Reste Ferm pour ganny sa Lakours Lavi eternel

SI I arive ki ou bezwen fer en vwayaz lo lanmer dan movetan, ki kalite bato ou pou swazir? Eski ou pou anvi en pti kannot oubyen en gro bato ki solid? Definitivman ou pou swazir sa gro bato, vi ki i pou pli byen kapab navige dan movetan.

Anmezir ki nou navig dan sa sistenm danzere e move, nou fer fas avek bann difikilte ki kapab boulvers nou. Par egzanp, bann zenn i kapab parler santi zot konfize e ganny antrennen avek bann lide ek pratik sa lemonn. Serten ki’n fek konmans sa lakours Kretyen i kapab pa ankor santi zot stab. Menm bann ki stab ki pe servi Bondye fidelman pour bokou lannen, i kapab pas atraver en leprev akoz sa ki zot ti pe ekspekte pa ankor ganny realize.

Sa bann santiman i pa nouvo. Bann serviter fidel Zeova, parey Moiz, Zob, ek David, ti santi zot trouble parler. (Nonm 11:14, 15; Zob 3:1-4; Psonm 55:4) Me lafason ki zot ti viv zot lavi ti demontre ki zot ti annan en latasman ferm avek Zeova. Zot bon legzanp i ankouraz nou pour nou osi reste ferm. Me Satan Dyab i anvi fer nou aret sa lakours pour lavi eternel. (Lik 22:31) Alor, ki mannyer nou kapab reste solid e “ferm dan lafwa”? (1 Pyer 5:9) Deplis, konman nou kapab fortifye nou bann frer ek ser?

Zeova i anvi nou reste ferm

Si nou fidel avek Zeova, i pou toultan la pour ed nou gard nou stabilite. Psalmis David ti rankontre bokou sitiasyon difisil, me i ti annan lespwar dan Bondye. Pour sa rezon ki i ti kapab sante: “[Zeova] ti retir mwan dan en trou, retir mwan dan labou. Apre i ti met mon lipye lo en ros, i ti solidman etablir mon lepa.”—Psonm 40:2.

Zeova i donn nou kouraz pour konbat “sa bon konba dan lafwa” afen ki nou kapab “sezi lavi eternel.” (1 Timote 6:12) I osi fourni mwayen pour nou reste stab e sorti viktorye dan nou lager spirityel. Zapot Pol ti ankouraz son bann konpanyon Kretyen pour ‘rod zot lafors dan linyon avek Senyer e dan son gran pisans. Met lo zot tou bann lekipman batay ki Bondye i donnen, pour ki zot a kapab reziste kont tou bann riz Dyab.’ (Efezyen 6:10-17) Me kwa ki kapab sekwe nou? Ki mannyer nou kapab defann nou lekor kont sa bann lenfliyans danzere?

Vey Keksoz ki kapab fer nou perdi nou Lekilib

I saz pour nou pa oubliy sa fe enportan: To-ou-tar bann desizyon ki nou fer i afekte nou stabilite Kretyen swa an byen ouswa an mal. Bann zenn i annan bann desizyon pour fer konsernan bann keksoz parey travay, ledikasyon pli avanse, ek maryaz. Petet bann adilt i bezwen deside si zot anvi sanz landrwa reste  oubyen fer en travay anplis. Toulezour nou fer desizyon konsernan lafason ki nou servi nou letan e bokou lezot keksoz. Kwa ki pou ed nou fer bann bon desizyon ki pou amelyor nou stabilite konman serviter Bondye? En Kretyen fidel depi lontan ti dir: “Ler mon pe fer bann desizyon mon demann Zeova son led. Mon krwar ki i enportan pour aksepte e aplik bann konsey ki nou gannyen dan Labib, dan bann renyon Kretyen, par bann ansyen, e dan bann piblikasyon baze lo Labib.”

Ler nou pe fer desizyon, nou devret demann nou lekor: ‘Senk an oubyen dis an plitar, eski mon pou kontan avek desizyon ki mon pe fer ozordi oubyen mon pou regrete? Eski mon esey fer sir ki mon bann desizyon pa pou fer mwan perdi mon lekilib spirityel me okontrer pou fer mwan progrese spirityelman?’—Filipyen 3:16.

Serten Kretyen pa stab akoz zot in les zot ganny kontrole par bann tantasyon e par viv en fason ki fer zot pros pour kas lalwa Bondye. I annan detrwa ki’n ganny ekskli dan kongregasyon akoz zot in kontinyen fer pese e pa’n repantir. Apre ki zot in fer bokou zefor zot in kapab ganny reentegre. Me parler pa bokou letan apre, zot ganny ekskli ankor pour menm pese. Eski petet zot pa’n priy Zeova pour ed zot “deteste sa ki mal e reste atase avek sa ki byen”? (Romen 12:9; Psonm 97:10) Nou tou nou bezwen kontinyen ‘fer en semen byen drwat pour nou lipye.’ (Ebre 12:13) Annou alor konsider serten pwen ki kapab ed nou reste stab spirityelman.

Bann Aktivite spirityel i fer nou reste ferm

En fason pour nou kontinyen reste stab dan nou lakours pour lavi se par fer bokou dan travay predikasyon Rwayonm. Wi, nou minister Kretyen i en led itil pour gard nou leker ek lespri fikse lo fer lavolonte Bondye e byen fikse lo sa pri, lavi eternel. Konsernan sa, Pol ti ankouraz bann Korentyen: “Mon bann frer byenneme reste ferm e solid. Montre touzour plis lentere dan travay Senyer, parski zot konnen ki dan Senyer zot travay pa anven.” (1 Korentyen 15:58) “Ferm” i vedir reste fikse an plas, pa bouze. Dapre langaz Grek, sa mo ki’n ganny tradwir “solid” i vedir ‘pa pou delarge kot i’n ganny anmare lo lasose.’ Alors, ler nou okipe dan nou minister sa i kapab ed nou pour pa perdi nou lekilib dan nou lakours Kretyen. Ed lezot dimoun konn Zeova i fer nou lavi annan en sans e i anmenn lazwa.—Akt 20:35.

Pauline, en Kretyen ki’n pas plis ki 30 an konman en misyonner e dan lezot aktivite servis aplentan, i dir: “Predikasyon i en proteksyon akoz pres avek lezot i fer mwan konvenki ki mon annan laverite.” Nou kapab devlop sa menm konviksyon par partisip dan lezot aktivite spirityel, parey asiste renyon pour ador Zeova e seryezman fer letid personnel lo Labib.

Bann Frer ek Ser ki kontan nou i ed nou reste stab

Form parti en lorganizasyon mondyal bann vre adorater i kapab annan en gran lefe lo nou, ki pou ed nou reste stab. I vreman en benediksyon pour asosye avek en tel lasosyasyon frer enternasyonal! (1 Pyer 2:17) Anmenmtan, nou osi nou kapab fer en bon lefe lo nou bann konpanyon Kretyen.

Zob ti en zonm drwat. Konsider bann bon keksoz ki i ti fer. Menm si Elifaz ti annan bann keksoz negatif pour dir lo Zob, i ti bezwen admet: “Okenn dimoun ki pe tonbe, ou parol pou lev li; e bann zenou ki pe kourbe, ou pou fer zot vin for.” (Zob 4:4) Ki nou pe fer dan sa domenn? Nou tou nou annan sa responsabilite pour ed nou bann frer ek ser andire dan servis Bondye. Ler nou ansanm avek nou bann frer ek ser, nou kapab azir dapre leta lespri sa parol: “Fortifye bann ki feb, zot lepep, e fer bann zenou ki pe tranble vin ferm.” (Izai 35:3) Alors, akoz ou pa fer li ou lobzektif pour fortifye e ankouraz enn oubyen de konpanyon Kretyen sak fwa ou rankontre zot? (Ebre 10:24, 25) Bann felisitasyon senser ek lapresyasyon pour zot zefor ki zot kontinyen fer pour fer  plezir Zeova, i kapab vreman ed zot reste ferm avek lespwar pour ganny sa lakours pour lavi.

Bann ansyen i kapab fer bokou dibyen par ankouraz bann ki pli nouvo. Sa i kapab posib par ofer bann sizesyon ki itil ek bann bon konsey baze lo Labib e par travay avek zot dan predikasyon. Zapot Pol ti toultan sezi loportinite pour fortifye lezot. I ti vreman anvi vwar bann Kretyen an Ronm pour li kapab ede fortifye zot spirityelman. (Romen 1:11) I ti konsider son bann frer ek ser an Filip ki i ti byen kontan konman son ‘lazwa ek kouronn,’ e i ti ankouraz zot pour “gard zot ferm dan Senyer.” (Filipyen 4:1) Ler i ti aprann difikilte ki son bann frer ek ser Tesalonik ti pe pas ladan, Pol ti anvoy Timote pour “afermi zot lafwa e ankouraz zot, pour ki personn parmi zot pa les li ganny kraze par persekisyon.”—1 Tesalonisyen 3:1-3.

Zapot Pol ek zapot Pyer ti rekonnet e apresye zefor fidel lezot konpanyon Kretyen. (Kolosyen 2:5; 1 Tesalonisyen 3:7, 8; 2 Pyer 1:12) Pareyman, annou pa konsantre lo febles nou bann frer ek ser, me lo zot bann bon kalite e lo zot bon konba pour reste ferm e onor Zeova.

Si nou mazin an mal oubyen kritik lezot, nou kapab pe fer li pli difisil pour serten reste ferm dan lafwa, san ki nou realize. I byen pour rapel ki nou bann frer ek ser i “fatige e dekouraze” dan sa lemonn ki nou pe viv ladan! (Matye 9:36) Dan kongregasyon Kretyen, zot ekspekte trouv rekonfor ek soulazman. Alors, annou fer nou mye pour batir nou bann konpanyon Kretyen e ed zot reste ferm.

I kapab arive ki parler lezot i tret nou dan en fason ki kapab afekte nou stabilite konman Kretyen. Zot kapab fer en move remark ouswa mal azir avek nou. Eski nou pou les sa fer nou ralanti nou dan nou servis pour Zeova? Annou pa zanmen les personn anpes nou reste ferm!—2 Pyer 3:17.

Promes Bondye i ed nou pour pa drive

Promes Zeova konsernan en lavenir merveye anba dominasyon Rwayonm i donn nou lesperans ki ed nou pour reste ferm. (Ebre 6:19) Sa konviksyon ki Bondye i toultan akonpli son promes i motiv nou pour “reste ferm dan lafwa.” (1 Korentyen 16:13; Ebre 3:6) Si i sanble annan en retar dan lakonplisman serten promes Bondye, sa i kapab teste nou lafwa. Alors, i byen enportan ki nou veye ki nou pa ganny tronpe par bann fo lansennyman e perdi nou lesperans.—Kolosyen 1:23; Ebre 13:9.

Move legzanp bann Izraelit ki ti ganny detri akoz zot ti napa lafwa dan promes Zeova i devret servi konman en lavertisman pour nou. (Psonm 78:37) Olye ki nou vin parey zot, annou reste ferm, par servi Bondye e gard antet ki bann dernyen zour i pros pour fini. En ansyen ki annan bokou leksperyans ti dir: “Mon viv sak zour konmsi sa gran zour Zeova pou ariv demen.”—Yoel 1:15.

Wi, gran zour Zeova i pros. Me nou napa nanryen pour per osi lontan ki nou reste pros avek Bondye. Si nou fer tou pour reste ferm e atase avek son bann standar drwat, nou kapab reisi fini sa lakours pour lavi eternel!—Proverb 11:19; 1 Timote 6:12, 17-19.

[Portre lo paz 19]

The Complete Encyclopedia of Illustration/J. G. Heck

[Portre lo paz 21]

Eski ou pe fer tou sa ki ou kapab pour ed ou bann konpanyon Kretyen reste ferm?