Kris I Koz Avek Bann Kongregasyon
Kris I Koz Avek Bann Kongregasyon
“La sa ki sa enn ki tenir sa set zetwal dan son lanmen drwat . . . i dir.” —REVELASYON 2:1.
1, 2. Akoz nou devret enterese avek sa ki Kris ti dir avek set kongregasyon Lazi Miner?
ZEZI KRI, sel garson Zeova, i Sef kongregasyon Kretyen. Pour gard kongregasyon son bann disip swazir san defo, Kris i aplik son lotorite par felisit e koriz zot. (Efezyen 5:21-27) Dan Revelasyon sapit 2 ek 3, nou trouv en legzanp kot Zezi ti anvoy bann mesaz pwisan e ranpli avek lanmour pour set kongregasyon an Lazi Miner.
2 Avan ki zapot Zan ti antann sa ki Zezi ti annan pour dir sa set kongregasyon, i ti ganny en vizyon konsernan “Zour Senyer.” (Revelasyon 1:10) Sa “zour” ti konmans ler Rwayonm Mesyanik ti ganny etabli an 1914. Alor sa ki Zezi ti dir avek bann kongregasyon i vreman enportan dan sa bann dernyen zour. Son lankourazman ek konsey i ed nou pour fer fas avek bann sitiasyon ki nou rankontre dan sa bann dernyen zour.—2 Timote 3:1-5.
3. Ki sa bann “zetwal,” “lanz,” ek “sandelye an-or” ki zapot Zan ti vwar i reprezante?
3 Zan ti vwar Zezi Kri ki ti’n ganny glorifye, pe “tenir sa set zetwal dan son lanmen drwat” e pe “mars omilye sa set sandelye an-or,” setadir kongregasyon. Sa bann “zetwal” se “bann lanz sa set [kongregasyon, NW ].” (Revelasyon 1:20; 2:1) Parfwa zetwal i reprezant bann lanz, me selman Zezi pa ti pou servi en zonm pour ekrir serten mesaz pour bann lanz. Alors, i fer sans pour dir ki sa bann “zetwal” i reprezant bann sirveyan ki’n ganny swazir par lespri sen, oubyen konsey bann ansyen. Sa mo “lanz” i refer avek zot rol konman bann mesaze. Vi ki lorganizasyon Bondye in agrandi, “serviter fidel” in osi apwent bann zonm kalifye parmi ‘lezot mouton’ Zezi konman sirveyan.—Lik 12:42-44; Zan 10:16.
4. Ki mannyer bann ansyen i benefisye letan zot ekout sa ki Kris ti dir sa bann kongregasyon?
4 Sa bann zetwal i dan lanmen drwat Zezi. Savedir zot anba son lotorite ek kontrol, e zot annan son laprouvasyon ek proteksyon. Alors, zot annan kont pour rann li. Par pran kont sa ki i ti dir sa set kongregasyon, bann ansyen denozour i esey vwar konman zot kapab fer fas avek bann sitiasyon parey. Byensir, tou Kretyen i bezwen ekout Garson Bondye. (Mark 9:7) Alors, ki nou kapab aprann letan nou ekout sa ki Kris ti dir sa bann kongregasyon?
Pour Lanz Efez
5. Ki kalite lavil Efez ti ete?
5 Zezi ti felisit e osi koriz kongregasyon Efez. (Lir Revelasyon 2:1-7.) Efez ti en sant komers e relizye ki ti ris, lo lakot was Lazi Miner. La dan sa sant, ti annan en gran tanp dedye pour bondye Artemis. Kantmenm Efez ti ranpli avek imoralite, fo larelizyon, ek pratik mazik, Bondye ti beni predikasyon zapot Pol ek lezot dan sa lavil.—Akt, sapit 19.
6. Ki mannyer bann Kretyen fidel ozordi i parey bann dan ansyen lavil Efez?
6 Kris ti felisit kongregasyon Efez, an dizan: “Mon konn tou ou bann laktivite, mon konn ou travay ek ou perseverans. Mon konnen ki ou pa kapab toler bann move dimoun. Ou’n teste bann ki apel zot lekor zapot, me ki an realite pa vre, e ou’n dekouver ki zot manter.” Denozour, bann kongregasyon disip Zezi i osi annan repitasyon pour bann bon aksyon, travay dir, e perseverans. Zot pa toler bann fo frer ki anvi ganny vwar konman zapot. (2 Korentyen 11:13, 26) Parey bann Efezyen, bann Kretyen fidel ozordi “pa kapab toler bann move dimoun.” Alors, pour gard ladorasyon Zeova prop e pour protez kongregasyon, zot pa asosye avek bann aposta ki pa oule repantir.—Galat 2:4, 5; 2 Zan 8-11.
7, 8. Ki problenm serye ki ti egziste dan kongregasyon Efez, e ki mannyer nou ti a kapab rezourd en problenm parey?
7 Parkont, bann Kretyen an Efez ti annan en problenm serye. Zezi ti dir: “Sa ki mon annan kont ou, ki ou’n perdi ou premye lanmour.” Bann manm kongregasyon ti bezwen resanti zot premye lanmour ki zot ti annan pour Zeova. (Mark 12:28-30; Efezyen 2:4; 5:1, 2) Nou tou nou bezwen veye ki nou pa perdi nou premye lanmour pour Bondye. (3 Zan 3) Me ki nou pou fer si bann keksoz tel parey en dezir pour ganny plis keksoz materyel oubyen plezir pe konmans kontrol nou lavi? (1 Timote 4:8; 6:9, 10) Dan sa ka, nou devret priy Zeova senserman. Demann li led pour ranplas sa bann tandans avek en lanmour profon pour li, ensi ki rekonesans pour tou sa ki li ek son Garson in fer pour nou.—1 Zan 4:10, 16.
8 Kris ti donn sa konsey bann Efezyen: “Mazinen kote ou’n sorti pour tonbe, detourn ou avek ou bann pese, e pratik sa bann aksyon ki ou ti pe fer okonmansman.” Me ki ti pou arive si zot pa fer sa? Zezi ti dir: “Si ou pa abandonn ou pese, mon pou vin kot ou e mon pou tir sa sandelye dan son plas.” Si tou mouton ti perdi zot premye lanmour, kongregasyon ki ganny reprezante par “sandelye,” ti pou nepli egziste. Alors, konman bann Kretyen devoue, annou travay dir pour fer kongregasyon kontinyen klere dan en sans spirityel.—Matye 5:14-16.
9. Konman nou devret konsider bann sekt?
9 Sa ki ti byen lo zot par, se ki bann Efezyen ti deteste “sa ki bann Nikolait i fer.” Apard sa ki’n ganny dir dan Revelasyon, nou napa lezot detay ki konfirm lorizin, lansennyman, ek pratik sekt Nikolait. Me vi ki Zezi ti fer vwar ki i mal pour swiv zonm, nou bezwen kontinyen deteste lansennyman bann sekt parey bann Kretyen an Efez ti fer.—Matye 23:10.
10. Ki bann ki ekout sa ki lespri i dir pou eksperyanse?
10 Zezi ti dir: “Sa ki annan zorey, alor ekout sa ki Lespri i dir avek bann [kongregasyon, NW ].” Kan Zezi ti lo later, i ti koz anba lenfliyans lespri Bondye. (Izai 61:1; Lik 4:16-21) Alors, nou devret ekout sa ki Bondye pe dir aprezan atraver li par mwayen lespri sen. Anba gidans lespri sen, Zezi ti promet: “Sa ki ranport laviktwar, mon pou donn li drwa manz fri pye dibwa lavi, ki dan paradi Bondye.” Pour bann Kretyen swazir ki ekout sa ki lespri i dir, sa pou vedir viv pour touzour dan “paradi Bondye” dan lesyel, setadir dan prezans Zeova li menm. Sa “gran lafoul” ki osi ekout sa ki lespri i dir, pou viv dan paradi lo later kot zot pou bwar dan “larivyer delo lavi” e ganny gerizon avek “fey sa pye dibwa” lo bor larivyer.—Revelasyon 7:9; 22:1, 2; Lik 23:43.
11. Ki mannyer nou kapab promot lanmour pour Zeova?
11 Bann Efezyen ti’n perdi zot premye lanmour. Si en sitiasyon koumsa pe devlope dan en kongregasyon ozordi, ki nou kapab fer? Annou promot lanmour pour Zeova par koz lo son bann fason fer keksoz ki ranpli avek lanmour. Nou kapab eksprim nou lapresyasyon pour lanmour ki Bondye in demontre par fourni son Garson byenneme pour sov nou. (Zan 3:16; Romen 5:8) Ler i apropriye, nou kapab mansyonn lanmour Bondye dan nou bann komanter e dan bann diferan parti progranm renyon. Nou kapab montre lanmour ki nou menm nou annan pour Zeova par loue son non dan predikasyon. (Psonm 145:10-13) Wi, nou parol osi byen ki nou aksyon i kapab kontribye bokou pour fer en kongregasyon resanti oubyen ranforsi son premye lanmour.
Pour Lanz Smirn
12. Ki listwar i revele konsernan Smirn ek son bann pratik relizye?
12 Kris ti felisit kongregasyon Smirn, “sa ki Premye e Dernyen, sa enn ki ti’n mor e ki’n retourn vivan” par mwayen en rezireksyon. (Lir Revelasyon 2:8-11.) Smirn (ki aprezan Izmir, Latirki) ti ganny batir lo lakot was Lazi Miner. Bann Grek ti etablir zot dan sa lavil, me apepre lannen 580 A.N.L., bann Lidyen ti detrir li. Bann sikseser Aleksann Legran ti rebatir Smirn dan en lot landrwa. I ti vin en parti provens Romen dan Lazi, e i ti en sant komers ki ti pe byen prospere e renonmen pour son bann zoli batiman piblik. Son tanp ki ti’n ganny dedye pour Tiber Sezar, ti fer li vin en sant ladorasyon lanperer. Sa bann adorater ti bezwen pran en pense lansan, bril li, e dir “Sezar i Senyer.” Bann Kretyen pa ti kapab fer sa akoz pour zot se ‘Zezi ki Senyer.’ Akoz sa, zot ti rankontre bokou difikilte.—Romen 10:9.
13. Menm si bann Kretyen Smirn ti mizer lo plan materyel, dan ki sans zot ti ris?
13 Apard sa bann soufrans, bann Kretyen Smirn ti viv dan lamizer. Sa petet akoz zot ti ganny viktimize pour rezon ki zot pa ti partisip dan ladorasyon lanperer. Denozour, bann serviter Zeova pa ganny eparnyen avek sa bann kalite leprev. (Revelasyon 13:16, 17) Menm si zot mizer lo plan materyel, bann ki parey bann Kretyen Smirn i ris spirityelman. Apre tou, se sa ki vreman enportan!—Proverb 10:22; 3 Zan 2.
14, 15. Ki rekonfor bann Kretyen swazir i kapab retire dan Revelasyon 2:10?
14 Laplipar Zwif an Smirn ti “form lasanble satan” parski zot ti atase avek bann tradisyon ki pa baze lo Labib. Deplis, zot ti rezet Garson Bondye, e zot ti blasfenm son bann disip ki ti’n ganny swazir par lespri sen. (Romen 2:28, 29) Me sa ki Kris i dir apre i kapab vreman rekonfort son bann disip swazir. I dir: “Pa per pour sa ki ou pou soufer. Gete, dyab pou anvoy byento serten antre zot dan prizon, pour teste zot, e zot pou bezwen soufer pandan dis zour. Reste fidel ziska lanmor, e mon a donn ou kouronn lavi.”—Revelasyon 2:10.
15 Zezi pa ti per pour mor akoz i ti siport souvrennte Zeova. (Filipyen 2:5-8) Menm si aprezan Satan pe lalit avek larestan Kretyen swazir, zot pa per pour sa ki zot bezwen soufer konman en group, ki swa i soufrans, lanprizonnman, oubyen lanmor vyolan. (Revelasyon 12:17) Zot pou ranport laviktwar lo lemonn. Olye ganny en kouronn fler, ki fletri avek letan, parey bann venker ti gannyen dan bann zwe payen, Kris i promet bann Kretyen swazir “kouronn lavi” dan lesyel. Pa sa i en kado vreman presye!
16. Si nou pe asosye avek en kongregasyon parey sa enn an Smirn, lo ki size nou devret konsantre?
16 Me ki nou pou fer si nou pe asosye avek en kongregasyon parey sa enn dan ansyen Smirn? Dan sa ka, annou ed nou bann frer ek ser pour konsantre lo rezon prensipal ki Bondye i permet persekisyon. Sa i annan pour fer avek sa kestyon konsernan drwa Zeova pour diriz liniver. Sak Temwen Zeova ki reste fidel i prouve ki Satan i en manter e i demontre ki menm en dimoun ki ganny persekite i kapab kontinyen siport drwa Bondye pour dirize konman Souvren Liniver. (Proverb 27:11) Annou ankouraz lezot Kretyen pour andir persekisyon e kontinyen “servi li [Zeova] san lafreyer, e pour viv en lavi zis e sen devan li toulezour nou lavi,” wi pour touzour.—Lik 1:68, 69, 74, 75.
Pour Lanz Perganm
17, 18. Ki kalite sant ladorasyon Perganm ti ete, e ki ti kapab arive si en dimoun ti refize pour partisip dan sa bann kalite ladorasyon?
17 Kongregasyon Perganm ti ganny felisite e osi korize. (Lir Revelasyon 2:12-17.) Perganm ti en lavil ki ti 80 kilomet nor avek Smirn e i ti anfonse dan larelizyon payen. Ou a krwar bann deviner ti’n sove Babilonn pour al laba. Dimoun malad ti al par grap kot tanp renonmen bondye Asklepyos, ki dapre zot ti donn gerizon ek latizann. Avek son bann tanp ki ti’n ganny dedye pour ladorasyon Sezar Ogis, Perganm ti ganny apele “sant prensipal ladorasyon lanperer okonmansman lanpir.”—Encyclopædia Britannica, 1959, Volim 17, paz 507.
18 An Perganm, ti annan en lotel ki ti’n ganny dedye pour bondye Zeis. Sa lavil ti osi en sant ladorasyon imen, ki Dyab ti par deryer byensir. I pa etonnan ki Zezi ti dir ki sa kongregasyon i reste lanmenm kot “tronn satan i ete”! Pour en dimoun ki ti soutenir souvrennte Zeova e refize ador lanperer, i ti kapab trouv son lanmor. Lemonn i ankor touzour dan pouvwar Dyab, e bann senbol nasyonal pe aprezan ganny adore. (1 Zan 5:19) Depi premye syek ziska nou letan, bokou Kretyen in soufer akoz zot lafwa, parey sa enn ki Kris ti apel “Antipas, mon temwen fidel, [ki] ti ganny touye kot ou.” Sirman, Zeova ek Zezi i mazin sa bann serviter fidel.—1 Zan 5:21.
19. Ki Balaam ti fer, e ki tou Kretyen i bezwen veye?
19 Kris ti osi koz lo “lansennyman Balaam.” Sa fo profet, Balaam, ti esey modi nasyon Izrael akoz i ti voras keksoz materyel. Kan Bondye ti fer son malediksyon vin en benediksyon, ansanm avek Lerwa Balak, Balaam ti antrenn bokou Izraelit dan ladorasyon zidol ek imoralite seksyel. Bann ansyen i bezwen ferm pour sa ki drwat zis parey Fineas ki pa ti toler sa ki Balaam ti fer. (Nonm 22:1–25:15; 2 Pyer 2:15, 16; Zid 11) Anfet, tou Kretyen i bezwen veye ki okenn form ladorasyon zidol oubyen imoralite seksyel pa ptit-a-pti antre dan kongregasyon.—Zid 3, 4.
20. Si i annan okenn Kretyen ki pe konmans akey bann pwennvi aposta, ki i devret fer?
20 Kongregasyon Perganm ti dan gran danze akoz i ti toler bann ki ti “pe swiv lansennyman bann Nikolait.” Kris ti dir kongregasyon: “Abandonn ou pese. Sinon mon pou vin kot ou byento e mon pou konbat kont zot avek lepe ki sorti dan mon labous.” Bann ki siport bann sekt i anvi detrir spirityalite bann Kretyen. Sa ki determinen pour promot divizyon ek sekt pa pou erit Rwayonm Bondye. (Romen 16:17, 18; 1 Korentyen 1:10; Galat 5:19-21) Si i annan okenn Kretyen ki pe konmans akey sa bann pwennvi aposta e anvi propaz zot, i devret pran lavertisman Kris oserye! Pour sov son lekor dan maler, i devret repantir e rod lasistans avek bann ansyen dan kongregasyon. (Zak 5:13-18) I enportan ki i fer li vit, akoz Zezi pe vin vit pour egzekit son zizman.
21, 22. Lekel ki manz sa “lamann ki’n kasyet,” e ki sa i reprezante?
21 Bann Kretyen swazir fidel ek zot konpanyon fidel pa bezwen per sa zizman ki pe vini. Benediksyon pe esper tou bann ki ekout konsey ki Zezi in donnen anba gidans lespri sen Bondye. Par egzanp, bann Kretyen swazir ki pou ranport laviktwar lo lemonn, pou ganny envite pour manz en pe “lamann ki’n kasyet” e zot pou ganny “en pti ros blan” avek “en nouvo non” lo la.
22 Bondye ti fourni lamann pour bann Izraelit manze pandan zot voyaz dan dezer ki ti dir pour 40 an. En pe sa “dipen” ti ganny garde dan en vaz annor dan lars lalyans e ti ganny kasyet dan sa bout ki ti apel Tre Sen, kot ti annan en lalimyer mirakile ki ti senboliz prezans Zeova. (Egzod 16:14, 15, 23, 26, 33; 26:34; Ebre 9:3, 4) Ti napa personn ki ti annan drwa manz sa lamann ki’n kasyet. Parkont, ler bann disip swazir Zezi i resisite, zot pou manz sa “lamann ki’n kasyet,” ki vedir zot pou vin imortel.—1 Korentyen 15:53-57.
23. Ki sa “pti ros blan” ek sa “nouvo non” i reprezante?
23 Dan lakour Romen, en pti ros nwanr ti vedir kondannasyon, tandis ki en pti ros blan ti vedir ki en dimoun i inosan. Lefe ki Zezi i donn “en pti ros blan” bann Kretyen swazir, sa i endike ki i konsider zot inosan, pir, e prop. Vi ki bann Romen ti osi servi bann pti ros konman en tiket pour antre dan bann levennman enportan, sa “pti ros blan” i kapab pe reprezant bann Kretyen swazir pe ganny en plas dan lesyel pour maryaz Lanyo. (Revelasyon 19:7-9) I kler ki sa “nouvo non” i reprezant privilez pour reini avek Zezi konman bann zeritye Rwayonm lesyel. Pa tousala i ankouraz bann Kretyen swazir, ensi ki zot konpanyon ki pe servi Zeova avek lespwar pour viv dan paradi lo later!
24. Ki pozisyon nou devret pran an rapor avek apostazi?
24 Pa oubliye ki bann aposta ti en danze pour kongregasyon Perganm. Si en sitiasyon parey pe menas byennet spirityel nou kongregasyon, annou rezet aposta konpletman e kontinyen mars dan laverite. (Zan 8:32, 44; 3 Zan 4) Bann fo ansennyan oubyen dimoun ki siport apostazi i kapab gat en kongregasyon antye. Alors, nou bezwen reste ferm dan nou desizyon pour rezet apostazi e pa zanmen les bann move pwennvi anpes nou obeir laverite.—Galat 5:7-12; 2 Zan 8-11.
25. Ki mesaz nou pou diskite dan lartik swivan?
25 Nou’n vwar sa ki Zezi ti annan pour dir avek trwa dan sa set kongregasyon Lazi Miner. Son bann bon remark ek konsey i fer reflesir bokou. Toudmenm, anba gidans lespri sen, i ti osi annan bokou pour dir sa kat kongregasyon ki reste. Dan nou lartik swivan, nou pou diskit lezot mesaz ki ti ganny adrese avek kongregasyon Tyatir, Sard, Filadelfi, ek Laodise.
Ki ou pou reponn?
• Akoz nou devret pran kont sa ki Kris ti dir sa bann kongregasyon?
• Ki mannyer nou ti a kapab ede pour fer en kongregasyon resanti sa lanmour ki i ti annan avan?
• Akoz nou kapab dir ki bann Kretyen ki ti mizer lo plan materyel dan ansyen Smirn ti an realite ris?
• Letan nou reflesir lo sitiasyon kongregasyon Perganm, ki mannyer nou devret konsider bann pwennvi aposta?
[Kestyon]
[Map lo paz 8]
(Pour prezantasyon, vwar piblikasyon)
LAGRES
LAZI MINER
Efez
Smirn
Perganm
Tyatir
Sard
Filadelfi
Laodise
[Portre lo paz 10]
Sa “gran lafoul” pou rezwir lavi dan paradi lo later
[Portre lo paz 11]
Bann Kretyen ki ganny persekite i ranport laviktwar lo lemonn