Fason donnen Ki Fer Plezir Bondye

ZEZI ek son bann disip ti pe apresye en bon repa an Betani avek detrwa zanmi. Parmi ti annan Mari, Mart, ek Lazar ki ti’n fek ganny resisite. I ti sa moman ki Mari ti pran en lesans byen ser e ti vid lo lipye Zezi. Sa ti fer Zida Iskaryot ankoler e i ti dir: “Akoz pa ti vann sa parfen pour 300 denye, e donn sa larzan bann pov?” Lezot osi ti konplent.—Zan 12:1-6; Mark 14:3-5.

Me Zezi ti reponn: “Les li trankil. . . . Toultan pou annan bann pov parmi zot, e si zot anvi zot pou touzour kapab fer dibyen bann pov. Me mwan mon pa pou toultan avek zot.” (Mark 14:6-9) Bann sef relizye Zwif ti ansennyen ki fer lasarite pa ti zis en bon keksoz pour fer, me i ti menm kapab pardonn pese. Parkont, Zezi li i ti fer kler ki donn bann pov pa ti sel fason donnen ki fer plezir Bondye.

En egzaminasyon bref lo fason ki bann premye Kretyen ti donnen pou fer resorti serten fason pratik kot nou kapab montre nou lentere pour lezot e fer Bondye plezir par lafason ki nou donnen. I pou osi endik en serten kalite fason donnen ki fer pli gran dibyen.

“Fer Lomonn”

Plizyer fwa, Zezi ti ankouraz son bann disip pour ‘donn larzan bann pov’ oubyen parey lezot tradiksyon i dir, ‘fer lomonn’ oubyen ‘fer lasarite.’ (Lik 12:33) Me Zezi ti averti konsernan fer keksoz zis pour lezot vwar, avek bi pour glorifye sa enn ki pe donnen olye Bondye. Zezi ti dir: “Kan ou fer lomonn, pa bezwen fer tapaz pour atir latansyon, parey bann ipokrit i fer dan sinagog ek dan semen. Zot fer sa pour ki dimoun i felisit zot.” (Matye 6:1-4) Bann premye Kretyen ti aplik sa konsey par evit latitid vantar bann lider relizye dan zot letan, e swazir pour ed dimoun ki dan bezwen par rann servis oubyen fer kado an prive.

Par egzanp, dan Lik 8:1-3, i dir ki Mari, Zann, Sizann, ek lezot ti servi “zot prop byen” dan en fason modes pour ed Zezi ek son bann zapot. Menm si sa bann zonm pa ti pov, zot ti’n abandonn zot travay pour zot  kapab depans plis zot letan dan servis Bondye. (Matye 4:18-22; Lik 5:27, 28) Alor, par ed sa bann zonm pour akonpli zot travay ki Bondye ti’n donn zot, sa bann madanm ti pe an realite glorifye Bondye. Bondye ti montre son lapresyasyon par fer rakont zot zenerozite dan Labib pour lezot zenerasyon lir.—Proverb 19:17; Ebre 6:10.

Dorkas ti en lot bon madanm ki ti “touzour okipe pe fer dibyen e pe ed bann pov.” I ti koud bann lenz pour bann vev ki ti dan bezwen dan son lavil Zope. Nou pa konnen si li ki ti aste latwal oubyen si zis i ti koud pour nanryen. Toudmenm, Bondye ek sa bann dimoun ki i ti ede ti kontan li pour son bon travay, e Bondye ti beni li pour son labonte.—Akt 9:36-41.

Bon Motivasyon i esansyel

Kwa ki ti motiv sa bann dimoun pour donnen? I pa ti zis akoz zot ti pran pitye pour lezot ki ti fer zot anvi ede. Zot menm zot ti santi ki i byen pour fer sa ki zot kapab sak zour pour ed sa bann ki ti dan povrete, problenm, maladi, oubyen lezot difikilte. (Proverb 3:27, 28; Zak 2:15, 16) Sa i sa kalite donnen ki fer plezir Bondye. I ganny motive sirtou par en profon lanmour pour Bondye ek en dezir pour imit son mizerikord ek son zenerozite.—Matye 5:44, 45; Zak 1:17.

Zapot Zan ti fer resorti sa laspe enportan konsernan donnen ler i ti demande: “Si en dimoun i posed bann byen later, e i trouv son frer dan bezwen e i ferm son leker, e i pa ed li, ki mannyer lanmour Bondye i kapab reste dan son leker.” (1 Zan 3:17) Larepons i evidan. Lanmour Bondye i motiv dimoun pour fer lasarite. Bondye i apresye bokou e rekonpans bann ki imit li, ki montre en leta lespri zenere. (Proverb 22:9; 2 Korentyen 9:6-11) Eski nou vwar sa kalite zenerozite ozordi? Konsider sa ki’n arive resaman dan en kongregasyon Temwen Zeova.

Lakaz en madanm Kretyen aze ti dan en kondisyon ki ti demann fer en gro reparasyon lo la. I ti pe reste li tousel e i ti napa fanmiy pour ed li. Pandan bann lannen ki ti’n pase, i ti toultan fer son lakour disponib pour fer renyon Kretyen ladan. Souvannfwa i ti osi partaz en repa avek nenport dimoun ki ti pou aksepte son lenvitasyon. (Akt 16:14, 15, 40) Ler zot ti vwar son sitiasyon ki i ti ladan, bann manm kongregasyon ti zwenn ansanm pour ede. Serten ti kontribye larzan, lezot ti ofer zot lafors. Dan lespas detrwa wikenn, bann volonter ti’n reisi met en nouvo twa, enstal en nouvo lasal-de-ben, krepi e penn premye letaz, e enstal nouvo kabinet dan lakwizin. Sa ki zot ti  donnen pa ti zis satisfer bezwen sa madanm me i ti osi fer bann frer ek ser vin pli pre avek kanmarad. I ti en legzanp konman ki vre Kretyen i donnen, ki ti osi enpresyonn bann vwazen.

I annan en kantite fason kot nou menm nou kapab ed lezot. Eski nou kapab pas en pe letan avek en garson oubyen en fiy ki napa papa? Eski nou kapab aste konmisyon oubyen koud en lenz pour en vev aze ki nou konnen? Eski nou kapab kwi en repa oubyen ede pour kouver depans en dimoun ki napa ase larzan? Pa fodre ki nou ris pour ede. Zapot Pol ti ekrir: “Si nou donn avek bonn volonte nou don i ganny aksepte par Bondye dapre sa ki nou annan, non pa dapre sa ki nou napa.” (2 Korentyen 8:12) Me eski donn direkteman avek en dimoun i sel fason donnen ki Bondye pou beni? Non.

Ede dan en Fason organize

Parler zefor personnel pa sifi. Annefe, Zezi ek son bann zapot ti gard en bwat kontribisyon pour bann pov, e zot ti aksepte kontribisyon avek bann dimoun ki zot ti rankontre dan zot travay predikasyon. (Zan 12:6; 13:29) Pareyman, bann kongregasyon dan premye syek ti ramas larzan ler ti annan bezwen e ti organiz led sekour lo en pli gran nivo.—Akt 2:44, 45; 6:1-3; 1 Timote 5:9, 10.

En tel lokazyon ti arive apepre lannen 55 N.L. Bann kongregasyon Zide ti pe eksperyans lapovrete, kekfwa akoz sa gran lafanmin ki ti’n fek arive. (Akt 11:27-30) Zapot Pol ki ti toultan konsernen avek bann pov, ti demann led avek bann kongregasyon menm ziska Masedwann. I ti personnelman anmas sa bann larzan e i ti servi bann zonm ki annan en bon repitasyon pour al anmenn sa larzan. (1 Korentyen 16:1-4; Galat 2:10) Ni li oubyen lezot ki ti enplike pa ti resevwar en lapey pour zot servis.—2 Korentyen 8:20, 21.

Ozordi, Temwen Zeova i osi pare pour ede ler dezas i arive. Par egzanp, pandan lete 2001, gro lapli toransyel ti fer linondasyon Houston, Texas, Letazini. An tou, 723 lakaz Temwen Zeova ti ganny serten domaz, bokou parmi ti ganny andomaze en kantite. En komite led sekour konpoze par bann ansyen ti ganny formen deswit pour verifye bezwen sak dimoun e pour distribye resours pour ed bann Temwen fer fas avek sa sitiasyon e repar zot lakaz. Bann volonter sorti dan bann kongregasyon dan zalantour ti fer tou travay. En Temwen Zeova ti telman apresye sa led, ki ler i ti ganny larzan avek son lakonpanni lasirans pour repar son lakaz, deswit i ti donn sa larzan avek sa komite afen ki i kapab ed lezot ki dan bezwen.

 Serten lasosyasyon i organiz bann progranm pour fer lasarite. Parler zot lans bann lapel. Nou bezwen fer atansyon e egzamin byen avan ki nou ede. Serten lorganizasyon saritab i annan bokou travayer ki zot bezwen peye oubyen depans bokou larzan pour fer lavertisman pour ankouraz dimoun kontribye. Finalman, zis en pti porsyon sa larzan ki’n ganny ramase ki ganny servi pour son vre bi. Proverb 14:15 i dir: “Sa ki napa leksperyans i met lafwa dan tou parol, me sa enn ki malen i egzamin son lepa.” Alor i bon pour byen egzamin bann fe.

Fason donnen ki fer pli gran Dibyen

I annan en fason donnen ki pli enportan ki fer lasarite. Zezi ti refer avek sa, ler en zenn dirizan ris ti demann li ki i bezwen fer pour ganny lavi eternel. Zezi ti dir li: “Vann tou sa ki ou posede e partaz sa larzan avek bann pov, e ou ava ganny en trezor dan lesyel. Apre vini e swiv mwan.” (Matye 19:16-22) Remarke ki Zezi pa ti zis dir ‘donn bann pov e ou pou ganny lavi.’ Okontrer, i ti azoute, “Vini e swiv mwan.” Andotmo, menm si bann aksyon saritab i bon e itil, ler ou en Kretyen sa i enplik fer plis ki sa.

Ed lezot spirityelman, ti keksoz pli enportan pour Zezi. En pe letan avan son lanmor, Zezi ti dir avek Pilat: “Mon’n ne e mon’n vin dan lemonn pour servi temwen pour laverite.” (Zan 18:37) Kantmenm Zezi ti ed bann pov, geri bann malad, e donn manze bann ki ti lafen, Zezi ti avan tou form son bann disip pour prese. (Matye 10:7, 8) Annefe, parmi son bann dernyen lenstriksyon avek son bann disip, Zezi ti donn sa komannman: “Ale e fer tou pep vin mon bann disip.”—Matye 28:19, 20.

Byensir, anons sa bon nouvel pa pou rezourd tou problenm lemonn. Me partaz sa bon nouvel konsernan Rwayonm Bondye avek tou sort kalite dimoun i glorifye Bondye. Sa i akoz ler nou fer sa, i akonpli lavolonte Bondye e i ouver semen pour sa bann ki aksepte mesaz Bondye ganny bann byenfe eternel. (Zan 17:3; 1 Timote 2:3, 4) Prosenn fwa ki bann Temwen Zeova i pas kot ou, akoz ou pa ekout sa ki zot annan pour dir ou? Zot vin avek en kado spirityel e zot konnen ki sa i pli bon kado ki zot kapab donn ou.

[Portre lo paz 6]

I annan bokou fason pour montre ki nou anvi ed lezot

[Portre lo paz 7]

Anons sa bon nouvel avek lezot i fer plezir Bondye e i ouver semen pour bann byenfe eternel