Rod Sa Ki Byen Dan Tou Dimoun
Rod Sa Ki Byen Dan Tou Dimoun
“Mazin mwan, mon Bondye, pour lebyen.”—NEEMYA 13:31.
1. Konman Zeova i azir dan en bon fason avek tou dimoun?
APRE ennde zour ki letan in reste lour e sonm, nou tou nou kontan pour vwar en zour ansoleye. Nou dan en pli bon limer e nou santi nou pli byen. Pareyman, apre en gran peryod lasesres kot soley in tap vreman for, en pti lapli oubyen menm en lapli toransyel, i anmenn en gran soulazman. Zeova, nou Kreater ki annan bokou lanmour, in kree later dan en fason ki i annan sa kado merveye—letan. Zezi ti atir latansyon lo zenerozite Bondye kan i ti ansennyen: “Kontan zot lennmi e priy pour bann ki persekit zot, koumsa, zot a vin garson zot Papa ki dan lesyel. Akoz i fer leve son soley lo bann ki move parey lo bann ki bon, e i fer tonbe lapli lo bann ki fer dibyen parey lo bann ki fer dimal.” (Matye 5:43-45) Wi, Zeova i azir dan en bon fason avek tou dimoun. Son bann serviter i devret esey imit li par rod sa ki byen dan lezot.
2. (a) Akoz Zeova i azir dan en bon fason? (b) Ki Zeova i obzerve an rapor avek nou reaksyon anver son labonte?
2 Akoz Zeova i azir dan en bon fason? Depi ki Adan ti fer pese, Zeova in toultan rod sa ki byen dan bann imen. (Psonm 130:3, 4) Son plan se ki bann imen obeisan i viv dan Paradi parey ti ete okonmansman. (Efezyen 1:9, 10) Gras a son faver imerite, nou annan lespwar pour ganny delivre dan pese ek lenperfeksyon, atraver sa Semans promiz. (Zenez 3:15; Romen 5:12, 15) Aksepte sa laranzman ki’n ganny fer pour delivre nou, i ouver semen pour nou finalman retourn parfe. En keksoz ki Zeova pe obzerve aprezan se konman nou pou reazir anver son zenerozite. (1 Zan 3:16) I vwar nenport kwa ki nou fer pour demontre nou lapresyasyon pour son labonte. Zapot Pol ti ekrir: “Bondye pa enzis pour li oubliy travay ki zot in fer, ni lanmour ki zot in montre pour li.”—Ebre 6:10.
3. Ki kestyon ki merit nou latansyon?
3 Alor, konman nou kapab imit Zeova par rod sa ki byen dan lezot? Annou vwar larepons pour sa kestyon dan kat laspe nou lavi: (1) dan predikasyon, (2) dan lafanmiy, (3) dan kongregasyon, e (4) dan nou relasyon avek lezot.
Dan Predikasyon
4. Konman ki partisip dan predikasyon i en fason pour montre ki nou pe rod sa ki byen dan lezot?
4 Pour reponn kestyon son bann disip konsernan sinifikasyon parabol dible ek move zerb, Zezi ti eksplike ki plantasyon i reprezant lemonn. Nou ki bann disip Kris konmela, nou rekonnet ki sa i vre kan nou al prese. (Matye 13:36-38; 28:19, 20) Nou predikasyon i enplik fer lezot konn nou lafwa. Lefe ki Temwen Zeova i renonmen pour pres port an port e lo semen, sa i prouve ki nou pe travay dir pour rod tou bann ki pare pour resevwar sa mesaz Rwayonm. Anfet, Zezi ti donn sa lenstriksyon: “Kan zot ariv dan en lavil oubyen en vilaz, rode ki sennla ki pare pour resevwar zot.”—Matye 10:11; Akt 17:17; 20:20.
5, 6. Akoz nou kontinyen revizit bann dimoun kot zot?
5 Kan nou vizit bann dimoun ki pa pe ekspekte nou se zot, nou obzerv zot reaksyon anver nou mesaz. Parfwa nou vwar en dimoun kot en lakour ki pare pour ekoute, me en lot anndan i kriye, “Nou pa enterese.” Sa vizit i termin lanmenm. I vreman regretab pour en dimoun ki opoze oubyen pa enterese enfliyans reaksyon en lot! Alor, ki nou kapab fer pour kontinyen rod sa ki byen dan tou dimoun?
6 Letan nou pou pres ankor dan sa rezyon, nou kapab tonm kot sa lakaz ankor. Sa i kapab donn nou loportinite pour koz direkteman avek sa dimoun ki ti enteronp nou vizit. Mazin sa ki ti arive sa zour, i kapab ede prepar nou. Petet sa dimoun ki ti opoze ti’n fer li avek en bon motif. I ti vreman krwar ki i devret fer sa enn ki pe ekoute aret ekout sa mesaz Rwayonm. Petet i ti’n ganny enfliyanse par bann fo lenformasyon konsernan nou lentansyon. Me sa pa anpes nou kontinyen pres sa bon nouvel kot sa lakour, pour esey koriz sa malantandi san ofans sa dimoun. Nou konsern se pour ed tou dimoun pour ganny en konnesans egzakt lo Bondye. Apre sa, i kapab ki Zeova i atir sa dimoun anver li.—Zan 6:44; 1 Timote 2:4.
7. Kwa ki kapab ed nou pour annan en pwennvi pozitif kan nou apros dimoun dan predikasyon?
7 Lenstriksyon ki Zezi ti donn son bann disip ti osi aplik pour bann fanmiy ki opoze. Eski Zezi pa ti dir: “Mon’n vin met en garson kont son papa, en fiy kont son manman; en belfiy kont son belmer”? Apre i ti azoute: “Ou lennmi pou trouv parmi manm ou prop fanmir.” (Matye 10:35, 36) Parkont, sitiasyon ek latitid dimoun i sanze. En maladi, lanmor dan fanmiy, dezas, troub emosyonnel, ek bokou lezot fakter i enfliyans reaksyon en dimoun anver nou predikasyon. Si nou annan sa panse negatif, ki dimoun ki nou pres avek pou kontinyen pa ekoute, eski nou pe vreman rod sa ki byen dan zot? Akoz nou pa repas kot sa bann lakour en lot fwa, avek lakontantman lo nou figir? I kapab ki nou ganny en reaksyon diferan. Parfwa, se pa zis sa ki nou dir me fason ki nou dir li ki fer sa dimoun reazir diferaman. Priy Zeova avan nou konmans prese, pou sirman ed nou pour annan en pwennvi pozitif e pour prezant sa mesaz Rwayonm dan en fason ki atiran pour tou dimoun.—Kolosyen 4:6; 1 Tesalonisyen 5:17.
8. Ki i kapab arive letan bann Kretyen i rod sa ki byen dan zot fanmiy ki pa Temwen?
8 Dan serten kongregasyon, i annan plizyer dimoun sorti dan en menm fanmiy ki pe servi Zeova. Laplipar-di-tan, perseverans en manm fanmiy aze ki ti annan bon relasyon dan fanmiy oubyen dan son lavi maryaz in kree en ladmirasyon ek respe dan bann ki pli zenn e sa in fer zot sanze. Bokou madanm Kretyen in reisi fer zot msye aksepte laverite “san laparol,” letan zot in swiv konsey zapot Pyer.—1 Pyer 3:1, 2.
Dan Lafanmiy
9, 10. Konman ki Zakob ek Zozef ti rod sa ki byen dan zot fanmiy?
9 Sa relasyon pros ki fer manm fanmiy atase avek kanmarad i en lot domenn kot nou kapab rod sa ki byen dan lezot. Annou tir en leson dan lafason ki Zakob ti azir avek son bann garson. Dan Zenez sapit 37, verse 3 ek 4, Labib i endike ki Zakob ti pli kontan Zozef ki lezot. Akoz sa, bann frer Zozef ti zalou ziska en tel pwen ki zot ti fer plan pour touy zot frer. Me remark latitid Zakob ek Zozef plitar dan zot lavi. Zot tou le de zot ti rod sa ki byen dan zot fanmiy.
10 Kan Zozef ti ansarz manze ler lafanmin ti frap Lezip, i ti byen resevwar son bann frer. Kantmenm i pa ti revel son lidantite deswit, i ti aranz bann levennman pour fer sir ki zot ti ganny swen neseser ek manze pour anmenn pour zot vye papa letan zot retournen. Wi, menm si i ti’n vin viktim zot laenn, Zozef ti azir dan zot lentere. (Zenez 41:53–42:8; 45:23) Pareyman, letan Zakob ti pe al mor lo lili, i ti pronons benediksyon profetik lo tou son bann garson. Menm si zot move aksyon ti fer zot perdi serten privilez, zot tou zot ti ganny en leritaz. (Zenez 49:3-28) Pa Zakob in demontre en zoli legzanp lanmour dirab!
11, 12. (a) Ki legzanp profetik ki montre lenportans pour rod sa ki byen dan nou fanmiy? (b) Ki leson nou aprann atraver legzanp sa papa dan parabol Garson perdi e retrouve?
11 Pasyans ki Zeova ti demontre anver nasyon Izrael enfidel, i fer nou pli byen konpran konman i rod sa ki byen dan son pep. An servan sitiasyon familyal profet Osea, Zeova ti demontre son lanmour dirab. Gomer, madanm Osea, ti’n komet adilter plizyer fwa. Kantmenm sa, Zeova ti dir Osea: “Ale ankor enn fwa. Kontan en fanm ki en lot dimoun in kontan e ki’n komet adilter, parey Zeova in kontan bann garson Izrael menm si zot pe tourn ver lezot bondye e pe kontan gato rezen.” (Osea 3:1) Akoz i ti donn en tel lenstriksyon? Zeova ti konnen ki parmi sa nasyon ki ti’n elwannyen avek son semen, ti annan serten ki ti pou byen reazir anver son pasyans. Osea ti konfirm sa: “Apre bann garson Izrael pou retournen e sirman zot pou rod Zeova zot Bondye, e David zot lerwa. Sirman zot pou vini an tranblan kot Zeova e kot son labonte, dan bann dernyen zour.” (Osea 3:5) Sirman, sa i en bon legzanp pour nou mazinen kan nou pe rankontre difikilte dan lafanmiy. Letan ou rod sa ki byen dan lezot manm fanmiy, omwen ou donn en bon legzanp pasyans.
12 Parabol Garson perdi e retrouve ki Zezi ti rakonte, i fer nou pli byen konpran konman nou kapab rod sa ki byen dan nou prop fanmiy. Sa pli zenn garson ti retourn dan lakour apre ki i ti’n fer fize tou son larzan. Son papa ti pran pitye pour li. Konman ki sa papa ti reazir letan son lene garson ki pa ti’n zanmen kit son fanmiy ti vin konplent avek li? I ti koz avek son lene garson, an dizan: “Mon garson, ou touzour isi avek mwan, e tou sa ki mon posede i pour ou.” Sa papa pa ti pe refize ekout sa ki son garson ti annan pour dir, me i ti pe senpleman konfirm son lanmour pour li. I ti kontinyen: “I tou zis ki nou fete e kontan, akoz ou frer ki ti’n mor i’n revin vivan, i ti’n perdi e i’n ganny retrouve.” Demenm, nou osi nou kapab kontinyen rod sa ki byen dan lezot.—Lik 15:11-32.
Dan Kongregasyon Kretyen
13, 14. Nonm en fason ki nou kapab met an pratik lalwa Royal dan kongregasyon Kretyen.
13 Vi ki nou Kretyen, nou sey met an pratik sa lalwa Royal, lanmour. (Zak 2:1-9) I vre ki petet nou aksepte lezot dan kongregasyon ki zot sitiasyon i diferan avek nou lo plan materyel. Me eski nou pe fer “preferans” baze lo ras, kiltir, oubyen menm larelizyon ki en dimoun ti ladan? Si wi, alor ki mannyer nou kapab pran aker konsey Zak?
14 Akey tou dimoun ki asiste renyon Kretyen, i montre ki nou leker i ouver pour tou dimoun. Kan nou pran linisyativ pour koz avek bann nouvo ki vin dan Lasal Rwayonm, sa i kapab fer zot pli alez e pa kanmi. Anfet, serten ki’n asiste renyon pour premye fwa, i’n fer sa remark: “Tou dimoun ti byen zantiy. Ou a krwar zot tou zot ti deza konn mwan. Mon ti santi mwan byen alez.”
15. Ki mannyer bann zenn dan kongregasyon i kapab ganny ede pour montre en lentere dan bann ki pli aze?
15 Dan serten kongregasyon, apre ki renyon in fini, serten zenn i kapab fer zot pti group anndan oubyen deor, e evite koz avek bann ki pli aze. Konman nou kapab sirmont sa tandans dan en fason pozitif? Premyerman, se bann paran byensir ki bezwen form zot zanfan dan lakour, prepar zot pour renyon. (Proverb 22:6) Petet bann zanfan i kapab responsab pour met pare bann piblikasyon pour ki tou dimoun i ava annan sa ki zot bezwen pour anmenn avek zot dan renyon. Paran i osi dan en pli bon pozisyon pour ankouraz zot zanfan pour partaz ennde panse avek bann ki aze e malad dan Lasal Rwayonm. Kan bann zanfan i annan en keksoz itil pour dir sa bann dimoun koumsa, sa i fer sa bann zenn ganny en satisfaksyon.
16, 17. Ki mannyer bann adilt i rod sa ki byen dan bann zenn dan kongregasyon?
16 Bann frer ek ser pli aze, zot osi zot bezwen montre lentere dan bann zenn dan kongregasyon. (Filipyen 2:4) Zot kapab pran linisyativ pour koz avek bann zenn dan en fason ankourazan. Normalman, serten pwen byen enteresan i ganny devlope dan renyon. Petet nou kapab demann bann zenn si zot in kontan renyon e si i annan okenn pwen partikilye ki zot in apresye e ki ti a kapab ganny aplike. Bann zenn i enportan dan kongregasyon. Zot devret ganny rekonnet pour zot latansyon e ganny felisite pour okenn komanter ki zot fer pandan renyon oubyen okenn partisipasyon dan progranm. Lafason ki bann zenn i travay ansanm avek bann aze dan kongregasyon e lafason ki zot fer bann pti travay kot lakour, pou endike ki zot kapab osi pran bann pli gro responsabilite plitar dan lavi.—Lik 16:10.
17 Par aksepte responsabilite, serten zenn i progrese ziska en pwen kot zot bann kalite spirityel i fer zot kalifye pour bann responsabilite pli enportan. Ler zot annan en keksoz pour fer, sa i kapab osi ed zot rezet bann kondwit bet. (2 Timote 2:22) Sa bann responsabilite i kapab “teste” bann frer ki pe aspir pour servi konman asistan ministeryel. (1 Timote 3:10) Zot partisipasyon volonter dan renyon ek devouman dan predikasyon, ensi ki lentere ki zot montre anver tou dimoun dan kongregasyon, i ed bann ansyen pour vwar si zot annan potansyel pour desarz lezot responsabilite.
Rod sa ki byen dan tou Dimoun
18. Ki latrap an rapor avek zizman ki nou bezwen evite, e akoz?
18 Proverb 24:23 i dir: “I pa byen pour fer preferans letan pe fer en zizman.” Lasazes divin i demande ki bann ansyen i evite fer preferans ler zot pe ziz en keksoz dan kongregasyon. Zak ti dir: “Lasazes ki sorti dan lesyel i premyerman pir, answit i kontan lape, i modere, pare pour met dakor, i ranpli avek pitye ek bon laksyon, san fer preferans e san lipokrizi.” (Zak 3:17) I kler ki kan bann ansyen pe rod sa ki byen dan lezot, zot bezwen fer sir ki zot zizman pa ganny enfliyanse par relasyon oubyen santiman personnel. Psalmis Azaf ti ekrir: “Bondye in stasyonn li dan son lasanble. I ziz dan milye bann bondye [“bann ki parey bondye,” not anba lo paz, pe refer avek bann ziz imen]: ‘Pour konbyen letan ankor zot pou kontinyen ziz dan en fason ki pa zis e fer preferans pour bann mesan?’ ” (Psonm 82:1, 2) Alors, bann ansyen dan kongregasyon i rezet okenn tandans pour fer preferans dan en zafer ki enplik zot zanmi oubyen fanmiy. Dan sa fason, zot prezerv linite dan kongregasyon e zot permet lespri Zeova azir libreman.—1 Tesalonisyen 5:23.
19. Konman nou kapab rod sa ki byen dan lezot?
19 Ler nou rod sa ki byen dan nou bann frer ek ser, nou pe reflekte latitid Pol kan i ti adres kongregasyon Tesalonisyen. I ti dir: “Senyer i donn nou sa lasirans, e nou krwar ki zot pe fer e ki zot pou kontinyen fer sa ki nou’n demann zot.” (2 Tesalonisyen 3:4) Nou pou tant pour les pase defo lezot kan nou rod sa ki byen dan zot. Nou pou rod bann domenn kot nou kapab felisit zot, e byensir nou pou evit sa latitid pour kritike. Ki nou ekspekte avek bann ki annan responsabilite dan kongregasyon? Se ki zot “ganny trouve fidel.” (1 Korentyen 4:2) Fidelite tou nou bann frer ek ser, pa zis bann ki annan responsabilite dan kongregasyon, i fer nou kontan zot. Nou ganny atire anver zot e nou relasyon antre frer ek ser i vin pli solid. Nou annan menm pwennvi ki Pol ti annan anver bann frer dan son letan. Se ki nou bann frer ek ser i ‘travay avek nou pour Rwayonm’ e zot “en gran rekonfor” pour nou. (Kolosyen 4:11) Dan sa fason, nou demontre latitid Zeova.
20. Ki benediksyon bann ki rod sa ki byen dan tou dimoun i gannyen?
20 Sirman, nou eksprim menm santiman avek Neemya dan son lapriyer: “Mazin mwan, mon Bondye, pour lebyen.” (Neemya 13:31) Pa nou kontan ki Zeova i rod sa ki byen dan lezot! (1 Lerwa 14:13) Fotespere ki nou osi nou fer parey dan nou relasyon avek lezot. Sa i ofer nou lespwar pour ganny delivre e viv pour touzour dan nouvo lemonn ki byen pros.—Psonm 130:3-8.
Ki ou pou reponn?
• Akoz Zeova i azir dan en bon fason avek tou dimoun?
• Ki mannyer nou kapab rod sa ki byen dan lezot
• dan nou predikasyon?
• dan nou fanmiy?
• dan nou kongregasyon?
• avek tou dimoun?
[Kestyon]
[Portre lo paz 13]
Malgre ki son bann frer ti ay li oparavan, Zozef ti rod sa ki byen dan zot
[Portre lo paz 14]
Lopozisyon pa anpes nou esey ed tou dimoun
[Portre lo paz 15]
Kantmenm zot ti mal azir dan lepase, tou garson Zakob ti resevwar son benediksyon
[Portre lo paz 16]
Akey tou dimoun ki vin renyon Kretyen