Pa Bouze E Gete Konman Zeova Pou Delivre Zot!
Pa Bouze E Gete Konman Zeova Pou Delivre Zot!
“Pran zot pozisyon, pa bouze, e gete konman Zeova pou delivre zot.” —2 Kronik 20:17.
1, 2. Akoz latak “Gog sorti dan pei Magog” i pli serye ki menas terorism lo lemonn?
TERORISM in ganny dekrir par serten konman en latak lo lemonn e menm lo sivilizasyon li menm. I normal ki en tel menas i ganny pran oserye. De lot kote, i annan en lot latak ki pli serye e ki lemonn pa pe pran kont. Ki sa latak?
2 I latak “Gog sorti dan pei Magog,” ki Labib i koz lo la dan Ezekyel sapit 38. Eski nou pe egzazere kan nou dir ki sa latak i pli serye ki menas terorism lo lemonn? Pa ditou, akoz latak Gog pa zis en latak lo bann gouvernman imen. I en latak lo gouvernman Bondye! Me kontrerman avek imen, ki pa toultan annan kontrol lo bann latak kont zot sistenm, Kreater i konn byen mannyer i pou mannyen latak pli kriyel Gog.
En Latak lo Gouvernman Bondye
3. Ki bann dirizan lemonn in ganny envite pour fer depi 1914, e konman ki zot in reazir?
3 Depi ki Rwayonm Bondye in ganny etabli dan lesyel, an 1914, i’n annan en konfli ant sa nouvo Lerwa ki Bondye in apwente ek sistenm mesan Satan. Sa letan, bann dirizan imen ti ganny averti pour soumet avek sa Dirizan ki Bondye ti’n swazir. Me zot ti refize pour fer li, parey i’n ganny predir: “Bann lerwa later i pran zot pozisyon e bann o-zofisye in rasanble konman en sel kont Zeova e kont sa enn ki i’n swazir, an dizan: ‘Annou kas zot lasenn e anvoy zot lakord lwen avek nou!’ ” (Psonm 2:1-3) Sa lopozisyon kont Rwayonm pou ariv lo son pik pandan latak Gog sorti Magog.
4, 5. Ki mannyer bann imen i kapab atak gouvernman envizib Bondye dan lesyel?
4 Petet, nou pe demann nou lekor ki mannyer bann imen i kapab lager kont en gouvernman envizib dan lesyel. Labib i montre ki sa gouvernman i formen avek “144,000 ki ti’n ganny sove lo later” e osi “Lanyo,” Zezi Kri. (Revelasyon 14:1, 3; Zan 1:29) Vi ki sa nouvo gouvernman i dan lesyel, i ganny apele “nouvo lesyel,” tandis ki son bann sitwayen lo later i ganny apele “nouvo later.” (Izai 65:17; 2 Pyer 3:13) Laplipar sa 144,000 ki pou diriz avek Kris in mor fidel e zot in ganny resisite. Alors, zot in montre ki zot diny pour zot nouvo latas dan lesyel.
5 Toudmenm, i annan ankor en pe sa 144,000 ki ankor lo later. Dan sa plis ki 15,000,000 dimoun ki ti asiste selebrasyon Repa Senyer 2002, zis 8,760 ki ti eksprim zot konfyans ki zot in ganny swazir pour sa latas dan lesyel. Nenport ki ki annan lodas pour atak larestan manm sa Rwayonm pe an realite atak Rwayonm Bondye.—Revelasyon 12:17.
Lerwa i ale pour ganny Laviktwar
6. Ki mannyer Zeova ek Kris i vwar lopozisyon ki ganny lanse kont pep Bondye?
6 Reaksyon Zeova anver bann ki rezet son Rwayonm etabli ti ganny predir: “Sa Enn ki pe asiz dan lesyel pou riye. Zeova li menm pou monk zot. Sa letan, i pou koz avek zot dan son lakoler e telman i pou mekontan i pou fatig zot, an dizan: ‘Mwan, mon’n enstal mon lerwa lo Siyon, mon montanny sen.’ ” (Psonm 2:4-6) Letan in arive aprezan pour Kris “ganny laviktwar” anba direksyon Zeova. (Revelasyon 6:2) Ki mannyer Zeova i vwar lopozisyon ki ganny lanse kont son pep pandan sa moman laviktwar? I vwar li konmsi pe ganny lanse kont li personnelman e kont son Lerwa ki pe rennyen. Zeova i dir: “Sa ki tous zot, pe tous mon kannet lizye.” (Zekarya 2:8) Zezi osi ti dir ki i konsider sa ki dimoun i fer oubyen pa fer anver son bann frer swazir konmsi i’n ganny fer anver li.—Matye 25:40, 45.
7. Akoz bann parmi “sa gran lafoul,” ki ganny dekrir dan Revelasyon 7:9 pou eksperyans lakoler Gog?
7 Byensir, bann ki aktivman siport sa larestan Kretyen swazir pou santi lakoler Gog zot osi. Sa bann fitir rezidan, setadir sa “nouvo later” Bondye, i “en gran lafoul” ki’n ganny apele “sorti dan tou nasyon, tribi, pep ek lalang.” (Revelasyon 7:9) Dan Labib, zot ganny dekrir konman bann ki pe “debout devan tronn e devan Lanyo, dan rob blan.” Sa i endike ki zot annan laprouvasyon Bondye ek Zezi Kri. Avek bann “brans palm dan lanmen,” zot salye Zeova konman Souvren liniver, ki son dominasyon i ganny reprezante atraver renny son Lerwa, Zezi Kri, “Lanyo Bondye.”—Zan 1:29, 36.
8. Ki latak Gog pou fer Kris fer, e avek ki rezilta?
8 Latak Gog pou fer Lerwa ki Bondye in apwente pran aksyon e anmenn lager Armagedon. (Revelasyon 16:14, 16) Bann ki refize rekonnet drwa Zeova pour dirize pou ganny detrir. De lot kote, bann ki’n soufer akoz zot fidelite anver Rwayonm Bondye, pou ganny soulazman total. An rapor avek sa, zapot Pol ti ekrir: “Sa i prouve ki zizman Bondye i zis, pour ki zot vin diny pour son Rwayonm pour lekel zot pe soufer. Bondye i zis. I pou repey par soufrans bann ki fer zot soufer, e pour zot ki pe soufer, i pou donn zot repo, ensi ki nou osi. I pou fer sa kan Senyer Zezi pou paret dan lesyel avek son bann lanz pisan, avek laflanm dife, pour tir vanzans lo bann ki pa konn Bondye ek bann ki pa obei levanzil ki konsern nou Senyer Zezi.”—2 Tesalonisyen 1:5-8.
9, 10. (a) Ki mannyer Zeova ti donn Zida laviktwar lo en lennmi danzere? (b) Ki bann Kretyen i bezwen kontinyen fer ozordi?
9 Pandan sa gran ladetres ki pe vini, ki pou fini avek Armagedon, Kris pou lager avek tou sa ki move. Me son bann disip pa pou bezwen lager, zis parey bann zabitan rwayonm Zida pa ti bezwen lager plis ki 2,900 an pase. Sa batay ti pour Zeova, e se li ki ti donn zot laviktwar. Resi i lir koumsa: “Zeova ti plas bann zonm dan en landrwa kasyet pour atak bann garson Amonn, Moab, ek rezyon montanny Seir, ki ti pe vin an Zida. Zot ti konmans bat kanmarad. Bann garson Amonn ek Moab ti debout kont bann zabitan rezyon montanny Seir pour detrir zot e detrir zot konpletman. Dek ki zot ti fini avek bann zabitan Seir, zot ti ed kanmarad pour detrir zot prop konpanyon. Me Zida li, i ti’n ariv kot latour veyer dan dezer. Kan zot ti tourn zot figir ver lafoul, zot ti vwar zot bann kadav ki ti’n tonm ater. Personn pa ti’n kapab sape.”—2 Kronik 20:22-24.
10 I ti deroul zis parey Zeova ti’n predir: “Zot pa pou bezwen lager.” (2 Kronik 20:17) Sa i vin konman en legzanp pour bann Kretyen swiv kan Zezi Kri i vini “pour ganny laviktwar.” Antretan, zot pe kontinyen lager avek lemal. Me zot pa servi bann vre zarm, zot plito servi bann zarm spirityel. Dan sa fason, zot “domin lemal par sa ki byen.”—Romen 6:13; 12:17-21; 13:12; 2 Korentyen 10:3-5.
Lekel ki pou diriz Latak Gog?
11. (a) Ki bann lorganizasyon Gog pou servi pour fer son latak? (b) Kwa ki enplike dan reste vizilan spirityelman?
11 Gog sorti Magog i ganny idantifye konman Satan Dyab ki’n ganny imilye depi 1914. Vi ki i en kreatir spirityel, i pa kapab fer son latak li menm. I pou servi bann lorganizasyon imen pour fer sa pour li. Lekel sa bann lorganizasyon imen ki i pou servi? Labib pa donn nou detay, me i donn serten lendikasyon ki kapab ed nou idantifye zot. Anmezir ki bann levennman mondyal i akonpli bann profesi Labib, i pou ptit-a-pti vin pli kler lekel ki Satan pou servi. Pep Zeova i evite enterpret bann profesi Labib san okenn baz, me zot reste vizilan. Zot byen atantif anver bann devlopman politik e relizye ki endik lakonplisman profesi Labib.
12, 13. Konman profet Danyel ti predir en latak final lo pep Bondye?
12 Profet Danyel i revel plis lenformasyon konsernan en latak final kont pep Bondye. I ekrir: “I [lerwa nor] pou sorti avek en gran lakoler pour detrir bokou. I pou met son latant ki parey en pale ant sa gran lanmer ek montanny sen sa zoli Dekorasyon.”—Danyel 11:44, 45.
13 Dan letan biblik, “sa gran lanmer” ti Lanmer Lamediterane. Sa “montanny sen” ti Siyon, ki Zeova ti mansyonnen letan i ti dir: “Mwan, mon’n enstal mon lerwa lo Siyon, mon montanny sen.” (Psonm 2:6; Zozye 1:4) Alors, dan en sans spirityel, sa pei “ant sa gran lanmer ek montanny sen” i reprezant partou kot bann Kretyen swazir pe fer zot aktivite spirityel. Zot nepli ganny idantifye avek lanmer, ki reprezant bann dimoun ki elwannyen avek Bondye, e zot pe esper avek enpasyans pour renny avek Zezi Kri dan Rwayonm lesyel. I kler ki bann serviter swazir Bondye, ansanm avek zot bann konpanyon fidel ki form sa gran lafoul, pou vin target lerwa nor letan i lans son latak kriyel pour akonpli profesi Danyel.—Izai 57:20; Ebre 12:22; Revelasyon 14:1.
Ki mannyer Pep Bondye pou reazir?
14. Ki sa trwa keksoz ki pep Bondye pou fer letan zot ganny atake?
14 Ki bann serviter Bondye i bezwen fer letan zot pou ganny atake? Ankor enn fwa, reaksyon nasyon Bondye dan letan Yeosafat i vin konman en model pour swiv. Remark byen ki son bann sitwayen ti ganny demande pour fer trwa keksoz: (1) pran zot pozisyon, (2) pa bouze, e (3) gete konman Zeova pou delivre zot. Konman ki pep Bondye ozordi pou azir an armoni avek sa parol?—2 Kronik 20:17.
15. Pran zot pozisyon i enplik kwa pour pep Bondye?
15 Pran zot pozisyon: San okenn ezitasyon, pep Bondye pou kontinyen donn tou zot sipor Rwayonm Bondye. Zot pou kontinyen gard zot pozisyon konman bann Kretyen ki pa mel dan bann zafer sa lemonn. Zot pou “reste ferm e solid,” fidel dan zot servis pour Zeova, e zot pou kontinyen loue li devan tou dimoun pour son labonte leker. (1 Korentyen 15:58; Psonm 118:28, 29) Napa okenn presyon ki zot kapab gannyen la konmela oubyen dan lavenir ki pou kapab fer zot renons oubyen abandonn sa pozisyon ki Bondye i aprouve.
16. Dan ki sans serviter Zeova pa pou bouze?
16 Pa bouze: Bann serviter Zeova pa pou esey sov zot lekor me zot pou met tou zot konfyans dan Zeova. Zis li ki kapab tir son bann serviter dan sa boulvers ki lemonn i ladan, e i’n promet ki i pou fer li. (Izai 43:10, 11; 54:15; Lamantasyon 3:26) Met konfyans dan Zeova i enplik met konfyans dan sa mwayen ki i’n klerman servi pour akonpli son bann plan pour plis ki 100 an. Plis ki zanmen oparavan, bann vre Kretyen pou bezwen met konfyans dan bann konpanyon Kretyen ki’n ganny lotorizasyon avek Zeova ek son Lerwa pour diriz kongregasyon. Sa bann zonm fidel pou gid pep Bondye. Sa ki inyor zot gidans i kapab mal fini.—Matye 24:45-47; Ebre 13:7, 17.
17. Akoz bann serviter Bondye pou vwar delivrans Zeova?
17 Gete konman Zeova pou delivre zot: Delivrans pou vin konman en rekonpans pour tou sa ki reste fidel e ki met zot konfyans dan Zeova. Otan ki posib, zot pou anons larive zour zizman Zeova ziska deryer minit. Tou kreasyon i bezwen konnen ki Zeova i sa vre Bondye e ki i annan son bann serviter fidel lo later. Pou nepli bezwen annan ankor en sitan gran deba lo si Zeova i annan drwa pour gouvern limanite.—Ezekyel 33:33; 36:23.
18, 19. (a) Ki mannyer sa sanson laviktwar dan Egzod sapit 15 i reflekte santiman bann ki pou sirviv latak Gog? (b) Aprezan i lemoman pour pep Bondye fer kwa?
18 Avek en nouvo lafors, pep Bondye pou antre dan nouvo lemonn, enpasyan pour sant en sanson laviktwar, zis parey bann ansyen Izraelit ti fer apre ki zot ti ganny delivre kot Lanmer Rouz. Zot pou toultan rekonesan anver Zeova pour son proteksyon. Alor, endividyelman e zot tou ansanm, zot pou repet sa bann parol ki ti ganny eksprimen byen lontan: “Les mwan sant pour Zeova, parski i’n ganny eleve tre o. . . . Zeova i en gerye. Son non i Zeova. . . . Ou lanmen drwat, Zeova, i kapab kraz en lennmi. Ou telman siperyer ki ou kapab bat bann ki lev kont ou. Ou anvoy ou lakoler brilan e i devor zot parey lapay. . . . Akoz ou annan labonte leker, ou’n gid sa pep ki ou’n libere. Avek ou lafors, ou’n sirman kondwir zot ziska sa landrwa sen kot ou reste. . . . Ou pou anmenn zot e plant zot dan montanny ou leritaz, sa landrwa fiks ki ou’n prepare pour reste, O Zeova, en landrwa sen ki ou lanmen in etabli. Zeova pou renny konman lerwa pour letan endefini, wi pour touzour.”—Egzod 15:1-19.
19 Aprezan, sa lespwar pour lavi eternel i pli evidan ki zanmen oparavan. Pa la i en bon moman pour serviter Bondye demontre zot devouman pour li e renouvle zot determinasyon pour servi li konman zot Lerwa!—1 Kronik 29:11-13.
Eski ou kapab eksplike?
• Akoz latak Gog pou ganny lanse lo bann Kretyen swazir ek lezot mouton?
• Ki mannyer pep Bondye pou pran zot pozisyon?
• Ki savedir pa bouze?
• Konman pep Bondye pou vwar Zeova delivre zot?
[Kestyon]
[Portre lo paz 28]
Zeova ti donn Yeosafat ek son pep laviktwar, san ki zot ti bezwen lager
[Portre lo paz 30]
Bann Kretyen swazir ek lezot mouton i siport drwa Zeova pour dirize
[Portre lo paz 31]
Parey bann Izraelit dan letan lontan, pep Bondye pou byento sant en sanson laviktwar