Eski Ou Pe ‘Kontinyen Espere’?
Eski Ou Pe ‘Kontinyen Espere’?
“Ki kalite lavi zot devre viv? Zot devre anmenn en lavi sen e annan respe pour Bondye, letan zot pe esper sa zour, an fezan zot mye pour fer sa zour vin pli vit.”—2 PYER 3:11, 12.
1, 2. Ki legzanp nou kapab servi pour montre ki nou pe ‘kontinyen esper’ zour Zeova?
MAZIN en fanmiy ki pe ekspekte bann envite pour en dinen. Ler pe aprose pour sa bann envite arive. Manman pe fer bann dernyen pti latous lo kote repa. Papa ek zanfan pe fer sir ki tou keksoz i annord. Tou dimoun i ranpli avek leksitasyon. Wi, lafanmiy antye pe esper bann envite avek enpasyans, pour manz sa bon repa e pas en bon letan ansanm.
2 Pour nou Kretyen, nou pe esper en keksoz ki pli enportan ankor. Kwa sa? Nou tou nou pe esper “zour Zeova”! Ziska ki i arive, nou bezwen fer parey profet Mika, ki ti dir: “Se Zeova ki mon pou kontinyen veye. Mon pou kontinyen esper Bondye ki pou sov mwan.” (Mika 7:7) Eski sa i vedir ki nou espere, nanryen fer? Non. I annan bokou travay pour fer.
3. Dapre 2 Pyer 3:11, 12, ki latitid bann Kretyen i bezwen annan?
3 Zapot Pyer i fer nou vwar ki kalite latitid nou devret annan anmezir ki nou pe espere. I dir: “Ki kalite lavi zot devre viv? Zot devre anmenn en lavi sen e annan respe pour Bondye, letan zot pe esper sa zour, an fezan zot mye pour fer sa zour vin pli vit.” (2 Pyer 3:11, 12) Par sa kestyon, Pyer pa ti montre ki i annan dout konsernan ki kalite lavi nou devret viv. Dan son de let enspire, i ti dekrir ki kalite lavi bann Kretyen i bezwen viv. I ti osi konsey zot pour kontinyen viv “en lavi sen e annan respe pour Bondye.” Menm si 30 an ti’n pase depi ki Zezi Kri ti’n donn sa siny ki ti pou endik lafen sa sistenm, bann Kretyen ti bezwen kontinyen reste vizilan. (Matye 24:3) Zot ti bezwen “esper sa zour, an fezan zot mye pour fer sa zour vin pli vit.”
4. Kwa ki enplike dan ‘fer zour Zeova vin pli vit’?
4 Pyer ti dir ki bann Kretyen i bezwen fer “zot mye pour fer sa zour vin pli vit.” I vre ki an realite nou pa kapab ‘fer zour Zeova vin pli vit.’ Deplis, nou pa ni konn “sa zour e sa ler” ki Zezi Kri pou vin egzekit zizman lo lennmi son Papa. (Matye 24:36; 25:13) En liv referans i eksplike ki verb orizinal sa lekspresyon “fer sa zour vin pli vit” i vedir “ ‘azir vit pour fer en keksoz’ e alor i relye etrwatman avek ‘devoue, aktif, e enterese avek en keksoz.’ ” Alors, Pyer ti pe sipliy bann konpanyon Kretyen pour vreman anvi ki sa zour i vini. Zot ti pou fer sa par toultan gard sa zour antet. (2 Pyer 3:12) Nou devret annan menm latitid, la ki sa “gran zour efreyan Zeova” i vreman pros.—Yoel 2:31.
“Anmenn en Lavi sen” anmezir ki nou espere
5. Ki mannyer nou kapab montre ki nou vreman anvi vwar “zour Zeova”?
5 Si nou vreman anvi sirviv zour Zeova, nou pou montre sa par “anmenn en lavi sen e annan respe pour Bondye.” Sa lekspresyon “anmenn en lavi sen” i kapab fer nou mazin sa konsey ki Pyer ti donnen: “Fer konman bann zanfan obeisan, pa bezwen les zot bann dezir ki zot ti annan, kan zot ti ankor dan linyorans, kontrol zot. Parey Bondye ki’n apel zot i sen, zot osi, vin sen dan tou zot kondwit. Annefe, Lekritir i dir, ‘Vin sen parey mwan mon sen.’ ”—1 Pyer 1:14-16.
6. Ki nou bezwen fer pour nou anmenn en lavi sen?
6 Pour annan en lavi sen, nou bezwen gard nou prop fizikman, mantalman, moralman, e spirityelman. Eski nou pe prepar nou pour “zour Zeova” par gard nou prop konman bann dimoun ki port non Zeova? I pa fasil pour reste prop ozordi akoz standar moral sa lemonn pe kontinyen deteryore. (1 Korentyen 7:31; 2 Timote 3:13) Eski nou pe kontinyen vwar en gran diferans ant nou standar moral ek sa ki pour sa lemonn? Si i pa leka, alors i annan keksoz ki pa pe mars byen. Eski petet nou prop standar pe ptit-a-pti deteryore li osi , menm si i pli o ki standar lemonn? Si wi, nou bezwen pran bann pa pour koriz sa afen ki nou kapab fer plezir Bondye.
7, 8. (a) Konman nou kapab konmans pa vwar lenportans pour “anmenn en lavi sen”? (b) Ki bann pa ki nou kapab pran pour koriz sa?
7 Avek laparisyon pornografi lo Internet, ki vin direkteman se ou, serten ki oparavan pa ti ganny akse avek sa bann keksoz imoral pe aprezan dekouver sa ki en dokter i apel “en sours loportinite seksyel ki napa limit.” Si nou pe al lo sa bann sit Internet ki sal, definitivman nou pe inyor komannman Labib pour “pa tous nanryen enpir.” (Izai 52:11) Eski dan sa ka nou pe vreman fer nou “mye pour fer sa zour vin pli vit”? Oubyen petet dan nou lespri nou pe anvoy sa zour pour plitar, pour ki nou annan ankor ase letan pour netway nou si nou pe sali nou lespri avek bann keksoz sal? Si nou annan en problenm dan sa domenn, i tre irzan ki nou sipliy Zeova pour ‘fer nou lizye pa get bann keksoz ki napa valer e gard nou vivan dan son semen’!—Psonm 119:37.
8 Lamazorite Temwen Zeova, bann zenn ensi ki bann aze, i fidel avek standar moral Bondye ki tre onivo e zot evit bann tantasyon imoral sa lemonn. Zot pe kontinyen “anmenn en lavi sen” vi ki zot konnen ki sa letan ki nou pe viv ladan i kourt e ki “Zour Senyer pou ariv konman en voler,” parey Pyer in averti. (2 Pyer 3:10) Zot aksyon i prouve ki zot “pe esper sa zour, an fezan zot mye pour fer sa zour vin pli vit.” *
“Annan Respe pour Bondye” anmezir ki nou espere
9. Ki respe pour Bondye i devret motiv nou pour fer?
9 Bann aksyon ki demontre “respe pour Bondye” i osi enportan pour nou gard antet zour Zeova. Devosyon profon oubyen respe pour Bondye i motiv nou pour fer sa ki byen dan son lizye. Ler nou vreman atase avek Bondye, sa i pous nou pour demontre par nou aksyon ki nou annan respe pour li. I oule “ki tou dimoun i ganny sove e ganny konnesans laverite.” (1 Timote 2:4) Bondye “pa oule ki personn i ganny detri, me ki tou dimoun i arive repanti.” (2 Pyer 3:9) Alors, pa nou respe profon pour Bondye i devret fer nou fer plis zefor pour ed dimoun konn li e imit li?—Efezyen 5:1.
10. Akoz nou devret met nou an gard kont “larises ki tronp dimoun”?
10 Nou demontre par nou aksyon ki nou annan respe pour Bondye ler nou rod son Rwayonm avan tou. (Matye 6:33) Sa i enplik annan en pwennvi balanse anver bann keksoz materyel. Zezi ti averti nou: “Fer atansyon, lavaris akoz lavi en zonm pa depann lo larises ki i posede.” (Lik 12:15) Kantmenm i pa fasil pour nou krwar ki nou kapab ganny avegle par lanmour pour larzan, remarke ki “traka lavi ek larises ki tronp dimoun” i kapab “touf laparol” Bondye. (Matye 13:22, NW ) Petet i pa fasil pour nou ganny nou dipen. Dan serten rezyon, bokou dimoun i krwar ki zot lavi pou pli byen si zot al dan en pei pli devlope. Zot kapab kit zot fanmiy deryer pour ennde lannen. Menm serten parmi pep Bondye in rezonn koumsa. Kan zot al travay dan en lot pei, petet zot kapab fourni zot fanmiy avek bann keksoz pli modern. Me ki i kapab arive avek spirityalite zot fanmiy ki zot in kit deryer? Lefe ki sef lakour pa la pour byen diriz keksoz dan lakour, eski zot pou annan sa spirityalite ki zot bezwen pour sirviv zour Zeova?
11. Ki mannyer en dimoun ki ti pe travay dan en lot pei ti demontre ki respe pour Bondye i pli enportan ki larises?
11 En Filipino ki ti pe travay Zapon ti aprann laverite dan Labib avek Temwen Zeova laba. Ler i ti aprann konsernan responsabilite ki en sef fanmiy i annan dan Labib, i ti realize ki i bezwen ed son fanmiy pour vin adorater Zeova. (1 Korentyen 11:3) Son madanm pa ti kontan ditou son nouvo lafwa e i ti anvi son msye kontinyen anvoy larzan olye retournen pour vin ansenny zot Labib. Me parski i ti realize ki sa letan ki nou pe viv ladan i kourt e i ti annan gran lentere pour son fanmiy, i ti retourn kot li. I ti ganny rekonpanse pour pasyans ki i ti demontre anver son fanmiy. Avek letan, son fanmiy ti ini dan vre ladorasyon e son madanm ti pran servis aplentan.
12. Akoz nou devret met keksoz spirityel premye dan nou lavi?
12 Nou sitiasyon i kapab ganny konpare avek bann dimoun dan en batiman ki pe pran dife. Eski i ti pou saz pour nou tay taye partou anndan pour sov bann keksoz dan sa batiman so ki pe al grennen? Pa i ti pou pli enportan pour sov nou lavi, lavi nou fanmiy, ek lezot dimoun dan sa batiman? Sa sistenm mesan pe al fini li osi e lavi bann dimoun i an danze. Letan nou realiz sa, definitivman nou bezwen met keksoz spirityel premye e konsantre lo sa travay predikasyon ki sov lavi.—1 Timote 4:16.
Nou bezwen “pir”
13. Dan ki kondisyon nou anvi ganny trouve letan zour Zeova i arive?
13 Pyer ti montre ki nou latitid i enportan anmezir ki nou pe esper sa zour, an dizan: “Mon bann byenneme, an atandan sa zour fer tou zefor posib, pour Bondye trouv zot pir, san defo e dan lape avek li.” (2 Pyer 3:14) Apard sa konsey pour anmenn en lavi sen e annan respe pour Bondye, Pol i fer resorti ki i enportan pour Zeova trouv nou prop par disan presye Zezi. (Revelasyon 7:9, 14) Pour sa posib, en dimoun i bezwen demontre lafwa dan sakrifis Zezi, dedye son lavi avek Zeova, e batize.
14. Pour ganny trouve “pir” oubyen san tas, ki nou bezwen fer?
14 Pyer i sipliy nou pour fer nou mye pour ganny trouve “pir” oubyen san okenn tas. Nou kondwit ek nou personnalite Kretyen i kapab ganny konpare avek en lenz. Eski nou pe fer sir ki sa lenz pa ganny tase avek sa lemonn? Kan nou vwar en tas lo nou lenz, deswit nou sey tir li. Sirtou si sa lenz i enn ki nou byen kontan, nou pou fer tou pour tir sa tas. Eski nou santi parey si nou lenz Kretyen i ganny en tas lo la akoz en defo dan nou personnalite oubyen en fot dan nou kondwit?
15. (a) Akoz bann Izraelit ti bezwen met en franz avek bordir zot lenz? (b) Akoz bann serviter Zeova dan nou letan i diferan avek lezot dimoun?
15 Bann Izraelit ti bezwen “met en franz avek bordir zot lenz” e “pik en pti bordir ble zis parlao sa franz.” Akoz? Pour ki zot mazin komannman Zeova, obeir li, e pour ki zot “vreman sen” devan zot Bondye. (Nonm 15:38-40) Nou ki servi Zeova ozordi, nou diferan avek sa lemonn akoz nou obeir lalwa Bondye ek son bann prensip. Par egzanp, nou gard nou prop moralman, nou annan respe pour disan akoz i sakre, e nou evit tou form idolatri. (Akt 15:28, 29) Bokou dimoun i respekte nou akoz nou byen determinen pour pa sali nou.—Zak 1:27.
Nou bezwen “san Defo”
16. Pour ganny trouve san defo, ki nou bezwen fer?
16 Pyer ti osi dir ki nou bezwen ganny trouve “san defo.” Eski sa i posib? Laplipar-di-tan, en tas i kapab sorti ler ou netway li me i pa leka avek en defo. En defo i endike ki i annan en keksoz mal anndan. Zapot Pol ti konsey bann konpanyon Kretyen an Filip: “Fer tou san okenn konplent ou largiman, pour ki zot a vin zanfan Bondye inosan, san okenn blanm, e san okenn defo dan sa zenerasyon koronpi e visye, kot zot briye konman lalimyer dan lemonn.” (Filipyen 2:14, 15) Si nou ekout sa konsey, nou pou evite konplent oubyen fer largiman e nou pou servi Bondye pour en bon rezon. Nou pou pres sa “Bonn Nouvel Rwayonm” akoz nou kontan Zeova e nou kontan nou prosen. (Matye 22:35-40; 24:14) Deplis, nou pou kontinyen anons sa bon nouvel menm si dimoun an zeneral pa konpran akoz nou volonterman donn nou letan ek zefor pour ed lezot aprann konsernan Bondye ek son Parol, Labib.
17. Si nou swete ganny serten privilez dan kongregasyon, kwa ki devret pous nou pour fer li?
17 Vi ki nou anvi Bondye i trouv nou “san defo,” nou devret egzamin nou motivasyon dan tou sa ki nou fer. Nou’n rezet fason fer bann dimoun sa lemonn, ki fer keksoz pour bann rezon egois. Par egzanp, zot lalit pour ganny larises ek pouvwar. Si nou swete ganny privilez dan kongregasyon, fotespere ki nou toultan annan en bon motivasyon. Nou devret toultan fer li akoz nou kontan Zeova ek lezot. I vreman ankourazan pour vwar bann zonm spirityel anvi servi Zeova ek zot bann konpanyon Kretyen avek lazwa ek limilite. (1 Timote 3:1; 2 Korentyen 1:24) Anfet, bann ki kalifye pour servi konman ansyen i ‘pran byen swen troupo Bondye . . . avek bonn volonte, konman Bondye i oule. Zot pa fer li pour ganny larzan me avek devouman. Zot pa domin lo bann ki’n ganny konfye dan zot responsabilite, me zotmenm, zot vin en model pour troupo.’—1 Pyer 5:1-4.
Nou bezwen “dan Lape”
18. Temwen Zeova i renonmen pour ki bann kalite?
18 Finalman, Pyer i demann nou pour ganny trouve “dan lape.” Pour sa posib, nou bezwen anpe avek Zeova e avek nou prosen. Pyer i met lanfaz lo lenportans “annan en gran lanmour pour kanmarad” e prezerv lape antre nou bann konpanyon Kretyen. (1 Pyer 2:17; 3:10, 11; 4:8; 2 Pyer 1:5-7) Pour prezerv lape, nou bezwen kontan kanmarad. (Zan 13:34, 35; Efezyen 4:1, 2) Nou lanmour ek lape i evidan sirtou kan nou fer nou bann lasanble enternasyonal. Rafal en lasanble ki ti fer Costa Rica an 1999, en vander kot erport ti mekontan akoz bann Temwen lokal ki ti pe akey bann delege ti pe bar son biznes san realize. Me son dezyenm zour, i ti remark lanmour ek lape demontre par sa lakey ki bann Temwen lokal ti donn bann delege menm si zot pa ti konn kanmarad personnelman. Son dernyen zour, sa vander ti zwenn ansanm avek bann Temwen pour akey bann delege e i ti demann en letid Labib.
19. Akoz i enportan pour fer lape avek nou bann konpanyon Kretyen?
19 Si nou pa tro tro senser an sa ki konsern fer lape avek nou bann frer ek ser spirityel, sa i kapab endike ki nou pa pe seryezman esper zour Zeova ek son nouvo lemonn. (Psonm 37:11; 2 Pyer 3:13) Meton nou vwar li difisil pour fer lape avek en serten frer oubyen ser. Eski nou kapab vwar nou pe viv anpe avek li dan Paradi? Si en frer oubyen en ser i annan en keksoz kont nou, nou devret “fer lape” avek li vitman. (Matye 5:23, 24) Sa i enportan si nou anvi anpe avek Zeova.—Psonm 35:27; 1 Zan 4:20.
20. Konman nou kapab montre ki nou pe ‘kontinyen esper’ sa zour?
20 Eski nou menm personnelman nou pe ‘esper sa zour, an fezan nou mye pour fer sa zour vin pli vit’? Nou montre nou gran dezir pour vwar lafen mesanste par reste pir dan sa lemonn imoral. Deplis, nou montre ki nou vreman anvi vwar zour Zeova e viv anba son Rwayonm par demontre atraver nou aksyon ki nou annan respe pour li. Finalman, vi ki nou pe ekspekte viv dan en nouvo lemonn kot lape pou egziste, nou bezwen prezerv lape antre nou depi konmela menm. Par sa kalite latitid, nou montre ki nou pe “kontinyen esper” zour Zeova e nou pe ‘fer nou mye pour li vin pli vit.’
[Not anba lo paz]
^ par. 8 Pour vwar serten legzanp, vwar Latour Veyer le 1 Zanvye, 2000, paz 16, ek Annuaire des Témoins de Jéhovah 1997, paz 51, (tou le de an Angle/Franse).
Eski ou rapel?
• Ki savedir ‘fer nou mye pour fer zour Zeova vin pli vit’?
• Ki mannyer nou kapab montre par nou kondwit ki nou pe “kontinyen esper” zour Zeova?
• Akoz i enportan pour montre par nou aksyon ki nou annan respe pour Bondye?
• Ki nou devret fer pour nou ganny trouve “pir, san defo e dan lape”?
[Kestyon]
[Portre lo paz 11]
Par viv en lavi sen, nou montre ki nou pe “kontinyen esper” sa zour
[Portre lo paz 12]
Pres lo Rwayonm Bondye i en travay ki sov lavi
[Portre lo paz 14]
Anmezir ki nou pe esper zour Zeova, annou prezerv lape antre nou