“I’n konble en Plas vid dan mon Leker”

“MON remersi ou avek tou mon leker pour sa zoli kado ‘Approchez-vous de Jéhovah.’ I’n konble en plas vid dan mon leker—sa nesesite pour santi ki Zeova i kontan e seri mwan. Aprezan, mon santi mwan bokou pli pros avek Zeova ek son Garson byenneme. Mon anvi koz avek tou dimoun konsernan sa liv e donn en kopi tou dimoun ki mon kontan.” Sa i santiman en Temwen Zeova konsernan sa liv 320 paz ki ti sorti dan Lasanble Distrik “Bann Proklanmater Rwayonm devoue” ki ti ganny fer lannen 2002/03. Annou egzamin serten laspe sa nouvo liv e akoz i ti ganny pibliye.

Serten Laspe sa nouvo Liv

Ki sa nouvo liv i kontyen? Tou lenformasyon dan sa de lartik letid dan sa nimero Latour Veyer, e ankor bokou plis keksoz! Sa liv i annan 31 sapit, e sak sapit i apepre longer en lartik letid dan Latour Veyer. Apre lentrodiksyon ek sa trwa premye sapit, sa liv i ganny divize an kat seksyon, en seksyon pour sak kalite prensipal Zeova. Sak seksyon i konmans avek en apersi lo sa kalite. Bann lezot sapit ki swiv i diskite konman ki Zeova i demontre sa kalite. Sak seksyon i kontyen en sapit lo Zezi. Akoz? Bon, Zezi ti dir: “Sa ki’n war mwan in osi war mon Papa.” (Zan 14:9) Vi ki i ti parfetman reflekte Zeova, Zezi i fourni nou avek legzanp vivan bann kalite Bondye an aksyon. Sak seksyon i konklir avek en sapit ki ansenny nou konman pour imit Zeova letan nou pe demontre sa kalite ki pe ganny konsidere. Ler sa nouvo liv pe diskit lo bann kalite Zeova, i fer referans avek tou liv dan Labib.

Sa liv Approchez-vous de Jéhovah i osi annan serten laspe spesyal. Apartir sapit 2, sak sapit i kontyen en bwat ki annan pour tit “Éléments de méditation.” Bann verse ek kestyon pa’n ganny mete konman en revizyon sa sapit. Okontrer, zot in ganny mete la pour ed ou servi Labib pour reflesir oprofon lo sa size. Ou ganny ankouraze pour lir sak verse byen menm. Apre reflesir lo sa kestyon e esey ou mye pour fer en laplikasyon personnel. En tel refleksyon i kapab tous ou leker, ki pou ed ou vin pli pros avek Zeova.—Psonm 19:14.

Bokou resers in ganny fer pour swazir bann portre pour sa liv Approchez-vous de Jéhovah e zot in ganny byen prepare pour kapab ansennyen e motive. I annan diset sapit ki kontyen bann zoli portre lo en paz antye ki montre bann senn dan Labib.

Akoz i’n ganny pibliye?

Akoz sa liv Approchez-vous de Jéhovah in ganny pibliye? Premye lobzektif sa nouvo piblikasyon se pour ed nou arive konn Zeova pli byen pour ki nou ava kapab batir en relasyon personnel ki pli for avek nou Bondye.

Eski ou mazin en dimoun ki kapab benefisye avek sa liv Approchez-vous de Jéhovah, petet en etidyan Labib ouswa menm en frer oubyen en ser inaktif? Me ou, eski ou’n konmans lir sa nouvo liv? Si non, akoz ou pa progranm en letan pour konmans lir li osito posib? Pran letan pour reflesir lo sa ki ou lir. Fotespere ki sa nouvo piblikasyon i ed ou pour vin pli pros avek Zeova Bondye, pour ki ou anons son bon nouvel Rwayonm avek en pli gran lazwa ek devouman!