Ki mannyer pour devlop vre Lanmour

“Lanmour i remed iniversel pour tou problenm; lanmour i lavi.”​—Living to Purpose, par Joseph Johnson, 1871.

KI MANNYER en dimoun i aprann pour annan lanmour? Eski par etidye psikolozi? Par lir bann liv ki dir ki en dimoun i devret fer pour devlop lanmour? Eski par get bann film romantik? Ditou. Premyerman, imen i aprann kontan lezot atraver legzanp ek formasyon zot paran. Si zanfan i grandi dan en latmosfer amikal kot zot vwar zot paran nouri e protez zot, kominik avek zot, e demontre en gran lentere dan zot, zot pou aprann ki savedir lanmour. Zot osi aprann pour devlop lanmour ler zot paran i ansenny zot pour viv dapre bann bon prensip konsernan sa ki byen ek sa ki mal.

Vre lanmour pa zis en lafeksyon oubyen en santiman anler anler. En dimoun ki annan vre lanmour, i pou toultan azir dan sa pli bon fason anver lezot, menm si lezot pa apresye sa ki sa dimoun pe fer a sa moman. Bann zanfan i souvan reazir koumsa ler zot pe ganny disiplinen avek lanmour. Nou Kreater i en legzanp parfe konman pour demontre lanmour pour lezot san mazin son prop lentere. Zapot Pol ti ekrir: “Mon garson, pran o-serye koreksyon ki Senyer i donnen; Pa bezwen dekouraze kan i fer ou bann repros. Parski Senyer i koriz bann ki i kontan, e i [disiplin, NW ] tou sa ki i rekonnet konman son garson.”—Ebre 12:5, 6.

Paran, ki mannyer ou kapab imit Zeova par montre lanmour ou fanmiy? Ki lenportans legzanp ki ou demontre konman en mari ek en madanm i annan?

Ansenny Lanmour par ou Legzanp

Si ou en mari, eski ou atas en gran valer avek ou madanm e tret li avek loner ek respe? Si ou en madanm, eski ou demontre lanmour pour ou mari e donn li ou sipor? Labib i dir ki mari ek madanm i devret kontan e respekte kanmarad. (Efezyen 5:28; Tit 2:4) Ler zot fer sa, zot zanfan i vwar lanmour Kretyen an aksyon. Sa i vreman en bon leson ki kapab enfliyans zot!

Paran i osi promot lanmour kot lakour ler zot swiv bann standar o nivo pour fanmiy dan bann laspe parey divertisman, moralite, lobzektif, ek priyorite. Dan lemonn antye, dimoun in dekouver ki Labib in kapab ed zot en kantite pour etablir bann bon standar pour fanmiy. Zot legzanp i prouve ki Labib i vreman “enspire par Bondye e i itil pour ansennyen, pour  koriz lerer, pour remet drwat, e pour formen pour viv byen selon Bondye.” (2 Timote 3:16) An realite, bokou dimoun i konsider sa bann prensip moral ek gidans ki trouve zis dan Sermon lo Montanny, konman pli bon ki tou lezot.—Matye, sapit 5 ziska 7.

Ler fanmiy antye i les Bondye gid zot lavi e zot atase avek son bann standar, sak manm fanmiy i santi zot pli an sekirite. Deplis, i annan plis posibilite ki zanfan pou devlop lanmour ek respe pour zot paran. Parkont, dan en lakour kot i annan de kalite standar, bann standar ki pa apropriye oubyen ki pa serye, zanfan i kapab ofanse, ankoler e revolte.—Romen 2:21; Kolosyen 3:21.

Me dan ka bann paran tousel? Eski i pou enposib pour zot ansenny lanmour zot zanfan? Pa neseserman. I vre i toultan pli bon ler papa ek manman i travay ansanm pour edik zanfan konsernan lanmour. Kantmenm sa, leksperyans in montre ki ler en paran tousel i annan en bon relasyon avek son zanfan, sa i kapab kouver labsans sa papa oubyen manman dan en serten degre. Si ou en paran tousel, fer zefor pour aplik bann prensip Labib kot ou lakour. Wi, en proverb i dir nou: “Met ou konfyans dan Zeova avek tou ou leker e pa apiy lo ou prop lentelizans. Dan tou ou semen pran li an konsiderasyon, e li i pou fer drwat tou ou santye.” Sa i aplik osi pour paran letan zot pe elve zot zanfan.—Proverb 3:5, 6; Zak 1:5.

I annan bokou zenn ki’n ganny elve par zis zot papa oubyen manman e ki aprezan pe servi Bondye fidelman dan plizyer milye kongregasyon Temwen Zeova partou dan lemonn. Sa i montre ki bann paran tousel i kapab reisi ansenny zot zanfan konsernan lanmour zot osi.

Ki mannyer tou Dimoun i kapab devlop Lanmour

Labib ti predir ki dan “bann dernyen zour” dimoun pou annan “leker dir.” Savedir dimoun pou napa lafeksyon ki normalman bann manm fanmiy i annan pour kanmarad. (2 Timote 3:1, 3) Toudmenm, menm bann ki’n kapab grandi dan en lanvironnman kot napa lafeksyon i kapab aprann devlop lanmour. Ki mannyer? Par aprann avek Zeova, ki Sours lanmour e ki demontre lanmour ek lafeksyon anver tou dimoun ki al ver li avek tou zot leker. (1 Zan 4:7, 8) En psalmis ti dir: “Si mon manman ek mon papa i kit mwan, Zeova li menm pou resevwar mwan.”—Psonm 27:10.

Zeova i demontre son lanmour pour nou dan bokou diferan fason. Sa i enkli gidans ki Zeova i fourni par mwayen Labib, led lespri sen, ek sipor bann frer ek ser dan lafwa. (Psonm 119:97-105; Lik 11:13; Ebre 10:24, 25) Annou vwar ki mannyer sa trwa provizyon i kapab ed ou pour ogmant lanmour pour Bondye e pour ou prosen.

Gidans enspire par en bon Papa

Pour devlop en relasyon pros avek en dimoun, nou bezwen arive konn sa dimoun byen. Par revel li dan Labib, Zeova i envit nou pour apros avek li. Me i pa sifi pour zis lir Labib. Nou bezwen aplik sa ki Labib i ansenny nou e eksperyans bann byenfe ki sa i anmennen. (Psonm 19:7-10) Dan Izai 48:17 i dir: “Mwan, Zeova, mon ou Bondye, sa Enn ki pe ansenny ou pour ou prop profi, sa Enn  ki pe fer ou mars lo sa semen lo ki ou devret marse.” Napa en dimoun ki pli kontan nou ki Zeova. Pour sa rezon, i enstri nou pour nou prop profi, non pa akoz i anvi priv nou nou liberte atraver bann lareg ek lalwa ki pa neseser.

En konnesans egzakt lo Labib i osi ed nou pour annan plis lanmour pour nou prosen. Sa i akoz laverite dan Labib i ansenny nou pwennvi Bondye lo imen e montre nou bann prensip ki devret diriz nou fason azir avek lezot. Avek en tel lenformasyon, nou annan en bon gidans pour devlop lanmour pour nou prosen. Zapot Pol ti dir: “Mon demande dan mon lapriyer ki zot lanmour i ogmante e vin plis ankor, avek en vre konnesans ek en zizman parfe.” (Nou ki’n met an italik.)—Filipyen 1:9.

Pour montre ki lefe “vre konnesans” i kapab fer lo lanmour, konsider sa laverite fondamantal dan Akt 10: 34, 35: “Bondye pa fer preferans pour personn, me dan nenport ki nasyon tou dimoun ki annan respe pour li e ki fer sa ki byen Bondye i kontan li.” Bondye i egzamin dimoun dapre respe ki zot annan pour li e bon keksoz ki zot fer, me non pa dapre zot nasyonalite oubyen ras. Eski nou osi pa nou devret vwar nou prosen menm parey?—Akt 17:26, 27; 1 Zan 4:7-11, 20, 21.

Lanmour—En Fri Lespri Bondye

Zis parey lapli ki vin zis dan moman apropriye i ede fer en bon rekolt dan plantasyon, lespri Bondye i kapab prodwir bann kalite ki Labib i dekrir konman “fri Lespri,” dan bann dimoun ki aksepte li. (Galat 5:22, 23) Premye dan sa fri i lanmour. (1 Korentyen 13:13) Me ki mannyer nou ganny lespri Bondye? En pli bon fason i atraver lapriyer. Si nou priy pour lespri Bondye, i pou donn nou. (Lik 11:9-13) Eski ou kontinyen “demann” Bondye son lespri sen? Si ou fer sa, alor son fri presye ki enkli lanmour, i devret vin pli evidan dan ou lavi.

Me i annan en lot kalite lespri ki travay kont lespri Bondye. Labib i apel li “lespri dapre lemonn.” (1 Korentyen 2:12; Efezyen 2:2) I en move lenfliyans, e son sours i pa lot ki Satan Dyab “sef lemonn,” ki elwannyen avek Bondye. (Zan 12:31) Zis parey divan i fer monte lapousyer ek salte, pareyman sa lespri i eksit bann move dezir ki detri lanmour e satisfer febles imen.—Galat 5:19-21.

Sa move lespri i antre dan bann dimoun ler zot ekspoz zot avek bann lide pour kontan keksoz materyel, egois, menm bann latitid vyolan, e avek bann move pwennvi lo lanmour ki sitan popiler dan sa lemonn. Si ou anvi devlop plis sa vre lanmour, ou devret byen determinen pour reziste lespri lemonn. (Zak 4:7) Me pa met konfyans dan ou prop lafors. Demann Zeova led. Son lespri, lafors pli pwisan dan liniver, i kapab fortifye ou e fer ou ganny laviktwar.—Psonm 121:2.

 Aprann annan Lanmour avek Led bann Frer ek Ser

Zis parey zanfan i aprann demontre lanmour letan zot eksperyans li kot lakour, nou tou—zenn konman vye—nou kapab devlop lanmour par asosye avek lezot Kretyen. (Zan 13:34, 35) Annefe, enn bann rol prensipal kongregasyon se pour ofer en lanvironnman kot dimoun i kapab “pous kanmarad pour annan lanmour e fer sa ki byen.”—Ebre 10:24.

Sa lanmour ki egziste dan kongregasyon i ganny apresye sirtou par bann dimoun ki’n “fatige e dekouraze” dan sa lemonn kot napa lanmour. (Matye 9:36) Leksperyans in montre ki en adilt ki devlop bann bon relasyon avek lezot, i kapab sirmont bokou move lefe labsans lanmour pandan son lanfans. Alor, i vreman enportan ki tou Kretyen i byen akey bann nouvo ki vin asosye avek zot!

“Lanmour i reste pour touzour”

Labib i dir ki “lanmour i reste pour touzour.” (1 Korentyen 13:8) Ki mannyer sa i posib? Zapot Pol i dir nou: “Lanmour i pasyan, e i bon; lanmour pa zalou ou vant son prop lekor. I pa arogan e i pa fer nanryen ki fer onte. Lanmour pa rod son prop lentere; i pa pran lakoler, e i pa gard rankin.” (1 Korentyen 13:4, 5) I evidan ki sa lanmour i pa zis en keksoz imaziner oubyen en santiman anler anler. Okontrer, sa bann ki pe demontre lanmour i konn bann dezapwentman ek douler lavi, me zot pa les sa bann keksoz detrir zot lanmour pour zot kanmarad. En tel lanmour i vreman “soud tou keksoz parfetman ansanm dan larmoni.”—Kolosyen 3:12-14.

Konsider legzanp en fiy Kretyen aze 17 an ki reste Kore. Ler i ti konmans servi Zeova, son fanmiy pa ti aksepte e i ti bezwen kite reste kot zot. Me olye ankoler, i ti priy lo sa size, e les Parol Bondye ek son lespri enfliyans son fason panse. Apre sa, i ti ekrir son fanmiy souvan e fer zot santi son lafeksyon ki i ti annan pour zot. An retour, son de frer pli aze ti konmans etidye Labib e aprezan zot in batize. Son manman ek pli zenn frer in osi aksepte laverite Labib. Finalman, son papa ki ti opoz severman in sanz son lopinyon li osi. Sa fiy Temwen i ekrir: “Nou tou nou’n marye avek lezot Kretyen e aprezan i annan 23 adorater ini dan nou fanmiy.” Vreman lanmour in ganny laviktwar!

Eski ou anvi devlop vre lanmour e ed lezot pour fer parey? Dan sa ka tourn ver Zeova, li menm ki Sours sa kalite presye. Wi, pran son Parol aker, priy pour lespri sen, e asosye avek bann frer ek ser regilyerman. (Izai 11:9; Matye 5:5) I vreman ankourazan pour konnen ki byento tou mesanste pou fini, e zis sa bann ki demontre vre lanmour Kretyen ki pou reste! Vreman, lanmour i sa keksoz esansyel pour trouv boner ek lavi.—Psonm 37:10, 11; 1 Zan 3:14.

[Portre lo paz 5]

Lapriyer ek letid lo Parol Bondye i ed nou devlop vre lanmour