“Bondye I Lanmour”
“Bondye I Lanmour”
“Sa ki pa kontan son prosen, pa konn Bondye, parski Bondye i lanmour.”—1 ZAN 4:8.
1-3. (a) Ki deklarasyon Labib i fer konsernan lanmour Zeova, e dan ki fason sa deklarasyon i inik? (b) Akoz Labib i dir ki “Bondye i lanmour”?
TOU bann kalite Zeova i ekselan, parfe, e atiran. Me sa enn ki pli atiran dan tou bann kalite Zeova se lanmour. Napa nanryen ki pli atir nou avek Zeova sitan en kantite koumsa ki son lanmour. Erezman, lanmour i osi son kalite dominan. Ki mannyer nou konn sa?
2 Labib i dir en keksoz konsernan lanmour ki i pa zanmen dir lo lezot kalite prensipal Zeova. Labib pa dir ki Bondye i pwisans oubyen ki Bondye i lazistis oubyen menm ki Bondye i lasazes. I posed sa bann kalite e li ki sours fondamantal tou le trwa kalite. Me en keksoz pli profon i ganny dir konsernan lanmour dan 1 Zan 4:8: “Bondye i lanmour.” Wi, lanmour i en par esansyel dan personnalite Zeova. Sa kalite i dan son natir. An zeneral, nou kapab met li koumsa: Pwisans ki Zeova i annan i permet li pour azir. Son lazistis ek lasazes i diriz lafason ki i azir. Me lanmour Zeova i pous li pour azir. Deplis, son lanmour i toultan reflekte dan lafason ki i servi son bann lezot kalite.
3 Souvannfwa nou tann dir ki Zeova i personnifikasyon lanmour. Pour sa rezon, si nou anvi aprann konsernan lanmour, nou bezwen aprann lo Zeova. Annou alor egzamin serten laspe lanmour Zeova ki pa kapab ganny konpare.
Pli gran Akt Lanmour
4, 5. (a) Ki sa pli gran akt lanmour dan tou listwar? (b) Akoz nou kapab dir ki Zeova ek son Garson i ini par en lyen lanmour pli for ki’n deza devlope?
4 Zeova in demontre lanmour dan plizyer fason, me i annan enn ki pli remarkab dan tou. Lekel? Se anvoy son Garson pour soufer e mor pour nou. Sirman, nou kapab dir ki sa i pli gran akt lanmour dan tou listwar. Akoz nou kapab dir sa?
5 Labib i apel Zezi “premye-ne tou kreasyon.” (Kolosyen 1:15) Zis mazinen—Garson Zeova ti egziste avan liniver. Ki kantite letan, alor, ki Papa ek Garson ti ansanm avek kanmarad? Serten syantis i estimen ki liniver i annan 13 bilyon lannen. Menm si sa lestimasyon i korek, i pa pou ase long pour reprezant kantite letan ki Garson premye ne Zeova in viv! Ki i ti fer pandan tou sa lannen? Sa Garson ti travay avek lazwa konman “zouvriye abil” son Papa. (Proverb 8:30; Zan 1:3) Zeova ek son Garson ti travay ansanm pour anmenn tou lezot keksoz an egzistans. Zot ti pas bann bon moman ansanm! Alor, lekel parmi nou, ki kapab vreman konpran ki kantite pros zot ti pros avek kanmarad apre tou sa letan ki zot in pas ansanm? I kler ki Zeova Bondye ek son Garson i ini par en lyen lanmour pli for ki’n deza devlope.
6. Kan Zezi ti batize, konman Zeova ti eksprim son bann santiman konsernan son Garson?
6 Kantmenm sa, Zeova ti anvoy son Garson lo later pour ne konman en pti baba. Fer en tel keksoz parey ti vedir ki pour apepre trant an, Zeova ti pou bezwen perdi sa relasyon pros ki i ti annan avek son Garson byenneme dan lesyel. Avek bokou lentere, Zeova ti obzerve, anmezir ki Zezi ti grandi pour vin en zonm parfe. Apepre laz 30 an, Zezi ti batize. Pour sa lokazyon son Papa ti koze personnelman kot i ti ete dan lesyel: “Sa mon Garson byenneme, ki donn mwan bokou lazwa.” (Matye 3:17) Letan i ti vwar ki Zezi ti fidelman fer tou sa ki ti’n ganny profetize, tou sa ki i ti demann li pour fer, son Papa ti’n bezwen santi li vreman kontan!—Zan 5:36; 17:4.
7, 8. (a) Ki Zezi ti bezwen andire le 14 Nizan, lannen 33 N.L., e konman son Papa dan lesyel ti ganny afekte? (b) Akoz Zeova ti permet son Garson pour soufer e mor?
7 Me ki mannyer Zeova ti santi le 14 Nizan, lannen 33 N.L., kan Zezi ti ganny trai e apre ganny arete par en group bandi byen ankoler? Ler zot ti sikann Zezi, kras dan son figir, e donn kou-d-pwen? Anmezir i ti ganny fwete, kot son ledo ti ganny sizle? Ler i ti ganny kloute, lanmen ek lipye, lo en poto dibwa e ganny les anpandan anmenmtan ki dimoun ti ensilte li? Konman sa Papa ti santi kan son Garson ti pe kriy ver li dan son soufrans? Konman Zeova ti santi kan Zezi ti respir pour dernyen fwa e ti nepli la pour premye fwa depi konmansman kreasyon?—Matye 26:14-16, 46, 47, 56, 59, 67; 27:26, 38-44, 46; Zan 19:1.
8 Vi ki Zeova i annan santiman, nou pa trouv mo pour kapab eksprim sa douler ki i ti’n bezwen santi apre lanmor son Garson. Sa ki nou kapab eksprimen se kwa ki ti motiv Zeova pour permet sa arive. Akoz sa Papa ti ekspoz li avek sa kantite soufrans? Zeova i revel en keksoz merveye avek nou dan Zan 3:16—en verse Labib ki sitan enportan ki ou kapab dir ki Levanzil antye i baze lo la. I dir: “Parski Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.” Alors sa ki ti motiv Bondye pour fer sa ti: lanmour. Napa personn ki’n deza montre en pli gran lanmour ki sa.
Konman ki Zeova i asir nou ki i kontan nou
9. Ki Satan i anvi fer nou krwar konsernan pwennvi Zeova lo nou, me ki Zeova i asir nou?
9 Me en kestyon enportan i leve: Eski Bondye i kontan nou personnelman? Serten i kapab dakor ki Bondye i kontan limanite an zeneral, parey Zan 3:16 i dir. Me an realite zot santi ki, ‘Bondye pa pou zanmen kapab kontan mwan konman en endividi.’ Larealite i ki Satan Dyab i vreman anvi fer nou krwar ki Zeova pa ni kontan nou ni apresye nou. De lot kote, menm si nou santi ki personn pa kapab kontan nou oubyen ki nou pa vo nanryen, Zeova i asir nou ki sak son bann serviter fidel i annan valer pour li.
10, 11. Ki mannyer legzanp Zezi lo sren i montre ki nou annan valer dan lizye Zeova?
10 Par egzanp, konsider parol Zezi ki trouve dan Matye 10:29-31. Pour demontre valer son bann disip, Zezi ti dir: “Eski de pti sren pa i vann pour en sou? Me en sel pa tonm ater san lavolonte zot Papa, me menm, bann bren seve lo zot latet in konte. Alor pa bezwen per, zot vo bokou plis ki en kantite sren!” Mazinen ki sa parol ti vedir pour sa bann ki ti ekout Zezi dan premye syek.
11 Dan letan Zezi, sren ti zwazo pli bon marse ki ti ganny vann konman manze. Pour en sou, en dimoun ti ganny de sren. Me Zezi ti fer resorti plitar, dapre Lik 12:6, 7, ki si en dimoun ti donn de sou, i ti ganny senk sren olye kat. Sa zwazo anplis ti ganny azoute konmsi i ti napa okenn valer. Petet sa bann zwazo ti napa valer dan lizye zonm, me konman Kreater ti vwar zot? Zezi ti dir: “Napa enn [ni menm sa enn ki’n ganny azoute] ki Bondye i obliye.” Aprezan nou kapab konmans konpran pwen Zezi. Vi ki Zeova i met sitan kantite valer lo en sren, konbyen plis valer en imen i annan alor! Parey Zezi ti dir, Zeova i konn tou detay lo nou. Annefe, menm seve lo nou latet in ganny konte!
12. Akoz nou kapab asire ki Zezi pa ti pe egzazere ler i ti dir ki nou seve lo nou latet in ganny konte?
12 Serten i kapab mazinen ki Zezi ti pe egzazere. Me zis mazin en kou konsernan rezireksyon. Zeova i bezwen konn nou byen oprofon pour li kapab re-kree nou! I sitan apresye nou ki i rapel tou pti detay, menm nou kod zenetik ki telman konplike e tou nou bann souvenir ek leksperyans. Ler nou konpar sa ki enplike dan rezireksyon avek kont nou seve—ki pous apepre 100,000 bren lo latet en imen—i evidan ki sa pou en senp keksoz pour li fer. Dan en fason vreman merveye parol Zezi i asir nou ki Zeova i pran swen avek nou konman bann endividi!
13. Konman ki ka Lerwa Yeosafat i montre ki Zeova i rod sa ki bon dan nou, menm si nou enparfe?
13 Labib i revel en lot keksoz ki asir nou ki Zeova i kontan nou. I rod e apresye bann bon keksoz dan nou. Pran par egzanp, sa bon Lerwa Yeosafat. Kan sa lerwa ti fer en keksoz enbesil, profet Zeova ti dir li: “Pour sa i annan en gran lakoler kont ou delapar Zeova.” Pa sa ti en panse ki fer reflesir! Me mesaz Zeova pa ti aret la. I ti kontinyen: “Kantmenm sa, i annan bann bon keksoz ki’n ganny vwar dan ou.” (2 Kronik 19:1-3) Menm si lakoler Zeova ti zistifye, i pa ti anpes li vwar “bann bon keksoz” dan Yeosafat. Pa i rekonfortan pour konnen ki nou Bondye i rod sa ki bon dan nou, menm si nou enparfe?
En Bondye ki “pare pour pardonnen”
14. Kan nou fer pese, ki bann santiman troublan ki nou kapab eksperyanse, me konman nou kapab benefisye avek pardon Zeova?
14 Kan nou fer pese, sa dezapwentman, laont, ek remor-d-konsyans ki nou santi i kapab fer nou mazinen ki nou pa zanmen merit servi Zeova. Me rapel ki Zeova i “pare pour pardonnen.” (Psonm 86:5) Wi, si nou repantir e fer bokou zefor pour pa repet ankor sa bann pese, nou kapab benefisye avek pardon Zeova. Annou vwar konman Labib i dekrir sa laspe merveye lanmour Zeova.
15. Ki kantite lwen avek nou ki Zeova i met nou pese?
15 Psalmis David ti servi en lekspresyon vivan pour dekrir pardon Zeova: “Zis parey les ek was i lwen avek kanmarad, demenm I’n retir nou bann fot byen lwen avek nou.” (Nou ki’n met an italik; Psonm 103:12, The Amplified Bible) Ki distans i annan ant les ek was? Dan en sans, les i toultan en distans pli lwen ki ou kapab mazinen avek was; sa de pwen pa zanmen kapab zwenn ansanm. En spesyalis Labib i dir ki sa lekspresyon i vedir “pli lwen posib; pli lwen ki nou kapab mazinen.” Parol enspire David i dir nou ki kan Zeova i pardonnen, i met nou pese pli lwen avek nou ki nou kapab mazinen.
16. Kan Zeova i pardonn nou pese, akoz nou kapab asire ki i vwar nou prop apre sa?
16 Eski ou’n deza esey tir en tas lo en lenz kouler pal? Petet malgre tou ou zefor ki ou fer, sa tas i reste lanmenm. Remarke konman Zeova i dekrir son kapasite pour pardonnen: “Menm si zot pese i byen rouz, i pou vin blan parey lanez; si zot menm kouler avek latwal rouz fonse, i pou vin menm kouler avek lalenn.” (Izai 1:18) “Rouz fonse” ti enn bann kouler epe ki ti ganny servi pour tenn latwal. * Avek nou prop zefor nou pa kapab retir sa tas ki pese i fer lo nou. Me Zeova i kapab pran pese ki byen rouz oubyen rouz fonse e fer zot vin blan parey lanez ouswa lalenn ki pa’n tenn. Alors kan Zeova i pardonn nou pese, nou pa bezwen santi ki nou ankor tase avek sa bann pese pour larestan nou lavi.
17. Dan ki sans Zeova i zet nou pese deryer son ledo?
17 Dan en kantik tousan, ranpli avek rekonesans, ki Izkiya ti konpoze apre ki i ti ganny eparnyen avek en maladi fatal, i ti dir avek Zeova: “Ou’n zet deryer ou ledo tou mon bann pese.” (Izai 38:17) Dan sa verse Zeova i ganny dekrir konmkwa i pran bann pese en peser ki repantir e zet zot deryer Li kot I pa ni vwar zot ni remark zot ankor. Dapre en travay referans, sa lide ki ganny transmet i kapab ganny eksprimen dan sa fason: “Ou’n konsider mon bann pese konmsi zot pa’n arive.” Eski sa pa i rekonfortan?
18. Konman ki profet Mika i endike ki kan Zeova i pardonnen, i retir nou bann pese pour touzour?
18 Dan en promes restorasyon, profet Mika ti eksprim son konviksyon ki Zeova ti pou pardonn son pep ki repantir: “Lekel ki en Bondye parey ou, enn ki . . . kouver fot sa restan son leritaz? . . . E ou pou zet dan fon lanmer tou zot pese.” (Mika 7:18, 19) Zis mazinen ki sa parol ti vedir pour bann dimoun ki ti pe viv dan letan Labib. Eski en dimoun ti kapab al anmas en keksoz ki’n ganny anvoye “dan fon lanmer”? Alor parol Mika i endike ki kan Zeova i pardonnen, i retir nou bann pese pour touzour.
“Konpasyon nou Bondye”
19, 20. (a) Ki sinifikasyon sa verb Ebre ki ganny tradwir “montre mizerikord” oubyen “annan pitye”? (b) Konman Labib i servi santiman ki en manman i annan pour son pti baba pour ansenny nou konsernan konpasyon Zeova?
19 Konpasyon i en lot laspe lanmour Zeova. Kisisa konpasyon? Dan Labib, konpasyon ek mizerikord i relye etrwatman avek kanmarad. Plizyer mo Ebre ek Grek i eksprim sa lide konpasyon. Par egzanp, sa verb Ebre ra chamʹ i souvan ganny tradwir “montre mizerikord” oubyen “annan pitye.” Sa term Ebre ki Zeova i aplik avek li menm, i relye avek sa mo “matris” e i kapab ganny dekrir konman “konpasyon en manman.”
20 Labib i servi santiman ki en manman i annan pour son pti baba pour ansenny nou lo konpasyon Zeova. Izai 49:15 i dir: “Eski en fanm i kapab oubliy son pti baba, i pa ava annan konpasyon [ra chamʹ] pour garson sorti dan son matris? Wi, zot kapab oubliye, me mwan mon pa pou oubliy zot.” (The Amplified Bible) I difisil pour mazinen ki en manman ti pou oubliye pour nouri e pran swen avek son pti baba. Apre tou, en pti baba pa kapab fer nanryen lo li menm; lizour konman aswar i bezwen latansyon son manman. Me malerezman, dan sa bann “letan difisil” i arive ki bann manman i negliz zot zanfan. (2 Timote 3:1, 3) Zeova i deklare: “Me mwan mon pa pou oubliy zot.” Sa konpasyon ki Zeova i annan pour son bann serviter i bokou pli for ki sa santiman natirel pli profon ki nou kapab mazinen—sa konpasyon ki en manman i normalman santi pour son pti zanfan.
21, 22. Ki bann Izraelit ti eksperyanse dan ansyen Lezip, e konman Zeova ti reazir anver zot lapel?
21 Ki mannyer Zeova i demontre konpasyon, parey en paran ki annan lanmour? Nou vwar sa kalite klerman dan lafason ki i ti tret ansyen Izrael. Alafen 16 syek A.N.L., plizyer milyon Izraelit ti an lesklavaz Lezip, kot zot ti soufer en kantite. (Egzod 1:11, 14) Dan zot ladetres, bann Izraelit ti enplor Zeova. Konman sa Bondye ranpli avek konpasyon ti reazir?
22 Leker Zeova ti ganny touse. I ti dir: “Mon’n vwar soufrans ki mon pep i ladan an Lezip e mon’n tann zot lapel . . . Mon konn tre byen douler ki zot pe sibir.” (Egzod 3:7) I ti enposib pour Zeova vwar soufrans son pep oubyen tann zot lapel san konpran sa ki zot ti pe pas ladan. Zeova i en Bondye ki konpran santiman lezot. Sa abilite pour konpran santiman lezot i relye etrwatman avek konpasyon. Me Zeova pa ti zis santi douler son pep; i ti ganny motive pour azir dan zot faver. Izai 63:9 i dir: “Dan son lanmour ek son konpasyon, li menm in re-aste zot.” Avek “en lanmen for,” i ti sov bann Izraelit an Lezip. (Deterononm 4:34) Apre sa, i ti donn zot manze mirakile e anmenn zot dan en pei prodiktif.
23. (a) Konman ki parol en psalmis i asir nou ki Zeova i vreman konsernen avek nou konman bann endividi? (b) Dan ki fason Zeova i ed nou?
23 Zeova pa montre konpasyon pour son pep selman konman en group. Nou Bondye lanmour i vreman konsernen avek nou personnelman. I konn tre byen okenn soufrans ki nou kapab pe rankontre. En psalmis ti dir: “Lizye Zeova i lo bann dimoun drwat, e son zorey i ekout zot lapel pour led. Zeova i pre avek sa bann ki annan leker brize; e i sov bann ki zot lespri i fatige.” (Psonm 34:15, 18) Ki mannyer Zeova i ed nou personnelman? I pa neseserman retir lakoz nou soufrans. Me i’n donn bann provizyon an abondans pour bann ki apel li pour ganny led. Son Parol i ofer konsey pratik ki kapab ed nou en kantite. Dan kongregasyon, i fourni bann sirveyan ki kalifye spirityelman, ki fer en gran zefor pour reflekte son konpasyon letan zot ed lezot. (Zak 5:14, 15) Etan donnen ki i sa Enn “ki ekout lapriyer,” Zeova i donn “son Lespri Sen tou bann ki demann li.” (Psonm 65:2; Lik 11:13) Tou sa bann provizyon i fason ki nou Bondye i eksprim son konpasyon.—Lik 1:78.
24. Konman ou pou reazir anver lanmour Zeova?
24 Eski pa i vreman enteresan pour reflesir lo lanmour nou Papa ki dan lesyel? Dan lartik presedan, nou ti ganny rapele ki Zeova ti demontre son pwisans, lazistis, ek lasazes dan bann fason ranpli avek lanmour pour nou byenfe. Dan sa lartik, nou’n vwar ki Zeova in eksprim son lanmour direkteman pour limanite—e pour nou endividyelman—dan bann fason remarkab. Aprezan, sakenn antre nou i devret demande, ‘Konman mon pou reazir anver lanmour Zeova?’ Fotespere ki an retour ou pou kontan li avek tou ou leker, tou ou lanm, tou ou lespri e avek tou ou lafors. (Mark 12:29, 30) Fotespere ki lafason ki ou viv ou lavi sak zour i reflekte ou dezir senser pour vin pli pros avek Zeova. Deplis, fotespere ki Zeova, sa Bondye ki lanmour, i vin pli pros avek ou—toudilon leternite!—Zak 4:8.
[Not anba lo paz]
^ par. 16 En spesyalis Labib i dir ki rouz fonse “ti en kouler ki pa zanmen pali. Ni laroze, ni lapli, ni lave, ni servi pour en bon pe letan, pa ti pou fer li pali.”
Eski ou rapel?
• Ki mannyer nou konnen ki lanmour i kalite dominan Zeova?
• Akoz nou kapab dir ki lefe ki Zeova in anvoy son Garson pour soufer e mor pour nou i pli gran akt lanmour ki’n deza ganny demontre?
• Ki mannyer Zeova i asir nou ki i kontan nou personnelman?
• Dan ki fason vivan ki Labib i dekrir pardon Zeova?
[Kestyon]
[Portre lo paz 24]
‘Bondye . . . in donn son sel Garson’
[Portre lo paz 25]
© J. Heidecker/VIREO
[Portre lo paz 25]
“Zot vo bokou plis ki en kantite sren”
[Portre lo paz 26]
Santiman en manman pour son pti baba i kapab ansenny nou lo konpasyon Zeova