“Pa Bezwen Per E Pa Les Lafreyer Pran Zot”

“Pa bezwen per e pa les lafreyer pran zot. . . . Zeova pou avek zot.”—2 KRONIK 20:17.

1. Ki lefe terorism i annan lo dimoun, e akoz nou kapab konpran sa lafreyer ki zot annan?

TERORISM! Zis sa mo tousel i senm lafreyer dan leker dimoun. I fer zot enkyet e fer zot krwar ki zot pa kapab fer nanryen. I fer monte diferan santiman: terer, lapenn, ek lakoler. I en mo ki dekrir sa ki bokou dimoun i per i kapab tourmant limanite pour bokou bokou lannen. Sa lafreyer i vin apre ki serten pei in konbat diferan form terorism pour bokou lannen san gran sikse.

2. Ki reaksyon Temwen Zeova anver problenm terorism? Ki kestyon sa i fer nou demande?

² Toudmenm, i annan bon rezon pour annan lespwar. Temwen Zeova, ki pe aktivman pres dan 234 pei ek teritwar partou lo later, i vreman get lavenir avek konfyans. Olye per ki terorism pa ava zanmen ganny eliminen, zot annan konfyans ki i pou ganny eliminen—e sa i tre byento. Eski i rezonnab pour annan konfyans parey zot? Lekel ki pou vreman reisi liber lemonn avek sa fleo? Konman sa pou posib? Vi ki nou tou nou’n kapab ganny afekte par vyolans dan en fason ou en lot, i ti a byen si nou vwar akoz nou kapab annan en tel konfyans.

3. Kwa ki fer dimoun per, e kwa ki ti ganny predir konsernan nou letan?

 ³ Denozour, i annan bokou keksoz ki fer dimoun per. Mazin sa kantite dimoun ki nepli kapab okip zot lekor akoz lavyeyes, akoz bann maladi ki napa gerizon e ki rann zot fay, e akoz problenm ekonomik ki fer difisil pour zwenn en bout avek en lot. Pa zis sa. Mazin ki mannyer lavi li menm pa stab! Nenport ler, en aksidan oubyen en dezas i kapab pran nou lavi, e met en lafen avek tou sa ki nou kontan. Sa lafreyer, sa lenkyetid, ensi ki tou sa problenm personnel ek dezapwentman ki nou rankontre dan lavi, i fer nou lepok al byen avek deskripsyon zapot Pol: “Rapel sa byen: dan bann dernyen zour pou annan letan difisil. Parski zonm pou vin egois, . . . pou annan leker dir, san pitye, kalomni zot prosen, vyolan, kriel, lennmi sa ki fer dibyen.”—2 Timote 3:1-3.

4. Ki laspe pozitif sa portre sonm ki trouve dan 2 Timote 3:1-3?

⁴ I vre ki sa pasaz Labib i portre en sitiasyon sonm. Toudmenm, i osi endik en lespwar. Remark byen ki sa bann letan difisil ti pou dan “bann dernyen zour” sa sistenm mesan Satan. Sa i vedir ki nou pros pour ganny soulazman e ki sa lemonn mesan pou byento ganny ranplase par dominasyon Rwayonm parfe Bondye. Se sanmenm sa Rwayonm ki Zezi ti ansenny son bann disip pour priye ki i vini. (Matye 6:9, 10) Sa Rwayonm i gouvernman Bondye e i dan lesyel. Parey profet Danyel i dir, i “pa pou zanmen ganny detrir. . . . I pou kraz e met en lafen avek tou sa bann rwayonm [zonm] e li menm i pou dire pour letan endefini.”—Danyel 2:44.

Pozisyon bann Kretyen anver Terorism

5. Tou dernyenman, konman bann pei in reazir anver menas terorism?

⁵ Pour bokou lannen, terorism in pran lavi plizyer milye dimoun. Partou dan lemonn, dimoun ti vin pli konsyan sa danze apre sa latak le 11 Septanm, 2001, New York City ek Washington, D.C. Vi ki terorism i en size ki afekte lemonn antye, diferan pei partou lo later ti deswit zwenn ansanm pour konbat li. Par egzanp, dapre bann rapor medya, le 4 Desanm, 2001, “bann minis zafer etranzer sorti dan 55 pei Eropeen, Nor Lanmerik, ek Sant Lazi, ti dakor pour adopte en plan” ki’n ganny fer avek bi pour armoniz zot zefor. En o zofisye Letazini ti salye sa pa, an dizan ki sa i donn en nouvo lelan zefor kont terorism. En sel kou, latansyon bokou dimoun ti lo sa ki The New York Times Magazine ti apel “konmansman en tre gran batay.” Si sa bann zefor pou vreman reisi, sa i en keksoz ki nou bezwen espere pour vwar. Parkont, konsekans en tel lager kont terer in fer bokou dimoun viv dan lafreyer ek lenkyetid. Me sa pa leka avek bann ki met zot konfyans dan Zeova.

6. (a) Akoz parfwa serten dimoun i kapab vwar li difisil pour aksepte pozisyon Temwen Zeova vizavi politik? (b) Ki legzanp konsernan aktivite politik Zezi in kit pour son bann disip?

⁶ Temwen Zeova i byen koni pour pa mel dan politik. Menm si laplipar dimoun i pare pour aksepte nou pozisyon dan letan lape, zot vin mwen toleran kan bann sitiasyon ki  zot pa ti pe ekspekte i devlope. Souvan, lafreyer ek konfizyon koze par lager, i fer dimoun vin vreman patriyotik. Alors, i kapab difisil pour serten konpran akoz en dimoun i a refize siport bann zefor ki son pei pe fer, kan tou lezot dimoun pe byen akey sa. Toudmenm, bann vre Kretyen i konnen ki zot bezwen obeir lord Zezi pour “pa fer parti lemonn.” (Zan 15:19; 17:14-16; 18:36; Zak 4:4) Sa i vedir ki zot pa mel dan politik oubyen dan bann lalit sosyal. Zezi li menm in kit en bon legzanp. Vi ki i ti annan en lasazes parfe ek bann abilite remarkab, i ti a’n kapab fer en bon kontribisyon dan bann zafer imen dan son letan. Pourtan, i ti evite mel dan politik. Okonmansman son minister, i ti klerman refiz dominasyon lo tou rwayonm lemonn ki Satan ti ofer li. Plitar, i pa ti les lafoul obliz li aksepte en pozisyon dan politik.—Matye 4:8-10; Zan 6:14, 15.

7, 8. (a) Kantmenm Temwen Zeova pa mel dan okenn politik, ki zot pwennvi konsernan vyolans, e akoz? (b) Ki mannyer Romen 13:1, 2 i montre ki Kretyen pa devret partisip dan vyolans kont gouvernman?

⁷ Lefe ki Temwen Zeova pa mel dan politik, sa pa vedir ki zot siport oubyen aksepte vyolans. Si zot ti fer sa, i ti pou montre ki kontrerman avek sa ki zot dir, zot pa vreman bann serviter “Bondye lanmour ek lape.” (2 Korentyen 13:11) Zot in aprann konman Zeova i vwar vyolans. En psalmis ti ekrir: “Zeova li menm pe egzamin sa ki drwat ensi ki sa ki mesan, e i vreman deteste nenport ki ki kontan vyolans.” (Psonm 11:5) Zot osi gard antet sa ki Zezi ti dir avek zapot Pyer: “Met ou lepe dan son plas. Tou sa ki servi lepe pou mor par lepe.”—Matye 26:52.

⁸ Menm si listwar i montre ki bann swadizan Kretyen in souvan tourn ver “lepe,” Temwen Zeova zot, zot pa’n fer sa. Zot pa partisip dan sa bann aktivite. Bann Temwen i fidelman obeir sa lord dan Romen 13:1, 2: “Tou dimoun i devre soumet li avek bann lotorite ki gouvernen, parski napa okenn lotorite amwen ki Bondye in etabli li, e bann lotorite ki egziste i ganny etabli par Bondye. Alor sa ki opoz lotorite, i opoz lord ki’n ganny etabli par Bondye, e ensi i pe atir kondannasyon lo limenm.”

9. Ki sa de fason ki Temwen Zeova i konbat terorism?

⁹ Vi ki terorism i sitan danzere, eski Temwen Zeova pa devret fer serten keksoz pour ede konbat li? Wi, zot devret, e zot pe fer li. Premyerman, zot menm zot pa partisip dan okenn aktivite terorism. Dezyenmman, zot ansenny dimoun bann prensip dan Labib e ler zot met an pratik sa bann prensip, zot rezet tou kalite vyolans. * Lannen pase, bann Temwen ti pas 1,202,381,302 er-d-tan pour ed bann dimoun aprann viv konman Kretyen. Zot pa ti pe zis gaspiy zot letan parski gras a sa aktivite 265,469 dimoun ti batize konman Temwen Zeova. Par sa, zot ti montre piblikman ki zot rezet vyolans konpletman.

10. Eski i posib pour retir vyolans konpletman dan sa lemonn ki nou pe viv?

¹⁰ Deplis, Temwen Zeova i rekonnet ki zot  menm zot pa pou zanmen kapab debaras lemonn avek mesanste. Se pour sa ki zot met tou zot konfyans dan sa enn ki kapab fer li—Zeova. (Psonm 83:18) Malgre ki bann imen i fer bann zefor senser, zot pa kapab met en lafen avek vyolans. En ekriven Labib ki’n ganny enspire ti donn sa lavertisman konsernan nou letan, setadir “bann dernyen zour.” I ti dir: “Bann move dimoun ek bann anbeter, zot pou fer touzour plis progre dan sa ki mal, zot pou anbet lezot e zot osi zot pou ganny anbete.” (2 Timote 3:1, 13) Letan nou reflesir lo sa parol, nou kapab dir ki posibilite pour imen ranport sa batay kont mesanste i vreman pti gin. De lot kote, nou kapab depan lo Zeova pour retir vyolans konpletman e pour touzour.—Psonm 37:1, 2, 9-11; Proverb 24:19, 20; Izai 60:18.

Pa per kantmenm Latak pe aprose

11. Ki aksyon Zeova in deza pran pour elimin vyolans?

¹¹ Vi ki Bondye lape i deteste vyolans, nou kapab konpran alor akoz i’n konmans pran aksyon kont sours vyolans, Satan Dyab. Anfet, I’n deza fer Satan sibir en defet anbarasan anba lanmen Misel Arkanz—nouvo Lerwa ki Bondye in apwente, Zezi Kri. Labib i dekrir li koumsa: “Ti annan lager dan lesyel, Misel avek son bann lanz ti lager kont dragon. Dragon avek son bann lanz ti lager, me dragon pa ti ganny laviktwar, e li avek son bann lanz pa ti kapab reste ankor dan lesyel. Sa gro dragon, ti ganny zet ater. Limenm li sa serpan lantikite, ki apel dyab ou satan, e ki tronp lemonn antye. I ti ganny zete lo later, e son bann lanz ansanm avek li.”—Revelasyon 12:7-9.

12, 13. (a) Kwa ki markan avek lannen 1914? (b) Ki profesi Ezekyel i predir pour bann ki siport Rwayonm Bondye?

¹² Kronolozi Labib ek bann levennman mondyal, zot tou le de zot idantifye 1914 konman sa lannen ki sa lager ti arive dan lesyel. Depi sa, bann kondisyon lemonn in vin deplizanpli pir. Revelasyon 12:12 i eksplike akoz: “Pour sa rezon, alor, rezoui lesyel ek tou bann [ki reste dan lesyel, NW ]! Me maler, later ek lanmer, parski dyab in desann kot zot avek en gran lakoler, akoz i konnen ki i reste li ankor zis en pti pe letan.”

¹³ Nou kapab konpran akoz Dyab in tir son lakoler premyerman lo bann adorater Bondye ki annan lespwar pour viv dan lesyel ek zot konpanyon, ‘lezot mouton.’ (Zan 10:16; Revelasyon 12:17) Byento, sa lopozisyon pou ariv lo son pik kan Dyab pou lans en latak vyolan kont tou sa ki siport Rwayonm ki Bondye in etabli e ki met zot konfyans ladan. Ezekyel sapit 38 i apel sa latak final latak “Gog sorti dan pei Magog.”

14. Ki proteksyon Temwen Zeova in gannyen dan lepase? Eski sa pou touzour leka?

¹⁴ Depi ki Satan in ganny pouse dan lesyel, pep Bondye in parfwa ganny proteze avek latak Satan par zefor bann group politik. Sa in ganny dekrir senbolikman dan Revelasyon 12:15, 16. Parkont, Labib i endike ki pandan latak final Satan, napa okenn  lorganizasyon imen ki pou protez bann ki met zot konfyans dan Zeova. Eski sa i devret fer bann Kretyen per e les lafreyer domin zot? Pa ditou!

15, 16. (a) Ki parol rekonfortan Zeova ti dir avek son pep dan letan Yeosafat ki fer bann Kretyen ozordi annan konfyans? (b) Ki legzanp Yeosafat ek lepep in kite pour bann serviter Bondye ozordi?

¹⁵ Bondye pou ed son pep zis parey i ti soutenir son nasyon dan letan Lerwa Yeosafat. Nou lir: “Ekout byen tou Zida, bann zabitan Zerizalenm, ensi ki Lerwa Yeosafat! La sa ki Zeova in dir zot, ‘Pa bezwen per e pa les lafreyer pran zot akoz sa gran lafoul, parski sa batay i pa pour zot, me pour Bondye. . . . Zot pa pou bezwen lager dan sa ka. Pran zot pozisyon, pa bouze, e gete konman Zeova pou delivre zot. Zida ek Zerizalenm, pa bezwen per e pa les lafreyer pran zot. Demen, sorti pour zot, e Zeova pou avek zot.’ ”—2 Kronik 20:15-17.

¹⁶ Lepep Zida ti ganny lasirans ki zot pa ti pou ni bezwen lager. Pareyman, letan Gog sorti Magog pou atak pep Bondye, zot pa pou pran okenn zarm pour defann zot lekor. Plito, zot ‘pa pou bouze, e zot pou gete konman Zeova pou delivre zot.’ Byensir, pa bouze pa vedir ki zot pa pou fer okenn aktivite. Sa pa ti leka avek pep Bondye dan letan Yeosafat. Nou lir: “Deswit, Yeosafat ti bese avek son figir anba, e tou Zida ek bann zabitan Zerizalenm ti tonm devan Zeova pour rann Zeova omaz. . . . Deplis, [Yeosafat] ti diskit avek lepep. I ti osi met an plas bann ki ti pou sant pour Zeova e bann ki ti pou loue li dan bann resanz sakre pour zot mars devan bann zonm arme, an dizan: ‘Loue Zeova, parski son labonte leker i pour touzour.’ ” (2 Kronik 20:18-21) Wi, menm kan zot ti pe fer fas avek latak zot lennmi, sa pep ti kontinyen loue Zeova. Sa i en legzanp pour Temwen Zeova swiv kan Gog i lans son latak lo zot.

17, 18. (a) Ki latitid pozitif Temwen Zeova i annan ozordi konsernan latak Gog? (b) Ki rapel ki ti ganny donnen resaman avek bann zenn Kretyen?

¹⁷ Ziska sa letan, e menm apre ki latak Gog i konmanse, Temwen Zeova pou kontinyen siport Rwayonm Bondye. Zot pou kontinyen ganny lafors ek proteksyon par asosye avek sa plis ki 94,600 kongregasyon partou dan lemonn. (Izai 26:20) Pa la i en letan  apropriye pour loue Zeova avek kouraz! Sirman, latak Gog ki kapab arive nenport ler, pa fer zot rekile avek lafreyer. Okontrer, i motiv zot pour ofer otan sakrifis louanz ki zot kapab.—Psonm 146:2.

¹⁸ Sa latitid pozitif in ganny byen demontre par bokou zenn partou dan lemonn ki’n pran servis aplentan. Sa trak Zenn—Ki ou pou fer avek ou Lavi? ti ganny lanse dan lasanble distrik 2002 pour montre ki swazir en tel fason viv i bokou pli meyer. Bokou Kretyen, zenn konman vye, in vreman apresye sa rapel ki’n vin zis atan.—Psonm 119:14, 24, 99, 119, 129, 146.

19, 20. (a) Akoz bann Kretyen napa okenn rezon pour per e les lafreyer pran zot? (b) Ki prosen lartik pou fer?

¹⁹ Malgre kondisyon lemonn, napa nanryen pour bann Kretyen per oubyen les lafreyer domin zot. Zot konnen ki Rwayonm Zeova pou byento elimin tou form vyolans enn fwa pour tou. Zot osi ganny rekonforte akoz zot konnen ki rezireksyon pou redonn lavi bokou dimoun ki’n mor dan vyolans. Sa pou donn serten zot premye loportinite pour aprann konsernan Zeova. Tandis ki lezot, rezireksyon pou donn zot loportinite pour kontinyen servi Zeova.—Akt 24:15.

²⁰ Vi ki nou bann vre Kretyen, nou konpran ki nou bezwen kontinyen pa mel dan zafer sa lemonn e nou determinen pour fer li. Nou anvi tenir ferm sa posibilite merveye ki nou annan pour ‘pa bouze, e gete konman Zeova pou delivre nou.’ Nou prosen lartik pou fortifye nou par fer nou konn bann levennman aktyel ki pe ptit-a-pti fer nou pli byen konpran lakonplisman serten profesi Labib.

[Not anba lo paz]

Eski ou kapab eksplike?

• Akoz bokou dimoun ozordi napa gran lespwar kan zot get lavenir?

• Akoz Temwen Zeova i get lavenir avek konfyans?

• Ki aksyon Zeova in deza pran kont sours tou vyolans?

• Akoz napa okenn rezon pour nou per latak Gog?

[Kestyon]

[Portre lo paz 22]

UN PHOTO 186226/M. Grafman

[Portre lo paz 23]

Zezi in donn en bon legzanp konman Kretyen pa mel dan zafer lemonn

[Portre lo paz 26]

Bokou zenn Temwen in pran servis aplentan avek lazwa