tranbleman-d-ter an El Salvador, swivi par en lavalas ki ti pran lavi bokou dimoun. Garson en Temwen, ki ti annan 25 an, ek de ser fiyanse sa garson ti mor. Manman sa zennonm ek son fiyanse ti deswit kit zot okipe dan predikasyon. Bokou dimoun ti dir zot ki Bondye ki ti’n pran bann ki ti’n mor oubyen ki sa ti lavolonte Bondye. Sa bann Temwen ti sit Proverb 10:22 pour montre ki Bondye pa anvi nou soufer. Zot ti lir Romen 5:12 pour montre ki pese zonm ki’n anmenn lanmor, pa lavolonte Bondye. Zot ti osi atir latansyon lo sa mesaz  rekonfor ki trouve dan Psonm 34:18, Psonm 37:29, Izai 25:8, ek Revelasyon 21:3, 4. Dimoun ti fasilman ekout zot, sirtou akoz sa de madanm zot menm zot ti’n perdi zot fanmiy dan sa dezas. Bokou zot ti konmans etidye Labib.

17. Dan bann moman dezas, ki kalite led nou kapab donnen?

¹⁷ Kan en dezas i arive, ou kapab rankontre en dimoun ki byen bezwen led fizik. Sa i kapab enplik telefonn en dokter, ede transport sa dimoun lopital, oubyen fer sa ki ou kapab pour fourni manze ek landrwa reste. Dan en dezas ki ti arive Itali an 1998, en zournalis ti remarke ki Temwen Zeova ti “ofer en led pratik. Zot ti ed bann ki ti pe soufer san trakas zot avek larelizyon ki sa bann dimoun ti ladan.” Dan serten rezyon, bann levennman ki’n ganny profetize pour bann dernyen zour pe anmenn bokou soufrans. Bann Temwen Zeova dan sa bann landrwa i atir latansyon dimoun lo sa bann profesi Labib, e rekonfort zot avek lasirans ki Rwayonm Bondye pou anmenn vre sekirite pour limanite.—Proverb 1:33; Mika 4:4.

Kan en Manm Lafanmiy i mor

18-20. Kan lanmor i arive dan en fanmiy, ki ou kapab dir oubyen fer pour rekonfort bann ki dan sagren?

¹⁸ Toulezour, bokou dimoun i pler lanmor en dimoun ki zot ti pros avek. Ou kapab rankontre sa bann dimoun letan ou pe prese oubyen dan ou bann aktivite lavi toulezour. Ki ou kapab dir oubyen fer pour rekonfort sa bann dimoun?

¹⁹ Eski sa dimoun i trouble emosyonnelman? Eski lakaz i ranpli avek bann fanmiy ki dan profon sagren? I kapab annan bokou keksoz ki ou ti a kontan dir, me i enportan pour demontre bon zizman. (Eklezyast 3:1, 7) Petet i ti a pli bon si ou senpatiz avek sa dimoun, kit en piblikasyon apropriye (en brosir, en  magazin, oubyen en trak), e detrwa zour plitar pase pour vwar si ou kapab ed sa dimoun dan okenn fason. Kan i apropriye, ofer pour partaz ennde panse ankourazan dan Labib. Sa i kapab kalmi e konmans geri sa dimoun. (Proverb 16:24; 25:11) Ou pa kapab lev bann mor parey Zezi ti fer. Me ou kapab fer sa dimoun konnen ki Labib i dir konsernan bann mor, menm si la pa ler pour neseserman prouve ki serten pwennvi i mal. (Psonm 146:4; Eklezyast 9:5, 10; Ezekyel 18:4) Ou kapab lir avek sa dimoun bann promes dan Labib konsernan rezireksyon. (Zan 5:28, 29; Akt 24:15) Ou kapab diskite ki sa i vedir, petet an servan legzanp en dimoun dan Labib ki ti ganny resisite. (Lik 8:49-56; Zan 11:39-44) En lot keksoz ki ou kapab fer se atir latansyon sa dimoun lo bann kalite sa Bondye lanmour ki pe donn sa lespwar. (Zob 14:14, 15; Zan 3:16) Eksplike konman sa bann lansennyman in benefisye ou e akoz ou annan konfyans dan zot.

²⁰ Envit sa dimoun Lasal Rwayonm, i kapab ed li ki dan lapenn pour fer konnesans avek bann dimoun ki vreman kontan zot prosen e ki konnen konman pour batir kanmarad. En madanm Laswed ti vwar ki se sa ki i ti pe rode tou sa letan dan son lavi.—Zan 13:35; 1 Tesalonisyen 5:11.

21, 22. (a) Ki nou bezwen fer pour rekonfort en dimoun? (b) Ki mannyer ou kapab rekonfort en dimoun ki deza konn Labib byen?

²¹ Eski ou’n deza konn en dimoun dan kongregasyon oubyen an deor ki dan profon sagren e ou pa konnen ki ou pou dir li? Sa mo Grek ki souvan ganny tradwir konman “rekonfor” dan Labib, i literalman vedir “en lenvitasyon pour vin obor en dimoun.” Alors ou prezans i enportan pour vreman rekonfort bann ki dan lapenn.—Proverb 17:17.

²² Me si sa dimoun ki ou anvi rekonforte i deza konn sa ki Labib i dir konsernan lanmor, ranson, ek rezireksyon? Zis prezans en zanmi ki annan menm krwayans avek li i kapab vreman rekonfort li. Si i anvi koze, ekout li atantivman. Pa krwar ki ou bezwen toultan annan keksoz pour dir li. Si zot lir serten teks dan Labib, fer konmsi Bondye menm ki pe koze. Sa i a donn zot kouraz. Eksprim zot konviksyon ki zot annan dan sa bann promes ki Labib i fer. Par demontre konpasyon parey Bondye e par partaz sa laverite presye dan Parol Bondye, ou pou kapab ed bann ki dan lapenn pour ganny rekonfor ek lafors sorti kot Zeova, sa “Bondye ki touzour donn konsolasyon.”—2 Korentyen 1:3.

[Not anba lo paz]

Ki ou annan pour dir?

• Dimoun i blanm ki sennla kan maler i arive, e konman nou kapab ed zot?

• Ki nou kapab fer pour ed lezot pour pli benefisye avek sa rekonfor ki Labib i ofer?

• Ki sitiasyon ki fer bokou dimoun sagren dan ou rezyon, e ki mannyer ou kapab rekonfort zot?

[Kestyon]

[Portre lo paz 31]

Kan refizye: UN PHOTO 186811/J. Isaac

[Portre lo paz 31]

Partaz en mesaz ki donn vre rekonfor pandan letan ladetres

[Portre lo paz 32]

Zis prezans en zanmi i kapab rekonfortan