Imit Zeova, Nou Bondye Ki Pa Fer Preferans

“Bondye pa fer preferans pour personn.”—ROMEN 2:11.

1, 2. (a) Ki plan Zeova ti annan konsernan bann Kananeen an zeneral? (b) Ki Zeova ti fer, e ki kestyon sa i fer nou demande?

LETAN zot ti pe kanpe lo Laplenn Moab lannen 1473 A.N.L., nasyon Izrael ti ekout Moiz atantivman. Ti annan en sitiasyon difisil ki ti pe esper zot lot kote Larivyer Zourden. Moiz ti deklare ki plan Zeova se pour fer nasyon Izrael defet sa set nasyon Kananeen dan Later Promiz. Sa ki Moiz ti dir ti vreman rasir zot: “Zeova ou Bondye pou sirman donn ou zot e ou bezwen defet zot”! Izrael pa ti devret fer okenn lalyans avek zot, e zot pa ti merit ganny okenn faver.—Deterononm 1:1; 7:1, 2.

² Pourtan, Zeova ti protez en fanmiy dan sa premye lavil ki Izrael ti atake. Dimoun dan kat lezot lavil ti osi ganny proteksyon Bondye. Akoz sa? Ki sa bann levennman remarkab konsernan sirvivans sa bann Kananeen i ansenny nou lo Zeova? Ki mannyer nou kapab imit li?

Reaksyon anver Repitasyon Zeova

3, 4. Ki lefe nouvel konsernan laviktwar bann Izraelit ti annan lo serten dimoun an Kanaan?

³ Pandan sa 40 lannen ki nasyon Izrael ti dan dezer avan ki zot ti antre dan Later Promiz, Zeova ti protez e lager pour son pep. Dan sid Later Promiz, Izrael ti zwenn fas a fas avek Lerwa Arad, en lerwa Kananeen. Avek led Zeova, bann Izraelit ti defet li ek son pep kot Orma. (Nonm 21:1-3) Plitar, bann Izraelit ti fer letour sant Edom e vwayaz dan direksyon nor pour al dan norde Lanmer Mor. Bann Moabit ti reste dan sa landrwa avan sa. Me aprezan se bann Amorit ki ti pe reste la. Lerwa Amorit, Sionn, pa ti oule les Izrael travers dan son teritwar. Izrael ek Lerwa Sionn ti lager kot Yaaz, ki ti nor avek Vale Arnon. La Sionn ti trouv son lanmor. (Nonm 21:23, 24; Deterononm 2:30-33) Pli lwen dan nor, Og ti domin lo lezot Amorit an Basann. Kantmenm Og ti en zean, i pa ti kapab debout devan Zeova. Og ti ganny touye kot Edrei. (Nonm 21:33-35; Deterononm 3:1-3, 11) Letan bann dimoun ki ti reste an Kanaan ti tann konsernan sa bann laviktwar e osi konsernan bann Izraelit ki ti’n sorti Lezip, sa ti fer en gran lefe lo zot. *

⁴ Kan Izrael ti antre Kanaan pour premye fwa apre ki zot ti’n travers larivyer Zourden, zot ti kanp kot Gilgal. (Zozye 4:9-19) Lavil Zeriko ki ti antoure avek miray pa ti tro lwen avek sa landrwa. Raab ki ti en Kananeen ti’n tann konsernan sa ki Zeova ti’n fer. Sa ti pous li pour azir avek lafwa. Rezilta se ki letan Zeova ti detrir Zeriko, i ti protez Raab avek bann ki ti reste ansanm avek li.—Zozye 2:1-13; 6:17, 18; Zak 2:25.

5. Kwa ki ti fer bann Gibeonnit azir avek pridans?

⁵ Apre, Izrael ti sorti dan plat obor Larivyer Zourden pour mont lo bann montanny dan milye sa rezyon. Zozye ti swiv gidans Zeova par fer bann latak an kasyet lo lavil Ai. (Zozye, sapit 8) Plizyer lerwa Kananeen ti zwenn ansanm pour lager kan zot ti tann nouvel konsernan sa gran defet. (Zozye 9:1, 2) Bann zabitan lavil Gibeonn, lavil bann Ivit lanmenm obor, ti reazir en lot fason. Zozye 9:4 i rakonte: “Zot ti pran linisyativ e azir avek pridans.”  Parey Raab, zot ti’n tande ki Zeova ti’n delivre son pep Lezip e ti’n defet Sionn ek Og. (Zozye 9:6-10) Bann Gibeonnit ti realize ki initil zot reziste. Alors, zot ti anvoy en group dimoun pour reprezant Gibeonn ek trwa lavil lanmenm obor—Kefira, Beerot, ek Kiryat Yearim. Sa group dimoun ti sanz zot dan en fason pour fer krwar ki zot sorti byen lwen. Zot plan ti marse. Zozye ti fer en lalyans avek zot ki ti pou asir zot lavi. Trwa zour plitar, Zozye ek bann Izraelit ti aprann ki sa bann zans ti’n trik zot. Toudmenm, vi ki zot ti’n fer serman avek Zeova pour gard sa lalyans, alors zot pa ti kas li. (Zozye 9:16-19) Eski Zeova ti dakor avek sa?

6. Konman Zeova ti reazir anver sa lalyans ki Zozye ti konklir avek bann Gibeonnit?

⁶ Bann Gibeonnit ti pou kapab koup dibwa e anmenn delo pour bann Izraelit, menm “pour lotel Zeova” kot tabernak. (Zozye 9:21-27) Deplis, kan senk lerwa Amorit ek zot larme ti menas bann Gibeonnit, Zeova ti entervenir dan en fason mirakile. Lagrel ti touy plis lennmi ki larme Zozye ti touye. Zeova ti menm reponn siplikasyon Zozye pour soley ek lalin pa bouze pour ki zot kapab defet bann lennmi. Zozye ti fer sa remark: “Ti napa en zour, ni avan ni apre sa, ki ti parey sa zour kot Zeova ti ekout lavwa en zonm, parski Zeova li menm ti pe lager pour Izrael.”—Zozye 10:1-14.

7. Ki laverite fondamantal Pyer ti rekonnet, e konman ki sa ti aplik dan ka serten Kananeen?

⁷ Raab ek son fanmiy, ansanm avek bann Gibeonnit, ti annan lakrent pour Zeova e sa ti fer zot reazir. Sa ki ti arive avek zot i demontre klerman en laverite ki zapot Pyer ti dir plitar: “Bondye pa fer preferans pour personn, me dan nenport ki nasyon tou dimoun ki annan respe pour li e ki fer sa ki byen Bondye i kontan li.”—Akt 10:34, 35.

Fason azir Zeova anver Abraam ek Nasyon Izrael

8, 9. Ki mannyer nou vwar ki Zeova pa fer preferans dan son fason azir anver Abraam ek nasyon Izrael?

⁸ Disip Zak ti atir latansyon lo faver imerite Bondye dan son fason azir anver Abraam ek son desandans. Se lafwa Abraam ki ti fer li vin “zanmi Bondye,” pa son nasyonalite. (Zak 2:23) Lafwa ek lanmour Abraam pour Zeova ti anmenn benediksyon pour son bann desandans. (2 Kronik 20:7) Zeova ti promet Abraam: “Sirman mon pou beni ou e mon pou fer ou semans vin bokou parey bann zetwal dan lesyel e parey bann gren disab obor lanmer.” Me get sa promes ki’n ganny fer dan verse ki swiv: “Par mwayen ou semans tou nasyon lo later pou ganny beni.”—Zenez 22:17, 18; Romen 4:1-8.

⁹ Olye fer preferans, Zeova ti montre par son fason azir anver Izrael, ki i kapab fer pour bann ki obeir li. En tel fason azir i montre ki mannyer Zeova i eksprim son lanmour fidel anver son bann serviter fidel. Kantmenm Izrael ti “propriyete spesyal” Zeova, sa pa vedir ki lezot dimoun ti napa drwa eksperyans labonte Zeova. (Egzod 19:5; Deterononm 7:6-8) I vre ki Zeova ti liber Izrael dan lesklavaz laba Lezip e apre deklare: “Mon’n konn zis zot parmi tou sa bann fanmiy lo later.” Me  atraver profet Amos ek lezot, Zeova ti osi fer en zoli promes pour dimoun sorti dan “tou nasyon.”—Amos 3:2; 9:11, 12; Izai 2:2-4.

Zezi, en Ansennyan ki pa ti fer Preferans

10. Konman Zezi ti imit son Papa pour pa fer preferans?

¹⁰ Pandan son minister lo later, Zezi ti byen reprezant son Papa. Parey Zeova, i pa ti fer preferans. (Ebre 1:3) Son premye konsern sa letan se pour rod “bann brebi perdi pep Izrael.” Pourtan, i pa ti ezite pour temwanny avek en madanm Samariten kot en pi. (Matye 15:24; Zan 4:7-30) I ti osi fer en mirak ki en zofisye larme, ki aparaman pa ti en Zwif, ti demann li pour fer. (Lik 7:1-10) I ti fer sa anplis ki demontre son lanmour pour pep Bondye par son aksyon. Bann disip Zezi osi ti pres partou. I ti vin deplizanpli kler ki latitid en dimoun ti enportan pour resevwar benediksyon Zeova, pa son nasyonalite. Bann dimoun ki ti annan limilite, ki ti senser, e swaf laverite ti byen resevwar sa bon nouvel Rwayonm. De lot kote, bann ki ti orgeye e arogan ti mepriz Zezi ek son mesaz. Zezi ti dir: “Mon Papa, Senyer lesyel ek later, mon rann ou glwar akoz ou’n kasyet sa bann keksoz avek bann malen ek bann entelizan e ou’n revel zot avek bann pti zanfan. Wi, Papa, parski sanmenm sa ki ou’n kontan realize.” (Lik 10:21) Kan nou azir avek lanmour ek lafwa anver lezot, nou pa fer preferans, vi ki nou konnen ki Zeova i oule nou azir koumsa.

11. Konman ti napa preferans dan kongregasyon Kretyen?

¹¹ Dan premye kongregasyon Kretyen, bann Zwif ek non Zwif ti egal. Pol ti eksplike: “Pou annan laglwar loner ek lape pour tou dimoun ki pratik sa ki byen, bann Zwif premyerman, apre bann Grek, parski Bondye pa fer preferans pour personn.” * (Romen 2:10, 11) Se pa zot nasyonalite ki ti determinen si zot ti pou eksperyans faver imerite Zeova, me lafason ki zot reazir letan zot aprann konsernan Zeova ek lespwar ofer par ranson son Garson, Zezi. (Zan 3:16, 36) Pol ti ekrir: “En vre Zwif i pa en dimoun ki annan zis laparans e ki’n sirkonsi zis dan en fason vizib fizikman. Me en vre Zwif i enn ki Zwif antyerman, ki’n sirkonsi dan son leker, par en sirkonsizyon enteryer e pa zis eksteryer selon lalwa.” En pwen enteresan la se ki Pol ti servi sa mo Zwif ki vedir sorti dan tribi Zida. Zida li menm i literalman vedir ganny loue oubyen felisite. Avek sa lide antet, Pol ti azoute: “En tel dimoun i resevwar felisitasyon non pa avek zonm me avek Bondye.” (Romen 2:28, 29) Zeova pa fer preferans kan i bezwen felisite. Eski nou fer parey nou osi?

12. Ki lespwar Revelasyon 7:9 i ofer, e pour ki?

¹² Plitar, dan en vizyon, zapot Zan ti vwar bann Kretyen swazir pe reprezant en nasyon spirityel avek 144,000 dimoun “sorti dan tou  tribi pep Izrael.” Apre sa, Zan ti vwar “en gran lafoul, . . . sorti dan tou nasyon, tribi, pep ek lalang. Zot ti debout devan tronn e devan Lanyo, dan rob blan e avek brans palm dan lanmen.” (Revelasyon 7:4, 9) Alors, napa okenn group etnik oubyen langaz ki napa drwa form parti kongregasyon Kretyen denozour. Dimoun avek diferan lorizin i annan lespwar pour sirviv sa ‘gran ladetres’ ki pe vini, e bwar dan “sours delo ki donn lavi” dan nouvo lemonn.—Revelasyon 7:14-17.

Lefe pozitif

13-15. (a) Konman nou kapab sirmont bann diferans ras oubyen kiltir? (b) Donn ennde legzanp pour montre byenfe ki en latitid amikal i anmennen.

¹³ Zeova i konn nou byen parey en bon papa i konn son zanfan. Pareyman, kan nou sey konpran lezot par pran en lentere dan zot kiltir ek lorizin, bann diferans i tant pour napa lenportans pour nou. Baryer etnik i disparet, e lanmitye ek lanmour i vin pli solid. Linite i ranforsi. (1 Korentyen 9:19-23) Sa i ganny byen demontre par aktivite bann misyonner ki servi dan bann pei etranze. Zot pran en lentere personnel dan bann dimoun ki reste laba. Rezilta se ki bann misyonner i fasilman adapte avek bann kongregasyon lokal.—Filipyen 2:4.

¹⁴ Dan bokou pei, nou vwar bann bon lefe kan nou pa fer preferans. Aklilu, ki sorti Etyopi, ti santi li tousel letan i ti pe viv an Lonn, kapital Langleter. Deplis, i ti santi ki bann dimoun laba pa ti tro amikal anver bann etranze, en santiman ki bokou dimoun i eksperyanse dan plizyer gran lavil Lerop. Sa ti fer li pli santi li tousel ankor. Keksoz ti vreman sanze letan Aklilu ti asiste en renyon dan Lasal Rwayonm Temwen Zeova! Bann dimoun ki ti la ti byen akey li, e deswit i ti santi li alez. I ti progres vit dan son konprenezon ek lapresyasyon pour son Kreater. I pa ti tarde pour rod loportinite pour partaz sa bon nouvel Rwayonm avek lezot dan sa distrik. En zour, son konpanyon ki i ti pe pres avek ti demann li ki bann lobzektif i annan dan lavi aprezan. Deswit, Aklilu ti reponn ki i ti a kontan form par en kongregasyon ki koz son langaz, Amarik. Kan bann ansyen dan kongregasyon  ki koz Angle ti aprann sa, zot ti volonterman aranze pour fer en diskour piblik dan langaz Aklilu. Lenvitasyon pour asiste sa renyon ti anmenn bokou etranze ek dimoun lokal ansanm pour siport sa premye renyon piblik dan langaz Amarik an Langleter. Ozordi, bann Etyopyen ek lezot ki koz langaz Amarik dan sa landrwa i ini ansanm dan en kongregasyon ki pe byen progrese. Bokou dimoun laba in vwar ki napa nanryen ki anpes zot pran en pozisyon pour Zeova e senboliz sa par batenm Kretyen.—Akt 8:26-36.

¹⁵ Karakteristik ek lorizin i varye. Napa ki pli siperyer oubyen enferyer. Zot senpleman bann diferans. Kan zot ti pe get batenm bann nouvo serviter Zeova lo zil Malt, lantouzyasm bann Temwen ki ti reste lo sa zil ti al byen avek larm lazwa ki ti koule lo figir bann viziter sorti Langleter. Tou le de group, bann Malte ek bann Angle, ti eksprim zot santiman dan diferan fason. Zot lanmour solid pour Zeova ti afermi zot relasyon avek zot bann frer Kretyen.—Psonm 133:1; Kolosyen 3:14.

Sirmont Prezidis

16-18. Rakont en leksperyans ki montre konman nou kapab sirmont prezidis dan kongregasyon Kretyen.

¹⁶ Anmezir ki nou lanmour pour Zeova e pour nou bann frer ek ser Kretyen i vin pli profon, nou kapab imit Zeova pli byen dan lafason ki nou vwar lezot. Nou kapab sirmont okenn prezidis ki petet nou ti annan avan anver serten nasyon, ras, oubyen kiltir. Annou pran legzanp Albert, ki ti dan servis militer pour Langleter pandan Dezyenm Lager Mondyal. I ti ganny pran konman prizonnyen par bann Zaponnen kan Sengapour ti tonbe an 1942. Plitar, i ti travay pour trwa zan lo konstriksyon en semen tren ki ti fer bokou perdi zot lavi, obor sa pon ki dimoun in apel pon larivyer Kwai. Kan lager ti fini e i ti ganny large, i ti pez 32 kilo. Son lanmaswar ek son nennen ti’n kase, e i ti pe soufer avek disantri, dart, ek malarya. Bokou son bann konpanyon ki ti dan prizon ti dan bann kondisyon pli pir. Bokou pa ti reisi sirviv. Akoz sa bann kriyote ki Albert ti vwar e eksperyanse, kan i ti retourn seli an 1945, i ti vin en dimoun ki gard rankin. I pa ti oule annan nanryen pour fer avek Bondye oubyen larelizyon.

¹⁷ Madanm Albert, Irene, ti vin en Temwen Zeova. Pour fer li plezir, Albert ti asiste ennde renyon dan kongregasyon lokal bann Temwen Zeova. En zenn Kretyen ki ti apel Paul e ki ti dan servis aplentan, ti vizit Albert pour etidye Labib avek li. Albert ti realize ki Zeova i vwar sak dimoun dapre zot kondisyon leker. I ti dedye son lavi avek Zeova e batize.

¹⁸ Plitar, Paul ti al viv an Lonn, kot i ti aprann langaz Zaponnen, e asosye avek en kongregasyon ki koz Zaponnen. Kan i ti sizere pour anmenn detrwa Temwen Zaponnen vizit son ansyen kongregasyon, bann frer laba ti mazinen ki Albert ti annan en prezidis ki ti for kont bann Zaponnen. Depi ki i ti’n retourn Langleter, Albert ti evite vin fas a fas avek okenn dimoun sorti Zapon. Alors, bann frer ti demann zot lekor konman ki i ti pou fer fas avek sa sitiasyon. Zot ti’n trakas pour nanryen. Albert ti resevwar sa bann viziter avek tou son lanmour.—1 Pyer 3:8, 9.

“Ouver gran zot Leker”

19. Ki konsey zapot Pol ti donnen ki kapab ed nou si nou annan tandans pour fer preferans?

¹⁹ Lerwa Salomon ti ekrir: “I pa byen pour fer preferans.” (Proverb 28:21) I fasil pour nou vin pros avek bann dimoun ki nou byen konnen. Parkont, nou annan tandans parfwa pour pa montre tro gran lentere dan bann ki nou pa tro konnen. I pa apropriye pour en serviter Zeova fer en tel preferans. Sirman, i ti a byen pour nou tou swiv konsey Pol pour ‘ouver gran nou leker.’ Wi, annou ouver gran nou leker pour bann konpanyon Kretyen avek diferan lorizin.—2 Korentyen 6:13.

20. Dan ki laspe nou lavi nou devret imit Zeova, nou Bondye ki pa fer preferans?

 ²⁰ Ki swa nou annan privilez pour al viv dan lesyel oubyen lespwar pour viv pour touzour lo later, letan nou pa fer preferans nou ini ansanm konman en troupo, avek en sel Berze. (Efezyen 4:4, 5, 16) Ler nou fer nou mye pour imit Zeova, nou Bondye ki pa fer preferans, sa i kapab ed nou dan nou predikasyon, dan nou fanmiy, e dan kongregasyon. Anfet i ed nou dan tou laspe nou lavi. Konman sa? Lartik swivan pou devlop sa size.

[Not anaba lo paz]

Ki ou pou reponn?

• Konman Zeova ti montre ki i pa fer preferans dan ka Raab ek bann Gibeonnit?

• Ki mannyer Zezi ti montre ki i pa fer preferans dan son lansennyman?

• Kwa ki kapab ed nou sirmont okenn prezidis konsernan ras oubyen kiltir en dimoun?

[Kestyon]

[Portre lo paz 8]

Izrael i konmans konkerir Kanaan

[Portre lo paz 9]

Zezi pa ti ezite pour temwanny avek en madanm Samariten

[Portre lo paz 10]

En renyon piblik dan langaz Amarik, Langleter

[Portre lo paz 10]

Lanmour ki Albert ti annan pour Zeova ti ed li sirmont son prezidis